Ndumba 10
10
A yor aduveina ki kawei ma hapma
1Ma didina mi de mi Moise ala: 2Ang yor kawei ma hapma aduveina mbà, ang yorozi ni ki kawei ma hap ma a bed’ema. A mba ndjunung á yi ablaud’a hi Israel-lîd’a, á hô kangâ mi. 3Ata yima a bu aduveina abo tazi tuna, ablaud’a hi Israel-lîd’a ti tok geveng avun zlub’u d’a ngaf tad’a. 4Le a bu adifa ni tu go ni, suma nglo suma avok ablaud’a hi Israel-lîd’a a tok geveng ni aziya. 5Le azi but ad’enga kikingû ni, suma a ve kangâ abo ma yorogonina a tchol id’a. 6Le a but ad’enga yazi á mbàd’a ni, suma a ve kangâ abo ma sutnina a tchol id’a. A mba but ad’enga ni yam i mazid’a. 7Wani le azi but ná tok ablaud’a ni, a but ad’enga d’i.
8 Ma ngat buzuna Aron groma a but ni aziya; ti arî gat ta didinda kagi kur atchogoi magi d’a lara ge pet.
9Fata agi tchologi kur ambas magid’a á igi dur ayîna ki magi suma djangû suma a mba ndagi ayînina, agi mba bugi adifa ad’enga kiking. Hina wani, an Ma didina Alo magina mba ni djib’er kagi ni sud’ugi woi abo magi suma djangûna mi. 10Kur bur magi ma furîd’a, kur vun til magi ma tetengâ d’oze kur deîd’a hi tilîd’a, agi bugi adifa ata yima agi hagi ahle suma ngat buzu suma ngala kahle suma ngat buzu suma zlap darigïd’ina. Hina wani, an Ma didina Alo magina mba ni djib’er kagiya. An ni Ma didina Alo magina.
ISRAEL-LÂ A TCHOL HUR FUL MA SINAI-NA Á ID’A
(10.11—21.35)
Israel-lâ a tchuk tazi id’a
11Kur bur ma dok mbàna hi til ma mbàna ma kur biza d’a mbà d’a azi buzugï woi kur Ezipte-d’ina, d’ugula tan ndei yam zlub’u d’a zandu’â hAlonina mi nga kuad’a. 12Israel-lâ a tchol kur ful ma Sinai-na a nde id’a d’igi a hazi vuna á id’a na. D’ugula ti i tchol hur ful ma Paran-na. 13Wana ni i mazi d’a avoka yam vun ma hed’a hi Ma didinina d’igi mi hazizi avun Moise na.
14Ades ma dur ayî ma mi tok ad’u drapod’a hi Juda-d’ina, mi tchol id’a avo’î mamu. Ma ngol ma avok suma hi Juda-nina ni Nason Aminadap goroma. 15Ma ngol ma avok suma hi Isakar-rîna ni Netanel Suwar goroma. 16Ma ngol ma avok suma hi Zabulon-nina ni Eliyap Helon goroma.
17A hô zlub’ud’a woyo. Suma hi Gerson-na ki suma hi Merari-na a i yo zlub’ud’a.
18Ades ma dur ayî ma mi tok ad’u drapod’a hi Ruben-ndina, mi tchol id’a. Ma ngol ma avok suma hi Ruben-nina ni Elisur Sedewur goroma. 19Ma ngol ma avok suma hi Simeon-nina ni Selumiyel Surisadai goroma. 20Ma ngol ma avok suma hi Gad-nina ni Eliyasaf Dewel goroma.
21Suma hi Kehat-na a tchol id’a, a yo ahle suma kur zlub’ud’a suma a tinizi irazi vazina. Suma hi Levi suma dingâ a ve zlub’ud’a akulo á djup mbad’a hi suma hi Kehat-nid’a.
22Ades ma dur ayî ma mi tok ad’u drapod’a hi Efraim-mbina, mi tchol id’a. Ma ngol ma avok suma hi Efraim-mina ni Elisama Amihut goroma. 23Ma ngol ma avok suma hi Manase-nina ni Gamliyel Pedasur goroma. 24Ma ngol ma avok suma hi Benjamin-nina ni Abidan Gidoni goroma.
25Ades ma dur ayî ma mi tok ad’u drapod’a hi Dan-ndina, mi tchol id’a bugol kis. Ma ngol ma avok suma hi Dan-nina ni Ahiyezer Amisadai goroma. 26Ma ngol ma avok suma hi Aser-rîna ni Pagiyel Okran goroma. 27Ma ngol ma avok suma hi Neftali-nina ni Ahira Enan goroma.
28Wana ni id’a hi Israel-lîd’a, a i nata lovod’ot lovod’ot ad’u ades mazi ma dur ayîna. Ni hina ba, a iya.
Moise mi hal sama tagazi lovota á titina
29Moise mi de mi Hobap Rewel ma Madiyan ma akunoma goromina ala: Ami nga imi yam ambas sa Ma didina mi hle vunam kat ala: An mba hagiziya d’a, ang mbei i ki sed’emiya. Ami mba lang djivi d’a Ma didina mba mi lat mi Israel-lîd’a.
30Hobap mi hulong dum ala: An min i d’i! An i ni yam ambas manda aduk simiyênu.
31Moise mi dum ala: An nga ni tchenengû, ang wal ki sed’emi d’i, kayam ang we yima ami mba vami kangâ abagei hur fulîna, ang mba mbut ni sama tagami lovotina. 32Le ang i ki sed’emiya ni, djivi d’a Ma didina mba mi lamizid’a, ami mba langzi mi ang na mi.
33A tchol yam ahinad’a hi Ma didinid’a a i á tit burâ hindi. Zandu’â hi Ma didinina nga mi i avorozi á hal yima azi tuk tazi kuana. 34Ata yima azi hô kangâ á id’ina ki faleid’a, d’ugula hi Ma didinid’a nga tchola avorozi gongzong.
35Ata yima zandu’â mi tchol á id’ina, Moise mi dala: Ma didina, ang tchol akulo! Ar mang suma djangûna a ndjoî woyo, ar suma a noyôngâ a ring ngei avorong mi!
36Ata yima a tinim kä na, Moise mi dala: Ma didina, ang mbeï aduk ablau Israel suma mimiyâk wana!
موجودہ انتخاب:
Ndumba 10: BA
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Azumeina Bible © Alliance Biblique du Tchad, 1999.