Mateus 27
27
Pilatosram Jesus satobyry
(Mc 15.1; Lc 23.1-2; Jo 18.28-32)
1Emetybyem idânârâ akaemo kurâdo eynynâ Deus agâ aguewâni modo iwymârydo, pymâ judeu domodo iwymârydo warâ âtunâguedylymo, âdara kuru Jesus tyâen-honlymo awyly tiuntuhomoem. 2Tonlo guarda modoram nhekâjien-honlymo, nhaleholymo, nhegamehonlymo warâ Pilatosram, pymâ Romadâpa ingonotybyram.
Judas âdyâhobyry
(At 1.16-19)
3Judas, Jesus egamenribyry, pymâdo Jesus tiân-homoem aguelymo tientuo, toenzepa kehoem âjityendyly, pymâdoram mâkâ tiengamehobyry wâgâ. Awylygue myani kurâdo eynynâ Deus agâ aguewâni modo iwymârydoram, kywymâry modoram warâ idâly. Mârâ trinta moeda sopâze kely mâkâ tiengamehobyry ebyry. 4Eyanmo aguely:
— Inakanhe lelâlâ awidâ; mâkâ uguondo âdaityby keba kulâ sawâneho — kely.
Aituo eyam aguelymo:
— Awârâ tiuntudyze inkâba xina. Âmâ inakanhe aini, xina mâkeba — kelymo.
5Agueduomo, Judas mârâ dinheru nhamely Deus ety odaji. Dinheru sameimbyryem, idâly okogâjize.
6Akaemo kurâdo eynynâ Deus agâ aguewâni modo iwymârydo mârâ moeda pratagueto sanânibyryem, aguelymo:
— Xirâ dinherugue keankâ uguondo xyâhoem epywadyly. Awylygue ise Moisés inweniby eynynâ, Deus ety oday kienwanipa kydawyly — kelymo.
7Aituo âtunâguedybyem, mârâ dinherugue onro nhanâdylymo. “Âdydo imeom onrogue xygato” kehobyry. Mârâ onro nhanâdylymo judeu keba modo igueypy etadâdoenlâ. 8Jesus iguehoem egamehobyry ebyrygue sanâtyby awylygue, “Xyâhoem egamehobyry ebyrygue sanâtyby” kelyguelâ mârâ âji ezeku iwerâ. 9Aguewânlâmy Jeremias, Deus eynynâ agueypy#27.9 Zacarias 11.12-13 warâdâ aguely. Zacarias myakâwândy agueim. Judeu domodo xurâem olâ idânârâ Deus xunâry egatuwâni modo inweniby Jeremias aguehobyryem lelâ nhutulymo.: “Trinta lelâ moeda pratagueto nhemakelymo. Israel iweom ‘Warâ ise ebyryem kiunduly’ kehobyry” kewâm. 10Mârâ dinheru tienmakeybygue, âdydo imeom onrogue xygato ejidy nhanâdylymo. Warâ myani aidylymo, Kywymâry Deus aguehobyry ara tâkeze myakâwânmy Deus eynynâ agueim.
Warâ myani Judas mârâ dinheru, Jesus tiengamehobyry ebyry anhedyly.
Jesus Pilatos enado satobyry
(Mc 15.2-5; Lc 23.1-5; Jo 18.33-38)
11Jesus XYDYK warâ, mâkâ pymâ Romadâpa ingonotyby, Pilatos enado. Pilatosram adapâigueoly:
— Judeu domodo iwymâry kuruka âmâ? — kely.
Jesus in-hoguly:
— Mâkâlâ urâ, amygueho ara — kely.
12Akaemo kurâdo eynynâ Deus agâ aguewâni modo iwymârydo, kywymâry modo warâ tâwentâduo, âdakepa olâ Jesus.
13Pilatos aguely Jesusram:
— Akaemo iwentâdo midatailâ. Amyguehonly mâin-hogubaka ise âmâ? — kely.
14Jesus olâ âdakepa. Toenzepa kehoem Pilatos âseguâdâdyly, Jesus tâsemaguehoem âdakepa awylygue.
