Tesadonica 2 3
3
Nuquin Papa chianneta, quequin Pabadon chiaid
1Tantia, cun utsibo. Mibitedi ënquin chuinu. Ubitedi tantiaquin Nuquin Papa chianneta. Nidaid utsi utsiec yacno nidmeshun Pabadobëta abëd nidquido Esusën naid matses dadpenquio bëdambuen chuibanme. Mimbi bëdambuen chuimiac ubitedishun Esus tantiabenondacpadombuembidi ma utsibontsen dadpenshun Esus tantiabennu, quequin Nuquin Papa chianneta. 2Adembidi Esus chuibansho issun abi chieshënquidon: Pabado mëyannu, casho mëyanmenda, Papa, quequin ubitedi tantiaquin Nuquin Papa chianneta. 3Nuquin Icbo bëdamboshë icquid nec. Muesambo icquin ambi chiacpadombuen naquid icquin nuquitedi bëdambuen dayun uaindac. Ubi tantienquio yannushe, queshun nuqui chieshtomenquio icquin Mayan Icsa Satanas nuqui iuametiapimbo iquendac. 4Aden Nuquin Icbon bëdambo icmiac umbi chuibocpadombuen mibitedishun abi nabanendac, quequin tantiembi. 5Naden mibitedi tantiaquin Nuquin Papa chiannembi: Cun Icbo Esuquidistun tantiamiac: Nuquin Papan ubi tantiec, quiash Tesadonica yacnocquido utsibobëd tantiananmeta, Papa. Chieshënaqui Esus chieshtoenquio icnëdacpadquiecbidi aido chieshtoenquio icquid icmeta, quequin Nuquin Papa chiannembi.
Chieshenquio yec chonoadta, quequin chiaid
6Tantia, cun utsibo. Nuquin Icbo Esuquidistun: Ubi chuibenneta, caidquio icquin mibitedi chuinu. Esus tantiaquido utsi utsiec umbi mibi chiondaid niacniaquec chieshuidequi icsho isash aidbëd tabadenda. 7Ubëd tabadec Pabado dayacquio iccondash, quequin tantiec chieshenquio yec tabadac bëdambo ictsiash, quequin mimbi abimbo tantiec. Mibëd tabadec chieshenquio yec chonoadtedniondabi. 8Mimbi pete meniac ¿cun piucquid mibi menenquiodambi ictionda? Bedquin mambi mibi meniannepondac. Aden: Ubi menequin atona uesnushe, quiash cunabi piucquid bednuec badiadën chonoadtedniashic inchëshëntsen adecbidi chonoadtedniondabi. 9Esus tantiaquidon abi chuibanquid menenquio icquid ¿quectabi ique? Padenquio. Esusën naid chuibanquid ambi chuibanaidon meniaquien bëdambo ictsiash. Chieshenquio icquin umbi nacnensho issun ma adembidi mibitedishuntsen: Nanu, quiashini chonoadtenniondac. 10Mibëd tabadquin naden chiondambi. Chonoadte bunenquio yec chieshuidequi icsho pemenquio icquid, quequin mibitedi chiondambi.
11Mibitedi caic: Utsi utsiec chonoadenquio yec tabadquin utsin icsambuen naiduidi chiec tabadosh, quequin chuisho tantiombi. 12Chieshquido icsho Nuquin Icbo Esuquidistun chiaidquio mibi chuinu. Chieshuidequi tabadenda. Min petebëta mitsana utsi bednuec chonoadta. 13Cun utsibo, Nuquin Papan chiacpadombuen naquin chieshtoenquio icquin bëdambuenuidi nata. 14Nëid dada uaquin umbi chuibambued niac niacsho ista. Aden chiaid niacquin icsambuen nasho isash: Icsambuen nachitombi, quequin dacuëdtanquin ma tantiabennu, quiash aidbëd onquec tabadenda. 15Aid chieshënenquio iquequi adta. Mibi padquid Esus tantiaquid min utsibimbuecquid icsho naden chui: Esus tantiaquid adec tabadesa neque. Bëdambuequien tabadtiad, quequin chuita.
III. ËNQUIN CHIAID
(3.16-18)
16Mibitedi tantiaquin Nuquin Papa naden chiannembi: Bëdambo icmianquidquio icquin Cun Icbonquio ma aido bëdambuec tabadquid icmepanuna, Papa. Aidobëd ma Esus tëshnanenquio icpanuna, Papa, quequin tantiaquin Nuquin Papa chiannembi. 17Mibi tantiembi, quequin umbimbo dada uaid nëid neque. Ista, quequin umbi nëidtedpactsëc dada uaid issun: Pabadon chiaidquio nec, quequin mimbi tantiendac. 18Nuquin Icbo Esuquidistun ma mibitedi tantiaquin bëdambuen ispanuna, caimbi. Amen. Aidted chuiquin dada uaombi.
موجودہ انتخاب:
Tesadonica 2 3: mcfNT
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2023, Wycliffe Bible Translators, Inc. All rights reserved.