Timoteo 1 3
3
Esus tantiaquido iccuededacno abi chuibanquido chiaid
1Tantia. Utsitsen mibi chuinu. Esus chuibanquid ictiadquio iquebi, quesho: Mibi bëdambuen nate bunec, cata. 2Adshumbic: Nuquin Papan Chiaid chuibanquid nadquid nec, quequin chuita. Icsambuen nainquio yec bëdambuec tabadquid nec, utsibon caidquio Nuquin Papan Chiaid chuibanquid nendac. Adquid chido abentsëc inquid nendac. Ambi icsambuen nate bunaid ënash bëdambuec tabadquid nendac. Bëdambuen tantiaquidquio yec bëdambuec tabadquid nec, utsibon caidquio nendac. Isedanquido bëdambuen isquin iuedshun aton shubun ushmequid nendac. Nuquin Papan Chiaid bëdambuen tantiamequin chuibanquid nendac. 3Tantiadennuen acte paë uaid aquenquio icquid nendac. Chushcanante bunenquiocquid yec niunnanenquio yec badedquio nëishenquio icquid nendac. Bëdambuec tabadquid nendac. Piucquid bedteuidi bunenquio icquid nendac. 4Adquidën aton chidobëta aton bacuëbo chieshmenquiocquin bëdambuen namequid nendac. 5¿Aden aton chidobëta aton bacuëbo bëdambuen namenquio icquinda Esus tantiaquid iccuededquido bëdambuen namepatsiash? Padenquio ictsiash. 6Esus chuibanquid icta, canun nëbimbobi Esus tantiabentsëcquid icsho: Ubi Esus chuibanquid icta, cainda. Adquid chuibanquid icmiac Nuquin Papan Chiaid badedquio niactsiashe. Mayan Icsa Satanasbimbuec: Ubiuidtsëqui bëdamboshë iquebi, quetsiashe. Adquid: Esus chuibanquid icta, cainda. 7Adembidi chuibanquid icmenuen Esus tantiesabon: Bëdambocquid nec, casho tantiata. Icsambocquid nec, caid chuibanquid icmenda. Adquid icmiac icsambuen nasho Esus tantiesabon mamënshuntsiash. Adquid Mayan Icsa Satanasën badedi icsametsiashe. Icsambo icquid nec, caid: Esus chuibanquid icta, cainda.
Esus tantiaquido nashunquid chiaid
8Esus tantiaquido nashunquid nadquio icquid nendac, quequin chuinu. Utsibon: Bëdambocquid nec, caidquio nendac. Muesambo nendac. Tantiadennuen acte paë uaid aquenquio icquid nendac. Muaquin piucquid dadpen bedteuidi bunenquiocquid nendac. 9Nuquin Papan Chiaid tantiaquin ënenquio icquin Esus tantiec bëdambuec tabadquid nendac. 10Esus tantiaquido nashunquid icmenuen: Nëidtedec ushquin: ¿Ada bëdambuen naique? Isnu, queshun istedneta. Adshumbic: ¿Ada bëdambo iccosh? quequin chiac utsibo: Ai, bëdambocquid nec, abitedi quesho tantiashun: Esus tantiaquido nashunquid icta, cac bëdambo ictsiash. 11Adquidën chido: Bëdambocquid nec, utsibon caidquio nendac. Utsin icsambuen naiduidi chienquio yec bëdambuec tabadquid nendac. Muainquiocquid nendac. Adquidquio Esus tantiaquido nashunquidën chido bëdambo ictsiash. 12Esus tantiaquido nashunquid chido abentsëc inquid nendac. Adquidën aton chidobëta aton bacuëbo chieshmenquiocquin bëdambuen namequid nendac. 13Adquid icta, caidën Esus tantiaquido bëdambuen nashumbansho issun utsibon bëdambuen isendac. Adquidbidi Esuquidistu tantiaquidquio yanendac. Esus tantiaquido nashunquido yec adec bëdambuec tabadquid nendac, quequin ënquin chiombi.
Esus bëdamboshë iquec, quequin abimbo chiaid
14Nëbi mibi isec nidte bunebi. Nidambo icquimbi nëid umbi dada uaid issun: 15Esus tantiaquido iccuededquin nadoquid, quequin Pabadon chiacpadombuen nanuna, cata. Nuquin Papambo uënëstiapimbocquidtsen tantiaquido nuqui nec. Aid tantiaquido icquin Nuquin Papan Chiaid utsi uaquin chienquio icquin aid abimbo chuiquid icquin ambi chiacpadombuen naquid nuqui nendac, quequin chuita. 16Ëndenquimbo abi bëdambuen ismequid ambi matses tantiamenquio icpampidi nëbi Nuquin Papan ismiac abi tantiamequid Esuquidistu bëdamboshë iquec.
Aidi Nuquin Papan matsesmepanëdash.
Nuquin Papan Mayanën: Nuquin Papapadquidquio yec icsaisambo Esus nec, quequin tantiamec.
Matsesën uënës uaqui uincuennëdaid yec Nuquin Papabëd icquidonquio isaidquio Esus nec.
Abi chuibennequidon nidaid utsi utsiec yacno nidshun chuibenniac matses utsin utsinquien Esus tantiabempanëdash.
Aidquiobi Nuquin Papan abuc indoshon abëdi tabadmeuapanëdash.
موجودہ انتخاب:
Timoteo 1 3: mcfNT
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2023, Wycliffe Bible Translators, Inc. All rights reserved.