อาโยวเอลัะ 2

1แตห เบ บูด เวา แคง มืง เยรูซาแลม. แตห เบ ดัด ตาง แดง นอน อี ซีงา บอด. โอว ดี ดัม ซาดีก ดี อี, แตห ดูอี บอ เรา บอ มืง บอกาเฆลียด โยว ดียูห ดีเยณ. โคว, ซีแง ปี ต็อห เฌาพรา ดี ตัห แฮะ กาตัด ดี ฌัม.

2อึณ มูห ซีแง ดี อับ ว็อง กาเซา. ซีแง กามึก ดี ฆลาย ดี บอ อับ ว็อง ดีตีณ, อึณอูะ ดี บอ เฮต กาเซา. อู เฌณ ดา ซึก อี กืน กาเซา อี มึห โปลม ตาง ดี บอ ตัห อึบ มืง ปี อับ ว็อง ดี ปลึก นอน. ดอ มึอน อาต นี อึณ ตู ดึอม แบน ปาย ตี. นา อาต นี ฮาว ดอน โจว ดอน บาน มืร อาว ฮู แบน ปาย ตี ดอ เหมา.

3นา อาต เฆ แฮะ มึห เงา อี แฮะ กาซึม โตต. นา ปัน เฆ มืร แฮะ มึห แปละ เงา อี กูห. มืง อี กอย นา อาต เฆ ตึอน, อึณ บอ ดาคึย บอ ชีด ปี กาปึม เอเดน. นา ปัน เฆ, อึณ บอ ปี แปร กาฮ็อห, ตู มึห มาเซ. อึณ มืร ตู มึห คอ อู โมยว อี ดี ปึอน ลอด ดี เฆ.

4เฆ มึห อารึบ ราง ปี อารึบ มังปร็อง. เฆ บอ กาแบลบ ปี ดา ซึก อี ป็อะ มังปร็อง.

5อึณ บอ ปี ฆรัณ ลักเลา ปี ป็อะ ดา ซึก บอ ฆรัณ ซีนัน. ดอ ฮาว เฆ ดี กาแดะ นอน เฆ บอ ฮัม แตห อึณ ปี อาฮืน เงา อี แฮะ กาซึม แปร กาฮ็อห. อึณ บอ ปี บอ ฆรัณ ดา ซึก อี แฮะ กืน กาเซา อี แฮะ ครึง ดี ฮาว กาโฆห.

6แคะ กอย เฆ ดูอี บอกาเฆลียด ดี บอ โยว ดียูห ดีเยณ. นา เฆ มืร ดี กาฮ็อห ต็อง ดอน อี.

7ปี ปาย เฆ ดี กาโฆห, อึณ บอ ปี ดา ซึก อี มึห น็อห ยัะ กาเซา. เฆ บอ โฮะ แรง มืง ปี ดา ซึก อี แฮะ มูห ดา โบว ตาง. เฆ บอ ฮาว ซืร ซืร โดบ อึณเตณ เฆ วี เหมา วี อัน ตู ฮาว กาซู กาวัร.

8เฆ มืร ตู ลาย กาปับ, ตู ลาย กาฌูน, เฆ บอ ฮาว โดบ อึณเตณ เฆ, วี เหมา วี อัน. เฆ ปี บอ กาแบลบ ฮาว กาแต ดูอี อี โฆ็ง มาปัวะ ลาง, อึณ ยี ตู มึห อาเซ อี ปึอน แร แตห เฆ ฆืด.

9เฆ บอ ลึบ แคง มืง บอ กาแบลบ ฮาว ดอน นา ดอน โปละ. เฆ บอ ลึบ โฮะ แคง กาง ดอน กาง, ลึบ ดี กาเดา ปาแตง ปี ดา ปรา.

10ดอ ตัห กาตัด เฆ กาดาย ดี บอ รัร. ฆางหราว ดี บอ ดียูห ดีเยณ. ซีแง ฆาย มาเฆียน ดี อับ ว็อง. ซีมัณ มืร อาว ฮู บลาง แคง เบลณ.

11เฌาพรา มืร ดี ดัด ตาง, แยต ตัห ดา ซึก อัน. ดา ซึก อัน เฌา ตี, แฮะ คึกคัม, แฮะ กืน กาเซา. เฆ บอ โทม โฆรห อัน เฌา. ซีแง ปี ต็อห เฌาพรา ตี, อึณ บอ มูห ซีแง อี หมึอม โยว กาเซา. อาว มึห คอ อู วี อี ดี ปึอน คัม.

