San Mateo 17
17
Jesús ojotopa Moisés ha Elías ndive
(Mc 9.2-13; Lc 9.28-36)
1Upe rire, 6 ára haguépe Jesús ogueraha Pédrope, ha Santiago ha tyvýra Juánpe, ha ojupi hikuái peteĩ yvyty ijyvatéva ru'ãme. 2Upépe henondépe kuéra, Jesús rete oñemoambue ohóvo. Hova oñepyrũ omimbi kuarahýicha, ha umi ijao katu morotĩ sakã ha ojajaipa. 3Ha peichahágui katu ohecha Moisés ha Elíaspe, oñemongetáva hína Jesús ndive. 4Upépe Pedro he'i Jesúspe:
—Che Jára, iporãite niko ikatúre roime ko'ápe. Reipotárõ ajapóta peẽme pene rendaguã, peteĩ ne mba'erã, peteĩ Moiséspe guarã ha Elíaspe guarã avei.
5Pedro oñe'ẽ aja, ou peteĩ arai omimbipáva ha ojaho'i chupe kuéra. Pe araígui oñehendu peteĩ ñe'ẽ he'íva:
—Kóva hína che Ra'y ahayhuetéva, che aiporavo vaekue.#Gn 22.2; Sal 2.7; Is 42.1; Mt 3.17; 12.18; Mc 1.11; Lc 3.22. Pehendu chupe.#Dt 18.15; 2 Mac 2.8.,#2 P 1.17-18.
6Hemimbo'e kuéra ohendúvo upéva, oñesũ omboja peve hova yvýre, okyhyjégui etereígui. 7Jesús katu oñemboja hendápe kuéra. Ha opokóvo hese kuéra he'i:
—Pepu'ã, ani pekyhyje.
8Ha ojesarupívo, ndohecha véima avavépe. Jesús ha'eñoha mante ohecha.
9Oguejykuévo pe yvytýgui, Jesús he'i chupe kuéra:
—Aníke pemombe'u avavépe ko pehecha vaekue che, yvypóraicha aju vaekue, aikove jey peve omanóva apytégui.
10Hemimbo'e kuéra oporandu Jesúspe:
—Mba'ére piko umi Moisés rembiapoukapy mbo'eha he'i Elías ou raẽ vaerãha?#Mal 3.23.
11Jesús he'i chupe kuéra:
—Añete niko Elías raẽ ou vaerãha, ha ha'e omoĩmba porã vaerã opaite mba'e hekópe. 12Ha che ha'e peẽme, Elías oúma hague ha avave ndoikuaái hague chupe.#Mt 11.14. Upévare ojapo hikuái hese opa ojaposéva. Péicha avei che, yvypóraicha aju vaekue, ahasa asýta ipópe kuéra.
13Upépe ae, hemimbo'e kuéra ohecha kuaa Jesús oñe'ẽ hague chupe kuéra Juan Bautista rehe.
Jesús omonguera peteĩ mitã kuimba'e oĩva mba'epochy poguýpe
(Mc 9.14-29; Lc 9.37-43)
14Oguahẽvo hikuái opavave oĩháme, oñemboja Jesús rendápe peteĩ karai, oñesũ henondépe ha he'i chupe:
15—Karai, eiporiahurerekomína ko che ra'ýpe. Imba'asy ojopy jave chupe niko oity jepi chupe ha upévare oiko asyeterei. Hetáma péicha ho'a tatápe térã ýpe. 16Agueru kuri ne remimbo'e kuérape, ha ha'e kuéra ndaikatúi omonguera.
17Jesús he'i upémarõ:
—Há, tekove jerovia'ỹ! Araka'e peve piko aiméta pene ndive, araka'e peve piko aikóta pende reheve? Peru chéve pe mitã rusu.
18Upépe Jesús oñe'ẽ hatã pe mba'e pochýpe, ha omosẽ pe mitãgui. Pe mitã okuera upepete.
19Upéi umi hemimbo'e kuéra oñe'ẽ Jesús ndive ha'eñoháme, ha oporandu chupe:
—Mba'ére piko ndaikatúi ra'e ore romosẽ pe mba'epochy?
20Jesús he'i chupe kuéra:
—Ndapejeroviapáigui Tupãre. Añete ha'e peẽme, pende jerovia michĩ ramo jepe oimeraẽ mba'e ra'ỹi michĩve vaicha, pejéta peteĩ yvytýpe: “Ejei ko'águi. Eva amo”,#Mt 21.21; Mc 11.23; 1 Co 13.2. ha pe yvyty ováta. Oimeraẽ mba'e ikatúne pejapo. 21(Péicharõ jepe, peñembo'e ramo ha Tupãme pe momba'e guasúvo ndape'úi ramo mba'eve añoite, ikatúne pemosẽ ko'ãichagua mba'e pochy).
Jesús he'i jey omanotaha
(Mc 9.30-32; Lc 9.43-45)
22Oiko aja hikuái Galiléa rupi Jesús oñe'ẽ hemimbo'e kuérape kóicha:
—Che, yvypóraicha aju vaekue, ha'áta hína yvypóra kuéra pópe. 23Ha'e kuéra che jukáta, mbohapy ára haguépe katu aikove jeýta.
Kóva ohendúvo, tuicha oñembyasy hikuái.
Viru oñeme'ẽva Tupaópe guarã
24Jesús ha hemimbo'e kuéra oguahẽ rire táva Cafarnaúmpe, umi viru ombyatýva Tupaópe guarã#Ex 30.13; 38.26. oho Pedro rendápe ha oporandu chupe:
—Pene mbo'ehára piko ome'ẽ oikóvo pe viru tupaópe guarã?
25Ha Pedro he'i chupe:
—Ome'ẽ.
Upéi, Pedro oikévo Jesús rógape, Jesús raẽ imandu'a Pédrope, ha oporandu chupe:
—Simón, mba'épa nde ere? Mburuvicha kuéra ombyaty ramo viru, mávarepa ha'e kuéra omopẽ?#Yma, mburuvicha kuéra omoĩ ramo peteĩ tetã ipoguýpe, umíva ári ho'a ome'ẽvo viru mburuvicha guasúpe guarã, hetãgua katu nahániri. Hetãgua kuérarepa térã ambue tetãguáre?
26Pedro he'i chupe:
—Ambue tetãguáre.
Jesús he'i chupe:
—Péicharõ niko hetãgua natekotevẽi ome'ẽ. 27Péicharõ jepe, ani haguã ipochy ñane ndive avave, tereho ýpe ha eity ne pinda. Pe pira reikutu raẽva jurúpe rejuhúta viru ohupytýva ñande mokõime guarã. Eraha ha eme'ẽ chupe kuéra upéva.
موجودہ انتخاب:
San Mateo 17: GPC2006
سرخی
شئیر
کاپی
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.