Matɨyui 8
8
Jizaazai a'mwe samatanakerɨ yavada'galake'nesɨ.
(Maakɨ 1:40-44; Lukɨ 5:12-14)
1Mugunyavɨ yagalya'mavaka kaanna walaabɨna yadaa'nyɨ kwala bwa'naanya kwalaalyara gamɨre yagaala wɨ'nesara mɨdɨnna yɨna. 2Mɨdɨnna yɨna yadaapi, yɨthaanyi, samatanakei gamɨnyawɨ aya kɨbanna bɨna yaka lotuya'na kwaakewɨ walaruta'nyɨna yaka lotuya'na kwadaai gɨlɨna yakegaa' wɨdɨna “Naangeigɨ, nɨmɨnyɨna ‘Tewaanya yavada'gaina wima!’ dɨza'na gɨmɨ wikɨra.” 3Wɨdɨna kya' ata dathɨwanna yaka wɨdɨna “Sare' nyɨvu'nɨwa'. Maamɨdarya jɨma'nana!” Dazagaa' yɨme'nya'bɨ' gamɨre samate yɨwɨna kya' tewaanyai yɨma'nakelyɨ. 4Tewaanyai yɨma'nakerɨ Jizaazai wɨdɨna “Dɨnyu'nana! Sareigɨ a'mwe aane pwai kwarɨ nujɨwaakɨdɨka! Aawa. Gotɨyare Angevɨna yarai wawa'gɨzɨ Gotɨyarɨna mubɨthɨka yɨra'derɨ gɨnnya kɨlaaka tewaanyajɨ' duzɨwainaawɨdeigɨnyɨ. Tɨnna mi'na kagyɨwarojɨ Gotɨyarɨna wɨjaaya'ne' Ne Mozɨzare Kɨwɨnya' dɨnɨke' sara jɨtheigɨnyɨ. Sara kya'gɨzɨ pwara jalɨkurakɨna ‘Sarei tewaanya yɨma'nɨwa'. Gamɨre samate mena yɨwɨwaka!’ Pwara sara yawɨta'na sara jɨtheigɨnyɨ.”
Jizaazai Romɨ mwaalya aawɨlata naangererɨ yavada'galake'nesɨ.
(Lukɨ 7:1-10)
5Anga Kaapanɨyamɨna wɨlaawɨna kya' Romɨya aawɨlasaraavɨ maremwaalaka pwai bɨna yaka dɨragɨnna buthɨna 6“Naangeigɨ nɨmɨre yaasɨwa'wawɨnyai nalaavɨnakei angevɨ warɨka. Gamɨre yagɨnya yuya mena bainɨkerɨnera. Daanga naanga wɨvɨmanɨkerɨnera.” 7Sara buthɨna kya' “Nɨmɨ wawa'mujɨ tewaanya yavada'galɨma!” 8Wɨdaka kɨrɨ' aawɨlasaraavɨ maremwaalakei dara ma'maa'na “Naangeigɨ, nɨmɨre angevɨna a'mwe maalɨkeinyɨrevɨna nulaabɨthɨka! Aawa. Maalɨkinyainyɨ. Gɨmɨ Naangeigɨnyɨra. Sare'na yune yagaalya'na kada'gɨzɨ nɨmɨre nyɨdaayadei tewaanya yɨma'nadelyɨra. 9Gɨthɨwe' dare'nesɨ. Nɨmɨnyɨ naangera nyɨmaremwaaihasaraavɨ dɨragɨnnakeraavɨ mɨdɨnna yadɨnyainyɨ. Nabaai aawɨlasara pwaraavɨ maremwaaiheinyɨ. Sareinyɨ pwarɨ wɨdɨwɨja' ‘Gɨmɨ dɨwona!’ sai kaanna wɨna yadelyɨ. Nabaai pwarɨ wɨdɨna ‘Gɨmɨ kaaja!’ sai bɨna yadelyɨ. Nɨnnya yaasɨwa'wawɨnyarɨ wɨdɨna ‘Wawɨnya daza' jɨthe'nanyɨ,’ sai wawɨnya' sara yɨna yadelyɨ. Sareinyɨ gɨthɨwa ‘Sabaaibɨ' yune yagaalya'na kada'gɨzɨ nɨmɨre wɨdaayadei tewaanya yɨma'nadelyɨ.’ ” 10Wɨdɨna kya' Jizaazai sa' kadɨka wɨ'naka atɨka maru'na'na yɨna yaka a'mwera mɨdɨnesaraavɨ wɨdɨna “Nebulya'na yɨhɨthɨvanɨge. Yɨzɨrelɨyai dɨragɨnna lɨmwanga da'darebulyɨya aane pwai kwarɨ mabɨramaaryadɨnyainyɨ. (Romɨ mwaalya dai nɨmɨnyɨna yawɨ'na ‘Dɨragɨnaangei yune yagaalya'na nalaavɨnakeraavɨ yavada'gaidelyɨ.’) 