1 Korɛ̃tɩ 14
14
A ƴɛ̀rʋ nɩr na bɛ wone a nɩ a naaŋmɩn-ƴɛ̀r-manɛ ƴɛ̀rʋ yele
1Nyɩ bɔbr a nɔ̃wfʋ. Nyɩ mɩ̀ bɔbr a maalʋ a Vʋʋrʋ Sõw na tɩrɛ a, baa zuo a za a naaŋmɩn-ƴɛ̀r-manɛ tome maalʋ. 2Bʋ̃ʋ n'ʋ vɛ̃ ʋlɩ sob na ƴɛ̀rɛ ƴɛ̀rʋ nɩr na bɛ wone a, nɩsaalbɛ zie bɛ n'a ʋ ƴɛ̀rɛ ɩ, Naaŋmɩn zie n'a, nɩr za na bɛ wone a ʋ ƴɛ̀rʋ a ƴãw. A Vʋʋrʋ Sõw mɩ́ ƴãw ʋ nɩ yã ʋ manɛ yele nɩsaal yã na kʋ̃ tʋ̃ɔ́ bãw tɔ a. 3Ɛcɛ sob nɛ na ƴɛ̀rɛ naaŋmɩn-ƴɛ̀r-manɛ ƴɛ̀rʋ a, ʋ ƴɛ̀rɛ nɩ a nɩsaalbɛ zie, k'ʋʋ ɩ a bɛ naaŋmɩn-sàw-deb kɛrɛ dɔwlɛ, k'ʋʋ kpaalɩ bɛ, k'ʋʋ mɔwlɩ bɛ. 4Ʋlɩ sob na ƴɛ̀rɛ ƴɛ̀rʋ nɩr na bɛ wone a, ʋ yõ n'ʋ nyɛrɛ a tɔnɛ, ɛcɛ sob nɛ na ƴɛ̀rɛ a naaŋmɩn-ƴɛ̀r-manɛ ƴɛ̀rʋ a, a lãw nɩbɛ za nɛbɛ nyɛrɛ a tɔnɛ.
5Mãa zie a, ɩ̃ tɩ bɔbr'a kɛ́ nyɩ za nãá ƴɛ̀rɛ ƴɛ̀rʋ nɩr na bɛ wone a, ɛcɛ nyɩ ƴɛ̀rɛ naaŋmɩn-ƴɛ̀r-manɛ ƴɛ̀rʋ, alɛ n'a ɩ̃ nɔnɛ zuo. A sob nɛ na ƴɛ̀rɛ ƴɛ̀rʋ nɩr na bɛ wone a, ʋlɛ bɛ mɩ́ wa ír a pɛr a lãw nɩbɛ tʋ̃ɔ́ nyɛ̃ tɔnɛ a, a sob nɛ na ƴɛ̀rɛ a naaŋmɩn-ƴɛ̀r-manɛ ƴɛ̀rʋ a zuo ʋ na. 6Yɛbr i, alɛ ɩ mɛ̃ ɩ̃ wa n a nyɩ nyɛ́b a ƴɛrɛŋa, wa ta ƴɛ̀rɛ ƴɛ̀rʋ nɩr na bɛ wone a, bʋ̃ʋ yel-ɩra n'ʋ ɩ̃ na tɛr a nyɩ zie? A ɩ̃ ƴɛ̀rʋ bɛ wa manɩ yel-sɔwla kãw kʋ̀ nyɩ a, ʋlɛ bɛ wa wa n bãwfʋ kãw a, bɛ ƴɛ̀r naaŋmɩn-ƴɛ̀r-manɛ ƴɛ̀rʋ kʋ̀ nyɩ bɩɩ kʋ̀ nyɩ wulu kãw a, bʋ̃ʋ yel-ɩra n'ʋ ɩ̃ na tɛr a nyɩ zie?
