Biểu trưng YouVersion
Biểu tượng Tìm kiếm

Luqa 1

1
TIWIT D TEMMEḌRIT N ƸISA
1.1-4.13
Mafol tt wektab injil tah
1Eɲa Teofiles, eggeten wi eǧmeynén éd ekteben isǎlan n awa iǧen ǧérénɣ, 2hund awa hasn tn eǧen imašhaden wi tn eneynén s téṭṭawén nsn émér héndɣ d eǧen s tizaret. Wiɣ entenéḍ a yǎmosen imawayen n Awal n Yaḷḷah. 3Fol awén, aked nk, édét eknéɣ ǎgemay i isǎlan win tizaret, teǧǧeh ahi enniyet n éd tn ektebeɣ s emmek was tn elmedeɣ baš éd hak tn amleɣ s iyyen iyyen, eɲa Teofiles, 4baš éd tsellekened tidet n tifér ti telmeded.
Iǧa ǎngelos isǎlan fol tiwit tan Eḥya wan ǎnesselmaɣ
5Dɣ ezzeman wa dɣ yǎmos Hérodes ǎmǎnokal n ǎkal n Yehudiya, illé amɣar n imerubay iyyen iǧan isem Zakariya, elant kél Abya. Hennis isem ennét Elizabét telét tawsit iyyet n dg Harun. 6Essin éssen olaɣen dat Yaḷḷah, eknan ǎlekam i elḥaq d elwaṣiya tin Émeli. 7Beššan wr elén arrawen, édét Elizabét tǎmeǧǧaǧrut, essin éssen weššaren daɣ.
8Ahel iyyen, itag Zakariya eššeɣel ennét dat Yaḷḷah édét tewaḍ tn-d meléla nsn enta d winnét. 9Hund awa tenna elɣada tan imerubay, eǧen iseɣéren, yeqqel folas émér n éd yeǧǧeh dɣ Éhen wa Heddigen n Émeli, éd ds yeǧ ikrora. 10A yekka Zakariya isikrurut, ǎddunet emdan timihuden dɣ ténéré.
11Émér héndɣ yos-d ǎngelos iyyen n Émeli dat Zakariya, yebded aɣil wan aɣil n elmejmer wan ikrora. 12As-t yeney Zakariya, yeǧa tǎremméq mǎqqeret ezzar yeksoḍ hullan. 13Beššan yenna has ǎngelos : « Wr teksoḍed, Zakariya, Yaḷḷah yesla i awa tettered : hennik, Elizabét, éd tekreh arraw, eǧ as isem Eḥya. 14Éd key-d tas tǎdǎwit mǎqqeret, ǎddunet aggotnén éd eddewén fol tiwit ennét. 15Edét éd yumas imaqqeren dat Émeli. Wr éd isas elboẓa ula a yǎmosen tésesé texmaret wl iyyet. Déndɣ d éd yeǧǧeh tesa n mas, éd yeṭker Unfas Heddigen. 16Éd yer Israyiliten ǎǧǧotnén dɣ ǎbǎreqqa n Émeli, Messineɣ nsn. 17Éd yeglâ dat Émeli s eṣṣahet d unfas win ennebi Eliya, baš éd iẓuheẓ ulawen n abbaten d meddansn ; baš éd-d isuɣel wi efelnén ǎbǎreqqa, éd tn-d yer s tayetté ta karrehen ǎddunet wi elenén udem dat Yaḷḷah ; hund awéndɣ éd isebded ǎddunet ojadnén i Émeli. » 18Yenna Zakariya i ǎngelos : « Menék awa hé eǧeɣ éd elmedeɣ as tidet a tgannéd ? Édét nk amɣar a ǎmoseɣ, henni aked enta weššar. » 19Yenna has ǎngelos : « Nk Jibril wa ibaddeden dat Yaḷḷah, ǎméheleɣ-d ɣork, éd hak siwleɣ, éd hak elleɣuɣ isǎlan wiɣ n elxér. 20Awah tidet a hak ennéɣ, tidet hé tetbetet dɣ émér ennét ; beššan wr hi teflésed, fol awén éd yeṭṭef émi ennek, ǎbas teddobéd awal ar émér héndɣ. »
21Émér héndɣ, ǎddunet eqqalen i Zakariya, ǎkunen folin yeqqim-in a yeǧǧén dɣ Éhen wa Heddigen. 22As zernah yeǧmeḍ-d, wr yeddobet éd hasn isiwel, elmeden as yemun as-d heret iyyen dɣ éhen wanǧam. Yeǧa sn tǎloǧamt beššan yendar as awal.
