Romanos 6
6
Camenako xban li ma̱c, aban yoꞌyo̱co saꞌ xcꞌabaꞌ li Jesucristo
1¿Cꞌaꞌru takaye chirix chixjunil aꞌin? ¿Ma toj yo̱ko ajcuiꞌ chixba̱nunquil li ma̱c re nak kꞌaxal cuiꞌchic ta̱numta̱k li rusilal li Dios saꞌ kabe̱n? 2¡Ma̱ jokꞌe! Ma̱min ta̱ru̱k. Chanchan nak ac camenako la̱o xban nak moco cuan ta chic xcuanquil li ma̱c saꞌ kabe̱n. Cui ma̱cꞌaꞌ chic xcuanquil li ma̱c saꞌ kabe̱n, ¿cꞌaꞌut nak toj yo̱ko chi ma̱cobc? 3Relic chi ya̱l nequenau nak la̱o xkacꞌul li cubi haꞌ xban nak xkapa̱b li Jesucristo. Nak xkacꞌul li cubi haꞌ chanchan nak xocam kochben li Jesucristo xban nak xkacanab xba̱nunquil li kanajter naꞌleb. 4Joꞌcan nak riqꞌuin xcꞌulbal li cubi haꞌ, chanchan nak ac xocam ut xomukeꞌ kochben li Cristo re nak tocuacli̱k cuiꞌchic chi yoꞌyo ut tocua̱nk saꞌ li aqꞌuil yuꞌam, joꞌ nak li Jesucristo quicuacli cuiꞌchic chi yoꞌyo saꞌ xya̱nkeb li camenak riqꞌuin xnimal xlokꞌal ut xcuanquilal li Dios Acuabej. 5Cui la̱o xotzꞌakon kochben li Cristo saꞌ lix camic, joꞌcan ajcuiꞌ nak totzꞌako̱nk saꞌ lix cuaclijic cuiꞌchic chi yoꞌyo saꞌ li acꞌ yuꞌam. 6Nakanau nak li kanajter naꞌleb quiqꞌueheꞌ chiru cruz rochben li Cristo. Naraj naxye nak quisacheꞌ xcuanquil li kanajter naꞌleb nak quicam li Cristo. Ut anakcuan incꞌaꞌ chic cuanco rubel xcuanquil li ma̱c joꞌ nak xocuan chak junxil nak xkacꞌanjela chak ru li ma̱c. 7Li ac xcam incꞌaꞌ chic nama̱cob. Joꞌcan ajcuiꞌ la̱o cui camenak chic li kanajter naꞌleb, incꞌaꞌ chic yo̱ko chixba̱nunquil li ma̱c. 8Cui ac xocam kochben li Cristo, nakanau nak yoꞌyo̱co ajcuiꞌ kochben saꞌ li acꞌ yuꞌam. 9La̱o nakanau nak li Jesucristo quicuacli cuiꞌchic chi yoꞌyo saꞌ xya̱nkeb li camenak. Li Cristo incꞌaꞌ chic ta̱ca̱mk xban nak ma̱cꞌaꞌ chic xcuanquil li ca̱mc saꞌ xbe̱n. 10Jun sut ajcuiꞌ quicam li Cristo ut anakcuan yoꞌyo chic. Quicam re xsachbal xcuanquil li ma̱c. Ut anakcuan yoꞌyo chic li Cristo re xqꞌuebal xlokꞌal li Dios. 11Joꞌcan ajcuiꞌ la̱ex. Cheqꞌuehak retal nak chanchan ajcuiꞌ nak camenakex ut ma̱cꞌaꞌ chic xcuanquil li ma̱c saꞌ e̱be̱n. Acꞌ chic le̱ yuꞌam qꞌuebil e̱re xban li Ka̱cuaꞌ Jesucristo ut junajex chic riqꞌuin. Yoꞌyo̱quex re nak texcꞌanjelak chiru li Dios. 12Joꞌcan nak me̱qꞌue chic e̱rib rubel xcuanquil li ma̱c ut me̱ba̱nu chic li cꞌaꞌru naxrahi ru le̱ chꞌo̱l. 13Chi moco cheqꞌue e̱rib chixba̱nunquil li ma̱usilal. Chekꞌaxtesi ban e̱rib saꞌ rukꞌ li Dios. Xban nak ac xecꞌul li acꞌ yuꞌam chanchan nak xexcuacli cuiꞌchic chi yoꞌyo saꞌ xya̱nkeb li camenak. Joꞌcan nak cheqꞌue le̱ rok e̱rukꞌ chi cꞌanjelac chiru li Dios re xba̱nunquil li us. 14Incꞌaꞌ chic cheqꞌue e̱rib rubel xcuanquil li ma̱c. Anakcuan cuanquex rubel xcuanquil lix nimal rusilal li Dios. Moco cuanquex ta chic rubel xcuanquil li chakꞌrab li quiqꞌueheꞌ re laj Moisés.