7Lɛ n'a a mɩ̀ ŋmɛ̃ a yielu bome zie. Mɛ̃ à ŋá a, a wele nɩ a korijom kɔkɛɛ bɛ wa yire dẽdeni a, ŋmɩŋmɩn n'a bɛ na bãw ʋlɩ bom a weli-pɛblɛ na pɛblɛ a, bɩɩ a korijom ŋmɩɛrɛ na ŋmɩɛr a? 8A wɩ-pɛblɛ bɛ wa pɛblɩ a wɩ́ɛ ʋ yi vla a, ãa n'ʋ na cɔbrɩ gù a zɛbr? 9Lɛ mɩ̀ n'a a nyɩ zie. A nyɩ nʋɔr wa ƴɛ̀rɛ ƴɛ̀r-bie nɩr na kʋ̃ tʋ̃ɔ́ bãw a, ŋmɩŋmɩn n'a bɛ na bãw a nyɩ ƴɛ̀rʋ pɛr? Nyɩ na dɛ na ƴɛ̀rɛ bɛrɛ vuo pʋɔ. 10A ƴɛ̀r-pɛ́ɛ bɛ tɛr nʋɔr a tẽ-daa zu ɛ, ɛcɛ been kãw za bɛ be be a ƴɛ̀r-bie bɛ tɛr pɛr ɛ. 11Ɛcɛ mãa bɛ wa wone ƴɛ̀rʋ kãw a, ɩ̃ na ɩ n nɩ-bʋla a sob nɛ na ƴɛ̀rɛ a zie, ɛ́ a sob nɛ na ƴɛ̀rɛ a, ɩ nɩ-bʋla a ɩ̃ zie. 12Lɛ n'a, a nyɩɩm mɩ̀, nyɩ na ƴãw fãw bɔbr a Vʋʋrʋ Sõw maalʋ a, nyɩ bɔbr kɛ́ nyɩ kpɛ a al na sõwne a Lãw-yir mɛb ƴãw a naalʋ zuo a za.
13Alɛ so, sob nɛ na ƴɛ̀rɛ ƴɛ̀rʋ nɩr na bɛ wone a, a fɛr'a k'ʋʋ puore tʋ̃ɔ́ páw a ƴɛ̀rʋ á ŋá pɛ́ɛ-íru maalʋ. 14Mãa wa puore ƴɛ̀rɛ ƴɛ̀rʋ nɩr na bɛ wone a, a ɩ̃ tɩɛrʋ mɩ́ sɩrɩ na puore, ɛcɛ a ɩ̃ yã bɛ ɩrɛ bom za ɩ. 15A na ɩ à ŋá a, ɩ̃ ɩ ŋmɩn? Ɩ̃ na puore nɩ nɩ a Vʋʋrʋ Sõw, ɛ́ mɩ̀ puore nɩ a ɩ̃ yã. Ɩ̃ na yiele na nɩ a Vʋʋrʋ Sõw, ɛ́ mɩ̀ yiele nɩ a ɩ̃ yã. 16Bʋ̃ʋ n'ʋ vɛ̃, a Vʋʋrʋ Sõw yõ wa n'ʋ ƴãw fʋ puore yãanɩ puoru a, ŋmɩŋmɩn n'a a lãw pʋɔ nɩ-zawlɛ na ƴãw «Amɛn» sɔw a fʋ yãanɩ puoru, bɛ na bɛ bãw a lɛ fʋ na yere a? 17A fʋ yãanɩ puoru saa vɩɛl yaga za a, ɛcɛ a fʋ tɔ sob bɛ nyɛ̃ maalʋ a pʋɔ ɩ.
18Naaŋmɩn so yãanɩ, ɩ̃ na ƴɛ̀rɛ ƴɛ̀rʋ nɩr na bɛ wone a zuo a nyɩ za a. 19Ɛcɛ a lãw nɩbɛ sɔgɔ, ɩ̃ mɩ́ nyɛ̃ na ƴɛ̀r-bie anũu na tɛr wob a nɩbɛ zie, ɩ̃ na na ƴɛ̀r wul'ɩ bɛ a, a sa ƴɛ̀r-bie tùr-pie (10 000) ɩ̃ na na ƴɛ̀r'ɩ ƴɛ̀rʋ nɩr na bɛ wone a.
