Luˇkaꞈ 24
24
Yeˬsuˇ gʼoꞈ dehꞈ laˇ-euˬ
(Maꞈtehˬ 28.1-10; Maˬkuˆ 16.1-8; Yoˇhaˬ 20.1-10)
1Tiˬ jaw laꞈ kʼoeˇ aˇ dahˬ beh-eu nah#24.1 Ka li zaˬ-euˬ Jawˇ nah-ahˇ ehˇ mawꞈ-eu meh. uˬ shawˬ yaw naꞈ-ehˇ, zaˬ miˬ zaˬ kʼoeˇ deuˬ aˬ yawꞈ maꞈ neh lehˬ hmˬ taˬ-euˬ tsiˇ yaw saw deuˬ yuˇ-awˇ, lmˬ bymˇ-ahˇ iˇ-euˬ meh. 2Kʼoeˇ ngeh, lmˬ bymˇ lo kʼahˬ-ahˇ ngawˬ tsoeˬ taˬ-euˬ kʼaˬ lo kʼoeˇ siˬ ngawˬ dzeh-awˇ jaˆ gaˇ ya mawˇ-euˬ meh. 3Ehˇ kʼawꞈ, laꞈ kʼoeˇ uˇ-iˇ haw ngeh, Sahˬpaˬ Yeˬsuˇ-euˬ gʼawˇ mawˇ maˬ jaˆ gaˇ ya mawˇ-euˬ meh. 4Aˬ yawꞈ maꞈ zahˬ leˇ-awˇ jawˇ ngeh, yaw shehꞈ bya-eu mehˬ tsoeˬ dm luꞈ-eu tsawˇ haˬ nyiˬ gʼaˬ aˬ yawꞈ maꞈ-euˬ dawˬ peh yawꞈ luꞈ gaˇ ya mawˇ-euˬ meh. 5Aˬ yawꞈ maꞈ tsawˬ guˆ-iˇ-awˇ, baˬ ba miˇ tsa tuˆ ni awˆ byaˆ gʼeh ngeh, tsawˇ haˬ kʼoeˇ nyiˬ gʼaˬ heu loꞈ-ehˇ ehˇ-eu meh. “Naw maꞈ aˬ jeˬ miˇ neh dehꞈ luꞈ-eu tsawˇ haˬ-ahˇ shiˇ-euˬ deuˬ jawˇ-eu jawˇ duˬ-ahˇ poˆ le teˬ. 6Aˬ yawꞈ heu gaˇ maˬ paˇ jawˇ meh. Aˬ yawꞈ gʼoꞈ dehꞈ laˇ gʼaˬ-euˬ meh. Aˬ yawꞈ Gaˬliˬlehˇ miˇ kʼahˬ-ahˇ jawˇ ngeh, naw maꞈ-ahˇ aˬ joˆ-ehˇ ehˇ nehˬ laꞈ-euˬ gaˇ paˇ noeˬ poˆ haw sheˇ. 7‘Tsawˇhaˬ-euˬ Zaˬmaˇ-ahˇ iˬ baˇ zaˬ deuˬ-euˬ aˬ laꞈ laꞈ kʼoeˇ a nehˬ-awˇ laꞈ yaꞈ kʼoeˇ taˆ bi taꞈ sehꞈ tehꞈ-a. Ehˇ kʼawꞈ, smˬ nah byah laˇ naˇ, Miˬyehˇ aˬ yawꞈ-ahˇ paˇ bi gʼoꞈ dehꞈ laˇ tehꞈ-a’ lehˇ ehˇ nehˬ laꞈ-euˬ maˬ ngeuˇ-a loˇ.”
8Kʼoeˇ ngeh, zaˬ miˬ zaˬ kʼoeˇ deuˬ aˬ yawꞈ neh ehˇ-euˬ dawˬ kʼoeˇ dawˬ-ahˇ noeˬ doˆ leˇ-euˬ meh. 9Kʼoeˇ naˇ, lmˬ bymˇ-ahˇ neh gʼoꞈ leˇ-awˇ, Gʼaˬ kʼehˇ tseˇ nyiꞈ gʼaˬ hawˇ-eu nui deuˬ dawˬ tawˆ luꞈ-ahˇ, gaˇ kawˆ kʼoeˇ deuˬ dzawˇ mehˬ nehˬ-euˬ meh.
