Iironga 26
26
ONTOPORUA 26.
Eehapu da Paulus motshipara tshomukuaniirua Agrippa
1Agrippa okua ti ku Paulus: “Nena nduno ou nepitiko rjokuipopira.” Ngashingika Paulus okua jeruca eke rje nde ta shimbike okuipopira.
2“Mukuaniirua Agrippa, onda panda unene, sho nda pitikua okuipopira kotshipara tshohe moru’iinima mbi ajishe aajuda taa pendje ondjo.
3Eno, ngueje ua tshiua naua eemkaro nomarudi geehapu daajuda. Otsho ngaje andi ku indire, puakenandje nonteni.
4Aajuda ajeshe oje tshi okukara kuandje okuza kuunjasha uandje, oshoka ketameko ngaje onda ri arushe mokati kotshiguana tshandje mu Jerusalem.
5Oje tshindje ketameko, nge ja ara oku tshi okorora, nokutja onda ri arushe motshimpaga shi tsha diginina uneenene ehiteero rjetu ng’omufarisai.
6Ndere nena andi cikama potshipundi tshetokoro moru’etegerero rjomarombuerero ga romborua ookuku ku Karunga.
7Ngaka ga arikua unene komazimo getu omurongo na gaari nokukarera Karunga omutenja nuusiku. Moru’etegerero ndi, mukuaniirua, te humanekerua kaajuda.
8Otsha tja ngiini? — Itamu vuru okuiteera nokutja Karunga ota jumuda aasi?
9Tshiri nangaje uo nda ri ndi tshi ndi nokuruica edina rja Jesus omunatsaret.
10Otsho nda ningire mu Jerusalem. Aajapuki ojendji onde j’edirire meendrongo, sho nda perue eempapira depitiko kaapristeri aakuruntu. Nge ja ara oku ja dipaga, nangaje uo nd’iteera.
11Meesinagoga adishe onde ja monica egeero, nde ja ciminika okutsheka.#26:11 Okue ja ciminika ikuidimbika Jesus. Mongejo handje onene onde ja tidatida sigo okiirando jokokure.
12Ndere sho nda hi nomadiradiro ngaka ku Damaskus, meenkondo no medina rjaapristeri aakuruntu,
13nena, mukuaniirua, mondjira handje, petango ljambandomutse, onda mona uujerere, ua zi keguru u vure etango mehadimo rjarjo, ua kondekandje, ngaje muene na mbaka ja cindikirandje.
14Nde sho tua guire po pevi atushe, ngaje ond’uvu eui meraka rjaahebrei, tari ti kungaje: ‘Saulus Saulus, otshike ua tidatidandje? Atshi ningi otshidigu kungueje okurjata omakegua.’#26:14 Okutja: Ito vuru okutinda, oshoka oshenda handje otahi ku icana neenkondo.
15Ndere ngaje onda ti: ‘Muene ongueje re? Muene okua ti: ‘Ongaje Jesus ngu to tidatida.’
16Cikama nduno, ijeruca, onde ku ihorokere ndi ku ninge omukareri ngu omuhokorori guandje gua shi ua mona na shi andi ke ku ororera okuza mpa.
17Andi ku kuca motshiguana shika mo maapagani#26:17 Karunga okue mu kuca, sho e mu ogorora a ninge omuapostoli gue. ku mboka to ka tumua kungaje ngashingika.
18Ngueje u pashure omesho gauo, opo j’idirurure, ja piramene eemrema, ja game kuujerere j’iteke epangero rjomusatana, jo ja tshune ku Karunga, opo ja peue edimopo rjeendjo nuuciga uujapuki#26:18 Uuciga uaajapuki, erago rjarushe rjomeguru. moru’ehiteero rjokuiteerandje.’
19Otsho ano, mukuaniirua Agrippa, inandi tinda okuiteera ehoroko ndika rjomeguru.
20Aaue, ond’uvicire tango mboka jomu Damaskus no mu Jerusalem no motshirongo atshishe tsha Judea. Okuza hoka ond’uvicire aapagani, jo j’idirurure, ja tshune ku Karunga, ja ninge iironga jehidirururo rjotshiri.
21Otsho aajuda ja kuaterandje sho nda ri motempeli, ja ara okudipagandje.
22Ndere moru’ekuaco negameno rja Karunga ngaje opo ndi ri sigo okesiku rjonena, andi okororere aacigona naajamba di da popiua ike kaaprofeti no ku Moses, di nokuguanicua.
23Nokutja Kristus ta k’epekua, ta ka jumuka kuusi ng’omutetekeri, he ta k’uvicira otshiguana#26:23 Okutja otshiguana tshaajuda. naapagani uujerere.”
24Sho kua tire ngaano nokuipopira, Festus oku’igida muure a ti: “Oua pirarara meendunge Paulus. Ehirongo rjeehapu doka odindji otari ke ku pirarareka eendunge.”
25Ndere Paulus okua ti: “Inandi pirarara meendunge, Festus nakusimanekua, aaue, andi popi eehapu dotshiri, inandi jaduuka.
26Omukuaniirua#26:26 Omukuniirua Agrippa. oku tshi naua iinima mbi, omoruashi ngaje nda popi nehinekero. Ndi tshi kapu na tsha tshomu mbika tsha orama ku he, ongashi inaji ningirua mekororo rja penipeni.
27Ngueje, mukuaniirua Agrippa, ou’iteera aaprofeti? Ondi tshi tshi nokutja ngueje ou’iteera.”
28Ndere Agrippa okua rombuera Paulus: “Okonjaranjara u’ekandje ndi ninge omukriste.”
29Nena Paulus okua ti: “Ando Karunga e tshi tu pe nokutja ha konjara ike, aaue, ciruciru, ha ngueje ike, aaue, ajeshejeshe mba taa huvundje, ja ninge nena onga ngaje, omarjenge ngano, aaue.#26:29 Paulus ta’ ti: “Okuninga omukriste konjara kaku noruporo, aaue, ngueje u nokuninga omukriste tshiritshiri. Tsho inatshi guana, onguejeiike nge to ningi omukriste, aaue, ajeshe naa ninge akriste onga ngaje muene. Eno onda ara ne amushe mu fendje muukriste, momarjenge aaue.
30Nena omukuaniirua okua cikama nomureri guotshirongo na Berenike najeshe mba ja kaatumba pu jo.
31Mokuza mo oja kundacana ja ti: “Omurumentu nguka ina ninga tsha tshokugeerua neso nenge nokumangua.”
32Agrippa okua rombuere Festus: “Omuntu nguno, ngeno kua ina icana etokoro rjomukuaniirua andora ota vuru okueciua.
Omission Heklesia Ekatolika, 1951. Namibian Catholic Bishops Conference.