Romanos 13
13
Tento takaqꞌueheb saꞌ xnakꞌ ku li qꞌuebileb saꞌ xcꞌanjel
1Chexpa̱ba̱nk chiruheb li nequeꞌtaklan saꞌ xbe̱n li tenamit. Ma̱ ani cuan xcuanquil chi takla̱nc cui incꞌaꞌ ta qꞌuebil re xban li Dios. Eb li cuanqueb xcuanquil saꞌ xbe̱n li tenamit, aꞌ li Dios quixakaban reheb. 2Joꞌcan nak li ani incꞌaꞌ napa̱ban chiruheb li cuanqueb xcuanquil, naxkꞌet li cꞌaꞌru xakabanbil xban li Dios. Ut yo̱ chixbokbal li tojba ma̱c saꞌ xbe̱n. 3Li nequeꞌba̱nun re li us moco xiu xiu ta cuanqueb chiruheb li cuanqueb xcuanquil. Aꞌ li nequeꞌba̱nun ma̱usilal xiu xiu cuanqueb chiruheb li nequeꞌtaklan saꞌ xbe̱n li tenamit. Cui incꞌaꞌ nequeraj nak xiu xiu cua̱nkex chiruheb li cuanqueb xcuanquil, cheba̱nuhak li us, ut eb aꞌan teꞌxye nak cha̱bilex. 4Eb aꞌan cuanqueb saꞌ xcꞌanjel xban li Dios re e̱tenkꞌanquil. Cui nequeba̱nu li incꞌaꞌ us, chexxucuak xban nak cuanqueb xcuanquil re teꞌrakok a̱tin saꞌ e̱be̱n xban nak aꞌan xakabanbileb xban li Dios ut nequeꞌxrahobtesi li nequeꞌkꞌetoc re li chakꞌrab. 5Joꞌcan nak tento texpa̱ba̱nk chiruheb li cuanqueb xcuanquil saꞌ xbe̱n li tenamit. Ma̱cuaꞌ yal re nak incꞌaꞌ texqꞌuehekꞌ chixtojbal rix le̱ ma̱c; re aj ban cuiꞌ nak cꞌojcꞌo̱k e̱chꞌo̱l riqꞌuin xba̱nunquil li cꞌaꞌru us. 6Joꞌcan nak tento xtojbal li naxpatzꞌ li po̱pol. Tento xtojbal xban nak li cuanqueb saꞌ xcꞌanjel xakabanbileb xban li Dios, ut aꞌan lix cꞌanjeleb. 7Chetojak li cꞌaꞌak re ru tento xtojbal. Cheqꞌuehak xcuanquileb li cuanqueb saꞌ xcuanquil ut che-oxlokꞌiheb li cuanqueb saꞌ xcꞌanjel.
Chocua̱nk saꞌ xya̱lal riqꞌuineb li kas ki̱tzꞌin
8Ma̱ ani aj iqꞌuin chicua̱nk e̱cꞌas. Ut cherahak e̱rib chi ribil e̱rib xban nak li ani naxra li ras ri̱tzꞌin naxba̱nu li cꞌaꞌru naxye li chakꞌrab. 9Joꞌcaꞌin naxye saꞌ li chakꞌrab: Matmuxuc caxa̱r; ma̱camsi a̱cuas a̱cui̱tzꞌin; mat-elkꞌac, matyoꞌoban a̱tin chirix la̱ cuas a̱cui̱tzꞌin; ma̱rahi ru li jalan aj e. Ut cui ta̱ra la̱ cuas a̱cui̱tzꞌin joꞌ nak nacara a̱cuib la̱at, riqꞌuin aꞌan yo̱cat chixba̱nunquil chixjunil li naxye li chakꞌrab. 10Li ani narahoc incꞌaꞌ naxba̱nu raylal re li ras ri̱tzꞌin. Li narahoc naxba̱nu chi tzꞌakal li naxye li chakꞌrab. 11Chikaba̱nu chixjunil aꞌin xban nak nakanau nak yo̱ chak chi nachꞌoc xkꞌehil nak ta̱tzꞌaklok ru li kacolbal nak tol-e̱lk cuiꞌchic li Jesucristo. Yoꞌon taxak cua̱nko xban nak yo̱ chak chi nachꞌoc lix cꞌulunic chiru nak copa̱ban chak la̱o. 12Chanchan nak yo̱ chi numecꞌ li kꞌojyi̱n ut yo̱ chi sake̱uc. Chikacanabak xba̱nunquil li incꞌaꞌ us li nequeꞌxba̱nu li toj cuanqueb saꞌ xkꞌojyi̱nal ru li ma̱c. Chikacolak kib chiru li incꞌaꞌ us riqꞌuin xcuanquil li Jesucristo. 13Xban nak cuanco chic saꞌ xcutan saken li Jesucristo, chocua̱nk saꞌ xya̱lal joꞌ junak tzꞌakal aj pa̱banel. Incꞌaꞌ chic toma̱cobk riqꞌuin li cala̱c, chi moco riqꞌuin li numcuaꞌac num ucꞌac, chi moco riqꞌuin muxuc caxa̱r, chi moco riqꞌuin coꞌbe̱tac yumbe̱tac, chi moco riqꞌuin li cꞌaꞌak chic re ru chi ma̱usilalil. Ut incꞌaꞌ chic topletik chi moco tocakcali̱nk. 14Kakꞌaxtesihak ban kib chi tzꞌakal rubel rok rukꞌ li Ka̱cuaꞌ Jesucristo re nak aꞌan chic ta̱tenkꞌa̱nk ke riqꞌuin lix nimal xcuanquil. Ut incꞌaꞌ chic takaba̱nu li ma̱usilal li naxrahi ru li kachꞌo̱l nak toj ma̱jiꞌ nakapa̱b li Cristo.
موجودہ انتخاب:
Romanos 13: kek
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2019, Wycliffe Bible Translators. All rights reserved.