10Zaˬ miˬ zaˬ kʼoeˇ deuˬ-aˬ, Maˬliˇ Maˬgaˬdaˬlaˇ, Yoˇaˬnaˆ, Yaˬkoˆ-euˬ aˬ ma Maˬliˇ aˬ ha maꞈ meh. Aˬ yawꞈ maꞈ hawˇ-eu aˬ yawꞈ maꞈ nehˬ-ehˇ jawˇ-eu zaˬ miˬ zaˬ nui deuˬ neh, Gʼaˬ kʼehˇ deuˬ-ahˇ gaˇ kawˆ kʼoeˇ deuˬ dzawˇ nehˬ-euˬ meh. 11Ehˇ kʼawꞈ, maˬ ngeuˇ gaˇ ehˇ-eu nga lehˇ noeˬ-awˇ, Gʼaˬ kʼehˇdeuˬ maˬ jah-a. 12Ehˇ kʼawꞈ, Beˬtuˆluˆ tsawˬ tuˇ-awˇ, lmˬ bymˇ-ahˇ cehˆ gʼeh-euˬ meh. Aˬ yawꞈ awˆ kʼoꞈ-awˇ haw ngeh, mawˇ tawˆ saˬ paˇ tehꞈ-ehˇ jaˆ yaꞈ-euˬ gaˇ ya mawˇ-euˬ meh. Aˬ yawꞈ zahˬ leˇ-awˇ gʼoꞈ-iˇ-euˬ meh.#24.12 Jaˇliꞈ tiˬ paˆ na deuˬ laꞈ kʼoeˇ, gaˬ naˇ yaw zaˬ 12 maˬ ahˇ-a.
Eˇmawꞈ pu-ahˇ iˇ-eu gaˇ ma-ahˇ Yeˬsuˇ doˆ le-euˬ
(Maˬkuˆ 16.12-13)
13Aˬ yawꞈ kʼoeˇ ngeh nah-ahˇ, Yeˬsuˇ mehˬ nah caw teh-euˬ tsawˇ haˬ nyiˬ gʼaˬ, Yeˬluˇsaˬlehˬ meuˬ-ahˇ neh shiꞈ laˇ byah ni kaˬ-eu Eˇmawꞈ pu-ahˇ iˇ-euˬ meh. 14Aˬ yawꞈ nyaꞈ Yeˬsuˇ-ahˇ taꞈ sehꞈ-euˬ gaˇ kawˆ kʼoeˇ deuˬ ja ja-ehˇ iˇ luꞈ-eu meh. 15Kʼoeˇ loꞈ-ehˇ ja ja-ehˇ iˇ luꞈ ngeh, Yeˬsuˇ aˬ yawꞈ nyaꞈ jawˇ gaˇ oe-awˇ, tiˬ kawˆ loꞈ-ehˇ iˇ-euˬ meh. 16Ehˇ kʼawꞈ, aˬ yawꞈ nyaꞈ-euˬ myaˆ nuiˆ dehˬ kaˬ taˬ-euˬ loꞈ-ehˇ pyeuꞈ-awˇ, aˬ yawꞈ-ahˇ maˬ haw siˬ nya-a. 17“Naw nyaꞈ aˬ jeˬ gaˇ kawˆ ja ja-ehˇ cah te” lehˇ Yeˬsuˇ ehˇ nehˬ-euˬ meh.
Aˬ yawꞈ nyaꞈ naˬ leˇ-awˇ, myaˆ pyawˬ nyoeˬ kʼeuˇ ni yawꞈ luꞈ-eu meh. 18Kʼoeˇ naˇ, aˬ yawꞈ nyaꞈ laꞈ kʼoeˇ, Gaˬloˇpaˇ lehˇ myahˇ-euˬ gʼaˬ Yeˬsuˇ-ahˇ ehˇ-eu, “Yeˬluˇsaˬlehˬ meuˬ-ahˇ le-awˇ, nymˬ-mˇ heu myaˆ nah-ahˇ kʼoeˇ gaˇ aˬ jeˬ pyeuꞈ yaꞈ-euˬ gaˇ kawˆ maˬ siˬ nya-eu, nawˇ maˬ ngeuˇ aˬ suˇ gʼaˬ jawˇ nga jeˇ.”
19Yeˬ suˇ ehˇ-eu, “Aˬ jeˬ gaˇ kawˆ-a.”
