Romanos 9
9
Li Dios quixsiqꞌueb ru laj Israel
1Yo̱quin chixyebal lix ya̱lal xban nak ninpa̱b li Jesucristo. Incꞌaꞌ ninticꞌtiꞌic. Nacuecꞌa saꞌ lin chꞌo̱l nak ya̱l li ninye ut li Santil Musikꞌej nacꞌutuc chicuu nak ya̱l. 2Ra nacuecꞌa ut nayotꞌeꞌ inchꞌo̱l xban nak eb laj judío lin tenamit incꞌaꞌ nequeꞌraj xpa̱banquil li Cristo. 3Tinqꞌue raj cuib chi tzꞌekta̱na̱c ut chi isi̱c riqꞌuin li Cristo cui ta riqꞌuin aꞌan ta̱ru̱k tebintenkꞌa re teꞌcolekꞌ. 4Aꞌan eb li ralal xcꞌajol laj Israel. Li Dios quixsiqꞌueb ru ut quixcꞌuleb chokꞌ ralal xcꞌajol, ut quixcꞌut lix lokꞌal chiruheb retalil nak cuan riqꞌuineb. Quixba̱nu li contrato riqꞌuineb ut quixqꞌue lix chakꞌrab reheb. Quicꞌuteꞌ chiruheb chanru teꞌxlokꞌoni li Dios saꞌ xya̱lal ut cuan cꞌaꞌ re ru quixyechiꞌi li Dios reheb. 5Aꞌaneb li ralal xcꞌajol li kaxeꞌto̱nil yucuaꞌ laj Abraham, laj Isaac ut laj Jacob. Ut saꞌ xya̱nkeb aꞌan quiyoꞌla li Cristo nak quitzꞌejcualoꞌ ut quicꞌulun saꞌ ruchichꞌochꞌ. Lokꞌoninbil taxak chi junelic li Cristo li kꞌaxal nim xcuanquil saꞌ xbe̱neb chixjunileb. Joꞌcan taxak. 6Li Dios quixqꞌue li quixyechiꞌi reheb laj Israel. Aban moco chixjunileb ta queꞌxcꞌul li yechiꞌinbil xban li Dios xban nak moco chixjunileb ta tzꞌakaleb aj Israel. Aban incꞌaꞌ ninye nak li Dios incꞌaꞌ quixqꞌue li quixyechiꞌi reheb laj Israel. 7Cuanqueb li ralal xcꞌajol laj Abraham incꞌaꞌ queꞌxcꞌul li quixyechiꞌi li Dios xban nak ma̱cuaꞌeb aꞌan li ralal xcꞌajol li yechiꞌinbil re laj Abraham najter xban li Dios nak quixye re:
Saꞌ xcꞌabaꞌ laj Isaac teꞌcua̱nk la̱ cualal a̱cꞌajol li xinyechiꞌi a̱cue. (Gén. 21:9-12)
8Aꞌin naraj naxye nak moco chixjunileb ta li ralal xcꞌajol laj Abraham sicꞌbileb ru xban li Dios. Caꞌaj cuiꞌ li yechiꞌinbil re xban li Dios, aꞌaneb li tzꞌakal ralal xcꞌajol li Dios. 9Aꞌan aꞌin li quixyechiꞌi li Dios re laj Abraham nak quixye re:
Nak toline̱lk saꞌ li chihab jun chic, lix Sara cua̱nk chic lix cꞌulaꞌal te̱lom. (Gén. 18:10)
10Lix Rebeca quicuan cuib lix cocꞌal ut junaj lix yucuaꞌeb. Lix yucuaꞌeb aꞌan, aꞌan laj Isaac li kaxeꞌto̱nil yucuaꞌ. 11Toj ma̱jiꞌ nequeꞌyoꞌla lix cocꞌal lix Rebeca nak quisiqꞌueꞌ ru li jun xban li Dios. Moco riqꞌuin ta lix yehom xba̱nuhom nak quisiqꞌueꞌ ru xban nak ma̱jiꞌ nequeꞌxba̱nu li us chi moco li incꞌaꞌ us. Riqꞌuin aꞌan nakanau nak li Dios incꞌaꞌ naxsicꞌ ru junak riqꞌuin lix yehom xba̱nuhom. Naxsicꞌ ban ru joꞌ naraj aꞌan. 12Li Dios quia̱tinac riqꞌuin lix Rebeca ut quixye re nak li asbej ta̱cꞌanjelak chiru li i̱tzꞌinbej. 13Tzꞌi̱banbil saꞌ li Santil Hu li ra̱tin li Dios li quixye:
