Jenɨzɨzɨ 28
28
Aazakɨ Jaikopɨmɨ Aaranɨ angewɨnna wɨdasaa'.
(27:41–28:5)
1-5 Jaikopɨ sara kya' Yɨzore sɨnna tɨka naanga kudava' da' “Jaikopɨmɨ mala tamɨdeinyɨra.” Yawɨta sara kya' Revekaa' dara wanganake' “Yɨzoi Jaikopɨmɨ mala tamadei daaka!” Daka “Jaikopɨmɨ pɨbanna wɨdaasɨma!” da'. Mi'na daka Aazakɨmɨ wɨda' “ ‘Yɨzoi a'mwe Etɨyawaarɨ maarake'ne' Jaikopɨ sara nyadɨka!’ dena gɨthɨwano.” Tɨvi'na kuda' Aazakɨ Jaikopɨmɨ jaka wɨdɨna yaka yagaala tewaanya' wɨdaka wɨdɨna “Kainanɨ mwaalyavɨ mamaa'dɨnnera! Laivanɨ jaakaangere kaimɨraaya' dɨmaa'deigɨnyɨ. Gotɨyai kaimɨraaya naanga gɨzaavadeigɨnyɨ. Gotɨyai Evɨraamɨmɨ wɨda' ‘Kwaake' gɨzaavɨdeinyɨ.’ Wɨdaka kwaaka dava gɨmɨnyɨjɨ gɨmɨre kaimɨraayaraavɨjɨ saihɨrɨne yɨhɨzaavadesɨra.” Aazakɨ mi'na wɨdɨna kya' Jaikopɨ kwaaka Aaranɨ sawɨ Laivanɨ mwaalakewɨnna wawa'.
Yɨzoi a'mwe pɨrɨsɨ maryaa'.
(28:6-9)
6-9Yɨzoi sara wɨ'naka “Nɨmaamaangei Kainanɨ mwaalyanna ‘A'mwe tewaanya mɨ',’ sa'bɨta yawɨ'mwa,” daka Evɨraamɨre gawaalɨ' Yɨzɨmelɨmɨre taaya' maara'.
Betelɨ Jaikopɨ waja ya'nyaa'.
(28:10-22)
10-22Jaikopɨ “Kwaaka Aaranɨ sawɨnneinyɨ,” daka kaanna wɨna yakegaa' pɨba se wa'mwaraka waja ya'nyɨna yaka dara wanganake' “Kɨnnaanya yɨravamakinɨke' kwaakevɨdaasa' yune sɨgunyavɨnanya' daaka!” Gotɨyare mamaaya ejelɨyara walaabɨna, yɨlaabɨna yadaapi wangana'. Sara kwangana' Gotɨyai wɨda' “Nɨmɨ Gotɨyainyɨra. Evɨraamɨjɨ Aazakɨjɨ saraai nyu'nagi. Kwaaka da' gɨmɨjɨ gɨmɨre kaimɨraayarajɨ yɨhɨzaavɨdesɨ. Gɨmɨre kaimɨraayara kwala naanga yɨma'napɨjɨ kwaaka davɨ yunebanna mwaaibɨ'dengɨ. Gɨmɨjɨyaraavɨna a'mwe kwaakevakɨ mwaaibɨzaraavɨne tewaanna yɨdeinyɨ. Gɨmɨjɨ wawakwoihɨri dava ayawɨnna yagalaawɨna yakwolyɨ bakadeinaalyɨ. Nɨmɨre yagaalya' nebwi gɨthɨwa.” Mi'na kuda' Jaikopɨ dɨkaa'na yaka da' “Gotɨyai dava mwaaidɨsɨ myawɨriwana. Davadaasɨ sɨgunyavɨnanyasɨra. Nɨmɨ lɨka yɨwana.” Yɨrɨke' kavura' Jaikopɨ daavaka sɨla yɨrɨ'mata dɨhaihɨsai yawɨta'nei yɨda'na marɨdaakwa'. Marɨdaakuna yaka “Dava Betelɨ (Gotɨyare angeba dɨnɨkesɨ),” daka welivananya' dɨngɨna ya' Gotɨyarɨna. Sara yaka Gotɨyarɨ wɨda' “Nɨmɨjɨ kwawakwolyɨ, wapaaya nɨgwɨlalaaka yɨvɨta nyɨjaava'gɨzɨ nɨmware angewɨnna ayawɨnna kanyɨmakaba'gɨri gɨmɨrebwi yɨdeinyɨ. Gɨlyɨvɨta ata yuyɨraai kanyɨjaava'gɨzɨ ayawɨ pɨrɨ'na gɨzaavɨdeinyɨ. Yuyagaa' yuyagaa' pɨrɨ'na, pɨrɨ'na gɨzaavɨdeinyɨra.”
موجودہ انتخاب:
Jenɨzɨzɨ 28: byr
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2013, Wycliffe Bible Translators, Inc. All rights reserved.