Aˬ yawꞈ nyaꞈ ehˇ-eu. “Naˬzaˬlehˇ tsawˇ haˬ Yeˬsuˇ-euˬ gaˇ kawˆ tawˇ. Aˬ yawꞈ-aˬ, Miˬyehˇ hawˇ-eu tsawˇ haˬ dawˬ tawˆ luꞈ-euˬ mehˬ shi, mˇ-eu shaˇ-eu ngehˬ-eu tmˇ-eu baoˬ huiˬ dui dui-eu, Miˬyehˇ gʼaˇ duˬ ngehˬ dah-eu tsawˇ haˬ tiˬ gʼaˬ meh. 20Aˬ yawꞈ-ahˇ sehꞈ-eu lehˇ yaˇ kʼaˬ bi daˇ tsehˆ-eu gʼaˇ duˬ, nga maꞈ-euˬ piˇ ma aˬ yuiꞈ deuˬ hawˇ-eu sahˬ paˬ sahˬ ma deuˬ neh a dzeh nehˬ-awˇ, laꞈ yaꞈ kʼoeˇ taˆ bi taꞈ sehꞈ-euˬ meh. 21Aˬ yawꞈ Iˇsaˬleˬlaˆ tsawˇ jeuˬ-ahˇ ka kʼoꞈ tehꞈ-a lehˇ nga maꞈ jah-euˬ ma. Kʼoeˇ uˬ taꞈ, kʼoeˇ loꞈ-ehˇ pyeuꞈ dzeuˇ yaꞈ-euˬ smˬ nah byah laˇ-euˬ meh. 22Kʼoeˇ naˇ, nga maꞈ-euˬ aˇ muˇ-ahˇ taꞈ-eu zaˬ miˬ zaˬ tiˬ deuˬ nga maꞈ zahˬ leˇ paˬ-ehˇ paˇ ja-eu meh. Uˬ shawˬ yaw naꞈ-ehˇ aˬ yawꞈ maꞈ lmˬ bymˇ-ahˇ iˇ-euˬ nga. 23Ehˇ kʼawꞈ, Yeˬsuˇ-euˬ gʼawˇ mawˇ maˬ jaˆ gaˇ mawˇ yaꞈ-awˇ, kʼoeˇ naˇ, yaw sahˇ laꞈ kʼoeˇ mˬ taˆ gʼaˬ kʼehˇ-ahˇ aˬ yawꞈ maꞈ paˇ mawˇ-awˇ, Yeˬsuˇ dehꞈ luꞈ meh lehˇ, mˬ taˆ gʼaˬ kʼehˇ neh aˬ yawꞈ maꞈ-ahˇ ehˇ nehˬ laꞈ-euˬ meh lehˇ ja-eu meh. 24Nga maꞈ-euˬ tsawˇ haˬ tiˬ paˆ na deuˬ lmˬ bymˇ-ahˇ iˇ haw ngeh, zaˬ miˬ zaˬ kʼoeˇ deuˬ neh kʼaˇ ehˇ-euˬ loꞈ-ehˇ jaˆ-awˇ, aˬ yawꞈ-ahˇ maˬ ya mawˇ-aˬ jeˇ.”
25Kʼoeˇ ngeh jawˇ, aˬ yawꞈ nyaꞈ-ahˇ Yeˬsuˇ ehˇ nehˬ-eu, “Dawˇ ga-oˇ, Miˬyehˇ gʼaˇ duˬ ngehˬ dah-eu tsawˇ haˬ deuˬ neh kʼaˇ ehˇ taˬ-euˬ dawˬ tawˆ luꞈ-ahˇ jah tuˆ leꞈ-eu gʼaˇ duˬ, aˇ naˆ naˆ-ehˇ ga-eu nya. 26Ka li aˬ yawꞈ yaw shehꞈ kʼahˬ sehˇ laꞈ kʼoeˇ uˇ leˇ nya ni, kʼoeˇ deuˬ-ahˇ jeˬ huˬ ya daˬ-eu maˬ ngeuˇ-a loˇ.” 27Kʼoeˇ naˇ, aˬ yawꞈ nyaꞈ-ahˇ Yeˬsuˇ ja shaw nehˬ-euˬ meh. Jaˇliꞈ laꞈ kʼoeˇ aˬ yawꞈ-euˬ gaˇ kawˆ kʼaˇ ehˇ taˬ-euˬ yawˬ jeˬ na luꞈ, Moˇseˬ neh boꞈ-euˬ sahˬ boꞈ deuˬ-ahˇ neh dahˬ beh-awˇ, Miˬyehˇ gʼaˇ duˬ ngeh dah-eu deuˬ neh boꞈ-euˬ sahˬ boꞈ deuˬ-ahˇ keuˆ ni, aˬ yawꞈ nyaꞈ gʼoˆ shaw nya ni Yeˬsuˇ ja mehˬ nehˬ-euˬ meh.