La̱in xinsicꞌ ru laj Jacob, ut laj Esaú xintzꞌekta̱na. (Mal. 1:2)
14¿Cꞌaꞌru takaye chirix aꞌan? ¿Ma takaye nak ma̱cuaꞌ ti̱quilal li naxba̱nu li Dios? Ma̱ jokꞌe takaye chi joꞌcan. 15Incꞌaꞌ naru takaye aꞌan xban nak aꞌin li quixye li Dios re laj Moisés:
La̱in tincuil xtokꞌoba̱leb ru li ani nacuaj xtokꞌobanquil ru, ut tincuuxta̱na ajcuiꞌ ru li ani nacuaj ruxta̱nanquil ru. (Ex. 33:19)
16Li sicꞌbil ruheb moco sicꞌbileb ta ru xban nak joꞌcan nequeꞌraj eb aꞌan chi moco riqꞌuin ta xyehom xba̱nuhomeb. Yal riqꞌuin ban xnimal ruxta̱n li Dios nak sicꞌbil ruheb. 17Joꞌcaꞌin nak tzꞌi̱banbil saꞌ li Santil Hu li a̱tin li quixye li Dios re laj faraón:
Xatinxakab chokꞌ xreyeb laj Egipto re nak ta̱cꞌutu̱nk lin cuanquilal a̱ban. Chi joꞌcan ta̱yema̱nk cuesilal yalak bar saꞌ chixjunil li ruchichꞌochꞌ. (Ex. 9:16)
18Joꞌcan nak li Dios naril xtokꞌoba̱l ru li ani naraj xtokꞌobanquil ru ut naxcacuubresi xchꞌo̱l li ani naraj xcacuubresinquil xchꞌo̱l saꞌ li ma̱usilal.
Li Dios naqꞌuehoc saꞌ tojba ma̱c ut na-uxta̱nan u
19Ma̱re nacaye chi joꞌcaꞌin, Cui li Dios naxcacuubresi xchꞌo̱l junak saꞌ li ma̱usilal, ¿chanru nak li Dios tixye nak cuan xma̱c junak? Cui joꞌcan naraj li Dios, ¿ani ta̱ru̱k ta̱poꞌok ru li cꞌaꞌru naraj li Dios? ma̱re chancat. 20Aban la̱in tinye a̱cue, ¿anihat la̱at nak ta̱cuechꞌi rix li cꞌaꞌru naxba̱nu li Dios? Junak li cuc incꞌaꞌ ta̱ru̱k tixye re laj pacꞌol re, ¿Cꞌaꞌut nak xina̱yi̱b chi joꞌcaꞌin? 21Aꞌ yal re laj pacꞌonel chanru nak tixyi̱b li tixpacꞌ. Cui naraj naru tixyi̱b cuib chi ucꞌal riqꞌuin junaj chi seb. Naru tixpacꞌ junak secꞌ cha̱bil, sicꞌbil ru lix cꞌanjel, ut li jun chic ma̱re re ta̱cꞌanjelak re yalak cꞌaꞌru. 22Chanchan aꞌan li naxba̱nu li Dios. Aꞌan yal re cꞌaꞌru tixba̱nu. Xcꞌulubeb raj li cuanqueb saꞌ ruchichꞌochꞌ li rakba a̱tin ut li ca̱mc. Li Dios quixcꞌut raj lix joskꞌil ut lix cuanquilal. Abanan kꞌaxal nim xcuyum saꞌ xbe̱neb. 23Ut riqꞌuin lix nimal rusilal quiruxta̱na ku ut quixcꞌut chiku lix lokꞌal. Junxil sicꞌbil chak ku xban re nak totzꞌako̱nk saꞌ lix lokꞌal. 24La̱o sicꞌbil ku xban li Dios. Cuan sicꞌbileb chak ru saꞌ xya̱nkeb laj judío ut cuan sicꞌbileb chak ru saꞌ xya̱nkeb li ma̱cuaꞌeb aj judío. 25Joꞌcaꞌin quixye li Dios joꞌ tzꞌi̱banbil saꞌ li Santil Hu xban laj Oseas:
