Jowulu - 2022 WBT (NT) Non Drama

Jowulu - 2022 WBT (NT) Drama

Juniɲa tɔnpa waari ki ru, nwɔ̀ i dɔri-ra tu Wulu ki, niŋ wuru nmaŋ. Niŋ wulu ki wuru Kirinŋ nu, ŋì i ji Kirinŋ i. Juniɲa tɔnpa waari ki ru, niŋ wulu ki wuru Kirinŋ fan. Mìnki finŋ kiri bataa ramɔni-i. Finŋ woo finŋ namɔni-i, ǹʼtɔri tenŋ namɔni wulu ka kɔɔtɛ kì. Ɲaninkulutɔnbi ki wuru niŋ wulu ki ru, niŋ ɲaninkulutɔnbi ki i ji konanmini kiri wɔ manisarinŋ i. Niŋ manisarinŋ ki i cucu-a mancinŋ ki ru, nka mancinŋ ki so ǹʼnu-i kì.
Waarinŋ bɛɛ na-i so, Kirinŋ i shuru bɛɛ cin na, niŋ shuru ki tɔ ki wuru tu Yuhana. Ntiŋ i na ji niŋ manisarinŋ ki shɛɛri ki i, ntiŋ i ǹʼtɔ shɔɔrinŋ bi, nwɔma awɔ wulu ki ramatɔnŋ kiri bataa i bili niŋ manisarinŋ ki ra. Ntiŋ yɛri ki wuru niŋ manisarinŋ ki i kì, nka ntiŋ na ŋuŋ ki wuru, a i ji ǹʼshɛɛri i. Niŋ manisarinŋ ki wuru manisarinŋ sɛlɛsɛli yɛrima ki i, nwɔ̀ namaan ki juniɲa nu, ŋì sarinŋ po-i konaŋ bataa tɛ.
Nwɔ̀ i dɔri-ra tu Wulu, niŋ wuru juu juniɲa ki ru nmaŋ kɔ, sabu mìnki juniɲa namɔni-i. Niŋ fa a fɔn na, ǹʼnamaan ki juniɲa nu, konaŋ kiri ǹʼtɔ kì. Ǹʼna-i awɔ mani nu tɔnŋ kiri tɛ, ǹʼwɔ mani nu tɔnŋ kiri ji ǹʼtɛ kì.
Niŋ fa a fɔn na, nwɔ̀ri ji-i ǹʼtɛ, kí i bili ǹʼna, ŋì so wɔri-i nini bataa tɛ, kí i ji Kirinŋ daŋ ni i. Kí i ji Kirinŋ daŋ ni i, niŋ ji konanmini jika ɲaan tɛ kì, shuru fa mari dintɛ bi dumiŋ i kì, nka kí ji-i Kirinŋ daŋ ni i Kirinŋ sababu ra.

Nwɔ̀ i Wulu u, niŋ ji-i konanmini i, ŋì i na sɔɔ yibɛɛ fan. Yibɛɛ ǹʼnɔɔri ki ja-i, Danshuru tenŋ pe wɔ̀ po-i Tiŋ Kirinŋ nu, niŋ nɔɔri ki yɛ. Ǹʼfaa-a shɔɔrinŋ ki fa Kirinŋ wɔ sɛli ki ra.
Yuhana wɔ̀ i ntiŋ wulu bi-a, niŋ ntiŋ tɔ shɔɔrinŋ ki sunjo-i, ntiŋ i fali, ntiŋ i ǹʼbi tu : « Míŋ wuru mìŋ koŋ ka wulu bi-a ábɛɛ tɛ ńʼtu ntiŋ a na míŋ kɔɔtɛ, nka ńʼtu ntiŋ gbɛ míŋ wu, sabu ntiŋ wuru míŋ jɛŋ nmaŋ kɔ. »
Ntiŋ faa-a shɔɔrinŋ wɔ̀ ra, yibɛɛ bataa ǹʼbɛɛ kila-i, niŋ i yi pyii. Jibi woo jibi, ŋì i shɔɔrinŋ ki bɛɛ bo-a shɔɔrinŋ ki bɛɛ sun yibɛɛ gbɛ. Kirinŋ sariya ki wɔri-i yibɛɛ tɛ Musa gbɛ, nka ŋì shɔɔrinŋ ki fa sɛli ki wɔri-i yibɛɛ tɛ Yesu Kirisa gbɛ. Koŋ tɔri tenŋ ɲaniŋ tu ja Kirinŋ na kì, nwɔ̀tiŋ ǹʼɲaanbi-i konanmini tɛ, niŋ i ǹʼDanshuru tenŋ pe ki i, ninwɔ̀ i Kirinŋ i, ŋì i ji Tiŋ Kirinŋ fan.


