Jenɨzɨzɨ 20
20
Evɨraamɨ Avimɨlekɨmɨ kwaasɨ wɨjaa'.
(20:1-18)
1-7Evɨraamɨ Yɨ'darya Maamɨredaa'nyɨ Kwaaka Geraanei kaanna wɨna ya'. Wɨna yaka ayagaa' a'mweraavɨne'na lɨka yaka wɨda' “Seraa' nya'mwesɨra.” Sara kuda' Avimɨlekɨ Geraa maremwaaidei Seraavɨ gannya angevɨ waka'. Sawɨta sagaa' waja' kya'na' Gotɨyai wɨda' “A'mwe pware balaange' ma'mwaana. Sayaba dɨvaideigɨnyɨra.” Avimɨlekɨ Seraavɨ kwala mamaaryaka Gotɨyarɨ wɨda' “Nɨmɨnyɨjɨ nɨmɨre maremwaaidɨnyaraavɨjɨ dɨramakɨjɨwaana? Evɨraamɨ nyɨdɨwa'dɨ' ‘Gamɨ nya'mwesɨra.’ Nabaai Seraa' nyɨdɨwa'dɨ' ‘Evɨraamɨ nya'mwelyɨra.’ ” Wɨdɨna kya' Gotɨyai wɨda' “Sa' yawɨ'mwa. Gɨmɨnyɨne ‘Avimɨlekɨ kayaa'na nyadɨ'! Seraavɨ mamaarannera!’ dena navɨka gɨmwaaihe. Evɨraamɨmɨne Seraavɨ ayawɨ dumaarya! Gamɨ sai nɨmɨnyɨne wɨdadelyɨra. Gamɨ ‘Avimɨlekɨ nabaladɨka!’ dozɨ Gotɨyainyɨ yagaala nyɨdathera,” wɨda' Gotɨyai.
8-18Mwanyavɨ Avimɨlekɨ Evɨraamɨmɨ jaka wɨda' “Kaajo!” Evɨraamɨ kaba' wɨda' “Nemɨ gɨmɨnyɨne kayaa'na myadaanyainera. Sa' baa'nebwi yɨvanɨgɨna?” Sara kuda' Evɨraamɨ wɨdɨna “ ‘A'mwe davanyara Gotɨyareburɨ myadɨvɨsarera,’ dena ‘Seraa' nya'mwesɨra,’ yɨhɨthɨwa'deinyɨ. ‘Nyɨramakɨpɨ'de'na Seraavɨ maapɨ'dera,’ dena yɨhɨthɨwa'deinyɨ. Gamɨza' nɨmware taaya' mwaalaka nɨwaavɨre taaya' mamwaalyɨ kya' nɨmɨ maare.” Mi'na wɨdɨna kya' Avimɨlekɨ Evɨraamɨmɨna Seraavɨ wɨjaavɨna ya'. Nabaai wawɨnya yadɨvɨsaraavɨjɨ jɨlɨkyaawaryaraavɨjɨ wɨjaavɨna ya'. Wɨjaavaka wɨda' “Dava nɨmɨre kwaake' warɨkeba gɨmɨre kunyavɨdaa'nyɨ ‘Gɨmɨre kwaaka warɨkeba mwaalɨma!’ da'gɨzɨ dɨmwaala!” Avimɨlekɨ sara kuda' Evɨraamɨ Avimɨlekɨmɨna Gotɨyarɨ kuda' Gotɨyai gamɨnyɨjɨ gannya a'mwengɨjɨ tewaanna ya'. Mi'na kya' aya'na Avimɨlekɨmɨre a'mwe kaimɨraayangɨ mɨle'.
موجودہ انتخاب:
Jenɨzɨzɨ 20: byr
سرخی
شئیر
کاپی
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.