Lim Aŋgàa Ntum 21
21
Por dú é Jerusalem
1Vèr à Por nèn màʼtì áwune, e nə̀ə́ e kikoŋ, a dù tìítiy e Kor. Vèr bvəə́shí, e mèé e Rodes, e shaà, a dù e Patara. 2Vèr meé fó, e yèn kikóŋ kímóʼ kí, a kí du e wòŋ woo Fənisia, vèr nèn nə̀ə́ sho, a dù. 3Vèr wìy lòo yen Saypur, e nèn tèém, e màʼtì Saypur e koy ŋkoòvìi, a dù dzə́ə fó wòŋ woo Siiria. Á meé é Taya fo vé‑eè yíi fəə́r vifá fo kikoŋ, vèr nèn fəə̀, 4e dù, e tàʼ aŋgàa biimé, e yèn, vèr áwune dzə̀ʼə̀m ŋgàm fur. Kiyoy ke Ranén kí yiì, áwune wáa tiisí e Por jii, lá wù yòʼ dù a e Jerusalem. 5Kishiíy kér ké lò ki gheén, vèr nèn lì dzə́ə, a dù ghán yér. Wùn à vikìy, à wóné tsəə́né ver adzə̀m, e fəə̀sín mvəmlaʼ. Vèr áwune meé é shùu rìbà ndzə̀v, e tsə̀m fó nsay, e bùnrì, e shàʼnìn. 6Vèr nèn nə̀ə́ e kikoŋ, áwune wáa kfən fo laʼ.
7Vèr ku nèn lò fo Taya bèy, a dù, e mèé e Ptolemayis, e nèn kfə̀n fəə̀, e dù, e shàʼtì aŋgàa biimé vee fó. Vèr áwune shiíy, 8yì rán kibvəə́shí, vèr kfən nə̀ə́ e kikoŋ, a dù e Sisaria. Vèr meé fó, e dù, a shiíy e Filiv lav, a dzə̀ wír wo wù‑uù ghán, fiʼtì kinyo ke Nyùy, kfə́n a dzə wír fo ŋgaà lìm woo saàmbà wo vé‑eè shoʼtin é Jerusalem. 9Wù‑uù kér wón vee vikìy akweè, a bó á yòʼ sí kér alúm. Áwune lo, á wàa tiisí vinyo ve á yú fo Nyùy.
10Mo vèr dzə́ fo, vishiíy ví lòo tumsín, *ŋgaà ntum Nyùy wùmòʼ lò, e wìy fo wòŋ woo Juda, a yírí dzə̀ ji Agabur. 11Wù wìy, e yèn ver, e lì kifám ké Por, e kùr kóy wun woo Agabur sho wùn à shwín vəə́, e sùúy jii, «Kiyoy ke Ranén kí suuy jii, á mo wír veé Judàa wíy kur ŋgaà kifàm kin bèn e Jerusalem, e way e wír ve bó yòʼ dzəə̀n veé Judàá wo.» 12Vèr à wír vee fóo yú bey, e nèn a boòrì Por ji lá wù yòʼ dù a e Jerusalem. 13Wù bìnèr jii, «Vèn diy, semèr shilív shém ben ji ka? M dzə̀ kibáʼtín fóo nəə́ e sháŋ é Jerusalem, e kfə̀n a dzə kibáʼtín fóo kpu bìʼ Taàtá Jesus.» 14Mo vifií və́ ví kù‑uù sí tíy bèy, a bó yòʼ dzə̀ vèr kàr, vèr nèn màʼtì, e sùúy ji Nyùy ku yiì a mo wù taʼà.
15Vèr nèn wìy lò, e bàʼtí vifá vér, a dù e Jerusalem. 16Vèr lòo dù, aŋgàa biimé veé Sisaria ámóʼó tsəə́né ver, e dù, e mèé e Menason lav fo vèr‑iì yíi a shiíy. A Menason və̀n‑eè dzə̀ wír woó Saypur, e kfə̀n a dzə wir mbìy wùmòʼ wo wù‑uù wayin shilív e Jesus wùn.