Incꞌaꞌ chic tocꞌanjelak chiru li ma̱c
15Anakcuan cuanco saꞌ rusilal li Dios. Moco cuanco ta chic rubel xcuanquil li chakꞌrab. ¿Ma yal xban nak incꞌaꞌ cuanco rubel xcuanquil li chakꞌrab nak toma̱cobk? ¡Incꞌaꞌ biꞌan! 16Ac nequenau nak cui te̱qꞌue e̱rib chi cꞌanjelac chiru junak patrón, aꞌan chic ta̱takla̱nk e̱re. Joꞌcan ajcuiꞌ cui te̱qꞌue li ma̱c chokꞌ e̱patrón ut te̱qꞌue e̱rib chokꞌ aj cꞌanjel chiru, texca̱mk. Aban cui te̱qꞌue e̱rib chi takla̱c xban li Dios, ta̱ti̱cobresi̱k le̱ chꞌo̱l. 17Junxil cuanquex rubel xcuanquil li ma̱c. Aꞌut anakcuan, bantiox re li Dios, chi anchal e̱chꞌo̱l nequepa̱b li tijleb li xekꞌaxtesi cuiꞌ e̱rib. 18Anakcuan colbilex chic chiru li ma̱c. Ut xekꞌaxtesi e̱rib joꞌ aj cꞌanjel chiru li Dios chixba̱nunquil li ti̱quilal. 19Ninchꞌolob xya̱lal che̱ru riqꞌuin xserakꞌinquil chirix li nakacꞌul arin saꞌ ruchichꞌochꞌ re nak te̱tau ru li ninye. Junxil xekꞌaxtesi e̱rib chixba̱nunquil li joꞌ ma̱joꞌil naꞌleb ut li cꞌaꞌak re ru chi ma̱usilal. Aꞌut anakcuan, chekꞌaxtesihak e̱rib chixba̱nunquil li ti̱quilal re nak texcua̱nk saꞌ santilal chiru li Dios. 20Nak toj nequecꞌanjela chak ru li ma̱c, ma̱cꞌaꞌ na-oc cuiꞌ e̱re li ti̱quilal. 21¿Cꞌaꞌru le̱ kꞌajca̱munquil xecꞌul nak xeba̱nu chak li ma̱usilal? Ma̱cꞌaꞌ. Caꞌaj cuiꞌ xecꞌut chak e̱xuta̱n. Li cꞌaꞌru naxqꞌue li ma̱c, aꞌan li ca̱mc. 22Anakcuan colbilex chic chiru li ma̱c ut kꞌaxtesinbilex chic chi cꞌanjelac chiru li Dios. Ut le̱ kꞌajca̱munquil aꞌan le̱ santobresinquil ut le̱ yuꞌam chi junelic. 23Lix tojbal rix li ma̱c, aꞌan li ca̱mc. Aban li ma̱tan naxqꞌue ke li Dios, aꞌan li junelic yuꞌam saꞌ xcꞌabaꞌ li Ka̱cuaꞌ Jesucristo laj Colol ke.
موجودہ انتخاب:
Romanos 6: kek
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2019, Wycliffe Bible Translators. All rights reserved.