Ta̱cuulak xkꞌehil nak la̱in tinye “cualal incꞌajol” reheb li ma̱cuaꞌeb cualal incꞌajol. Eb aꞌan incꞌaꞌ sicꞌbileb chak ru inban. Anakcuan tinye reheb: “raro̱quex inban”. (Ose. 2:23)
26Ut saꞌ li naꞌajej bar quiyeheꞌ cuiꞌ reheb: “La̱ex ma̱cuaꞌex cualal incꞌajol”, aran ajcuiꞌ ta̱yehekꞌ reheb: “La̱ex tzꞌakal ralal xcꞌajol li yoꞌyo̱quil Dios”. (Ose. 1:10)
27Joꞌcaꞌin quixye laj Isaías chirixeb laj Israel:
Usta nabaleb li ralal xcꞌajol laj Israel joꞌ xqꞌuial li samaib chire li palau, aban moco qꞌuiheb ta li teꞌcolekꞌ.
28Xban nak li Ka̱cuaꞌ chi se̱b ta̱rakok a̱tin chi tzꞌakal saꞌ xbe̱neb li ralal xcꞌajol laj Israel. (Isa. 10:22-23)
29Quixye ajcuiꞌ laj Isaías chi joꞌcaꞌin:
Cui ta incꞌaꞌ quixcanab kalal kacꞌajol nak quixsach ru li katenamit li Ka̱cuaꞌ Dios, li kꞌaxal nim xcuanquil, joꞌ raj li Sodoma ut li Gomorra nak co-osoꞌ. (Isa. 1:9)
Eb laj judío ut li colba-ib
30Aꞌan aꞌin xya̱lal li yo̱co chixyebal: Eb li ma̱cuaꞌeb aj judío incꞌaꞌ yo̱queb chixsicꞌbal li ti̱quil chꞌo̱lej riqꞌuin xba̱nunquil li naxye li chakꞌrab, ut xban nak queꞌpa̱ban, queꞌti̱cobresi̱c xchꞌo̱leb. 31Ut eb laj judío yo̱queb chixsicꞌbal li ti̱quil chꞌo̱lej riqꞌuin xba̱nunquil li naxye li chakꞌrab, aban incꞌaꞌ queꞌxtau. 32¿Cꞌaꞌut nak incꞌaꞌ queꞌxtau? Xban nak moco yo̱queb ta chixsicꞌbal li ti̱quil chꞌo̱lej riqꞌuin xpa̱banquil li Cristo. Queꞌxsicꞌ ban li ti̱quilal riqꞌuin xba̱nunquil li naxye li chakꞌrab. Ut xban aꞌan, chanchan queꞌxtich rib chiru jun li pec. Ut li pec aꞌan retalil li Cristo. Ut li nequeꞌxtich rib chiru, aꞌan li nequeꞌtzꞌekta̱nan re li Cristo. 33Tzꞌi̱banbil saꞌ li Santil Hu li quixye li Dios:
Qꞌuehomak retal xban nak la̱in tinqꞌue jun li pec aran Sión.#Saꞌ li versículo 9:33 cuan li a̱tin “pec”. Li a̱tin “pec” naraj naxye Cristo. Nabaleb li tenamit teꞌxtich rokeb chiru ut teꞌtꞌanekꞌ. Abanan li ani ta̱pa̱ba̱nk re aꞌan, incꞌaꞌ ta̱rahokꞌ xchꞌo̱l mokon xban nak tixcꞌul li cꞌaꞌru yechiꞌinbil re xban li Dios. (Isa. 28:16)
موجودہ انتخاب:
Romanos 9: kek
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2019, Wycliffe Bible Translators. All rights reserved.