“Nigue lelâ awâkâ Jesus” Pilatos kehobyry
(Mc 15.6-15; Lc 23.13-25; Jo 18.38–19.16)
15Páscoa etyguedyly ume, aunlolâ mykâinane Pilatos etadâdyby modo ewy tokalâ nhetaguehonly, âdaunlolâ kurâdo nhekadybylâ. 16Ilâ ume tâlâ myani uguondo kadeia oday tâtagueim, kurâ domodo nhutuly, Barrabásgue tâzekeim. 17Aituo kurâdo âtâdyguyly, Pilatos ety iwyantay. Pilatos eyanmo aguely:
— Ânguyka kâentaguedyze matomo, [Jesus] Barrabás keho, Jesus Messias keho Deus Ingonotyby? — kely.
18Tâsewânilygue kulâ akaemo judeu domodo iwymâry, Jesus tyam nhegamely awyly, tutuze olâ myani Pilatos. 19Pilatos târâ tribunaldâ ekadybyem awyly ume myani iwydy âjitaumbyguely eyam.
— Jesus âdakâiedâ. Koendonro awâkâ uguondo. Âdy inakanhe anientaymba awâkâ. Kopae eagâ kâjiâensedai. Toenzepa kâsenagazedai eagâ kâjiâensedobyry wâgâ — kely.
20Akaemo kurâdo eynynâ Deus agâ aguewâni modo iwymârydo, kywymâry modo warâ toenzepa kurâdoram aguelymo.
— Barrabás nhetaguehoem ekadaungâ Pilatosram. Jesus xyâhoem ekadaungâ-ro warâ — kelymo.
21Ine warâ myani Pilatos kurâdoram agueondyly:
— Âdykonlo uguondoka kâentaguehondyze matomo? — keondyly.
Aituo in-hogulymo:
— Barrabás! — kelymo.
22— Âdakânhedyly pylâka ise merâ Jesus, Messias, Deus Ingonotyby? — kely myani Pilatos.
Idânârâ kehoem in-hogulymo:
— Kruz onwa sakâjien-hongâ, iguehoem! — kelymo.
23— Âdaituo? Ienanaji, âda nitaymba merâ iguehoem — kely Pilatos.
Agueduo olâ idânârâ adaenkelymo ton-honre kehoem:
— Kruz onwa sakâjien-hongâ, iguehoem! — keondylymo.
24Tutuze olâ Pilatos, aguiom kurâdo tunâry nugukeba awyly. Tutuze lâpylâ, akaemo tagâ iewiâpadyly, aguehomobyry ara anipyra-ro watay. Aituo tâzemaunguehoem paru nhenenehonly. Enanaynmo âzemaunguely, tâwentâzeba tawyly tienehon-hoem. Eyanmo aguely:
— Urâ keba ise âsenagazeni merâ uguondo iguehobyry wâgâ. Âmaemo ise tâwentâzeim, mâyâen-hohomobyry wâgâ — kely.
25Idânârâ kurâdo aguely:
— Xinalâ ise tâwentâzeim awâkâ iguehobyry wâgâ, xina, xina imeombyry, xina iweompyry alelâ — kelymo.
26Aituo Barrabás nhetaguehonly, nhekadomobyry ara. Ilâpyryem myani Roma donro sodadu domodoram aguely:
— Jesus sapioguwâdaungâ. Ilâpyryem ise mandylymo, kruz onwa sakâjize-ro warâ, iguehoem — kely.
Sodadu domodo Jesus âwankuem nhetobyry
(Mc 15.16-20; Jo 19.2-3)
27Ilâpyryem sodadu domodo Jesus nhadyly palaciuram, Pilatos etyram. Idânârâ târâ sodadu modo âtâdyguylymo myani. Jesus tuontaji nhedylymo, âwankuem tientomoem. 28Jesus etygueimbyryem, âtâ BOH waunlo tapabileingue nhetydâdylymo, pymâ âzetydâdo ara, âwankuem tientomoem. 29Tyguyreim koroaem xygatyby myani mâkâ nhangahu onwa nhekylymo. Aho eynynâ segue nhematâdylymo, pymâ ara. Enado âzeguhoam idylymo, pymâ enado adâitomo ara. Eyam aguelymo:
— Tynrenseim âmâ, judeu domodo iwymâry kuru! — kelymo, âwankuem nhedylymo.
30KUITÚ kelymo nhonwa, segue nhangatainlymo warâ. 31Âwankuem ienipyryem âtâ BOH waunlo tapabileim Jesus wâgâpa nhetylymo. Ety iwogonropyryguelâ nhetydâdylymo. Ilâpyryem nhadylymo, kruz se xygatyby onwa sakâjize.
