Mɨkolano 2
2
Erikima ly'oMʉthɨma Mwerʉ
1Ekɨro ky'ePentekosite kyabere kyahika, abɨkɨrɨtsya boshi babyaga nibahindene hagʉma. 2Aho n'aho lʉkanda molwathoka mo lʉbʉla, nɨlʉlɨ nga kɨhʉnga kɨtsɨbʉ ekɨbʉhɨrɨra, na mokyotsutsya enyʉmba yoshi yo babyaga bikeremo. 3Aho mobashʉnga ko kwamahʉlʉka so ndɨmɨ sɨrɨnga ndɨmɨ sa mʉtsanwa, mosagabana n'ikira ko bʉlɨ mʉgʉma wa kʉbo. 4Aboshi mobotsutsibwa n'oMʉthɨma Mwerʉ na mobathanga ɨnegena mo yɨndɨ mɨnegene, ɨkwamana n'ebyo Mʉthɨma Mwerʉ ahagabo obuthoki bw'erɨnegena.
5ɨYerʉsalemʉ yabyaga niyikere Bayuta bo babyaga bashikitsye Gongo, bo bathokaga mo bɨhʉgo byoshi. 6Olʉkanda olo lwabere lw'onvwɨka, bandʉ bangɨ mobahindana. Aboshi mobashishala kʉtsɨbʉ, kʉshangwa obʉlɨ mʉndʉ mʉbo agendaga onvwa abɨkɨrɨtsya nɨabanegena mo mʉnegene ʉwe. 7Mobashweka n'ishishala kʉtsɨbʉ nɨabanegena bathɨ: «Abandʉ bo banegena aba, aboshi bathalɨ bandʉ b'iNgalilaya? 8Aho bɨthokekene bɨthɨ obʉlɨ mʉndʉ mw'ithwe onvwabo mo mʉnegene ʉwe? 9Mw'ithwe mʉlɨ bobathoka mo kɨhʉgo ky'aBapariti, na ky'aBameti na ky'aBaelamʉ. Halɨ na bandʉ b'ekɨhʉgo ky'ɨMesopotamɨa na ky'iYuteya na ky'iKapatokia na ky'ɨPonto na ky'iAsia, 10na ky'iFurikia na ky'iPamufilia na ky'iMisiri na b'omo kɨhʉgo ky'iLibia mo ndambɨ-ndambɨ y'omuyi w'iKurene, n'abandɨ bobathokaga mo muyi w'ɨRoma, 11n'ekɨhʉgo ky'ɨKɨrete na eky'iArabia, bagʉma babʉthawamo Bayuta, n'abandɨ babɨndʉkɨraga mo kɨsomo ky'aBayuta. Naho othwonvwabo balɨ abanegena mo mɨnegene ethʉ ebɨnwa by'amaka wa Gongo!» 12Aboshi mobashishala kʉtsɨbʉ nibathakyetsi kyo bangaganɨtsya, bagenda ababwɨrana bagʉma kʉ bandɨ bathɨ: «Ebyo binegenire bithi ki?» 13Hewethuwe abandɨ bagenda abashekeretsya abɨkɨrɨtsya bathɨ: «Bakundire tifayi yo kʉtsɨbʉ!»
Makangɨrɨtsya wa Petero
14Aho Petero mwimana hagʉma n'abandɨ bathʉmwa ikumi n'omʉgʉma, mwahambala mʉ mʉlenge mʉnene n'ɨbwɨra omuhindano athɨ: «Imwe Bayuta nemwe bandʉ boshi b'ɨYerʉsalemʉ, mʉhʉlɨkɨrɨtsye kʉbʉya ebɨnwa byaye na mwonvwe kʉbʉya byo bɨtsʉka. 15Abandʉ aba bathakundire nga ko mʉganɨtsya, kʉshangwa bʉkɨne saha ishathu sa mʉ makera-kera. 16Hewethuwe lɨno eby'omʉmɨnyeretsɨ Yoeli anegenaga byamabererera:
17“Gongo anegena athɨ:
‘Bɨno byo byandabya ko bɨro by'enduli:
Nyandafʉbʉlɨra oMʉthɨma aye w'oko bandʉ boshi,
abatsana benyu n'abathasha benyu bandamɨnyerera,
n'abasole benyu bandashʉnga humanani,
n'abashyakʉlʉ benyu bandalotha bɨlotho.