Waarinŋ wɔ̀ ru Yerusalɛmu kili ki ru Yawutu jɛntɔnŋ kiri Kirinŋ tɛ sarakawɔrɔtɔnŋ bɛɛ ri fa Lewi nupo bɛɛ ri cin-i Yuhana tɛ, kí i ta ntiŋ nanɔri tu : « Miŋ nkɛnŋ? » Ntiŋ nwɔ̀ bi-i kí tɛ, niŋ i kaa.
Ntiŋ sɛli ki fɔɔ bi-i kí tɛ, ntiŋ ǹʼnadu kì, ntiŋ tu : « Míŋ Kirinŋ Ɲaannakonshimaan ki i kì. »
Kí i ntiŋ nanɔri sɛbɛ tu : « Niŋ na, miŋ nkɛnŋ? Miŋ i Kirinŋ wɔ cintɔnŋ Eli wa? »
Yuhana tu kí tɛ : « Aayi, míŋ niŋ i kì. »
Kí i ntiŋ nanɔri sɛbɛ tu : « Kirinŋ wɔ cintɔnŋ wɔ̀ wulu bi-i, miŋ i niŋ i wa? »
Ntiŋ i kí rupwulu tu : « Aayi, míŋ niŋ i kì. »
Niŋ na, kí tu ntiŋ tɛ : « Nʼyɛri ɲaanbi yi tɛ sa ni! Nwɔma yi i so ta-i niŋ bi yi bo natɔnŋ kiri tɛ. Miŋ nkɛnŋ? »
Yuhana i kí rupwulu Kirinŋ wɔ cintɔnŋ Esayi wɔ cintɔnbi wulu ka wu tu : « Koŋ fali wulu wɔ̀ i po-a jaŋ ki faninmwuŋ, ŋì i ǹʼbi-ri tu : ‹ Á Ŋuntiŋ ki wɔ saa ki ramɔni ›, míŋ i niŋ fali wulu ki i. »
Koŋ wɔ̀ri bo na wuru Yuhana tɛ, nini wuru Farinsiyɛnŋ kiri wɔ kwuru ki ru. Kí i ta jɛŋ arɔɔ ranɔri kiri wu, kí i Yuhana nanɔri sɛbɛ tu : « A miŋ ji Kirinŋ Ɲaannakonshimaan ki i kì, miŋ dumiŋ Kirinŋ wɔ cintɔnŋ Eli i kì, nʼdumiŋ Kirinŋ wɔ cintɔnŋ wulu bimaan ki i kì, nfɛnŋ na miŋ i konaŋ kiri wu-ri? »
Yuhana i kí rupwulu tu : « Míŋ kɔniŋ i ábɛɛ wu-a ju ra, nka koŋ i ábɛɛ kanfɛ, ábɛɛ nwɔ̀tiŋ tɔ-a kì. Ntiŋ a na míŋ cɛfan, nka míŋ ŋuniŋ kuru-i ntiŋ wɔ kari yaa pilitɔnŋ i. »
Niŋ bi kiri bataa ma-i Bɛtani, Yurudɛn baa ki kɔɔtɛ, Yuhana wuru konaŋ kiri wu-a niŋ mani wɔ̀ ru.

Niŋ sisarifuluntɔnŋ ki, Yuhana Yesu naanna ki ja-i a tɛ, ntiŋ tu : «  Kirinŋ wɔ Saanaŋ ki i kaa, ninwɔ̀ i konaŋ ki bataa wɔ bijɛ ki wu san-a nmaŋ. Míŋ koŋ wɔ̀ wulu bi-i ábɛɛ tɛ, ńʼtu ntiŋ a na míŋ cɛfan, ńʼtu ntiŋ gbɛ míŋ wu, ńʼtu sabu ntiŋ wuru míŋ jɛŋ nmaŋ, niŋ koŋ ki i kaa. Míŋ yɛrima ki ntiŋ tɔ-ri kì, nka míŋ na ŋuŋ ki wuru-i, ŋí i na konaŋ ki wu ju ra, nwɔma ntiŋ i a yɛri ji Isirayɛli konanbi ki wu. »
Yuhana i ǹʼbi tu : « Míŋ Ɲiniwɔlinŋ ki jɛri-ra ki ja-i ntiŋ sun, ŋì i po kirinpɔli ki ra miŋ tu kilaaŋ. Míŋ kɔniŋ ntiŋ tɔ-ri kì, nka Kirinŋ wɔ̀ ki míŋ cin-i tu míŋ konaŋ kiri wu ju ra, niŋ i ǹʼbi-i tu, a míŋ na na Ɲiniwɔlinŋ ki jɛrira ki ja koŋ wɔ̀ sun, tu ninki a na konaŋ ki wu Ɲiniwɔlinŋ ki ra. Míŋ yɛrima ki ǹʼja-i ŋí i ǹʼbi ńʼtu sii ǹʼna ǹʼnu kì, ńʼtu ka a Kirinŋ Danshuru ki i. »