Por ghán Jeem
17Vèr meé é Jerusalem, aŋgàa biimé vee fóo səə́sí ver kijuujùŋ. 18Yì rán kibvəə́shí, vèr à Por dù, e ghàn Jeem, aàtǎr kintatìi kì bàʼtí fó adzə̀m. 19Por shàʼtì áwune, e nèn a fèr e naáy naáy vinyo ve Nyùy‑iì yii e wír ve bó yòʼ dzəə̀n veé Judàá mvəm, e shaà fo lìm ye wù limè. 20Áwune yú, a burí Nyùy, e bóo kfə̀n yòŋ Por, e suúy sho jii, «Fə̀r, ku yèn mo wír veé Judàa wayin ne shilív e Jesus wùn ansə̀kì ansə̀kì. Aáwune dzə̀ adzə̀m bèn, aá kù ghár *Nsər Mooser kitávín, 21a vé‑eè sí yú kév ji à ghán, yéʼey wír veé Juda ve á dzəə̀n é vitum ve sən ví ji á maʼti nsər se Mooser sìy, e làa yòʼ dzə́ə a saŋ *mbèʼ se won, e kfə̀n màʼtì a liì wòsən wòŋ e dzə̀m. 22Mo áwune kù yíi yu ji à dzə̀ fen, a dzə̀ vèsən yèe le lèn? 23Kii wò, ku yiì mo vèr suuyì. Wír ámóʼó dzə̀ fen akweè, aá yiì ne kaʼ fo Nyùy. 24Ku dù, é vèn áwune yii cu, e *kfə̀mrí vitú vén, é ku làʼ wò vinyo ve áwune kér fó kwàŋrì vidzə̀m, é bo á kóm vitú vév. À yii bèy, é wìr dzə̀m nèn yèn ji à lem sa Nsər Mooser, a vinyo ve á tóy e wò bàm ví dzə̀ á kisáŋ. 25Fo ké aŋgàa biimé ve bó yòʼ dzəə̀n wír veé Juda, vèr tsə̀nsí ne ŋwàʼ wo vèr‑iì sìysìn jii, áwune wáa leʼ vifá ve á cuùn anyùy sho, a leʼ mensə́, a leʼ nyám yee là seé, e kfə̀n a leʼ liì woo kùm kinjàŋ.» 26Por nèn lì wír vee shooy, yì rán kibvəə́shí, wùn áwune dù, e kfə̀mrí vitú vév, e nə̀ə́ e lav cù, e fìʼtì kishiíy ke kfə́mrí yee shooyi wíy mày, aá yii cu fo wìr mòʼón mòʼón.
Á bám Por e lav cù
27Vishiíy vee shooy vi lòo mày, a ví‑iì dzə̀ saàmbà, wír veé Juda ve vé‑eè wìyìn fó wòŋ woo Asia ámóʼó yén Por e lav cù, e bàm, a bayír wíri, 28a rəəmé ji wír veé Israyi wàá kaáy. Dzə̀ á wír və̀n wo wù ghán virə́ʼ vidzə̀m, yéʼey wíri ji á wáa leéy woŋ və̀n, wùn à Nsər Mooser, à lav Nyùy rə̀n ntéŋ. Wù kfən màysì lèn, e wìy e wír ve bó yòʼ dzəə̀n veé Judàa é lav cù fèn, a bivír kirə́ʼ ké Nyùy kìn sho. 29A vé‑eè suuy bèy, bìʼ fo vé‑eè yenen, a Por ghán e mvə̀mlaʼ wùn Toofimur wo dzəə̀n wír woó Efesor, á nèn a kwàʼtì ji wù kì wìy á sho e lav cù.