Jesus kruz wâgâ iguehoem sakâjihobyry
(Mc 15.21-32; Lc 23.26-43; Jo 19.17-27)
32Xidadâ odaypa tâgasedaymo, uguondo Simão agâ oxiodylymo. Xidadâ Cirene donro myani mâkâ. Aituo myani, sodadu domodo kruz Jesus tiankâjiho eyam nhanânehonlymo. 33Golgotaram myani Jesus nhadylymo. (Iwy Calvariogue tâzekeim lâpylâ, tâjiangahubyry ara enurunugue.) 34Târâ myani vinhu tâzenukuru agâ ietybygue sakuize kelymo. Ekunibyryem myani tienydyzeba idyly. 35-38Aituo kruz onwa nhakâjilymo. Jesus merâ, judeu domodo iwymâry kuru kely iweniby sakâjiwânmomy Jesus nhangawaym kruz wâgâ. Âdaituo Jesus nhakâjilymo awyly xutuhoem myani mârâ anhedylymo. Ilâem lâpylâ azagâ tâmagaduneim modo nhakâjilymo. Tokalâ Jesus ahoru eynynâ, eagonro pâem eynynâ warâ nhakâjilymo. Sakâjirimbyryem, Jesus ety iwogompyry nhepajiwâdylymo. Dadu nhamelymo ânguy, ânguy warâ Jesus ety iwogompyry emakeim awyly tiuntuhomoem. Aitybyem ekadylymo, akaemo azagâ tokalâ warâ kruz onwa sakâjiwâdyby ânguy nynanâbyra itoem.
39Tâinkâ sakadaynrim modoram âwankuem âieholy. Angakânilymo, inwykelymo warâ.
40— “Deus ety sakalagueze urâ” myguema. “Azagâ emedyly#27.40 Nota de pé Mateus 12.40dâ egâ. idyly ara kulâ saunâtonze urâ” mygue warâ. Ton-honreim lelâlâ matay, tâwâlâ âsemaguegâ! Deus imery âmâ watay, kruz wâgâpa âytâguygâ! — kelymo.
41Kurâdo eynynâ Deus agâ aguewâni modo iwymârydo, Moisés inweniby wâgâ enomedâni modo, kywymâry modo warâ âwankuem nhedylymo. Aguelymo:
42— Âkelomo nemake, tâwâlâ nâsemagueba olâ! Israelita domodo iwymâry lelâlâ-ro watay, iweâ lelâlâ kruz wâgâpa nytâguy. Xytâguyly-ro watay, einwânse kurâ. 43“Deus imery urâ” nygue. “Deus ietâ” nygue warâ mawânkâ. Âkealâ kuru-ro watay, Deus kruz wâgâpa xytâguyânze âese iweâ lelâlâ! Deus tâense watay, nemake pylâ! — kelymo, âwankuem nhedylymo.
44Akaemo azagâ tâmagaduneim modo eagâ sakâjiwâdyby modoram âwankuem âieholy lelâ lâpylâ.
Jesus iguehobyry
(Mc 15.33-41; Lc 23.44-49; Jo 19.28-30)
45Kuotatay idânârâ iamadyly; azagâ tokalâ warâ horas ani iamu. 46Azagâ tokalâ horas ituo myani Jesus adaenkely:
— Eli, Eli, lemá sabactani? — kely. (“Pabai, âdaituoka wodokely?” keze aguely.)
47Tonlo modo, koendâ nidapyra tawylygue, Elias ingâsedyly ara nhenehonlymo, Deus eynynâ agueim lâpylâ mykâinane mâkâ. Aituo aguelymo:
— Idataungâ. Elias ingâsedyly tâmakehoem — kelymo.
48Akaemo ewy egatudyly myani vinhu nhewantybygue esponja ikuize. Tinkuibygueduo se iopiry onwa nhekâjily. Jesus nhugakâin-hoem wâne nhuduly.
49Eagonro modo eyam aguely:
— Ine wao. Elias awâkâ ingâseguyly. Elias emakeze âewyly kyzene wao — kelymo.
50Aituo Jesus adaenkeondyly ago kehoem, tyiguehoem kuru. Ipa kuru idyly.
51Iguely ume kehoem myani, Deus ety oday Deus Âepanâgueho xuahuho tyxieim iotagâ adauguely kaynonrobyryem, on-yam; Deus, kurâdo agâ tygue ito myani mârâ xuahuru. Ton-honre kehoem onro âzekânily. Tuhu imâsedo modo tatuwâze myani. 52Onro âzekâniduo, âguedy modo etadâdo âzenahunguewâdyly. Aituo myani Deus eynynonro igueypy modo myarâ ietyby, kurâem itondylymo. 53Tâkanâdobyrydâba egaselymo. Deus, Jesus kurâem nhetombygueduo myani akaemo idâly xidadâ Jerusalémram, Deus ijidadâryam. Târâ tâtyuneim modoram tâzehozemo myani.