Niŋ sisarifuluntɔnŋ ki, ŋì i Yuhana fa awɔ kalindaŋ koŋ fuuli bɛɛ tu sɛbɛ, ntiŋ i Yesu fwuudera ja. Ntiŋ tu : « Á ǹʼshɛɛli, Kirinŋ wɔ Saanaŋ ki i kaa! »
Niŋ kalindaŋ koŋ fuuli ki niŋ wulu ki rama-i, kí i ǹʼpa Yesu cɛfan.
Yesu a ɲaannupwulu-i, ntiŋ i kí ja a cɛfan waarinŋ wɔ̀ ru, ntiŋ i kí ranɔri tu : « Ábɛɛ nfɛnŋ ceeli-la? »
Kí tu ntiŋ tɛ tu : « Arabi, (niŋ kɔri ki i tu kalimɔɔ) ábɛɛ jɛri mani danwɔ ru? »
Ntiŋ i kí rupwulu tu : « Á na, ábɛɛ ra ǹʼja. » Kí i ta ntiŋ fan, kí i ta ntiŋ jɛrimaŋ ki ja. Bilana, waari pyiirantɔnŋ ki so wuru kɔ, kí i sunŋ pyɛ ki kɔ ntiŋ fan nmaŋ.
Kalindaŋ koŋ fuuli wɔ̀ri Yuhana wɔ wulu ki rama wuru-i, kí i ǹʼpa Yesu cɛfan, nini nu koŋ tenŋ tɔ wuru tu Andire. Simɔŋ wɔ̀ wuru dɔri-ra tu Pyɛɛri, ntiŋ i ji niŋ pwaŋ i.
Andire ta-i wulu ki bi ǹʼjɔnɔ a tindaŋ Simɔŋ tɛ tu : « Yibɛɛ Kirisa ja-i! » Niŋ kɔri ki i tu Kirinŋ Ɲaannakonshimaan.
Ntiŋ i Simɔŋ jɛnpa tiri Yesu maŋ ki ru. Yesu Simɔŋ shɛɛlika shɔ-i, ntiŋ i ǹʼbi tu : « Miŋ i Yuhana danshuru Simɔŋ, miŋ tɔ ki a ye tu Sefasi. » Nwɔ̀ i bi-a tu Pyɛɛri, niŋ kɔri ki i ji tu kwɔ.

Niŋ sisarifuluntɔnŋ ki, Yesu wuru ǹʼtɛ a i tiri Galile sɔɔta ki ru. Ntiŋ fa Filipu i fu, ntiŋ tu niŋ tɛ : « Ǹʼpa míŋ cɛfan! » Filipu wuru Bɛtisayidatɔnŋ i, Andire fa Pyɛɛri i po-ri mìŋ kili ki ra sɛbɛ. Niŋ kɔɔtɛ, Filipu i Natanayɛli ja, ntiŋ i ǹʼbi niŋ tɛ tu : « Musa i koŋ wɔ̀ wulu bi-a Sariya sɛbɛ ki ru, niŋ fa Kirinŋ wɔ cintɔnŋ kiri i ntiŋ wulu bi-ri arɔɔ sɛbɛ kiri ru, yibɛɛ ntiŋ ja-i. Yusufu danshuru Yesu yɛ, ŋì i po Nansarɛti kili ki ra. »
Natanayɛli tu : « Finŋ shɔɔrinŋ a so po-i Nansarɛti wa? »
Filipu tu ntiŋ tɛ : « Na, ŋi i na ǹʼja. »
Yesu Natanayɛli naanna ki ja-i a tɛ waarinŋ wɔ̀ ru, ntiŋ tu : « Isirayɛlidaŋ sɛlɛsɛli ki bɛɛ i kaa, shuru yɛ, nwɔ̀ teli-i haali! »
Natanayɛli tu Yesu tɛ : « Miŋ míŋ tɔ da? »
Yesu i ǹʼnupwulu tu : « Míŋ miŋ ja-i shɔ jirinŋ ki fɛ, niŋ i fa Filipu miŋ dɔri-ri sun kì. »
Natanayɛli tu Yesu tɛ : « Kalimɔɔ, ábɛɛ i Kirinŋ Danshuru ki i, Isirayɛli wɔ masa ki! »
Yesu tu Natanayɛli tɛ : « Míŋ ǹʼbi-i ńʼtu míŋ miŋ ja, ŋì i miŋ tu shɔ jirinŋ ki fɛ, niŋ ki ra, miŋ i bilinabi ki ma wa? Miŋ ɲaniŋ a bi sinaŋ tɔri ri ja, ŋì i fwuu ka sun sɛbɛ! » Ntiŋ tu sɛbɛ : « Sɛli ki ra, míŋ a ǹʼbi ábɛɛ tɛ ńʼtu, ábɛɛ ra na kirinpɔli ki rawwulumaan ki ja, á i Kirinŋ wɔ mɛlɛkɛn kiri jɛrira ki ja pwɔkulinŋ sun, á i yìrì tunpaara ki ja kirinpɔli ki ru Koŋ Danshuru ki bira. »

Nghe Yuhana 1