Jenɨzɨzɨ 24
24
Aazakɨ a'mwe' maryaa'.
(24:1-67)
1-9Evɨraamɨ a'mwe nei mwaalaka gannya wawɨnya wɨdaayade naangerɨ jaka wɨdaka wɨdɨna “Nɨmɨre kaimɨraayarɨne a'mwe' dumaaridera. Kainanɨ mwaalyaraayawɨnna munnera! Nɨmɨre avaalyaraayawɨnna kaanya wawa'gɨzɨ dɨmaraawɨde. Yagaala naanga' Gotɨyaryaba ‘Evɨraamɨgɨ nyɨdɨwaanya' sara yɨdeinyɨra,’ nyɨdana!” Wɨdɨna kya' wawɨnya wɨdaayadei yagaala Evɨraamɨ wɨdake wɨda' “A'mwe' ‘Sabanna kaanna mwɨyɨ yɨde'nyɨ,’ kanyɨdozɨ gamɨre kwaakevɨna Aazakɨmɨ makabɨna yɨdeinyɨ da?” Sara kuda' Evɨraamɨ wɨdɨna “Arɨkawɨnyɨra. Nɨnnya kaimɨraayai mamakunnera! Gotɨyai gannya mamaayarɨ yaasɨna kyojɨ gamɨ gɨmɨnyɨne tewaanna yadelyɨra. A'mwe' ‘Aalo,’ kadozɨ, ‘Kaanya muwɨnera!’ kagɨthozɨ gɨmɨre wawɨnya mi'nanyɨra. Waramaryana!” Mi'na wɨdɨna kya' wawɨnya wɨdaayadei wɨda' “Gɨmɨ dɨwaanyabwi yɨdeinyɨra.”
10-14Evɨraamɨmɨre wɨdaayadei kaanya wawaka narɨnna, nɨgwia, gɨlyɨvɨta naanga maaraka kaamelɨya atɨraalyangɨ gɨlyɨvɨsa yɨlamarakaka kaanna makuna. Makuna yaka kwaaka Mezapotemɨyana yɨ'mavaawɨna yaka angeba Aaranɨ aalɨkavi'nɨnnyayaba mwaalɨna. Gamɨre kaamelɨyara sɨvɨla tɨka'na aalɨkavi'nɨnnyayaba mwaalɨna. Mwaalɨna kya' Evɨraamɨmɨre wɨdaayadei Gotɨyarɨ wɨdɨna “Gotɨyaigɨ, Evɨraamɨmɨne tewaanna yɨja' gɨmɨre asɨrɨna wɨma! Davanya sɨdɨraaya aalɨkavi’ nɨnnyavɨna kulaabapɨjɨ sɨdɨraaya pɨrɨ' kulaabozɨ ‘Aalya' dɨnyɨrya!’ sara kuda'mujɨ aalya' nyɨryojɨ nabaai nɨmɨre kaamelɨyaraavɨne aalya' kwiryojɨ yawɨ'na yɨdera ‘Aazakɨmɨne' daaka a'mwe dava!’ dɨdeinyɨra,” wɨda'.
15-25Gotɨyarɨ wɨdadaa'nyɨyagaa' sɨdɨraaya Revekaa' aalya'na bɨna. Sɨdɨraaya sa' nawɨ'nya' kwala mamaarya' mwaalɨna yakesɨ. Evɨraamɨmɨre wawɨnya wɨdaayadei wanganaka wɨda' “Aalya' nyɨryaama! Nɨma!” Mi'na kuda' Revekaa' aalya' yarai yɨrɨna yaka wɨjaavɨna. Sara yaka wɨda' “Nabaai gɨmɨre kaamelɨyaraavɨne aalya' pɨrɨsɨ wirima!” Sara wɨdake' yadaa'nyɨ Evɨraamɨmɨre wɨdaayadei tɨnna wangana'. Revekaavɨne sɨnna kadɨtaavarya gɨlɨraka wɨjaavɨna yaka wɨda' “Gɨmaamaangei aaihware'gɨnaka? Gɨmaamaangere angevɨ gavinyavɨ nɨmɨ mwaalɨdeinyɨ dɨngaka?” Kuda' Revekaa' wɨda' “Betɨyɨwelɨmɨre'nyɨra. Naawomɨ balaange' Milɨkaa' gamɨzai mɨla'. Nɨmware anga wapaaya wa'devɨ dɨmwaaideigɨnyɨra,” wɨda'.
26-27Evɨraamɨmɨre wɨdaayadei “Gotɨyai naangeigɨnyɨ,” daka tuta'nyɨna yaka wɨda' “Evɨraamɨ gu'nadelyɨra. Nyɨmaremwaaiderɨne tewaanna yagɨna gamɨjɨ avaalyaraavɨna nyɨbwarɨdakɨwaana,” wɨda' Gotɨyarɨ.
