Lyfr y Psalmau Rhagymadrodd.
Rhagymadrodd.
Y brif ystyriaeth a’m hannogodd i’r gorchwyl o gyfieithu a chyfansoddi ’r Psallwyr o’r newydd ar fesur cerdd, ydoedd y diffyg amrywiaeth mesurau sydd ynghyfansoddiad rhagorol yr Arch-dïacon Prys: teimlid fod y diffyg hwn yn rhwystr mawr i ganiadaeth Psalmau mewn cynnulleidfaoedd; a diben yr ail gyfansoddiad hwn ydyw dwyn Psalmau Dafydd i arferiad mwy cyffredinol ynghymmanfaoedd mynydd Sïon. Amcanwyd y gwaith, nid i gael ei arferyd yn lle ’r hen gyfieithiad, ond yn hytrach i fod yn gydymaith iddo.
Ymgedwais mor ofalus ag y gallwn at ystyr lythyrennol yr iaith wreiddiol; ac ni chynnygiais wneuthur dim o’r hyn a elwir ysprydoli neu efangyleiddio Psalmau Peraidd Ganiadydd Israel; oblegid y maent yn ddigon ysprydol, efangylaidd, a Christionogol fel y maent. Pe buaswn, trwy gyfansoddiad esponiadol, yn ceisio eu dwyn yn nes at iaith y Testament Newydd, yr oeddwn yn ofni y buaswn yn cyfyngu yn ormodol ehangder eu hystyr hwy. A chan na roddwyd i ni lyfr o Psalmau yn y Testament Newydd, iawn yw barnu ddarfod bwriadu Psalmau Dafydd i gael eu harferyd yn gystal yn yr Eglwys Gristionogol ag yn yr Eglwys Iuddewig.
Dosperthais y Psalmau hwyaf yn amryw rannau, er mwyn hwylysdod i’r cantorion: a phan fyddo ansawdd y testun neu’r matter yn newid yn yr un Psalm, gwnaed yn achlysurol gyfnewidiad yn y mesur hefyd. Gofalwyd na ddefnyddid ond y mesurau hynny yn unig ag sy’n fwyaf syml a chyffredin.
Parodd Esgobion Cymru i’r cyfieithiad hwn gael ei chwilio a’i brofi gan wŷr dysgedig, cymmwys i’r gorchwyl, yn eu gwahanol Esgobaethau; ac ar hynny hwy a ddatganasant eu caniattâd ar iddo gael ei arferyd yn y cyfryw gynnulleidfaoedd ag a ddewisent ei ddefnyddio.
Ac yn awr nid oes gennyf ond cyflwyno’r gwaith i genedl y Cymry, yr hyn yr wyf yn ei wneuthur gyd â gostyngeiddrwydd a gwylder; gan weddïo ar iddo fod, dan fendith y nef, yn adeiladaeth i’w ffydd, ac yn gymmorth i’w defosiwn.
Amlwch, Mai 1, 1850.
Đang chọn:
Lyfr y Psalmau Rhagymadrodd.: SC1850
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Y Psallwyr gan y Parch. Morris Williams (Nicander). Cyhoeddwyd gan H. Hughes, Llundain 1850. Cafodd y testun ei ddigideiddio gan Gymdeithas y Beibl yn 2021.