Ñwaè' Luêk 2

1À m ba à nfè' anà ŋkʉʉ Kayisaro Ògostò à fa rsa' enɛ bèe wɛɛwɛ a yě ŋgòŋ a saŋ mlii tɛ e bo bè' bèe. 2À m ba nfè' entombì ce a m ce bè' bèe. Kùrɛnò à m ba govanǒ à ŋgǒŋ Sirìyà à nfè' anà. 3Ŋwɛ̀ wɛɛwɛ à m dù fa yě là' à rsaŋ li rlii àfo. 4Josɛ̀f ye ye à m nàtǐ à rla' Nasarɛ̀t à ŋgǒŋ Galèlê, a du a ba' à rla' Bɛtɛ̀lɛ̀hɛm à ŋgǒŋ Jùdiyà. Rla' ca à m ba rla' Dɛvìd. E m dù àfo njobè' e m ba ŋwɛ̀ embe ndʉ̀' Dɛvìd. 5E m dù a Mɛ̀ɛri ce e m ce niŋ gùu àgho tɛ a ye a bo dù saŋ mlii. Mɛ̀ɛri à m ba nè rbʉ̀. 6Wowèe a ba' a cu à rla' anà, nfè' rbi à ghɛɛ. 7E m bi muu rŋgòo, à ba muu mbaŋrù. E m kur muu anà njep bcɛ̀', a noŋsi njep rghii njèe njobè' ndap à m ruu nè wowèe.

8Bèe mo' ce a m ce cìŋ yap njèe a m ba à rla' anà a ba à mŋkʉ̀, a ce cìŋ yap njèe nètʉ'. 9Ncìndap à nyɛɛ mbe wǎp ndù, rraa Tata li suu mbe wǎp ndù, wowèe a wɛp sê. 10Ncìndap Nyʉ̀ anà à laa nè wowèe enɛ̂, “Fa wɛp nè ka', mɛ̀ vʉ̀ wèe nè nsuŋ mbòŋmboŋ, à ba nsuŋ ce bèe wɛɛwɛ a be yu', lu'shi sê. 11A bi yè ŋwɛ̀ rjà' à rla' Dɛvìd ntìni na. A ye Krǎis anà ce e yu Tatâ. 12Yuu ce yi be gèe tɛ wèe riŋ enɛ nsuŋ ca yu mini yi yu enɛ, wèe be dù yɛ muu àmbò a kur njep bcɛ̀', a noŋsi njep rghii njèe.” 13Wowèe a ka' kè' a yɛ àmbò ku' bcìndap Nyʉ̀ a vʉ̀, a kyese nyor àgee ncìndap Nyʉ̀ cà, a ce kù'si Nyʉ̀, a ce làa enɛ̂,

14“Fòo yi ba nè Nyʉ̀ embe bùu,

tɛ cumʉnyaŋ ba njep ŋgòŋ nè bèe ce Nyʉ̀ ce yu' rbòŋ nè wowèe.”

15Bcìndap Nyʉ̀ ca a ka' mà'shi wowèe kʉti mbe bùu, ŋgǎa ncìŋ njèe ca a kɛ' a ce làa fa wǎp mʉ enɛ̂, “Sèe du à rla' Bɛtɛ̀lɛ̀hɛm du yɛ ka yuu ce Tata à suŋ sèe enɛ yi koni na.” 16Wowèe a natì, a du cɛrcɛr sê, a du a yɛ Mɛ̀ɛri ba Josɛ̀f, a yɛ muu àmbò e nòŋ njep rghii. 17A ka' yɛ muu ca, a suŋ Josɛ̀f ba Mɛ̀ɛri yuu ce ncìndap Nyʉ̀ à suŋ wowèe àmbò muu anà. 18Bèe wɛɛwɛ ce a m yu' nsuŋ ce ŋgǎa ncìŋ njèe a m suŋ na, a m bɛ̀ɛŋger sê. 19Mɛ̀ɛri ye ye à m ce kuushi buu ca a ce kwà'shi àmbò vi. 20Ŋgǎa ncìŋ njèe a m kʉti, a ce yòŋshi Nyʉ̀, a ker ce kù'si ye à buu wɛɛwɛ ce wowèe a m yu' a ker yɛ, njobè' buu anà à m ku ba àmbò ncìndap Nyʉ̀ à m suŋ wowèe.