30Á rəə́mé bey, mvə̀mlaʼ nèn lò, e bvəə̀rí e dzə̀m, wíri nyéŋkír, e wìy. Á kaáy Por, e sə̀ŋ, e fəə̀ shó fo lav cù fèy, á ku nèn a sətí shúu kishem fo bàm. 31Wír vìyi wáa dzə̀v Por, a tàʼ ké yuyrí yuyrín. Kitú ke vé rər ké wìr veé Rom ki yú ji melaà mè sì á Jerusalem e dzə̀m, 32wù ku nèn lì vé rər wùn à vilìmbìy vév ví, wùn áwune nyéŋ ji á tó fo. Wír vìyi yén, aá wiyì, e nèn yàr fó a dzə̀v Por. 33Kitú ke vé rər kiy ki dù, e ghàr Por, e sùúy ji á kúr á asháŋ abaà, e dzə̀r e wíri jii, sà dzə̀ la woo shoon a? Wù sà yèe le á? 34Wíri nèn lò, a yòr yòrìn. Ámóʼó wáa waamé kinyo ke sən kí, ámóʼó ke sən kí, la wù yòʼ dzəə kìíy kinyo ke kí kooyin gheéy. Kí gháʼ, wù nèn sùúy e vé rərí ji á li á Por, e dù sho e vé rərí laʼ. 35Á dù, e lòo meé fo vé‑eè sèʼtìn dzə́ə séʼtin, kí gháʼ, á lì Por líin é mbèʼ, bìʼ fo wíri‑iì guutì fo bàm anín, 36rəə́me jii, á ku yùyrí a yuyrín.
Por túnér kitú kfə́
37Wùn à Por ku lò ji á sí nəə e vé rərí laʼ fèy, wù dzə́r e kitú ke vé rər kí jii, «A dzə̀ m sùúy kinyo e wò a?» Wù yú, a Por súŋnin Lám Grik, e dzə̀r shó jii, «Á mo à kiìn Lám Grik bèn à? 38Bó yòʼ dzə̀ wò wír woó Ejiv wo wù‑uù taʼ, e màʼ sáʼ yeé wòŋàn və̀y à? Kí vèn à wíri‑iì tàtí ansə̀kì akweè, a ghan, a yuyrí wíri, a dù, a lìr e kwaʼ?» 39Por bìnèr jii, «M dzə̀ wír woó Juda, a m lò fo Tasor e wòŋ woo Silisia, a bó Tasor yòʼ dzə̀ mvəmlaʼ yee fó tèr gheéy. Kii wò, ku fò mo kilíŋ, é m súŋnín e wír vìne.»
40Wù biímé, Por nèn tìím e kirə̀ʼ ke seʼtìn kiy ki, e sə̀r wíri e kiwó ki. Á sə́sín, wù yòŋ áwune é Lǎm Hibru jii,
موجودہ انتخاب:
Lim Aŋgàa Ntum 21: LNB
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2022 CABTAL
Lim Aŋgàa Ntum 21
21
Por dú é Jerusalem
1Vèr à Por nèn màʼtì áwune, e nə̀ə́ e kikoŋ, a dù tìítiy e Kor. Vèr bvəə́shí, e mèé e Rodes, e shaà, a dù e Patara. 2Vèr meé fó, e yèn kikóŋ kímóʼ kí, a kí du e wòŋ woo Fənisia, vèr nèn nə̀ə́ sho, a dù. 3Vèr wìy lòo yen Saypur, e nèn tèém, e màʼtì Saypur e koy ŋkoòvìi, a dù dzə́ə fó wòŋ woo Siiria. Á meé é Taya fo vé‑eè yíi fəə́r vifá fo kikoŋ, vèr nèn fəə̀, 4e dù, e tàʼ aŋgàa biimé, e yèn, vèr áwune dzə̀ʼə̀m ŋgàm fur. Kiyoy ke Ranén kí yiì, áwune wáa tiisí e Por jii, lá wù yòʼ dù a e Jerusalem. 5Kishiíy kér ké lò ki gheén, vèr nèn lì dzə́ə, a dù ghán yér. Wùn à vikìy, à wóné tsəə́né ver adzə̀m, e fəə̀sín mvəmlaʼ. Vèr áwune meé é shùu rìbà ndzə̀v, e tsə̀m fó nsay, e bùnrì, e shàʼnìn. 6Vèr nèn nə̀ə́ e kikoŋ, áwune wáa kfən fo laʼ.
7Vèr ku nèn lò fo Taya bèy, a dù, e mèé e Ptolemayis, e nèn kfə̀n fəə̀, e dù, e shàʼtì aŋgàa biimé vee fó. Vèr áwune shiíy, 8yì rán kibvəə́shí, vèr kfən nə̀ə́ e kikoŋ, a dù e Sisaria. Vèr meé fó, e dù, a shiíy e Filiv lav, a dzə̀ wír wo wù‑uù ghán, fiʼtì kinyo ke Nyùy, kfə́n a dzə wír fo ŋgaà lìm woo saàmbà wo vé‑eè shoʼtin é Jerusalem. 9Wù‑uù kér wón vee vikìy akweè, a bó á yòʼ sí kér alúm. Áwune lo, á wàa tiisí vinyo ve á yú fo Nyùy.
