Hechos 20
20
Laj Pablo co̱ Macedonia ut Grecia
1Ut nak ac xnumeꞌ li mululij ib, laj Pablo quixbokeb laj pa̱banel riqꞌuin. Quixqꞌueheb xnaꞌleb, quixkꞌaluheb, quixchakꞌrabiheb ut co̱ Macedonia. 2Nak ac xrulaꞌaniheb li cuanqueb saꞌ li naꞌajej Macedonia, ut nak ac xqꞌueheb xnaꞌleb chi cha̱bil, co̱ aran Grecia. 3Oxib po quicuan aran Grecia ut xic raj re Siria chiru haꞌ nak quirabi resil nak eb laj judío teꞌxram saꞌ xbe. Joꞌcan nak co̱ cuiꞌchic Macedonia. 4Qui-ochbeni̱c toj Asia xbaneb laj Sópater li ralal laj Pirro, Berea xtenamit; laj Aristarco ut laj Segundo, Tesalónica xtenamiteb; ut laj Gayo, Derbe xtenamit; rochbeneb laj Timoteo, laj Tíquico ut laj Trófimo, Asia xtenamiteb. 5Eb aꞌan co̱eb chi ubej ut aran Troas coeꞌroybeni. 6La̱o toj kanumsi li ninkꞌe nak nacuaꞌeꞌ li caxlan cua ma̱cꞌaꞌ xchꞌamal. Chirix aꞌan co̱o aran Filipos chiru haꞌ. Nak ac xnumeꞌ o̱b cutan coxeꞌkatau aran Troas, ut cocana cuukub cutan aran. 7Ut saꞌ xbe̱n li cutan re li xama̱n, chꞌutchꞌu̱queb laj pa̱banel chi cuaꞌac saꞌ comonil. Laj Pablo yo̱ chixtzolbaleb. Ac cuulajak naxic. Tuktu kꞌojyi̱n toj yo̱ chi a̱tinac. 8Cuanqueb nabal li xam lochlo̱queb saꞌ li naꞌajej bar chꞌutchꞌu̱co cuiꞌ toj saꞌ xbe̱n li cab. 9Jun li sa̱j al, aj Eutico xcꞌabaꞌ, cꞌojcꞌo saꞌ li ventana. Xban nak quinajtoꞌ kꞌojyi̱n laj Pablo chi a̱tinac, quicube xcuara laj Eutico, ut quitꞌaneꞌ chak saꞌ rox tasal li cab. Toj takꞌa quinak. Ut camenak chic nak queꞌxcuaclesi. 10Laj Pablo quicube takꞌa, quixcꞌutzub rib saꞌ xbe̱n li al, quixkꞌalu ut quixye reheb: —Me̱qꞌue e̱cꞌaꞌux. Yoꞌyo, chan. 11Quitakeꞌ cuiꞌchic, quixjachi li caxlan cua, ut queꞌcuaꞌac. Ut qui-oc cuiꞌchic chi a̱tinac. Ac xsake̱u chic nak quixcanab a̱tinac. Chirix aꞌan qui-el saꞌ xya̱nkeb ut co̱. 12Ut li al yoꞌyo nak queꞌxcꞌam. Ut cꞌajoꞌ nak quisahoꞌ saꞌ xchꞌo̱leb. 13La̱o co̱o toj Asón chiru haꞌ chixcꞌulbal laj Pablo. Aꞌan co̱ chi chꞌochꞌel xban nak joꞌcan quiraj. 14Nak cocuulac Asón kanumeꞌcꞌam laj Pablo ut co̱o Mitilene. 15Saꞌ xcab li cutan co̱o chiru haꞌ ut cocuulac saꞌ xcaꞌyaba̱l Quío. Joꞌ cuulajak chic co-el aran ut cocuulac aran Samos. Ut coxohila̱nk saꞌ li tenamit Trogilio. Toj saꞌ li cutan jun chic cocuulac Mileto. 16Laj Pablo ac cuan saꞌ xchꞌo̱l nak incꞌaꞌ ta̱numekꞌ Éfeso re nak incꞌaꞌ ta̱ba̱yk Asia. Yo̱ chixse̱banquil rib xban nak ta̱raj cua̱nc saꞌ li ninkꞌe Pentecostés aran Jerusalén.