20 Yɛbr i, nyɩ ta tɛr bibi-yã a yele bãwfʋ ƴãw ɛ. Nyɩ ɩ bibiir a yel-faa maalʋ ƴãw, ɛcɛ a yele bãwfʋ ƴãw a, nyɩ ɩ nɩ-bɛrɛ. 21Bɛ sɛb'ɩ à ŋá a Naaŋmɩn wulu sɛbɛ pʋɔ:
«A Sore yel'a:
nɩbɛ na ƴɛ̀rɛ ƴɛ̀r-yoru a nɛbɛ
ɩ̃ na ƴãw bɛ ƴɛ̀r a nɩ-bʋʋrɛ bɛ ŋa zie,
nɩ-sãanbɛ nʋɔr'ʋ ɩ̃ na ƴɛ̀r'ɩ a bɛ zie,
ɛ́ a lɛ mɩ̀ a, bɛ cãà kʋ̃ bɛr wõ a ɩ̃ ƴɛ̀rʋ ɛ#14:21 Nyɛ̃ Ɩza 28.11-12..»
22A na ɩ à ŋá a, a ƴɛ̀rʋ nɩr na bɛ wone a maalʋ bɛ ɩ bãwfʋ a naaŋmɩn-sàw-dierbɛ ƴãw ɛ, ʋ ɩ n bãwfʋ a naaŋmɩn-bɛ-sàw-dierbɛ ƴãw. A naaŋmɩn-ƴɛ̀r-manɛ maalʋ ʋl a, ʋ bɛ ɩ bãwfʋ a naaŋmɩn-bɛ-sàw-dierbɛ ƴãw ɛ, ʋ ɩ n bãwfʋ a naaŋmɩn-sàw-dierbɛ ƴãw.
23Mɛ̃ à ŋá a, alɛ ɩ mɛ̃ a Lãw-yir nɩbɛ za ɓã n taa, ɛ́ bɛ za ƴɛ̀rɛ ƴɛ̀rʋ nɩr na bɛ wone a, a nɩ-zawlɛ bɩɩ a naaŋmɩn-bɛ-sàw-dierbɛ wa kpɩɛr a, bɛ kʋ̃ tɩɛr kɛ́ nyɩ yarɛ na ɩ? 24Ɛcɛ, bɛ za nɩ̃ɛ wa ƴɛ̀rɛ naaŋmɩn-ƴɛ̀r-manɛ ƴɛ̀rʋ, ɛ́ naaŋmɩn-bɛ-sàw-diere bɩɩ nɩ-zawla wa kpɛ a, ʋ na nyɛ̃ nɩ a ʋ sãwna bɛ za na yere a, nɩ a ʋ yele bɛ za na bãwnɛ a. 25A ʋ pʋ-tɩɛr-sɔwla na sãá na. Ʋ na lo n tẽw vɔblɩ muru, ʋ na puore nɩ a Naaŋmɩn nɩ ʋ tʋɔra-siwru ɛ́ yere kɛ́ a Naaŋmɩn sɩrɩ na be a nyɩ sɔgɔ.
Nyɩ ta mɩ́ bʋ̀nɛ ɩrɛ a nyɩ lãw pʋɔ ɩ
26Yɛbr i, a na ɩ à ŋá a, ɩ̃ ɩ ŋmɩn? Nyɩ na mɩ́ wa ɓã taa a, a nyɩ kãw na mɩ́ tʋ̃ɔ́ na yiele yielu, kãw tɩrɛ wulu bɩɩ yel-sɔwla kãw, kãw ƴɛ̀rɛ ƴɛ̀rʋ nɩr na bɛ wone a ɛ́ íre a pɛ́ɛ. Ɛcɛ à á ŋá za a, a ɩrɛ a lãw ʋ kɛrɛ. 27Nyɩ mɩnɛ wa ƴɛ̀rɛ ƴɛ̀rʋ nɩr na bɛ wone a, bɛ ɩ nɩbɛ ayi, bɛ ta zuo nɩbɛ ata ɩ, ɛ́ ŋa mɩ́ ƴɛ̀r, ɛ́ kʋ̀ ŋa ʋ ƴɛ̀r, ɛ́ nɩr be be íre a pɛ́ɛ. 28Nɩr bɛ wa ka be na íre a ƴɛ̀rʋ nɩr na bɛ wone a pɛ́ɛ a, a sob nɛ na ƴɛ̀rɛ a ƴɛ̀rʋ á ŋá a, ʋ zɩ̃ gbili a lãw pʋɔ, ʋ ƴɛ̀rɛ nɩ ʋ tʋɔra ɛ́ ƴɛ̀rɛ nɩ a Naaŋmɩn. 