23Adih as yesmenda Zakariya iheḍan ennét n ǎƹebad, yeqqel tǎɣǎhamt ennét. 24Okeyen iheḍan, tessimrew Elizabét. Teffer awén semmoset tlil. Tenna dɣ iman ennét : 25« Awah ahi yeǧa Émeli : as foli yesres ǎsewaḍ ennét, yekkes ahi teɣaššimt ta eléɣ ǧér ǎddunet. »
Iǧa ǎngelos isǎlan fol tiwit tan Ƹisa
26As okeynet seḍiset tlil, yesséwey Yaḷḷah ǎngelos ennét Jibril s taɣremt iyyet dɣ ǎkal n Jalila, teǧat isem Ennaṣira, 27ɣor tǎmawaṭ iyyet teǧat isem Meryem, teggibbel i Yusef. Yusef wah, aheya n ǎmǎnokal Dawud. 28Yeǧǧeh-in ds ǎngelos, yenna has : « Esselam folm ! Km ta telet tǎhanint mǎqqeret n Émeli wa dm yeddéwen, teboreked ǧer téḍéḍén emdanet. » 29Tǎkun Meryem hullan fol awa has yenna, wr tessén elmeƹna n ǎseslam wah. 30Yenna has ǎngelos : « Wr teksoḍed, Meryem, édét Yaḷḷah yesres folm tǎhanint ennét. 31Adih éd tsimrewed, éd tekrehed arraw, éd has teǧed isem Ƹisa. 32Éd yeqqel imaqqaren, éd has itahawal Ag Ǎmaṭkal. Éd-t yekf Émeli Yaḷḷah eṭṭebel wan tis Dawud, 33éd imnukel ar abedǎh fol iheyawen n Yaƹqub, temenukela ennét wr éd temmendu. » 34Tenna has Meryem : « Man emmek n awén ? Edét nk wr ezzéyeɣ médden ?” 35Yenna has ǎngelos : « Unfas Heddigen éd-d yeres folm d eṣṣahet tan Ǎmaṭkal éd km yewer hund télé. Fol awéndɣ arraw wa yeqquddesen hé yiwin, éd i has itahawal Ag Yaḷḷah. 36Ekid, aked wlt mam Elizabét, dɣ tewehré ennét tessimrew, enta tas itahawal tǎmeǧǧaǧrut, teǧǧeh tallit ennét tan seḍiset. 37Edét ula indaren i Yaḷḷah. » 38Tenna has Meryem : « Taklit n Émeli a ǎmoseɣ, yeǧét awas i tennéd. » Ifel tt ǎngelos émér héndɣ.
39Adih tenker Meryem dɣ iheḍan windɣ, tegla terored, tekka aɣrem iyyen dɣ tidreɣén n ǎkal wan Yehudiya. 40Teǧǧeh tǎɣǎhamt tan Zakariya, tesseslem Elizabét. 41Adih déndɣ d tesla Elizabét awal wan Meryem, tofrey i arraw ennét yeggad s tǎdǎwit dɣ tesa ennét. Émér héndɣ yeṭker tt Unfas Heddigen has yeswennen awah, 42teṭkel Elizabét emesli ennét, tenna :
« Yekfim Émeli elbaraka ennét ǧer téḍéḍén emdanet,
elbaraka ennét tella fol arraw wa ihen tesa ennem !
43Ma ǎmoseɣ as hi-d tas mas n Émeli-hin ? 44Édét, ekid, émér wéndɣ d-esléɣ i ǎseslam ennem, arraw wa ihan tesa hin yegged s tǎdǎwit. 45Tengeḍ-am km ta teflaset édét éd yetbet awas ham yenna Émeli !”
46Dédih tenna Meryem :
« S enniyetin, éd simɣereɣ Émeli,
47ulin yeddiwet fol Yaḷḷah, emaɣlasin,
48édét yesres foli akeyad ennét,
nk ta wrt tǎmos ar taklit ennét.
Edét mn dimaɣ ar abedǎh,
ayt Adem, éd hi gannen : tengeḍ am,
49édét Ǎneddabu yeǧa ahi a yeggén n tihusay.
Enta was isem ennét yeqquddes,
50yǎmos tamella i wi-t ekṣoḍnén
dɣ iwetyan ikét nsn ;
51yessekna terna n ǎfus ennét :
yezmezzey ǎddunet wi yeṭker ettekebbor dɣ ulawen nsn.