28Aˬ yawꞈ maꞈ iˇ luꞈ-eu pu kʼoeˇ pu-euˬ pu dzeˇ iˇ keuˆ ngeh, Yeˬsuˇ-aˬ, mehˬ hu paw paˇ iˇ-eu lehˇ gʼeh-eu meh. 29Ehˇ kʼawꞈ, aˬ yawꞈ nyaꞈ aˬ yawꞈ-ahˇ gʼeu tehˬ-awˇ, “Nga nyaꞈ nehˬ-ehˇ jawˇ yaꞈ-awˬ. Uˬ ciꞈ ciꞈ le-awˇ zahˇ le shaw-iˬ ngaˇ.” lehˇ ehˇ-eu meh. Kʼoeˇ miˇ neh, aˬ yawꞈ nyaꞈ nehˬ-ehˇ iˇ kahˇ laꞈ kʼoeˇ uˇ leˇ-awˇ yaꞈ-euˬ meh. 30Aˬ yawꞈ nyaꞈ nehˬ-ehˇ hawˬ jawˬ jawˬ leˇ ngeh, aˬ yawꞈ kaˬ muˇ yuˇ-awˇ dawˬ ngehˬ gʼeh nehˬ-euˬ meh. Kʼoeˇ naˇ, ngawˬ pyehˬ-awˇ aˬ yawꞈ nyaꞈ-ahˇ biˇ nehˬ-euˬ meh. 31Kʼoeˇ ngeh, aˬ yawꞈ nyaꞈ-euˬ myaˆ nuiˆ pah laˇ-awˇ, aˬ yawꞈ-ahˇ haw siˬ-euˬ meh. Ehˇ kʼawꞈ, aˬ yawꞈ-ahˇ maˬ paˇ ya mawˇ ni byoˆ-iˇ-euˬ meh. 32Aˬ yawꞈ nyaꞈ yaw kaˬ ehˇ-eu, “Gaˇ pehˇ-ahˇ aˬ yawꞈ aˇ nyaꞈ-ahˇ dawˬ ngehˬ cawˬ laˇ-awˇ Jaˇliꞈ gaˇ kawˆ ja mehˬ nehˬ laꞈ ngeh, nui ma laꞈ kʼoeˇ miˬ dzaˬ doꞈ-eu loꞈ-ehˇ gʼeh law miˇ-a ehˇ lawˬ.”
33Aˬ yawꞈ nyaꞈ tiˬ poˆ tehꞈ-ehˇ tsawˬ tuˇ-awˇ, Yeˬluˇsaˬlehˬ meuˬ-ahˇ gʼoꞈ leˇ-euˬ meh. Zaˬ lahˇ tseˇ nyiꞈ gʼaˬ hawˇ-eu nui deuˬ uiˬ leˇ taˬ-awˇ jawˇ gaˇ aˬ yawꞈ nyaꞈ ya mawˇ-euˬ meh. 34“Sahˬpaˬ Yeˬsuˇ gʼoꞈ dehꞈ laˇ-euˬ yaw duˬ baw meh. Aˬ yawꞈ-euˬ gʼawˇ mawˇ Siˇmoˬ-ahˇ bi mawˇ le-euˬ meh” lehˇ, aˬ yawꞈ maꞈ ehˇ luꞈ-eu meh. 35Kʼoeˇ ngeh, gaˇ pehˇ-ahˇ pyeuꞈ laˇ-euˬ gaˇ kawˆ maˬ ehˇ, kaˬ muˇ ngawˬ pyehˬ ngeh hawˇ-eu aˬ yawꞈ nyaꞈ aˬ yawꞈ-ahˇ haw siˬ-euˬ gaˇ kawˆ maˬ ehˇ, aˬ yawꞈ maꞈ-ahˇ aˬ yawꞈ nyaꞈ dzawˇ mehˬ nehˬ-euˬ meh.