54Sodadu Roma donro modo iwymâry, izodadury Jesus etaynrim modo warâ onro âzekânily tâensemo myani. Aidyly tâensemo warâ. Tientuomo, toenzepa kehoem myani âseanedylymo. Aguelymo:
— Deus imery lelâlâ mynra merâ uguondo! — kelymo.
55Tâlâ myani târâ pekodo modo, iwaguelâ olâ nhedylymo. Jesus sakâjily iraynâ, Jesus Galiléia eynynâ atay, emawyadânibyry ani akaemo pekodo modo tâlâ tatomogue. 56Maria (Magdala donro), Maria (Tiago, José warâ ise), Zebedeu imeom ise warâ myani iduaymo.
Jesus eguepybyry tuhu imâsedo tâtagueim odaji nhetadâdomobyry
(Mc 15.42-47; Lc 23.50-56; Jo 19.38-42)
57Iguandyly iraynâ uguondo tydinherugueim José saindyly, xidadâ Arimatéia donro. Jesus einwânni lâpylâ myani mâkâ. 58Aituo José, Pilatosram idâly agueze:
— Jesus nigueaki, Pymâ. Kruz wâgâpa kâyntâguyândyze olâ urâ, tuhu imâsedo tâtagueim odaxi kâenkanâdoem. Tâwâlâ kâyntâguyândyly? — kely.
Aituo Pilatos, Jesus eguepybyry José nhatoem,
— Tâwâlâ — kely.
59Aituo José, Jesus eguepybyry kruz wâgâpa nhytâguyândyly. Xytâguyânibyryem intuwynly âtâ iwelo linhuguetogue. 60Tyigueduo tâtaryem tiensaguehoymby odajilâ myani Jesus eguepybyry nhetadâdyly. Iwelo esagueze myani mârâ tâtagueim. Myarâ eguepybyry ienipyryem nhenahunly tuhu imâsedogue. Ilâpygueduo, idâly. 61Azagâ pekodo modo: Maria Magdala donro, Maria lâpylâ warâ Jesus eguepybyry etadâdobyrydâmolâ myani.
Jesus eguepybyry etadâdobyrydâ guarda domodo âxidâdobyry
62Páscoa etyry sakabygueduo, iguandyly ume akaemo kurâdo eynynâ Deus agâ aguewâni modo iwymârydo, fariseu domodo warâ idâlymo Pilatos agâ âtunâgueze.
63— Pymâ, tyiguely iraynâ, warâ keankâ Jesus aguely: “Yigueduo, azagâ#27.63 Nota de pé Mateus 12.40dâ egâ. emedyly idyly wâgâ kurâem itonze urâ” nygue. Xirâ âkealâba kulâ aguehobyry enra xina nhenanâguely. 64Awylygue Jesus eguepybyry etadâdobyry koendâ mâenehonly xina ize ato. Azagâ emedyly idyly ara enipe târâ nidâ, eynynonrobyry modo eguepybyry nemagazebyra itomoem. Tienmagazeduo, “Jesus kurâem nitondâ” kezemo mawânkâ. Toenzepa iwerâ “Jesuslâ Messias” kelygue tonokudo einwânni modo. “Jesus kurâem itondybyem” kely nheinwândylymo watay lakuru ise aguykeho einwândyly inmolymo kuru — kelymo.
65Aituo Pilatos eyanmo aguely:
— Âdainkâba. Anra yzodadury modo. Idâzemo lelâ agâmo, azagâ emedyly ise târâ agâmo awyly, Jesus etadâdobyry eniem. Imawyadâzemo, ânguy Jesus eguepybyry nynanâbyra itoem — kely.
66Aituo myani Roma donro sodadu domodo tagâ nhadylymo. Tâtagueim enahun-ho enahungueybyem awyly xutuho tyesemo myani, ânguylâ Jesus eguepybyry eydâ atoram egawânipyryem awyly tiuntuhomoem. Adiempygueduo myani idâlymo. Sodadu domodo lelâ myani eniem âxiânrim.
موجودہ انتخاب:
Mateus 27: bkq
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2011, Wycliffe Bible Translators, Inc. All rights reserved.