52Yesres imenokalen d temenukela nsn,
yeṭkel wi meḍruynén.
53Yeɣmer wi yeŋɣa laẓ,
yesɣer wi eɣmernén.
54Yellil i Israyil, wa yǎmosen akli ennét :
wr yettuwet tamella
tas yenna éd tt yekf i abbaten nnɣ,
55Ibrahim d iheyawen ennét, ar abedǎh. »
56Teqqim Meryem ɣor Elizabét ɣor keraḍet tlil, ezzar teqqel ihenan ennét.
Tiwit tan Eḥya
57Yéweḍ émér wan térwa tan Elizabét, tekreh arraw. 58Inaraǧen ennét d ǎddunet ennét, elmeden tamella ta mǎqqeret has iǧa Émeli, oheren ds tǎdewit. 59As okeyen ettam iheḍan ḍeffer tiwit, osen-d éd ezzeyenén arraw, eɣélen éd has eǧin isem n tis, Zakariya. 60Beššan tuǧey asn mas, tenna hasn : « Kela, éd yeǧ isem Eḥya. » 61Ennen as : « Wrt illé ǎwadem wl iyyen dɣ ǎddunet ennem iǧan isem wan Eḥya !” 62Ezzar essestenen s tǎloǧamt tis n arraw, essestenent d isem was yera éd-t yeǧ i rurés. 63Yesseǧmey Zakariya elloḥ wa fol yekteb awah : « Isem ennét Eḥya. » Yeskerebbetten awén. 64Γor déndɣ ǎméren émi d iles win Zakariya, yesnemmer Yaḷḷah yeṭkal awal ennét. 65Inaraǧen emdan eksoḍen, efelen isǎlan édeg wéndɣ eɣleyen tidreɣén emdanet tin ǎkal wan Yehudiya. 66Emdan wi has eslenén, yǎmos asn ettexmima, gannén : « Ma hé yumas arraw waɣ ? » Yemun as yesiwert Émeli ǎfus ennét.
67Zakariya, tis n arraw, yeṭkert Unfas Heddigen, iǧa awal n ennebi, yenna awah :
68« Tebareka Émeli, Messineɣ n Israyil,
wa hin yosen, yennejja ellamet ennét.
69Yesséwey anɣ-d Ǎmaɣlas mǎqqeren dɣ iheyawen n akli ennét Dawud.
70Awén awa yeswenna i ennebiten ennét wi eqqudesnén wan éru :
71Yenna haneɣ éd haneɣ yennej fol ihenǧa nnɣ, d imiksenen nnɣ.
72Yessekna tamella i abbaten nnɣ, ikuttu téséq ennét ta teqquddeset.
73Awén, tahoḍé tas yeǧa Messineɣ i abba nnɣ Ibrahim éd hanɣ tt yekf,
74yenna has éd hanɣ yennej fol ihenǧa nnɣ, éd haneɣ yey éd-t neƹbed wr neksoḍ,
75neqquddes, neẓẓal dats dɣ tǎmeddort nnɣ temda.
76Key, arrawin, éd tumased ennebi n Ǎmaṭkal, édét éd tegled dat Émeli,
éd has zehhuseyed ǎbǎreqqa ennét
77baš éd iselmed elɣelas i ǎddunet ennét s ǎsaruf n ibekkaḍen nsn,
78s tamella n ul n Messineɣ nnɣ.
Hund awéndɣ éd d yas folnɣ yǎmos taffawt n ihokhaken,
79baš éd yeǧ taffawt i wi eqqimen dɣ tihay n éheḍ d dɣ télé n tǎmettant,
éd hanɣ isuman ǎbǎreqqa wan esselamet. »
80Idaggel arraw, ikarreh tayetté. Yeqqim dɣ ikalen win tinariwen ar ahel wa-d yosa ǧér ǎddunet win Israyil.

Đang chọn:

Luqa 1: thv

Tô màu

Chia sẻ

Sao chép

None

Bạn muốn lưu những tô màu trên tất cả các thiết bị của mình? Đăng ký hoặc đăng nhập

YouVersion sử dụng cookies để cá nhân hóa trải nghiệm của bạn. Bằng cách sử dụng trang web của chúng tôi, bạn chấp nhận việc chúng tôi sử dụng cookies như được mô tả trong Chính sách Bảo mậtcủa chúng tôi