ลอง เฆ ดูอี กาปลูะ น็อห

12แฮะ ฮอต, เฌาพรา ปี วี ต็อห, “ดอ ตี นี, แตห เบ ตัห ดี โอว ดอ ซี มึห อาคราว อัน, แตห เบ อาบ ดัว น็อห เบ ดี โอว. ดอ ตัห เบ แตห เบ ยืน ปี ดี โฮม บอ ยาม บอ หงูน.”

13เบ ยี ตู โลว กายาต ครึง เบ โกบ กลึร เบ. เบ โลว กายาต น็อห เบ. แฮะ ฮอต, แตห เบ วี ตัห กาตัด เฌาพรา อี มูห เฌาพรา ปี กรึบ เบ. แม เฌา, แม มูห เฌาพรา อี นับ ดี ร็อก, นับ ดี กาเว อี. แม บอ มึห น็อห คัม ดี ยืน, ตู หงึย รู. แม บอ มึห น็อห ซี เฆฌู อี, ตู ซี ดัม หมาบ ดี อี.

14อาเซ ดี บอ นับ, อัน เฌา แฮะ วี กาปลูะ น็อห, วี ร็อก กาเว เฆ, วี ม็องการา ดัว นา หมึอม ดี เฆ, แตห อึณ ฆลึม อาดา ปี ดี หลู เฆ โหงว บอ อึม มางูน. ปาย ตี เฌาพรา ตู วี โบง อี ตู หมึอม ปี กาลาง อัน บอ แตห เบ กอย ดาคึย ปี คา อาต.

15แตห เบ บูด เวา แคง มืง เยรูซาแลม, แตห เบ ยืน ปี ดี โฮม, แตห เบ ตัห กาฌูะ บอ โหลห เฌาพรา.

16แตห เบ แดะ ตัห โตต ดูอี บอกาเฆลียด, โบง แตห เฆ บอกาเฆลียด ซีงา. แดะ บอ เฆ ดูอี กัด ดูอี แฆ บอ เฆ ฆอน ดีรอย, ฆอน ดีราะ บอ ฆอน อี ซี ปู, แตห เฆ ตัห กาฌูะ โตต. แตห กาโณม อี ดี คัด บอ เลห แคง โฮง อีด อัน, แตห ดีบยา อี ดี คัด บอ เลห แคง โดง กอย อัน.

17เฆ ดา อี หลู ดี เฌาพรา บอ เฆ อี โบง ฆาน แคง โฮว เฌาพรา, แตห เฆ กอย ดี กาแต โฮว เฌาพรา บอ กาโช็ง หลู, แตห เฆ ยาม บอ กาลาง ต็อห, “อึย แม เฌาพรา, หมาณ แตห แม กาเว เฆ ดูอี ปี อึบ แม. แกวะ แตห อี เฮา กาย็อง เฆ. แกวะ แตห เฆ ดูอี อาโมยว เฮา ปึอน ดี กาณัห บอ ปี วาณาก ดี เฆ. แกวะ แตห เฆ ต็อห, ‘เฌาพรา ปี กรึบ เฆ ดูอี อีซาเรลัะ กอย ดี เหมา? อึณ ปี อัน ตู มึห ปวน มาเซ.’”

18เซ เบ โบง ปาย ตี เฌาพรา ดี บอ วี นัมโหลห มืง ปี อึบ อัน. อัน บอ วี กาเว เฆ ดูอี ปี อึบ อัน.

19เฌาพรา วี อึร โฆรห เฆ, วี กาลาง ดี เฆ ต็อห, “โอว ดี วี ดัว ดี เบ โหงว เฆ ดีฆาว, อึม มางูน บอ นามัน. เบ ดี บอ ปึอน ดี โฮม แพ โฮม ลึง. วาย อัน ตี โอว มืร อาว ฮู แตห เบ แบน ปี แนนัะ ดูอี อาโมยว เฮา.

20โอว ดี วี แตห ดา ซึก อี ตัห บลาก นา กัว ตึอน ฮาว กอย กาโต็ง, กอย ลาย กายาน ดี เบ. โอว ดี วี ณอน ฮาว เฆ แคง โดง กาฮ็อห, โดง ตู มึห อี กอย. ดา ซึก อี กอย ดี ปัน, เฆ ดี ฮาว แคง อึม ดึง แซะ ซ็อง บลาก นา เลห ซีแง. เฆ อี แยต ดี อาต ดี บอ ฮาว แคง อึม นัมมูกซารา บลาก นา เฆต ซีแง. อูห อัม โดว ยัม เฆ ตี ดี กอย แคง มืง บอ มืง, อึณ ดี บอ กาลัต ดอน โปละ. เฌาพรา แฮะ โบง อี หมึอม อาม อาคัร หมาน.”

21อึย กาดาย มืง ยูดา, แกวะ แตห แม โยว, แตห น็อห แม โบยว ดาคึย บอ แตห แม มึห น็อห กรึอม น็อห ตาง. เฌาพรา แฮะ โบง อี หมึอม อาม กาเซา.