Yeˬsuˇ aˬ yawꞈ-euˬ zaˬ lahˇ deuˬ-ahˇ gʼawˇ mawˇ bi mawˇ le-euˬ
(Maꞈtehˬ 28.16-20; Maˬkuˆ 16.14-18; Yoˇhaˬ 20.19-23; Gʼaˬkʼehˇ 1.6-8)
36Aˬ yawꞈ maꞈ kʼoeˇ loꞈ-ehˇ ja luꞈ ngeh, Yeˬsuˇ aˬ yawꞈ maꞈ-euˬ gʼahˇ ceh yawꞈ le-awˇ, “Naw maꞈ kʼoeˇ taˆ nui saˇ oꞈ-eu jeˬ jaˆ luꞈ-uˇ” lehˇ ehˇ-eu meh.#24.36 Jaˇliꞈ tiˬ paˆ na deuˬ laꞈ kʼoeˇ, “Naw maꞈ kʼoeˇ taˆ nui saˇ oꞈ-eu jeˬ jaˆ luꞈ-uˇ lehˇ ehˇ-eu meh” lehˇ ehˇ-eu heu deuˆ maˬ ahˇ-a.
37Ehˇ kʼawꞈ, aˬ yawꞈ maꞈ zahˬ leˇ-awˇ, tsawˬ guˆ-iˇ-eu laꞈ kʼoeˇ, yaw sahˇ mawˇ le-euˬ nga lehˇ noeˬ-euˬ meh. 38Kʼoeˇ ngeh, aˬ yawꞈ maꞈ-ahˇ aˬ yawꞈ ehˇ nehˬ-eu, “Aˬ jeˬ miˇ neh naw maꞈ nui ma suˬ saˬ-awˇ tsawˬ toeˬ tsawˬ daˆ-ehˇ noeˬ luꞈ te. 39Ngaˬ-euˬ aˬ kuiˇ aˬ laꞈ-ahˇ haw sheˇ. Maˇ maˇ ni ngaˇ ma. Ngaˬ-ahˇ toeˬ haw sawˆ haw-awˇ, haw duˬ sheˇ. Yaw sahˇ ngeuˇ lawˬ naˇ, heu loꞈ-ehˇ shaˬ yoeˬ hawˇ-eu shaˬ jiˇ maˬ baw-aˇ.”
40Aˬ yawꞈ kʼoeˇ loꞈ-ehˇ ehˇ gʼaˬ-awˇ, aˬ yawꞈ maꞈ-ahˇ aˬ yawꞈ-euˬ aˬ kuiˇ aˬ laꞈ bi haw-euˬ meh.#24.40 Jaˇliꞈ tiˬ paˆ na deuˬ laꞈ kʼoeˇ gaˬ naˇ yaw zaˬ 40 maˬ ahˇ-a. 41Aˬ yawꞈ maꞈ zahˬ leˇ-awˇ laˬ kʼaˬ cehˇ dui dui kʼawꞈ, maˬ jah duˬ nya-ehˇ shaˬ luꞈ-eu meh. Kʼoeˇ miˇ neh, “Dzaˬ-eu tiˬ jeˬ paˬ maˬ jaˆ loˇ” lehˇ, aˬ yawꞈ maꞈ-ahˇ aˬ yawꞈ naˇ haˬ-euˬ meh. 42Aˬyawꞈ maꞈ aˬ yawꞈ-ahˇ ngaˬ sha tehˬ ba-euˬ biꞈ nehˬ-euˬ meh. 43Aˬ yawꞈ yuˇ-awˇ, aˬ yawꞈ maꞈ-euˬ mehˬ shi dzaˬ-euˬ meh.
44Kʼoeˇ naˇ, aˬ yawꞈ maꞈ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Moˇseˬ-euˬ Zahˇ dawˬ kʼoꞈ dawˬ laꞈ kʼoeˇ maˬ ehˇ, Miˬyehˇ gʼaˇ duˬ ngehˬ dah-eu deuˬ neh boꞈ taˬ-euˬ sahˬ boꞈ deuˬ laꞈ kʼoeˇ maˬ ehˇ, Ja ceuˬ-eu sahˬ boꞈ laꞈ kʼoeˇ maˬ ehˇ, ngaˬ-euˬ gaˇ kawˆ boꞈ taˬ-euˬ yawˬ jeˬ na luꞈ, heu loꞈ-ehˇ pyeuꞈ laˇ-awˇ ya byah laˇ meh lehˇ, ngaˇ naw maꞈ nehˬ-ehˇ jawˇ ngeh neh naw maꞈ-ahˇ ehˇ nehˬ-euˬ ma.”