10Mo vèr dzə́ fo, vishiíy ví lòo tumsín, *ŋgaà ntum Nyùy wùmòʼ lò, e wìy fo wòŋ woo Juda, a yírí dzə̀ ji Agabur. 11Wù wìy, e yèn ver, e lì kifám ké Por, e kùr kóy wun woo Agabur sho wùn à shwín vəə́, e sùúy jii, «Kiyoy ke Ranén kí suuy jii, á mo wír veé Judàa wíy kur ŋgaà kifàm kin bèn e Jerusalem, e way e wír ve bó yòʼ dzəə̀n veé Judàá wo.» 12Vèr à wír vee fóo yú bey, e nèn a boòrì Por ji lá wù yòʼ dù a e Jerusalem. 13Wù bìnèr jii, «Vèn diy, semèr shilív shém ben ji ka? M dzə̀ kibáʼtín fóo nəə́ e sháŋ é Jerusalem, e kfə̀n a dzə kibáʼtín fóo kpu bìʼ Taàtá Jesus.» 14Mo vifií və́ ví kù‑uù sí tíy bèy, a bó yòʼ dzə̀ vèr kàr, vèr nèn màʼtì, e sùúy ji Nyùy ku yiì a mo wù taʼà.
15Vèr nèn wìy lò, e bàʼtí vifá vér, a dù e Jerusalem. 16Vèr lòo dù, aŋgàa biimé veé Sisaria ámóʼó tsəə́né ver, e dù, e mèé e Menason lav fo vèr‑iì yíi a shiíy. A Menason və̀n‑eè dzə̀ wír woó Saypur, e kfə̀n a dzə wir mbìy wùmòʼ wo wù‑uù wayin shilív e Jesus wùn.
Por ghán Jeem
17Vèr meé é Jerusalem, aŋgàa biimé vee fóo səə́sí ver kijuujùŋ. 18Yì rán kibvəə́shí, vèr à Por dù, e ghàn Jeem, aàtǎr kintatìi kì bàʼtí fó adzə̀m. 19Por shàʼtì áwune, e nèn a fèr e naáy naáy vinyo ve Nyùy‑iì yii e wír ve bó yòʼ dzəə̀n veé Judàá mvəm, e shaà fo lìm ye wù limè. 20Áwune yú, a burí Nyùy, e bóo kfə̀n yòŋ Por, e suúy sho jii, «Fə̀r, ku yèn mo wír veé Judàa wayin ne shilív e Jesus wùn ansə̀kì ansə̀kì. Aáwune dzə̀ adzə̀m bèn, aá kù ghár *Nsər Mooser kitávín, 21a vé‑eè sí yú kév ji à ghán, yéʼey wír veé Juda ve á dzəə̀n é vitum ve sən ví ji á maʼti nsər se Mooser sìy, e làa yòʼ dzə́ə a saŋ *mbèʼ se won, e kfə̀n màʼtì a liì wòsən wòŋ e dzə̀m. 22Mo áwune kù yíi yu ji à dzə̀ fen, a dzə̀ vèsən yèe le lèn? 23Kii wò, ku yiì mo vèr suuyì. Wír ámóʼó dzə̀ fen akweè, aá yiì ne kaʼ fo Nyùy. 24Ku dù, é vèn áwune yii cu, e *kfə̀mrí vitú vén, é ku làʼ wò vinyo ve áwune kér fó kwàŋrì vidzə̀m, é bo á kóm vitú vév. À yii bèy, é wìr dzə̀m nèn yèn ji à lem sa Nsər Mooser, a vinyo ve á tóy e wò bàm ví dzə̀ á kisáŋ. 25Fo ké aŋgàa biimé ve bó yòʼ dzəə̀n wír veé Juda, vèr tsə̀nsí ne ŋwàʼ wo vèr‑iì sìysìn jii, áwune wáa leʼ vifá ve á cuùn anyùy sho, a leʼ mensə́, a leʼ nyám yee là seé, e kfə̀n a leʼ liì woo kùm kinjàŋ.» 26Por nèn lì wír vee shooy, yì rán kibvəə́shí, wùn áwune dù, e kfə̀mrí vitú vév, e nə̀ə́ e lav cù, e fìʼtì kishiíy ke kfə́mrí yee shooyi wíy mày, aá yii cu fo wìr mòʼón mòʼón.