21Ŋgàa à ka' kùu, nfè' ce a be gèe muu bʉ̀ à ghɛɛ. E ka' ghɛɛ, a fa rlii muu enɛ Jisòs. Rlii ca à m ku ba rlii ce ncìndap Nyʉ̀ à m fa muu wɛɛ tɛ yì ma ka' kè koo rbʉ̀.

22Nfè' ce a be mìsi gèe yuu ce ncir yi làa enɛ njeŋwɛ̀ ce e bi muu gee tɛ e bo ba nrara à bsii Nyʉ̀ à ka' ghɛɛ, Mɛ̀ɛri ba Josɛ̀f a lor muu a du àgho à rla' Jɛ̀rusalɛ̀m à rfa nè Tata Nyʉ̀, 23àmbò a saŋ mbe Ŋwǎ' Mncir Tata enɛ̂, “A be fa boo rŋgòo ce yu boo mmbaŋrù wɛɛwɛ nè Nyʉ̀.” 24Wowèe a m dù foŋ à rgèe taŋshì àmbò ncir Tata Nyʉ̀ yi ce làa. Yi yu mbo enɛ ŋwɛ̀ ka' tɛ gèe taŋshì ca nè bběŋ bbaa ka', e gee nè byoo bǔu bbaa.

25Ŋwɛ̀ mò' à m ba à rla' Jɛ̀rusalɛ̀m à nfè' anà a ce too enɛ Simìyòn. E m ba ŋwɛ̀ nyɛɛnì, a ce wɛp Nyʉ̀ foŋ, a cu a ce kè' nfè' ce Nyʉ̀ be gèe tɛ bèe Isrɛ̀l a tʉr rfʉtè. Yʉ' Rara yi m ba a ye. 26Yʉ' anà yi m gèe e riŋ enɛ e be yɛ Krǎis yì Tata Nyʉ̀ wɛɛ, ka' kwe. 27Yʉ' ca yi lor ye a du àgho mbe Ndàp Nyʉ̀. Ma muu ba tar muu a ka' vʉ̀ nè muu mbe Ndàp Nyʉ̀ à rgèe yuu ce ncir yi m ce làa enɛ a gee àtu muu, 28Simìyòn à koo muu mbe mbò, a yoŋshi Nyʉ̀ a laa enɛ̂,

29“Yà masà, wɛ̀ lɛ̀ mo mkà'ni,

mà'shi là sè'ni tɛ yò ŋwɛ̀ rfà' du yi yu nè rfʉtè-ŋwɛ̀.

30Ma mmir mi yɛ ŋwɛ̀ rjà'

31ce wɛ̀ tuusi, a duŋshi nè bèe wɛɛwɛ.

32E yu rraa ce li bo dùŋshi yo nduunjì nè bèe enje jɛɛ

kèr gèe tɛ bèe a ku'si yò bèe ce yu bèe Isrɛ̀l.”

33Tar muu ba ma muu a m yu' buu ce Simìyòn à m làa a kuu muu anà, a bɛɛŋger sê. 34Simìyòn à ghonì wowèe a laa nè yì ma ce Mɛ̀ɛri enɛ̂, “Muu ca à lɛ̀ Nyʉ̀ tɛ e bo gèe tɛ bèe magǒr à to' Isrɛ̀l a kweŋger, kèr gèe tɛ bèe magǒr à ŋgòŋ anà a natî. E be ba ncòo ce bèe magòr a be kòŋ ka', làa bebep se àmbò ye. 35Yi ba wa'a, tɛ mkwà'shì bèe magòr mi bo yɛɛti àwaŋ. Ŋkoosimnse ce e be kè ba àmbò kàafǎ' ncɛncɛp wa'a, be kè sòp yo ntee foŋ.”