45Kʼoeˇ ngeh, Jaˇ liꞈ-ahˇ gʼoˆ shaw nya ni, aˬ yawꞈ maꞈ-euˬ nui ma-ahˇ aˬ yawꞈ pah nehˬ-euˬ meh. 46Kʼoeˇ naˇ, aˬ yawꞈ maꞈ-ahˇ heu loꞈ-ehˇ ehˇ nehˬ-euˬ meh. “Jaˇliꞈ laꞈ kʼoeˇ heu loꞈ-ehˇ boꞈ taˬ-euˬ meh. Ka li-aˬ, sehꞈ gaˇ ya daˬ-awˇ, smˬ nah byah laˇ naˇ, Miˬyehˇ neh paˇ bi gʼoꞈ dehꞈ laˇ tehꞈ-a. 47Kʼoeˇ naˇ, Yeˬluˇsaˬlehˬ meuˬ-ahˇ neh dahˬ beh-awˇ, tsawˇ jeuˬ dawˬ tawˆ luꞈ-ahˇ iˬ baˇ noeˬ poˆ-eu gaˇ kawˆ hawˇ-eu, Miˬyehˇ iˬ baˇ pyehˬ nehˬ-eu gaˇ kawˆ, aˬ yawꞈ-euˬ tsawˇ myahˇ uˬ moˆ ya mehˬ nehˬ-iˇ meh lehˇ boꞈ taˬ-euˬ meh. 48Naw maꞈ-aˬ, gaˇ kawˆ heu gʼaˇ duˬ saˇ kiˇ ya kamˬ-eu tsawˇ haˬ deuˬ meh. 49Ngaˬ Da neh ngaˬ-ahˇ biꞈ taˬ-euˬ saˇ jaˇ dawˬ, naw maꞈ-ahˇ ngaˇ paˇ biꞈ-eu ma. Ehˇ kʼawꞈ, mˬ taˆ-euˬ baoˬ naw maꞈ kʼoeˇ taˆ maˬ keuˆ le kʼoeˇ keuˆ ni, meuˬ laꞈ kʼoeˇ naw maꞈ ya dawˬ tawˬ meh.”
Yeˬsuˇ-ahˇ mˬ kʼoeˇ taˆ ciˬ kʼoꞈ daˆ leꞈ-euˬ
(Maˬkuˆ 16.19,20; Gʼaˬkʼehˇ 1.9-11)
50Kʼoeˇ naˇ, Yeˬsuˇ neh aˬ yawꞈ maꞈ-ahˇ Beˬtaˬniˇ pu dawˬ peh keuˆ ni sheuˬ keuˆ gʼeh-awˇ, aˬ laꞈ baꞈ diˇ-awˇ aˬ yawꞈ maꞈ-ahˇ dawˬ ngehˬ gʼeh nehˬ-euˬ meh. 51Aˬ yawꞈ dawˬ ngehˬ gʼeh nehˬ gʼaˬ ngeh, aˬ yawꞈ maꞈ-ahˇ gʼawˬ-iˇ-awˇ, mˬ kʼoeˇ taˆ bi sheuˬ daˆ kʼoꞈ leꞈ-euˬ meh.#24.51 Jaˇliꞈ tiˬ paˆ na deuˬ laꞈ kʼoeˇ, ‘Mˬ kʼoeˇ taˆ bi sheuˬ daˆ kʼoꞈ leꞈ-euˬ meh’ lehˇ ehˇ-eu heu deuˆ maˬ ahˇ-a. 52Aˬ yawꞈ maꞈ aˬ yawꞈ-ahˇ uˬ duˬ tahˬ yaꞈ-awˇ, Yeˬluˇsaˬlehˬ meuˬ-ahˇ laˬ kʼaˬ tiˬ cehˇ gʼoꞈ leˇ-euˬ meh. 53Kʼoeˇ naˇ, aˬ yawꞈ maꞈ Uˬ duˬ tahˬ nymˇ nymˇ ma laꞈ kʼoeˇ tehꞈ-ehˇ Miˬyehˇ-ahˇ ja ceuˬ ja ceuˬ-ehˇ jawˇ-euˬ meh.
Đang chọn:
Luˇkaꞈ 24: AHK
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Akha Bible Revision (Latin Script) © Thailand Bible Society, 2011.