18Ega, ebɨro ebyo nyandafʉbʉlɨra oMʉthɨma aye w'oko bakoli baye,
abayira n'abakatsɨ,
nabo bandamɨnyerera.
19Nyandabukya bɨthɨko-thɨko mo kyanya mw'elʉgʉlʉ
na bɨmɨnyɨkalo hano ishi.
Kwandabya mʉsasɨ, na mʉtsanwa na bɨfʉ bya muki.
20Erɨtsʉba lyandahɨndʉlwamo mwitsimya
n'omʉgenda andahɨndʉka ngʉla nga mʉsasɨ,
embere ekɨro kya Nyinya-kowethʉ kihike,
ekɨro kɨkʉlʉ na ky'olʉkengerwa.
21Aho obʉlɨ mʉndʉ yo wandalaka kw'ɨtsɨna lya Nyinya-kowethʉ andashabʉlwa.#2:17-21 Soma Yoeli 3:1-5 kʉtse Yoeli 2:28-32.’”
22«Imwe bandʉ b'iIsiraeli, mʉhʉlɨkɨrɨtsye ebyo nyababwɨra: Yesʉ w'iNasareti abyaga mʉndʉ yo Gongo abakangayamo amaka ʉwe, mw'ɨbereretsya emɨhanda yoshi y'emɨkolano ya maka, na y'ebɨthɨko-thɨko, n'eyebɨmɨnyɨkalo mw'ɨtsʉkɨra mʉ Yesʉ mo kathi kenyu, nga ko munetsi imwe bene-bene. 23Omʉndʉ oyu mwahirwa mo minwe enyu ɨkwamana na ko Gongo abyaga nietsi n'ebyo athangaga ithegekania. Nemwe momwamwithire mw'imumikira abakoli b'ebɨtsɨbʉ bamʉbambe ko mʉsalaba. 24Hewethuwe Gongo mwamulubukya, mwamulamya ko magali w'olʉholo, kʉshangwa byabyaga nɨbɨthathokekene olʉholo lʉmʉtsɨmbɨrɨre mo maka walo. 25Kʉshangwa Tawiti mwanegena ko bimulebitsye athɨ:
“Nyagenda enyɨshʉnga Nyinya-kowethʉ lʉgʉmerera embere saye.
Alɨ ko lʉnda lwaye lw'amalyo kʉshangwa nyithathithimanaga.
26Nɨ bʉshana n'ekyo omʉthɨma aye amogire kʉtsɨbʉ
n'ebɨnwa byaye byotswiremo lʉmogo,
n'omʉbɨrɨ aye nawo andalʉhʉka mo maha.
27Kʉshangwa Nyinya-kowethʉ, uthindanyimike kw'ɨrʉnga,
ʉthɨndatsɨge ingye mubuyirire awe nyɨbolere mw'ɨsɨnda.
28Mowanyikangya so nzɨra so sihikya ko bʉyɨngo,
wandanyotsutsyamo lʉmogo mw'ibya hagʉma nangye.#2:25-28 Soma Saburi 16:8-11.”
29«Bagala bethʉ, bɨtholere nɨnyababwɨra kʉbʉya-kʉbʉya ko bɨnwa byahikiraga thatha-kʉlʉ Tawiti: mwafwa na mwathabwa n'erɨsɨnda lɨwe lɨnalɨ kʉno wethʉ ihika munobwire. 30Hewethuwe abyaga mʉmɨnyeretsɨ kandɨ abyaga nietsi Gongo ko mwamʉlaga mw'ɨlahɨtsya ko mʉgʉma w'omo kɨhanda kɨwe andikala ko lʉthebe lʉwe lw'eryamɨ. 31Tawiti, bʉshana n'ɨshʉnga ko byo byandahika embere, mwasɨmola kw'ilubuka lya Kirisito abere anegena athɨ:
“Mwathamikwa kw'ɨrʉnga,
n'omʉbɨrɨ ʉwe mwathabolera mw'ɨsɨnda.”