36Njeŋwɛ̀ mò' à m ba ŋwɛ̀ ncep ntuu Nyʉ̀ a ce too enɛ Anà. E m ba muu Fɛnùwɛ̀r embe ndʉ̀' Ashà. E m ba nleeŋwɛ̀ sê. E m dù bgùu, a nduu a ku cu ba à bfè' sàamba cà'cà', nduu à kwe. 37E m cu à ŋgwaŋkʉŋwɛ̀ a ba' bfè' ncòp kyèe-à-mwaami. E m ce buu mbe Ndàp Nyʉ̀ à nfè' mò' ka', ka' nètʉ' ɛ̀, ka' nèmootì ɛ̀, e m ku ba mbo a ce jì mdip, a ce gèe rloo nè Nyʉ̀. 38À ka' ba à nfè' a m vʉ̀ nè muu mbe Ndàp Nyʉ̀ anà, ye ye à ku tose foŋ, a yoŋshi Nyʉ̀, a laa àmbò muu ca nè bèe wɛɛwɛ ce a m ce kè' enɛ Nyʉ̀ fʉr rla' Jɛ̀rusalɛ̀m efa ŋgɛ'.

39Wowèe a ka' gèe buu wɛɛwɛ ce ncir Tata Nyʉ̀ yi m ce làa enɛ a gêe, a kʉti à lap rla' Nasarɛ̀t à ŋgǒŋ Galèlê. 40Muu ca à m kù' a tʉr ŋger, a ker tʉr bfee foŋ sê. Nyʉ̀ à tʉr ye à ntee bòŋboŋ.

41Yì ta ba yì ma a m ce dù ŋkǎ' càasi-mndap à rla' Jɛ̀rusalɛ̀m njep fè' wɛɛwɛ. 42Jisòs à ka' ba bfè' ncòp-baa-à-rrʉ̀ʉ, a wowèe a du ŋkà' ce a m ce dù njep fè' njep fè' nà. 43Ŋkà' yi ka' mì, wowèe a natì a ce kʉti à là', Jisòs à cu yi mbenjì à rla' Jɛ̀rusalɛ̀m. Yì ta ba yì ma a riŋ ka'. 44Wowèe a m ce kwà'shi enɛ e yu mbe ŋgoo bèe ce a wowèe a m ce dù. A ka' jɛ̀r à nòŋ bìi, a yɛ ye ka', a kɛ' a ce ròo ye à mʉ̀ bfʉr wap ba bkar wap. 45Wowèe a ka' yɛ ye ka', a kʉti à rla' Jɛ̀rusalɛ̀m à rròo ye. 46Mnòŋ vi ka' cǎa btaar wowèe a yɛ ye mbe Ndàp Nyʉ̀ àmbò e cu mbe mʉ̀ ŋgǎa ryɛ'nì, a ce yu'shi buu ce wowèe a m ce yɛ'ni, a ce bipshi buu nè wowèe. 47Bèe wɛɛwɛ ce a m yu' buu ce e m ce làa, a m bɛ̀ɛŋger à ryu' àmbò e m ce bipshi buu, a ker ce bèesi buu nè bfee-ŋwɛ̀. 48Yì ta ba yì ma a ka' yɛ ye a bɛɛŋger sê. Yì ma à laa nè ye enɛ̂, “Muu wà, wɛ̀ gèe nè wèr wa' njokɛ? Wèr yò ta à ròo wɛ̀, tu yi korŋgèr wèr.” 49E laa enɛ̂, “Wèe à ba ce ròo mɛ̀ njokɛ? Wèe à ba rìŋ weenɛ yu ya dì' à rba mbe Ndàp yà ta ka' a?” 50Wowèe a m rìŋ mbùu ce e m làa wa' ka'. 51E natì a du a wowèe à rla' Nasarɛ̀t, a cu a wowèe, a ce yu'ni nè wowèe. Yì ma à m lɛ̀ buu ca wɛɛwɛ njep yě ntee. 52Jisòs à m ce kù' à nyòr ba à bfee, a tʉr bsii waŋ a Nyʉ̀ ker ba bèe.

Đang chọn:

Ñwaè' Luêk 2: LNT

Tô màu

Sao chép

So sánh

Chia sẻ