29A naaŋmɩn-ƴɛ̀r-manɛ ƴɛ̀rʋ ƴãw a, nɩbɛ ayi bɩɩ ata mɩ́ ƴɛ̀rɛ, ɛ́ a ŋmaarɛ jiele a bɛ ƴɛ̀rʋ. 30Nɩr kãw na be a lãw pʋɔ wa páw yel-sɔwla kãw bãwfʋ a, a fɛr'a k'aa ʋlɩ sob na tɩ ƴɛ̀rɛ a, ŋmãa a ʋ ƴɛ̀rʋ bɛr. 31Nyɩ za na tʋ̃ɔ́ na ƴɛ̀rɛ naaŋmɩn-ƴɛ̀r-manɛ ƴɛ̀rʋ, ɛcɛ, nyɩ ƴɛ̀rɛ lɩɛrɛ taa, k'aa nɩbɛ za tʋ̃ɔ́ nyɛ̃ wulu nɩ mɔwlʋ. 32A naaŋmɩn-ƴɛ̀r-manɛ so a naaŋmɩn-ƴɛ̀r-manɛ tɩɛrʋ na ƴãw ʋ ƴɛ̀rɛ a. 33Bʋ̃ʋ n'ʋ vɛ̃, Naaŋmɩn bɛ ɩ bʋnɛ-ɩrɛ Naaŋmɩn ɛ, ʋ ɩ n ƴã-ɓaarʋ Naaŋmɩn.
Mɛ̃ a lɛ a na ɩrɛ a kɩrɩta-nɩbɛ Lãw-yie za pʋɔ a, 34a pɔwbɛ, bɛ mɩ́ zɩ̃ gbili a nyɩ lãw pʋɔ: a bɛ tɛr sɔ́r kɛ́ bɛ de ƴɛ̀rʋ a be ɩ. Mɛ̃ a lɛ a Naaŋmɩn wulu na bin a, a fɛr'a kɛ́ bɛ mɩ́ tɛr nʋɔr-sàwfʋ ɛ́ zɩ̃ gbili. 35Bɛlɛ wa bɔbr kɛ́ bɛ bãw yel kãw pɛr a, bɛ̃ɛ sowri a bɛ sɩr a yir. A bɛ sɛw kɛ́ pɔw ƴɛ̀rɛ a nyɩ lãw pʋɔ ɩ. 36Nyɩɩm zie n'a a Naaŋmɩn ƴɛ̀rʋ tĩ bɩɩ? Nyɩɩm tɛwr nɛbɛ páw ʋ bɩɩ? 37Nɩr wa tɩɛr k'ʋʋ ɩ n naaŋmɩn-ƴɛ̀r-manɛ bɩɩ k'ʋʋ tɛr'ɩ Vʋʋrʋ Sõw maalʋ kãw a, a fɛr'a k'ʋʋ nyɛ̃ Sore nɔ-ƴãwna a sɛbrʋ á ŋá ɩ̃ na kʋ̀rɛ nyɩ a pʋɔ. 38Nɩr bɛ wa nyɛ̃ Sore nɔ-ƴãwna a pʋɔ a, a wul'a kɛ́ Naaŋmɩn mɩ̀ bɛ bãw ʋ ɛ.
39A na ɩ lɛ a, yɛbr i, nyɩ bɔbr kɛ́ nyɩ ɩ naaŋmɩn-ƴɛ̀r-manbɛ, ɛ́ ta diwr ƴɛ̀rʋ nɩr na bɛ wone a bɛrɛ ɩ, 40ɛcɛ a za a, a mɩ́ ɩrɛ mɛ̃ a lɛ a na sɛw a, ɛ́ ta bʋ̀nɛ ɩrɛ ɩ.
Đang chọn:
1 Korɛ̃tɩ 14: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.