रोमियो 3

1सेवट यहूदीयान यहूदी येणेन केव्ही खतना येणेन काय लाभ? 2आखान प्रकारान जादा काही. पेल्ला तर हे कि बोगवानान वचन ताह होपील. 3कोलाकान विश्वास मेलील नाह केरीन काय ईइल? तान अविश्वास बोगवानान विश्वासपात्रता व्यर्थ केरील काय? 4केदिमेदी नाहं! नापून बोगवान खेरो एने प्रत्येक माणुह ठेग-यु ठेरणू, जोहलो लिखील हि, “ज्यान तू आपणो वातू माय खेरो ठोरावणे न्याय करीन टाइम तू विजयी पावेल.”

5जानकेरता केध्दीह आमारो अधर्म बोगवानान धार्मिकता हि, तर आमु काय केहू? काय ज्याच कि बोगवान जो राग करने अन्यायी हि? हे तर मी माणहान रीतीमाय किथी हि. 6केदिमेदी नाहं! नाहं तर बोगवान केवी जगान न्याय केरूह? 7केध्दीह मारो ठेगणे पणाच्या कारणाने बोगवानान सत्य तान महिमा केरता, जास्ती एय प्रगट एनी तर ओवतो का पापाहा हारका दण्डान योग्य ठेरिन्यो जाथू? 8“आमु का बुराई केरूह नाहा कि हाजो निकाली? जोहलो कि आमऱ्येपुररीन हि दोष लागाडया जाथू, एने काही केणु कि ज्यान केणे हि पुण इही जे ठराविलु ते हाजो हि.”

कुणीच धर्मी नाह

9तर ओवतो काय एय गीयो? काय आमु ताउगेरीन हाजो हि? केधीच नाहं; काहाकाय आमु यहूदी एने यूनानी उपेर हा दोष लागिल हि कि ता आखा आखा पाप्यान वंश माय हि. 10जाणेन लिखील हि: “कुनुस धर्मी नाहं, एक पुण नाहं.” 11कूण होमजणार नाहं; कूण बोगवानान होदनारू नाहं. 12आखा भटकिल्यो हि, आखा आखा बिगरउपयोगी बोणावीन गीया हि; कुनुस सत्कर्मे केरणार नाहं. 13तानकेरीन गळा उगडील माणहान हि, तास आपणो जीभने वेखडणु किरील हि तान ओठमाय गेयळेकान विष हि. 14तान मूय शापाने एने कपटीपानाने भूरील हि. 15तान पाय रक्त वोयाडील उतावळे एय गीयो हि, 16तान मार्गाम नाश एने क्लेश हेते, 17तास शान्तिन सिडिक ओलखिल नाहं. 18तान डोला सुमोर बोगवानान बिय नाहं. 19आमु ओलखिल कि व्यवस्था जे काही किथी हि, ते ताहाज किथी हि जे व्यवस्था अधीन हि; तान केरता कि प्रत्येक मूय बंद किरील जातीमाय एने आखा जग बोगवानान दण्डाचे योग्य ठेरती; 20काहाकाय का व्यवस्था कारण से काल्लोज प्राणी तान सुमोर धर्मी ठेरणार नाहं, जानकेरता कि व्यवस्था द्वारे पापान ओलेख एती.

विश्वासा द्वारे धार्मिकता

21पुण ऐवी व्यवस्था आलेग बोगवानान ती धार्मिकता प्रगट एनी, हि ज्यान गवाही पवित्र शास्त्र एने भविष्यवक्ता आपणु. 22म्हणजे बोगवानान हि धार्मिकता जे यीशु मसीहा पोर केरणू ता विश्वास केरणारा केरता हि. काहाकाय कि कायीच भेदभाव नाहं; 23जानकेरता कि आखा पाप किरील हि एने बोगवानान महिमारहित हि, 24पुण तान कृपासे सुटकेद्वारे जो मसीह यीशु माय हि, नितीमुल्य धर्मी ठेरिन्यो जातीमाय. 25ताह बोगवानान तान रक्तान कारणाने एक इही क्षमा ठेरायेल जो विश्वास केरणेन केरता कार्यकारी एती, कि जे पाप पेल्ला किरील गीया एने ज्यापूर बोगवानान आपणो सहनशीलतान काहाकाय लक्ष आपील नाहं. तान विषयाम तो आपणी धार्मिकता प्रगट केरूह. 26नापून ता टायीमा तान खेरापण प्रगट एती कि ज्यान ते खुदेन खेरो ठेरणू, एने जे यीशुवर विश्वास मेलणार नीतिमान ठेरावी एय. 27तर खत केरणेन कां रेणा? तान तर जागेज नाहं कायताहा व्यवस्था कारणाने? नाहं, नापून विश्वासान व्यवस्था कारणाने नाहं. 28जानकेरता आमु आवो परिणामापुर पुचनु हि माणुह व्यवस्था कामान केरता जुदोज, विश्वासा द्वारे नीतिमान ठेरहू. 29काय बोगवान केवळ यहूद्यांचाच हि? काय दिहरी जाती न्यान नाहं? होव, दिहिरिजातीन न्या पुण हि. 30कारण एकुच बोगवान हि, जो नाहं खतना किरील, विश्वासान एने खतना किरील पुण विश्वासान द्वारेच धर्मी ठेरायेल. 31तेवी काय आमु व्यवस्थाह विश्वासान द्वारे वाया ठेरायेल? एखातवार नाहं! नापून व्यवस्था माय स्थिर केरणू.

موجودہ انتخاب:

रोमियो 3: NLXNT

سرخی

کاپی

موازنہ

شئیر