Doma 7

7. Nëbi Esusën namiaid nuqui nec, quequin chiaid

(7.1-13)

Bëdambuec tabadte tantiamenuen bënëchoquid chido chiaid

1Cun utsibo, naden chiaid mibitedishun tantiec. Nuquin Papan: Naden nata, quequin chuiquin Moises dada uamiampicpadombuen uënësabi icquin matsesën naquid. Uënëssun aidën chiaid natiapimbo iquec, quequin mimbi tantiec. 2Aid tantiamete chuinu. Tantia. Chidon dadan bedaid icquin Nuquin Papan Moises chuiquin dada uamiampicpadombuen aton bënë uënësabi icsho nianesa nec. Bënë uënësambien chido dada utsin bedadquid. 3Bënë uënësambo icnubi dada utsi bedsho issun: Icsambo iquec, cabededtsiash. Bënë uënësambien dada utsin bedadquid chido. Aden dada utsin bedacsho: Icsambo iquec, cainquio ictsiash.

4Adecbidi mibitedi Esuquidistubëd abentsëc yacbimbuec tabadquid nec. Adquid yec Esuquidistubëd uënësacbimbuen padpiden Nuquin Papan Moises chuiquin dada uamiampidtedi nainquio iquec. Adec uënësacsho Esus uincuenmiaidbëd daëdash aid tantiec utsibobëd tantiananec tabadquin Nuquin Papa bëdambuen ismec. 5Esus tantiabi yec nuqui bunacpadenuidi naic icsapadennec. Aden nainda, quequin Nuquin Papan Moises chuiquin dada uamiampid tantiashi: Adequi icsate bunquiebi, quiash nuquitedi icsaquiopadennec. Adquid yec uënësacbimbuec icsho ënenquio icquin cuidacno nidmequin nuqui nësecatsempondash. 6Adquid icbuedëmbi nëbi uënësacbimbuen padpiden Nuquin Papan Moises chuiquin dada uamiampicpadombuen naic tabadte bunenquio nuquitedi yanondac. Nëbi icsambuen naid ënash utsiacbimbuec bëdambuec tabadquin Nuquin Papa tantiaquido nec. Ënden ambi Moises chuiquin dada uamiampicpadombuen nabambuedi nëbi Nuquin Papan Mayan Bëdan tantiamiacpadec nuquitedi bëdambuec tabadec.

Icsambuen nabanec icsamane, quiash bëdambuec tabadte chiaid

7Nuquin Papan: Naden nata, quequin chuiquin Moises dada uamiampid icsambuen namiantequid nec ¿quectabi ique? Padenquio. Nuquin Papan: Naden nata, quequin chuiquin Moises dada uamiampid issun: Icsambuen naombi, quequin tantiondambi. Utsina isash cuna adquid nibëdec, quec chieshëmënenda, quequin Nuquin Papan Moises dada uamiampid issun: Aden icsambuen naombi, quequin tantiondambi.#7.7 Buan. 20.17bëta M.I.Ch. 5.21 isbanta. 8Utsina isash: Adquid cuna nibëdec, quiash chieshëmëmbuedi Nuquin Papan: Adenda, quequin chiaid tantiashi icsaquid yec utsina cumapenec bunquiec chieshëmënquiondabi. Aden Nuquin Papan Chiampid nibëdnuc: Icsachitobi, quequin tantienquio ictsenondambi. 9Nuquin Papan Chiampid tantiabi yec cuidte dacuëdënenquio yec bëdambo iquebi, quiondabi. Adshumbic Nuquin Papan Moises dada uamiampid issumbi: Ambi chiaid niac niacquin icsambuen naquidquio nebi, quec 10uënësacbimbuec yanondabi. Adquid yec Nuquin Papan: Naden nata, quequin chiaid tantiaquin: Aidën chiacpadenuidi naic abi yacno ënëdenquio yec tabadebi, quequin tantiondambi. Adbuedi ambi chiampicpadec bëdambuecuidi tabadtiapimbo icsho ënenquio icquin cuidacno nësecatequid ictsenondabi. 11Nuquin Papan: Naden nata, quequin chiampid tantiaquin icsambuen namequidën icsambuen namequin muaondashi. Adoac aidën chiaidquiobidi icsambuen naic uënësacbimbuecquid icsho cuidtequid icmetsenondashi. 12Abimbo tantiametequid Nuquin Papan: Naden nata, quequin chiampid bëdambo iquec. Nuquin Papan: Naden nata, quequin chiampid icsaisambo icsho aid isquin aidën chiacpadombuen naic bëdambo ictequid nendac.