Laj Pablo quixchakꞌrabiheb li nequeꞌcꞌamoc be saꞌ xya̱nkeb laj pa̱banel aran Éfeso
17Nak toj cuan Mileto quixtakla chak xbokbaleb li nequeꞌcꞌamoc be saꞌ xya̱nkeb laj pa̱banel aran Éfeso re teꞌxic riqꞌuin. 18Ut nak queꞌcuulac riqꞌuin aran Mileto, quixye reheb: —La̱ex nequenau nak chalen cuoquic Asia saꞌ xya̱lal cuanquin saꞌ e̱ya̱nk. 19Nak yo̱quin chi cꞌanjelac chiru li Ka̱cuaꞌ quincubsi incuanquil ut quinya̱bac xban li raylal ut li yalecꞌ li quichal saꞌ inbe̱n xbaneb laj judío. 20La̱in xinchꞌolob chi tzꞌakal lix ya̱lal che̱ru. Ma̱cꞌaꞌ xinmuk che̱ru. Quinchꞌolob ban xya̱lal chiruheb li tenamit joꞌ ajcuiꞌ saꞌ eb li cab. 21Yo̱quin chixjulticanquil chiruheb laj judío ut chiruheb li ma̱cuaꞌeb aj judío, nak teꞌxyotꞌ xchꞌo̱l ut teꞌxjal xcꞌaꞌux chiru li Dios ut teꞌpa̱ba̱nk saꞌ xcꞌabaꞌ li Ka̱cuaꞌ Jesucristo. 22Anakcuan tenebanbil saꞌ inbe̱n xban li Santil Musikꞌej xic Jerusalén. Ut incꞌaꞌ ninnau cꞌaꞌru tincꞌul aran. 23Caꞌaj cuiꞌ ninnau nak li Santil Musikꞌej quixcꞌut chicuu nak saꞌ li junju̱nk chi tenamit tinnumekꞌ cuiꞌ, tincꞌul raylal ut tineꞌxqꞌue saꞌ tzꞌalam. 24Abanan la̱in ma̱cꞌaꞌ ninxucua, chi moco ninra lin yuꞌam chokꞌ cue injunes. Abanan nacuaj nak tinchoy lin cꞌanjel chi sa saꞌ inchꞌo̱l. Ut ninnau nak taklanbilin xban li Ka̱cuaꞌ Jesús chixyebal resil li evangelio li quixqꞌue li Dios xban li rusilal. 25La̱in xinchꞌolob chak xya̱lal lix nimajcual cuanquilal li Dios saꞌ e̱ya̱nk la̱ex. Ut ninnau ajcuiꞌ nak ma̱ jun chic e̱re la̱ex ta̱ilok cuu. 26Joꞌcan nak anakcuan la̱in ninye e̱re nak la̱in ma̱cꞌaꞌ inma̱c cui la̱ex incꞌaꞌ texcolekꞌ, 27xban nak ac xinchꞌolob chi tzꞌakal re ru li naꞌleb li taklanbilin cuiꞌ xban li Dios. 28Joꞌcan nak ilomak e̱rib chi us la̱ex ut ilomakeb laj pa̱banel li xeꞌqꞌueheꞌ cheril xban li Santil Musikꞌej, li quixlokꞌeb riqꞌuin lix lokꞌlaj quiqꞌuel. Cherilak laj pa̱banel joꞌ nak naril chi us lix carner li pastor. 29La̱in ninnau nak tine̱lk saꞌ e̱ya̱nk, chanchanakeb laj xoj nak teꞌcha̱lk li jalaneb xnaꞌleb chixpoꞌbal ru le̱ pa̱ba̱l. Eb aꞌan incꞌaꞌ teꞌril xtokꞌoba̱l e̱ru. 30Ut saꞌ e̱ya̱nk ajcuiꞌ la̱ex cua̱nkeb li teꞌoc chixyebal cꞌaꞌak re ru incꞌaꞌ ya̱l re xkꞌunbesinquileb laj pa̱banel re teꞌxic chirixeb. 31Yoꞌon cua̱nkex ut chijulticokꞌ e̱re nak chiru oxib chihab, chi kꞌek chi cutan yo̱quin chi ya̱bac ut incꞌaꞌ xinhilan chixchꞌolobanquil e̱naꞌleb che̱junju̱nkal. 32Anakcuan ut ex herma̱n, texinkꞌaxtesi saꞌ rukꞌ li Dios ut li ra̱tin li quixqꞌue chak e̱re xban lix rahom chitenkꞌa̱nk e̱re chi qꞌui̱c saꞌ le̱ pa̱ba̱l. Ut aꞌan ajcuiꞌ ta̱qꞌuehok e̱naꞌaj saꞌ xya̱nkeb li sicꞌbileb ru xban li Dios. 33La̱ex nequenau nak la̱in incꞌaꞌ xinrahi ru lix tumin jalan, chi moco lix biomal, chi moco li rakꞌeb. 34Ut nequenau ajcuiꞌ nak la̱in xincꞌanjelac riqꞌuin cuukꞌ re xsicꞌbal li cꞌaꞌru cue joꞌ ajcuiꞌ li cꞌaꞌru reheb li cuanqueb cuochben. 35Riqꞌuin chixjunil li xinba̱nu, xincꞌut che̱ru chanru xtenkꞌanquileb li teꞌraj tenkꞌa̱c. Chijulticokꞌ ke li quixye li Ka̱cuaꞌ Jesús: Kꞌaxal us li qꞌuehoc chiru li cꞌuluc, chan. 36Ut nak quirakeꞌ chixyebal chixjunil aꞌin, laj Pablo quixcuikꞌib rib ut qui-oc chi tijoc rochbeneb chixjunileb. 37Cꞌajoꞌ nak queꞌya̱bac chixjunileb. Queꞌxkꞌalu laj Pablo ut queꞌrutzꞌ ru. 38Cꞌajoꞌ xrahil queꞌrecꞌa nak queꞌrabi li a̱tin li quixye laj Pablo nak incꞌaꞌ chic teꞌril ru. Ut nak co̱, coxeꞌxcanab chak chire li palau cuan cuiꞌ li jucub.
موجودہ انتخاب:
Hechos 20: kek
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2019, Wycliffe Bible Translators. All rights reserved.