11Sare'na yɨhɨthɨvanɨge. Nyɨlyai bilyɨrɨ'dimagɨdaa'nya a'mwe kwalaalyara yɨ'mavaabɨna. Yɨ nyɨlyai walakadimagɨ yɨ'mavaabɨna. Yɨnasarajɨ saajarajɨ yɨ'mavaabɨna yɨpɨ'dere. Maremwaalade Sɨgunyavɨyavɨ yɨ'mavaabɨna yapɨjɨ tɨ'munnevɨ Yɨzɨrelɨyaihɨre Ne sɨnnawɨnyara Evɨraamɨjɨ Aazakɨjɨ Jaikopɨjɨ sarajɨ ye'mwannemwaala yɨpɨ'dere. 12Sare' kɨrɨ' Yɨzɨrelɨyaihi Gotɨyai yɨhɨmaremwaalanne pwaihɨrɨ mwasawɨ jɨhɨnya kewewɨnɨ yɨhɨmarasɨ'nadeihɨlyɨ. Dazahɨba kɨnna naanga dadɨvɨ' maangerɨkaavɨ dɨhɨzɨvainyideihɨlyɨ.” 13Sara wɨdaka aawɨlasaraavɨ maremwaaiderɨ wɨdɨnana “Gɨnnya angevɨna dɨwona! ‘Nɨmɨre yaasɨwa'wawɨnyarɨ yagaalya'na tewaanya javada'gaidelyɨ,’ yawɨ'mwaanyabaaibɨ' sahwai tewaanya sara yɨma'nade'nanyɨ.” Sara wɨdakegaa' sahɨgaa' yaasɨwa'wawɨnyai tewaanya yɨma'na'.
Jizaazai kwalaalyaraavɨ yavada'galake'nesɨ.
(Maakɨ 1:29-31; Lukɨ 4:38,39)
14Pitare angevɨ Jizaazai wɨlɨna yaka Pitarɨ ganyaalɨmaange' nabalɨdɨ'nake' wa'dɨ'nyɨyavɨ tɨnna wanganna. 15Tɨnna wanganna yaka gamɨre asɨrɨ dathɨwanna kya' nabalɨdɨke' yagalya'makuna. Sara yagalya'makuna kya' daavɨna yaka Jizaazarɨne tɨka wapaaya yovɨrawakɨna ya'.
(Maakɨ 1:32-34; Lukɨ 4:40-41)
16Sawɨtɨrɨnyaburɨ nyɨlyai walakakegaa' Kwazaakegaa' yɨ'mwannakegaa' Jizaazaryawɨnna a'mwe yɨma'naka kwalaalyaraavɨ makabɨna yɨna. Makabɨna yɨna kye' yagaala gave' yɨmakeraavɨ wɨdaasɨna. Wɨdaasɨna yaka pwara nalaavɨnaka yuyaraavɨ tewaanya yavada'gaina. 17Sarevɨdaa'nyɨ Gotɨyarɨ wɨ'nawɨjɨwaakadei pɨropetɨyai Aazaayai kɨgaakuna jaake' yune' yɨma'nyɨna. Dara dɨnɨke'
“Gamɨ nemɨre nagaazabwi marasɨ'mwa'.
Nemɨre nabalya yuya makuwa'.”
Sara dɨnɨke' yunebanna yɨna ya' Jizaazai.
Jizaazarɨ mɨdɨnya'neraavɨnesɨ.
(Lukɨ 9:57-60)
18Kwala bwa'naanya naange' Jizaazaryawɨnna yɨkabɨna yɨkabɨna yadaapɨjɨ sai tɨnna wanganna yɨna yakegaa' gamɨreraavɨ wɨdɨna “Aalɨbunya kengimagɨnna wawaana!” 19Mi'na kuda' Kɨwɨjai bɨna yɨna yaka wɨdɨna “Wɨjɨwaakyaigɨ, nɨmɨ gɨmɨdɨnamaride'nanyɨ kaanya yamarija yuyabanna.” 20Sara kuda' sai wɨdɨna “Kavɨjɨlɨka maalɨkera kwaakevakɨ daibu'nya kɨnɨnnakere. Nabaai sɨgunyavɨne yusara arɨta kɨnɨnnakere. Sare' kɨrɨ' A'mweraavɨne Kaimɨraayainyɨ mɨnyagɨnya dɨhaihɨsa'neba kuneinyɨ. (Anga se wa'dɨnya' kuneinyɨ. Nɨmɨ sareinyɨna ‘Mɨdɨnɨma!’ dɨzaigɨ se waryaba sɨmunya yune'na yawɨra'gɨzɨ dɨnyɨmɨdɨnaama!)” 21Wɨdakegaa' mɨdɨnya'ne pwai wɨdɨna “Naangeigɨ, mɨdɨnya'na tewaanya' dɨngaka nɨnnya nɨmwarɨ tɨvi'na maralɨkiraka'mujɨyagaa'na?” 22Sare' Jizaazai wɨdɨna “Kanyɨmɨdɨna'gɨzɨ manyɨmɨdɨnyadɨvɨsara bainɨkerabɨsara balyaraavɨ sara lɨkirakɨpɨka! Kuna nyɨmɨdɨnaama!”
