GÉNESIS 1
1
I. URAQIN QALLTAPA, JAQIN JAKAÑAPAN QALLTAPA
(1—11)
Diosan luratanakapa
1Taqi kunan qalltäwipanxa Diosax alaxpacha, akapacha luräna. 2Aka uraqix jan uñtani ch'usakïnwa, taqi manqha ch'amakanakax umakamakïnwa, Diosan ajayupasti uma patxan unxtäna.
3Diosasti sänwa: “Qhanax utjpan”#1.3 2 Co 4.6. Jn 1.1-4. sasa.
Qhanasti ukspachaw utjxäna. 4Diosax qhanan wali sumätap uñjasinxa, qhanxa ch'amakat jaljtayäna, 5ukatsti qhanarux “uru” sutimpiw uchäna, ch'amakarusti “aruma” sutimpiw ucharakïna. Ukhamaw mayïr urux phuqhasïna.
6Ukxarux Diosax sarakïnwa: “Umanakar jaljtayirix utjpan, ukhamat umanakan payar jaljtañapataki” sasa. 7Ukatsti ukhamapunïnwa. Diosasti umanak jaljtayir uchäna, ukhamat mä chikat uman aynachankañapataki, mä chikat umasti alayankañapataki. 8Diosasti uka jaljtayatarux “alaxpacha” sutimpiw uchäna. Ukhamaw payïr urux phuqhasïna.
9Ukatsti Diosax sänwa: “Alaxpachat aynachankki uka umanakax mayawjar tantacht'aspan, ukhamat wañan uñstañapataki” sasa. Arsutapasti ukhamapuniw phuqhasïna.#1.9 Job 38.8-11; Sal 104.6-9; Pr 8.27-30; Jer 5.22. 10Diosasti wañarux “uraqi” sutimpiw uchäna, tantachat umanakarusti “lamar quta” sutimpiw ucharakïna. Diosax taqi kunan wali sumätap uñjasinxa, 11sänwa: “Uraqinxa kunayman alinak utjpan, jathanak churir alinaka, ukhamarak achu churir quqanakasa” sasa. Arsutapasti ukhamapuniw phuqhasïna. 12Uraqinxa kunayman alinakaw jilantäna: Jathanak churir alinaka, ukhamarak achunak churir quqanaka. Diosasti taqi kunan wali sumätap uñjäna. 13Ukhamaw kimsïr urux phuqhasïna.
14-15Ukatsti Diosax sarakïnwa: “Urumpi arumampi yaqhachañatakix alaxpachan qhanirinakax utjpan, uka qhanan pachanaka, urunaka, maranak chimpjañapataki, ukhamarak alaxpachatpach aka uraqir qhananiñapataki” sasa. Arsutapasti ukhamapuniw phuqhasïna. 16Diosasti pä jach'a qhanirinak luräna, intix urun qhanañapataki; phaxsisti aruman qhanañapataki. Warawaranaksa lurarakïnwa. 17Diosasti uka qhananakxa alaxpacharuw usküna, 18urusa, arumasa uraqir qhant'aniñapataki, ukhamarak qhanaru ch'amakat yaqhachañapataki. Ukham lurasinsti Diosax ukanakan wali sumätap uñjäna. 19Ukhamaw pusïr urux phuqhasïna.
20Ukxarusti Diosax sarakïnwa: “Umanxa kunayman jakir animalanak utjpan, uraqinxa alayanjam thuqnaqir jamach'inakas utjarakpan” sasa. 21Arsutapasti ukhamapuniw phuqhasïna. Diosasti qutan jakir wali jach'a axsarkay animalanak#1.21 Jach'a axsarkay animalanaka, taqi uka animalanakasti Diosan luratätap uñacht'ayi, ukanakarusti jupaw apnaqaraki. usküna, qutan kunayman jakir animalanakampi, ukhamarak kunayman jamach'inakampi.
Diosasti ukanakan wali sumätap uñjäna. 22Taqi uka animalanak lurkatayna ukanakarusti aka aski arunak arsüna: “Qutanakar phuqhantañkam mirantapxpan, jamach'inakasti taqi akapachar phuqhantañkam mirantapxarakpan” sasa.
23Ukhamaw phisqïr urux phuqhasïna.
24Diosasti sarakïnwa: “Kunayman animalanak aka uraqin utjpan: uywañ animalanaka, pampankir animalanaka, uraqinjam qatatnaqtir animalanaka” sasa.
Arsutapasti ukhamapuniw phuqhasïna. 25Diosasti taqi uka animalanak luräna, ukatsti taqi kunansa sumätap uñjäna.
26Ukatsti Diosax sarakïnwa: “Jichhax jaqi lurarakiñäni, uka jaqisti jiwasar uñtasitäniwa, jupaw qutan utjir chawllanakaru, jamach'inakaru, uywañ animalanakaru, pampankir animalanakaru, uraqinjam qatatnaqtir animalanakarus apnaqani”#1.26 Sal 8.4-8(8.5-9); Eclo 17.1-4; Sab 2.23; 10.2. sasa.
27Kunapachatix Diosax jaqi lurkäna ukkhaxa,
jupar uñtasit luräna,#1.27 Jupar uñtasit luräna: Ukax sañ muni, Diosampi parlasiñataki, ukhamarak taqi akapacha jupa lanti apnaqañapataki. Gn 5.1; 9.6; 1 Co 11.7; Stg 3.9. chacha, warmi luräna.
28Ukatsti jupanakarux aski waxt'äwinak churäna:
“Mirantapxam, walja wawanakanïpxam,
aka uraqirusti phuqhantapxam, ukat apnaqapxam;
taqi chawllanakarusa, jamach'inakarusa,
uraqinjam qatatnaqtir animalanakarus apnaqapxarakim” sasa.
29Ukxarusti sarakïnwa: “Jichhax jumanakaruw churapxsma kunayman jathachir alinaka, kunayman achunak churir quqanaka. Taqi ukanakasti jumanakan manq'añamatakïniwa. 30Ukampis pampankir animalanakaru, uraqinjam qatatnaqtir animalanakaru, jamach'inakarusa manq'añapatakix quranak churarakta” sasa.
Arsutapasti ukhamapuniw phuqhasïna, 31Diosasti taqi kuntix lurkatayna ukanakan wali sumätap uñjäna. Ukhamat suxtïr urux phuqhasïna.
Đang chọn:
GÉNESIS 1: AYOPD
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996