32Gongo mwalubukya Yesʉ oyo ɨthoka mo baholi, nethwe boshi thʉlɨ batimo bo mwatsɨ oyu. 33Mwirukibwa n'iyikala ko malyo wa Gongo na mwabona ɨthoka ewa Thatha oMʉthɨma Mwerʉ yo walagawa, na mwamʉfʉbʉlɨra kw'ithwe, nɨ ebyo omʉshʉngako n'ɨonvwa lɨno. 34Kʉshangwa Tawiti yowene-wene mwathɨrʉkɨra elʉbʉla, hewethuwe mwanegena athɨ:
“Nyinya-kowethʉ Gongo mwabwɨra Nyinya-kowethʉ athɨ:
‘Ikala ko malyo aye,
35ihika ko kɨro nyandayɨra so nzigu sawe,
mo kɨndʉ kyawe ky'iryathirako.#2:34-35 Soma Saburi 110:1.’”
36Aho abandʉ boshi b'iIsiraeli batholere nɨbamɨnya kundu-kundu ko Yesʉ yo mwabambaga ko mʉsalaba, n'ɨye yo Gongo ayɨragamo Nyinya-kowethʉ na Kirisito!»
37Babere bonvwa ebɨnwa ebi, mobathabagana kʉtsɨbʉ mo mɨthɨma yabo. Mobabʉtsya Petero n'abandɨ bathʉmwa bathɨ: «Bagala bethʉ, thʉkole ki?» 38Petero mwashʉbɨtsyabo athɨ: «Mʉbɨndʉke ɨthoka mo bɨtsɨbʉ byenyu, n'obʉlɨ mʉgʉma wa kw'imwe abatisibwe mw'ɨtsɨna lya Yesʉ Kirisito bʉshana mʉganyɨrwe ebɨtsɨbʉ byenyu. Aho nɨmo mwahabwa olʉhembo lwa Gongo, oMʉthɨma Mwerʉ. 39Kʉshangwa endagane ya Gongo eno yahirawaho bʉshana n'imwe, n'abana benyu, na ko boshi bo balɨ hale, na aboshi bo Nyinya-kowethʉ Gongo wethʉ andabɨrɨkɨra.» 40Petero mwabwɨrabo bɨndɨ bɨnwa bɨngɨ bʉshana bɨkɨrɨtsye ebyo anegena n'ɨhabo muhwa nɨanegena athɨ: «Muyilamye ɨthoka mo kɨgenyero kɨbɨ kɨno!» 41Bandʉ bangɨ mobɨkɨrɨtsya ebɨnwa bya Petero na mobabatisibwa. Ekɨro ekyo bandʉ hofɨ bɨhʉmbɨ bɨshathʉ mobongereka ko kɨkembe ky'abɨkɨrɨtsya.
Ibyaho ly'obʉgʉma
42Abɨkɨrɨtsya babyaga na muhwa w'ɨkwama kʉbʉya amakangɨrɨtsya w'abathʉmwa, n'ibyaho mo bʉgʉma, n'ɨgenda abalɨra hagʉma#2:42 abalɨra hagʉma: Kano kangabya kalyo k'olʉgalɨ lwa Nyinya-kowethʉ, kʉtse kalyo ko kanalɨbwa honyuma w'olʉgalɨ lwa Nyinya-kowethʉ. n'ɨgenda abashabɨra hagʉma. 43Obʉlɨ mʉndʉ abyaga na bʉba, kʉshangwa Gongo agenda akola bɨthɨko-thɨko bɨngɨ na bɨmɨnyɨkalo bɨngɨ kw'ɨtsʉkɨra abathʉmwa. 44Abɨkɨrɨtsya boshi babyaga mʉ bʉgʉma, na bagenda abashangɨra ebyoshi babyaga bawitheko. 45Bagenda abagʉtsya ebɨndʉ byabo, n'esofaranga sagenda esɨthoka kʉbyo bagenda abagabanatho, ɨkwamana n'emɨlago y'obʉlɨ mʉndʉ. 46Ebɨro byoshi bagenda abahindana mo Nyʉmba ya Gongo, na bagenda abalɨra hagʉma mo manyʉmba wabo na bagenda abalya akalyo kabo mo lʉmogo na mo mɨthɨma y'obʉlonvʉ. 47Bagenda abasingya Gongo, kandɨ nibatsiyirwe n'abandʉ boshi. Na Nyinya-kowethʉ agenda ongerera ekɨkembe kyabo, abo agenda ashabʉla ebɨro byoshi.
2025 Group of Associations for the Promotion of Languages, Cultures for Integral Development