Jizaazai yɨhuta naangevɨ se dakake'nesɨ.
(Maakɨ 4:36-41; Lukɨ 8:22-25)
23Aalɨbunyavɨ a'ba sɨpɨya' warakevɨ sai yɨlamwaaina kya' gamɨre mɨdɨdɨvɨsara mɨdɨdɨvɨ' yɨlamwaaina kye' aalyavɨ makuna. 24Aalyavɨ makuna yadaa'nyɨ, yɨthaanyi, yɨhu'maanarya naange' yɨna yaka sɨpɨyavɨ aalɨmavajɨnaaka mɨladathɨvaina yɨna yadaa'nyɨ kɨrɨ' sai se warɨna. 25Se wa'dɨ'nyɨ wɨna yeva yɨdɨkaa'na yeva yarai wɨdɨna “Naangeigɨ! Dɨnevadaihasamaaka! Yɨwawaade'na yɨwona!” 26Yarai wɨdɨna kye' wɨdɨna “Lɨke' baa'na yɨvanɨgava! ‘Gotɨyai nayaa mamaremwaalyɨ neyadelyɨ,’ lɨmwamanɨgasaihi daaka!” Sara wɨdɨna yaka daavɨna yaka yɨhusangɨjɨ aalɨmavajɨnaakengɨjɨ maanga wɨdɨna. Maanga wɨdɨna yake'na yɨhusa myɨna, aalya' ayahi kave dathɨvaaina ya'. 27Kave dathɨvaaina kya' a'mwera atɨka maru'nakulɨna yeva dɨnyɨna “A'mwe dazai beibɨtalaka? Yɨhusasɨ aalyasɨ gamɨre yagaalya' nebwi kadɨka yɨna yɨwakeva?”
Jizaazai yɨmaka kɨnɨnnakeraarɨ yavada'galake'nesɨ.
(Maakɨ 5:1-17; Lukɨ 8:26-37)
28Aalɨbumaangevɨ pimagɨ Gathaara mwaalyaraavɨre kwaakevɨna sai yɨ'mavaawɨna. Sahɨba a'mweraai yɨmakera kɨnɨnnakeraai mwaalɨna. Saraai gɨlekavi'nɨnnyaba mwaalɨna. Saraai sɨgyaarya yɨma'nadisaraai mwaalɨna. Sarevɨdaa'nyɨ a'mwera tutaanya saba kaanya myamaryadɨvɨsare. Sareraai gɨlekavi'nɨnnyabadaa'nyaraai gamɨnyɨ burata'nyɨna. 29Burata'nyɨna yagɨla, yɨthaanyi, jaka wɨdanganna “Nemɨnyɨ gara dɨneyɨde'neka! Gotɨyare Kaimɨraayaigɨ, Yawɨbwasagaa' yɨrɨka aayarɨ' mavurinanyɨra! Davanna bɨwaanya' sɨnnawɨ nemɨnyɨ sagaa'ne daanga wɨjaaya'neigɨ davɨwaana! Yɨrɨka sarɨ' aawano.” Sara wɨdahi. 30Sagaa' yaawarya kwalaalya naanga menya kɨbaweba mwaaleva kurɨvaarɨya tɨka nɨdaa'nyɨna. 31Tɨka nɨdaa'nyɨna yadaapɨjɨ yɨmakera Jizaazarɨ dɨragɨnna yɨdaanganna “Nabaai, nedaasɨja', yɨ yaawarɨkwala dazavɨ yɨkulaade'na dɨnedaasɨdeigɨnyɨ.” 32Sara wɨdɨna kye' Jizaazai wɨdɨna “Kaanna dɨwila!” Yɨthaanyi, sagaa' a'mwe saraarɨ yagalya'ma'na yɨna yeva yaawaryaraavɨ kusawɨ wɨlɨna yɨna. Wɨlɨna yɨna kye', yɨthaanyi, yaawarya yuya dazara kaanyave'na walaawɨna yɨna ye' davaanyaba. Davaanyaba walaawɨna yɨna yeva aalɨbunyavɨ walaraawɨna yeva aalyavɨ baihulaawɨna ye'.
33Yaawaryara balɨna kye' sagaa' yaawaryaraavɨ maremwaaidɨvɨsara lɨkaanya wɨna. Sara yeva kumɨre anga naangebanna yɨ'mavaawɨna yeva yagaala yuya daza wɨjɨwaakɨna yɨna ye'. A'mweraai yɨma'nakeraarɨ yaka sabwina bazɨwɨna. 34Bazɨwɨna kye' anga naanga sabanyara Jizaazarɨna bavɨramaa'na. Sahwarɨna bavɨramaa'na yeva yagaala dɨragɨnna yɨdaanganna “ ‘Kwaaka nemɨre dava yagalya'mavojɨ kwaaka pɨwɨnna kaanna yɨna yana!’ kadɨwo sara ja!”
موجودہ انتخاب:
Matɨyui 8: byr
سرخی
شئیر
کاپی
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.