22อึย เบ โดว ซัดดาวา, แกวะ แตห เบ โยว. เปต เฆ แปร ดี บอ วี ลัต แคง ยวน แคง แปร. เฮ มืร ดี บอ วี มึห เบล อัน. เฮ ดีปู บอ เฮ มางูน มืร ดี บอ วี มึห กืน เบล อัน.

23อึย เบ ดูอี อี กอย แคง มืง เยรูซาแลม, แตห เบ โบยว ดาคึย บอ บึง เฌาพรา ปี กรึบ เบ. แตห เบ มึห น็อห กรึอม น็อห โคย. โคว, อัน เฌา ดี วี แตห ฆลาย โจห, แตห อึณ บยัะ เฆฌู อัน. อัน ดี แตห ฆลาย ตาง อี มูห ฆลาย อาต ซัม บอ ฆลาย วาย ซัม โจห อาดา เบ, แตห อึณ วี ปี บรีม.

24โหงว มืร ดี บอ โนะ ดี โอ็ง กางน็อห เบ. อึม มางูน บอ นามัน มืร ดี บอ โนะ ลูต แคง แปรณ เบ.

25เฌาพรา ปี วี ต็อห, “โอว ดี วี ดัว ดี เบ แปะ แฮะ โฮม มาอาโฌ็ง บอ มาอาโม็ง แบน โมยว แบน โมยว. เฆ แฮะ ตัห ปี ดา ซึก อี แฮะ กืน กาเซา. โอว แฮะ จัร เฆ, แตห เฆ ดัว ดูก ดี เบ.

26เบ ดี บอ วี ปึอน ดี โฮม แพ โฮม ลึง. เบ ดี บอ วี ปึอน อืบ มยูก เฌาพรา ปี กรึบ เบ อี แฮะ โบง ดี เบ อี หมึอม อาม กาเซา. วาย อัน ตี เฆ ดูอี ปี อึบ โอว, เฆ อาว ฮู โลว ซาย อี แคะ ตี.

27เบ มืร ดี นับ, โอว กอย กาแต เบ ดูอี อีซาเรลัะ. เบ ดี บอ นับ ลอง มูห โอว เฌาพรา ปี กรึบ เบ. แดง โอว อาว มึห เฌาพรา ปอ อู กาดัง. เฆ ดูอี ปี อึบ โอว, เฆ ตู วี โลว ซาย อี.”

ลอง เฌาพรา ดี ดัว น็อห พึอม อัน แคง น็อห ดูอี

28วาย อัน ตี โอว ดี วี ฮูห น็อห พึอม โอว แตห อึณ ฌัม แดง เฆ ดูอี บอกาเฆลียด. แตห อึณ ปี ดูอี ฮูห เลห อึม แคง กาเปา. เฆ ฆอน อีบึณ บอ ฆอน อีมาย เบ, เฆ ดี บอ นับ ดี บยาน โฆรห เฌาพรา. เฆ ดูอี กัด ดูอี แฆ, เฆ ดี บอ นับ ดี อึณบาว ดอน โมยว. เฆ ดูอี อี ซี หนึม, เฆ ดี บอ ยึร ปี บยัะ เฌาพรา ดี เฆ.

29ดอ อัน ตี โอว ดี ฮูห น็อห พึอม โอว แดง แดเจณ โอว อี มูห บอ อีบึณ บอ อีมาย.

30โอว มืร ดี บยัะ แตห เบ ยึร อี หมึอม อาม กาเซา แคง ฆางหราว บอ แดง กาดาย นี. อึณ ดี บอ มึห หนาม, แปละ เงา บอ ดัก เงา.

31อาต ฌัม ซีแง อี หมึอม โยว กาเซา, ซีแง ปี ดี โบง เฌาพรา ตี, ซีแง ดี บอ อับ ว็อง ดีตีณ, มาเฆียน ดี บอ เลห ปี หนาม.

32ดอ อัน ตี เฆ อี ซาคึร อี ฆาว ปวน เฌาพรา ดอน อี, เฌาพรา ดี บอ คยอด เฆ. เฆ อี กอย ดี นอน ฌีโอน บอ เฆ อี กอย แคง มืง เยรูซาแลม, เฆ ดี บอ ลอด ยัม มัง อี. ปาย ตี อึณ โดบ โฆรห ปี ดึอม กาลาง เฌาพรา แตห อึณ มึห เฆ อี ซี ฆีด ซี กอย, อี มูห ดูอี แปะ แฮะ แดะ เฌาพรา.

موجودہ انتخاب:

อาโยวเอลัะ 2: pce

سرخی

کاپی

موازنہ

شئیر