San Mateo 4

4
Aña oha'ã vai ramo guare Jesúspe
(Mc 1.12-13; Lc 4.1-13)
1Upe rire Espíritu ogueraha Jesúspe yvy ojeiko'ỹháme, upépe Aña oipy'a ra'ã haguã chupe.#Heb 2.18; 4.15.
2Ohasa 40 ára ha pyhare pukukue ho'u'ỹre mba'eve, upe rire iñembyahýi. 3Upépe Aña oñemboja Jesús rendápe oipy'a ra'ã haguã chupe, ha he'i:
—Nde ramo añete Tupã ra'y, ere ko'ã itágui toiko mbujape.
4Ha Jesús katu ombohovái chupe ha he'i:
—Ñandejára Ñe'ẽme he'i: “Ndaha'éi tembi'u añónte oikotevẽva yvypóra oikove haguã, opa ñe'ẽ Tupã jurúgui osẽva rehe avei oikotevẽ.”#Dt 8.3.
5Upéi katu Aña ogueraha chupe táva marangatu Jerusalénpe, ha ohupi chupe pe Tupao ijyvatevehápe, 6ha he'i chupe:
—Nde ramo añete Tupã ra'y, ejepoi oakãvo. Ñandejára Ñe'ẽme niko he'i:
“Tupã he'íta hemimbou kuérape
oñangareko haguã nde rehe.
Ipópe ha'e kuéra nde rupíta,
ani haguã reñepysãngánte jepe.”#Sal 91.11-12.
7Jesús katu he'i chupe:
—Ñandejára Ñe'ẽme niko he'i avei: “Ani reipy'a ra'ã Tupã nde Járape.”#Dt 6.16.
8Ipahápe, Aña ogueraha chupe peteĩ yvyty ijyvatéva ru'ãme. Ha upégui ohechaukapa chupe umi tetã yvy arigua, ha umi mba'eta ipype oĩva. 9Ha he'i chupe:
—Ame'ẽmbáta ndéve ko'ã mba'e, reñesũ ramo che renondépe ha che momba'e guasu.
10Jesús katu he'i chupe:
—Tereho ko'águi Sataná. Ñandejára ñe'ẽme niko he'i: “Tupã nde Jára renondépe reñesũ vaerã, ha chupe añónte remomba'e guasu vaerã.”#Dt 6.13.
11Upépe Aña oheja chupe. Ha oguahẽ Jesús rendápe Tupã remimbou kuéra*f** oúva oipytyvõ haguã chupe.
Jesús oñepyrũ hembiapo Galiléape
(Mc 1.14-15; Lc 4.14-15)
12Jesús ohendúvo Juan oñemyakãsã hague,#Mt 14.3; Mc 6.17; Lc 3.19-20. oho jey yvy Galiléape. 13Osẽ táva Nazarétgui ha oho opyta Cafarnaúmpe,#Jn 2.12. peteĩ táva oĩva yguasu rembe'ýpe, Zabulón ha Neftalí ñemoñare kuéra ypýpe. 14Upéva ojehu oiko haguã hekoitépe umi mba'e maranduhára Isaías omoĩ vaekue kuatiáre he'i ramo:
15Zabulón ha Neftalí
ñemoñare kuéra yvy
opytáva yguasu gotyo
ysyry Jordán mboypýri!
Nde, yvy Galiléa,
ambue tetãgua oikohápe!
16Umi yvypóra nde pypegua,
oiko vaekue pytũmbýpe,
ohecha tesape tuicháva.
Tesapeha peteĩ ohesapéva
umi omanóma vaekuéicha
oikóvape.#Is 9.1-2.
17Upe guive Jesús oñepyrũ oñemoñe'ẽ ha he'i:
—Pejevy Tupã gotyo. Hi'aguĩma hína ñesãmbyhy yvágagui oúva.#Mt 3.2.
Jesús ohenói irundy pira renohẽhárape
(Mc 1.16-20; Lc 5.1—11)
18Jesús oguata jave oikóvo yguasu Galiléa rembe'y rupi, ohecha mokõi ojoryvýpe, Simón hérava avei Pedro ha Andréspe. Ha'e kuéra niko pira renohẽha, ha oity hína hikuái pyaha ýpe. 19Jesús he'i chupe kuéra:
—Peju che moirũ, ha che pombo'éta penohẽ haguã pende rapichápe jejopy vaígui.
20Upepete voi oheja hikuái umi pyaha, ha oho hendive.
21Ha Jesús ohovévo upégui, ohecha jey mokõi ojoryvývape, Santiago ha Juan, Zebedeo ra'y kuérape. Ha'e kuéra oĩ hína itúva ndive ha omyatyrõ umi irréd kuéra kanóape. Jesús ohenói chupe kuéra, 22ha upepete voi oguejy hikuái ikanóagui, oheja itúvape, ha omoirũ Jesúspe.
Jesús ombo'e hetápe
(Lc 6.17-19)
23Jesús oiko yvy Galiléa rupi, ha oporombo'e umi judío kuéra tupao rupi. Ha'e omoherakuã marandu porã oñe'ẽva Tupã sãmbyhýre. Hetápe avei omonguera opaichagua mba'asy ha mba'e vaígui.#Mt 9.35; Mc 1.39. 24Jesús herakuã opa rupi yvy Siria tuichakue. Ha ojegueru chupe opaichagua hasýva ha hete rasýva, umi mba'epochy poguýpe oikóva, itarováva ha umi ijapapágui oguata'ỹva. Ha Jesús omonguera chupe kuéra. 25Heta oĩ ohóva Jesús rapykuéri Galiléagui, Decápolis, Jerusalén, Judea ha Jordán mboypýrigui.

موجودہ انتخاب:

San Mateo 4: GPC2006

سرخی

شئیر

کاپی

None

Want to have your highlights saved across all your devices? Sign up or sign in

YouVersion آپ کے تجربے کو ذاتی بنانے کے لیے کوکیز کا استعمال کرتا ہے۔ ہماری ویب سائٹ کا استعمال کرتے ہوئے، آپ ہماری کوکیز کے استعمال کو قبول کرتے ہیں جیسا کہ ہماری رازداری کی پالیسیمیں بیان کیا گیا ہے۔