13Aden Nuquin Papan Chiampid bëdambocquid nec, quequin tantiashobi uënësacbimbuec icsho ubi ënenquio icquin cuidacno nësecaindac ¿quectabi ne? Padenquio. Icsambuen namiantequidën namiac icsambuen nabanec ubi uënësacsho ënenquio icquin cuidacno nësecatsiashi, quequin tantiabenondambi. Icsambuen naquido icquin Nuquin Papan Chiampid isash: Icsambuecshë tabadebi, quequin nuquitedi tantiabempondac.

8. Matses icsambuen naquido nec, quequin chiaid

(7.14-25)

14Nuquin Papan Mayan Bëdan tantiamiacpadombuen Moisesën Ambi Chiaid dada uapampic, quequin nuquitedi tantiec. Matses yec uidëmpentsëcquio icquid nebi. Adquid icsho icsambocquidën iua icquin aidën namiaid nebi. 15Umbi nabanaid tantienquio iquembi. Umbi bëdambuen nate bunaid nainquio iquembi. Aden nainquiocquin umbi: Aden icsambuen naic icsamboshë iquec, caid naimbi. 16Nuquin Papan Moises chuiquin dada uamiampid bëdambocquid nec. Adquid icsho aidën chiaid niacte bunenquio iquebi, quebuedëmbi aidën chiaid niaquec: Bëdambuen chiaidimbi niacchitec, quianobi. 17Aden icsambuen naid umbibi tantiaquin naidpenquio nec. Aidi icsamianquidën tantiamiacpaden umbi ëquëducshun tantiaquin naid nec. 18Ubi uidëmpentsëcquio icquid icquin icsambuen naidbëta icsambuen tantiaidtedi nabanaid icnuc bëdambuen naid cuna nibëdec. Adecbidi bëdambuen nabannu, quebuedi bëdambuen natiapimbo iquebi. 19Bëdambo icte bunebi, quebuedi ubibi bëdambuec tabadtiapimbo iquebi. Icsate bunenquio iquebi, quebuedi ubibi icsaded icsadedebi. 20Aden: Umbi bëdambuen nabannu, caid nainquio icsho icsambuen namianquidën ëquëducshun namiac ubibi bëdambo ictiapimbo iquebi.

21Adquid nebi, quiash bëdambuen nate bumbuedi aden nainquio yec badedquio icsaded icsadedchitebi, quequin tantiabenondambi. 22Nuquin Papan: Naden nata, quequin Moises chuiquin dada uamiampid tantiate bunebi, 23quebuedi icsambuen naquid yec ubibi bëdambuec tabadtiapimbo iquebi. Quënën tsadunacbimbuen umbi icsambuen ëquëducshun tantiaquin naid ëntiapimbo iquebi. 24Adquid yec shubitiadquio icchitebi. Icsambuen naquid icsho ¿tsuntsin ubi icsate bunaid ubi uënësmete chicpatsiash? 25queshobi Nuquin Papan namiac Nuquin Icbo Esuquidistunuidtsëqui chicposhi. Adoaid yec: Nuquin Papa bëdambo iquec, caimbi. Ai naden tantiembi. Nuquin Papan Moises dada uamequin chiacpadombuen nabanac bëdambo ictsiash. Padnuen matses uidëmpentsëcquid yec icsambuen nate bunquin naimbi.

موجودہ انتخاب:

Doma 7: mcfNT

سرخی

کاپی

موازنہ

شئیر