Á bám Por e lav cù
27Vishiíy vee shooy vi lòo mày, a ví‑iì dzə̀ saàmbà, wír veé Juda ve vé‑eè wìyìn fó wòŋ woo Asia ámóʼó yén Por e lav cù, e bàm, a bayír wíri, 28a rəəmé ji wír veé Israyi wàá kaáy. Dzə̀ á wír və̀n wo wù ghán virə́ʼ vidzə̀m, yéʼey wíri ji á wáa leéy woŋ və̀n, wùn à Nsər Mooser, à lav Nyùy rə̀n ntéŋ. Wù kfən màysì lèn, e wìy e wír ve bó yòʼ dzəə̀n veé Judàa é lav cù fèn, a bivír kirə́ʼ ké Nyùy kìn sho. 29A vé‑eè suuy bèy, bìʼ fo vé‑eè yenen, a Por ghán e mvə̀mlaʼ wùn Toofimur wo dzəə̀n wír woó Efesor, á nèn a kwàʼtì ji wù kì wìy á sho e lav cù.
30Á rəə́mé bey, mvə̀mlaʼ nèn lò, e bvəə̀rí e dzə̀m, wíri nyéŋkír, e wìy. Á kaáy Por, e sə̀ŋ, e fəə̀ shó fo lav cù fèy, á ku nèn a sətí shúu kishem fo bàm. 31Wír vìyi wáa dzə̀v Por, a tàʼ ké yuyrí yuyrín. Kitú ke vé rər ké wìr veé Rom ki yú ji melaà mè sì á Jerusalem e dzə̀m, 32wù ku nèn lì vé rər wùn à vilìmbìy vév ví, wùn áwune nyéŋ ji á tó fo. Wír vìyi yén, aá wiyì, e nèn yàr fó a dzə̀v Por. 33Kitú ke vé rər kiy ki dù, e ghàr Por, e sùúy ji á kúr á asháŋ abaà, e dzə̀r e wíri jii, sà dzə̀ la woo shoon a? Wù sà yèe le á? 34Wíri nèn lò, a yòr yòrìn. Ámóʼó wáa waamé kinyo ke sən kí, ámóʼó ke sən kí, la wù yòʼ dzəə kìíy kinyo ke kí kooyin gheéy. Kí gháʼ, wù nèn sùúy e vé rərí ji á li á Por, e dù sho e vé rərí laʼ. 35Á dù, e lòo meé fo vé‑eè sèʼtìn dzə́ə séʼtin, kí gháʼ, á lì Por líin é mbèʼ, bìʼ fo wíri‑iì guutì fo bàm anín, 36rəə́me jii, á ku yùyrí a yuyrín.
Por túnér kitú kfə́
37Wùn à Por ku lò ji á sí nəə e vé rərí laʼ fèy, wù dzə́r e kitú ke vé rər kí jii, «A dzə̀ m sùúy kinyo e wò a?» Wù yú, a Por súŋnin Lám Grik, e dzə̀r shó jii, «Á mo à kiìn Lám Grik bèn à? 38Bó yòʼ dzə̀ wò wír woó Ejiv wo wù‑uù taʼ, e màʼ sáʼ yeé wòŋàn və̀y à? Kí vèn à wíri‑iì tàtí ansə̀kì akweè, a ghan, a yuyrí wíri, a dù, a lìr e kwaʼ?» 39Por bìnèr jii, «M dzə̀ wír woó Juda, a m lò fo Tasor e wòŋ woo Silisia, a bó Tasor yòʼ dzə̀ mvəmlaʼ yee fó tèr gheéy. Kii wò, ku fò mo kilíŋ, é m súŋnín e wír vìne.»
40Wù biímé, Por nèn tìím e kirə̀ʼ ke seʼtìn kiy ki, e sə̀r wíri e kiwó ki. Á sə́sín, wù yòŋ áwune é Lǎm Hibru jii,
موجودہ انتخاب:
:
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2022 CABTAL