Ruma 3
3
Kwa ala ma dəlili akas
1A ꞌwa aka ndə Yahuda a ɗa dəy aha həji ndiɓi aagi avaŋga? Təwah ma ndza ata zla mazhemter veme? 2Ayəw a ɗa səkən ma təwah tiwtiw kwa a vatəy! Diw tə ci, a Yahuda aagi, həji ndə Bizlaf a va a vəlatana ma tə ka aagi. 3Ama azha ya, andza həji ndiɓi aagi va a ndza abə deŋ ŋkwaɓ gbak gbak ya, deŋ ŋkwaɓ ta ma gbak watsa a tak Bizlaf aka a ndza abə deŋ ŋkwaɓ ŋtaɗ vəw? 4Aŋghə, tandza ikwa səku! Həji sənə ci, Bizlaf a zlap ŋter, həji tiwtiw aa ɗa gaɗaɗaŋ aagi, andza ndə a ŋtiraya, iŋgaya: Ma vah ndə həji kaadzam guma ata hwa ci, ikwa abə həji a gərahu a wəzaha a zlap kwa aagi, azha, hwa kaarəz səku. 5Ama andza səkən ma gamak ndə həji kaɗalə ana ma kaghalə ci, Bizlaf a ɗa dəlili, həji aghal avaŋga? Mbara azha Bizlaf ma ŋkula ɗa dəlili abə a kaŋgəzahəji abə ghuɗek tə vəw? A ɗi ci, sa zlap andza həji aagi. 6Ŋter ikwa səku! Mbara andza Bizlaf taɗa dəlili aka səku ya, a sən a zla guma ataa manahayak avaŋga? 7Ama andza gaɗaɗaŋ naka ana ma kafəl ma ma ɗa ŋter ataa Bizlaf aska a ghal sləf tə ya, mbara sa sən a ɗa, sa tadzawaya andza ala mpət zhana avaŋga? 8Həji ndiɓi aagi karani, azha həji watsa aagi kazhiva a dzawa ka. Aa katək ma ata ni, aagi iŋgaya: «Kiyzaŋkwa a ɗal səkən ma gamak, aska səkən ma ŋtan a ndaha,» aagiy! Mbara həji ŋkula ɗal səkən ma gamak watsa ara veme? 9Ama azha, a ndza avaŋga? Ŋkwa Yahuda aagi ya, həji dəy aha həji ndiɓi aagi vəw? Aŋghə, tandza ikwa səku. Ara ndə a ɗa, sa taghalatana ma minja bəza: Yahuda aagi, abə həji ma ŋkula ɗa Yahuda aagi ci, aa ndza aska ra mpət tiwtiw. 10Andza ndə a ŋtiraya a Ɗerewal ma ghwaɗeɗe, iŋgaya:
Kwa ala ma dəlili akas, kwa ŋtaɗ akas.
11 Kwa ala ma ndza abə ŋkwaɓ a zlima səkən ma dəlili akas,
kwa ala ma kagas a sən Bizlaf akas.
12 Aa tambasl təf ma ŋtan aka tiwtiw,
təmta tiwtiw aa taɗal səkən ndə Bizlaf a kamay kas.
Kwa ŋtaɗ ala ma kaɗal səkən ma ŋtan akas,
kwa ŋtaguleŋ akas!
13 Maŋgurləm ta a ndza andza jiɓ ma dəɗ tə.
Aa kaghut həji ndiɓi aagi abə gaɗaɗaŋ ta.
Ma ma kandaa a bəza a takam ta ya,
a ndza andza dara sheshuk.
14 Gəy ma gamak abə dahalay ana ma kandaa a bəza a takam ta.
15 Aa shi kahkah aska bazl həji aagi.
16 Gəy səkən aagi abə dadawər ana ndə aa kaɗalə
ata la ndə aa kapew.
17 təf ataa təwah ya, aa kasən səku.
18 Kwa aa kahawanə a Bizlaf akas!
19Avəli həji kasənə, kala səkən ndə ma ma garagar a kaghalə ci, a ghalatana a həji ma kahawanə a ma ma garagar watsa aagi, aska kwa vaye a tsak ma tə ka a zlap, azha aska manahayak aagi asənə ha ta, aa ɗa həji ma gəy ma aagi atama Bizlaf. 20Sha ana ndə a ɗa ya, ata nja Bizlaf ci, kwa ala ma dəlili akas, dawna ndə həji kaɗalɓa zlən ataa ma ma garagar, ara ndə a ɗa, ma ma garagar a dərakwatana aska aagi asən ci, aa ɗa həji mpət aagi.
Ndza ma dəlili gwara ara ɗal awa
21Ama anawatsə, Bizlaf taghalaŋkwa avaŋgəy abə a bəwahəji ka a ɗa həji ma dəlili aagi, mba ma gwara ara ma ma garagar, ma ma garagar Musa abə ha tə abə həji ma ɗaf ma ndə aa zlimazə ara Bizlaf aagi taghal ma ma ndza a heɗe. 22Bizlaf a bəw həji aagi ka dəlili dawna ɗal awa ta a Yesu Kərist, a ɗalatana a həji ma kaɗalanə awa a Kərist aagi tiwtiw, ara ndə a ɗa, ghala a walaŋ ta akas: 23təmta tiwtiw, aa ɗa həji mpət aagi, aa kalima sləf Bizlaf səku. 24Ama Bizlaf abə sənma tə, tabəwata ka a həji ma dəlili aagi, a ɗa səkən ndə Bizlaf a ɗalatana ɓəlaakaka, gwara ara Yesu Kərist ma pəlata a bəza a mpət. 25Sha ana ndə Bizlaf a ji aska zah ampəs tə ka aska a pəl mpət ataa həji ma ɗalanə awa aagi. Bizlaf a ɗalə ikwa aska ghal dəlili tə, ara ndə a səw ma aagi bəza ambəɗa tə, taŋgəɗ mpət akas. 26Ama vah səw ma tə. A kaghalə ci, a ɗa dəlili anawatsə ata vah ma ndza akacihwa, aska həji aagi asən ka ci, dəlili ndə a kabəw ala ma ɗalanə awa a Yesu aka a ɗa ala ma dəlili. 27Azha təf ara ŋkwa a həji a zhin a ghav aka vəw? Aŋghə, kwa akas, mbara dawna azha veme? Ara ndə a ɗa, səkən ma kazhiva a ɗal ci, njin ma ma garagar səku, ama ɗal awa. 28Həji kadeŋ ka, həji iŋgaya: həji aagi tabəw ta a həji ma dəlili dawna ndə aa kaɗal awa, ama ndə aa kaɗal səkən ndə ma ma garagar a kaɗiwi səku. 29Aka səku ci, Bizlaf a ɗa Bizlaf ataa Yahuda aagi gagagha vəw? A ɗa Bizlaf ataa həji ndiɓi aagi yəm wəra? Ayəw, a ɗa ŋter, a ɗa Bizlaf ataa həji ndiɓi aagi yəm, 30ara ndə Bizlaf a ɗa ŋtaguleŋ, sha ana ma kaabəw Yahuda aagi a ɗa dəlili dawna ɗal awa. Zhana wəruk sha ana ma kaabəw həji ma ŋkula ɗa Yahuda aagi ka a həji ma dəlili dawna ɗal awa ta. 31Azha ndə həji kaɗal awa ya, həji tabəw ma ma garagar ka a səkən ma ɓəlaakaka vəw? Ikwa səku, aɓa azha ci, həji vəlanə ŋter sləf a ma ma garagar.
موجودہ انتخاب:
Ruma 3: GOU
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in