28-31Revekaa' “Nɨwaavɨ wɨdɨma!” daka kaanyɨve'na wɨna. Dɨvi gathaakaangei Laivanɨ aalɨbunyayabanna baka wɨda' “Ata bwa'naka! Kaajo! Nemɨre angevɨ tewaanya yɨwevɨ dɨmwaalo!” Sara kuda' Evɨraamɨmɨre wɨdaayadelyɨ Laivanɨjɨ wawagi.
32-49Laivanɨ kaamelɨyaraavɨne wapaaya wɨmaarina yaka aalya yɨnya'nesɨ wapaayajɨ maarɨna yaka Evɨraamɨmɨre wɨdaayaderɨ wɨjaavɨna ya'. Wɨjaavɨna kya' sa' wɨdaayadei wɨdɨna “Sɨnnawɨ sagaa' ‘Nɨmɨ wɨlaabena nɨmɨre wawɨnya' berɨvaka?’ dena dɨnyu'nyi! Nɨmɨre dɨwɨjavɨ kanyu'napɨjɨ nɨmɨ wapaa nɨdera. Evɨraamɨmɨre wawɨnya wɨdaayadɨnyainyɨ naangeinyɨ Gotɨyai Evɨraamɨmɨne tewaanna kya' gɨlyɨvɨkɨravɨnakelyɨra. Seraasɨ Evɨraamɨjɨ a'mwe neyoi kyɨma'nagi Seraa' kaimalei kamɨla' kaimalerɨ Aazakɨ yaya' wo'na'. Evɨraamɨ kabalojɨ Aazakɨ gɨlyɨvɨta yuya maaradelyɨra. Evɨraamɨ nyɨda' ‘Kaanna wɨja' nɨmɨjɨ avaalyaraavɨreba Aazakɨmɨne a'mwe' dɨvɨramaa'! Gotɨyai gɨhaimwagadeigɨnyɨra. A'mwe' kagɨthozɨ “Kaanna mwɨyɨ yɨde'nyɨ,” wawɨnya gɨmɨre' mɨ',’ sara nyɨda' Evɨraamɨ. Nɨmɨ aalɨbunyayabanna bena Gotɨyarɨ wɨdɨwa ‘Aazakɨmɨre balaanga' yɨma'nadevɨ nyɨbwarɨdaakwia!’ Kudɨwa Gotɨyai Revekaavɨ nyɨbwarɨdaakwɨwa'. Evɨraamɨmɨre gawaalɨvɨne a'mwe' Revekaa' dumaarijɨwaai? ‘Nɨmɨ yawɨrɨde'na kɨrɨmɨre sɨmunya yawɨ'dita nyɨjɨla!’ Nɨmɨ yɨhu'nɨma!” wɨdɨna ya'.
50-61Revekaavɨre ganɨmaangei Betɨyɨwelɨjɨ Laivanɨjɨ sanɨdaai wɨdahi “Gotɨyai dara yake' naarɨmɨ yagaala madakanera! Revekaavɨ dɨmakwona!” Mi'na kudahi Evɨraamɨmɨre wɨdaayadei gɨlyɨvɨta naanga yanga muda'. Mwanyavɨ “Nɨmɨ wɨma!” dadaa'nyɨ Revekaavɨre ganaangesɨ gathaakaangelyɨ wɨdahi “Dava sawɨta atɨraai mwaalakɨri dɨwidewaaihɨlyɨ.” Sa' Evɨraamɨmɨre wɨdaayadei wɨda' “Aala. Dahaa' kaanna wɨdera.” Sara kuda' Revekaavɨ wɨdahi “Dahaa' gamɨjɨ dɨwijɨwaai?” Revekaa' wɨda' “Nɨmɨ kaanna wɨdera.” Sara kuda' gya'mwelyɨ ganaangesɨ sawaai wɨdahi “Gɨmɨ kaimɨraaya kwala naanga maa'dɨzara kunnya yɨkamaangeraavɨ maremwaaibɨ'derera.” Mi'na kudahi Evɨraamɨmɨre wɨdaayadei Revekaavɨjɨ gamɨre wɨdaayadɨvɨsangɨjɨ maarɨna kya' kumɨ kaanna wɨna ye'.
62-67Pɨgaa' sawɨsaburɨ Aazakɨ wawɨnyavɨ mwaalaka dara wanganake' “Kaamelɨyara keibanna jɨnɨgava!” Aazakɨ wangadaa'nyɨ Revekaa' gamɨzarɨ wanganaka bwalaawɨna yaka Evɨraamɨmɨre wɨdaayaderɨ wɨda' “A'mwei aaihwalaka?” “Aazakɨ gɨmɨre kwalaangelyɨra.” Sara kuda' Revekaa' kawaaka yɨ'na'. Wɨdaayadei Aazakɨmɨ gamɨ yake' wɨda'. Mi'na kuda' Aazakɨ Revekaavɨ gannya angevɨ wɨmwaaihɨna kya' a'mweyoi mwaalagi.
موجودہ انتخاب:
Jenɨzɨzɨ 24: byr
سرخی
شئیر
کاپی
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.