อาโมวซา 9
9
ลอง เฌาพรา ซูงพยาด ดารา
1โอว วี ยึร เฌาพรา จ็อง โคบ กาโช็ง หลู บอ วี กาลาง ดี โอว ต็อห, “มัห กาเซา กาแดะ โฮว เฌาพรา ตี, แตห ดัง ร็อง เฆ เจณ ร็อง กอ ดีเยณ. แฮะ ฮอต, วี ปยาต แวน ร็อง แตห กาตูะ โฮว ดีฆรับ โลง, แตห อึณ ง็อห ยัม ดูอี กืน. เฆ อี ซี ฆีด ซี กอย โอว ดี วี แตห เฆ ยัม ดี มาปัวะ ลาง. อึณ มืร ตู มึห คอ อู วี อี ดี ปึอน เลห เตา.
2เซ เฆ ปี บอ นับ ดี ฆึห กาเดา, แตห อึณ กอ ฌัม แคง มืง มารานัะ มืร, โอว ยี ดี วี ตา แด โอว, ดึห เลห เฆ โดง ตี. เฆ ปี บอ นับ ดี โฮะ แคง ฆางหราว มืร, โอว ดี วี ดึห โลง เฆ.
3เฆ ปี บอ โฮะ ดี กาแดะ นอน ฆาเมลัะ มืร, โอว ดี วี เหรต เฆ บอ เหมต เฆ ดี ตี. เฆ ปี บอ เครียง ดี กาดัม อึม นัมมูกซารา, โอว ยี ดี วี จัร มากราย แตห อัน ก็อะ เฆ ดี ตี.
4เฆ ปี บอ แฮะ กาดูห รันซู เฆ, เหมต ฮาว แบน หมาย อี เฮา มืร, โอว ดี วี จัร เฆ อี โฆ็ง มาปัวะ ลาง, แตห เฆ ง็อห ยัม ดูอี โดง ตี. โอว ดี แตห เฆ คัม ดูก, ตู เฆฌู เฆ, ตู จอย เฆ.”
5เซ เฌาพรา อี อึบ โตต ดอน โมยว ตัห ดึร กาดาย, กาดาย ดี บอ ลาต ปี อึม. เฆ ดูอี บอกาเฆลียด อี กอย แดง กาดาย ตี, เฆ ดี บอ กลึร บอ หงูน. กาดาย ดี ดีเยณ บอ บรึย โฮะ, ปี วี เจต โลง ปี อึม แบลง นีลา แคง มืง แอฆึบ.
6อัน เฌา โบง โดง กอย อัน คร็อง แดง แคง ฆางหราว. ดัง โดง กอย อัน ยี กอย แดง กาดาย. อัน บอ ดึห อึม นัมมูกซารา โฮะ นา แดง, แตห ฆลาย วี โจห แดง กาดาย. เฌาพรา มูห เฌาพรา อี จืร อัน เฌา อี อึบ โตต ดอน โมยว.
7เฌาพรา วี ดีหมอด, “อึย เบ ดูอี อีซาเรลัะ, เบ ทาง โอว แฮะ มาด เบ หมึอม หลึอม ดูอี แคง มืง ฆูซา? โอว แฮะ ดึห เลห เบ แคง มืง แอฆึบ. โอว มืร แฮะ โบง ฌึร ตี ดี ดูอี อาโมยว เฮา. โอว แฮะ ดึห เลห เฆ ดูอี พีลีที แคง มืง เกรทา บอ แตห เฆ ดูอี อาราม เลห แคง มืง กีรัะ.
8โอว เฌาพรา อี อึบ โตต ดอน โมยว, โอว ดี ยอด ดูอี อีซาเรลัะ อี โบง หมาบ เซเซ. โอว ดี บอ ปยาต แวน เฆ, แกวะ แตห เฆ กอย แดง กาดาย. โอว ยี แฮะ ดัว กาดีก ซัดฌา ลอง โอว ตู แตห เฆ หลูกหลาน อาโกบ บอกาเฆลียด ยัม.” เฌาพรา แฮะ ฮอต กาลาง ปาย ตี.
9โคว, โอว แฮะ ดัว อามีง แตห ดูอี อาโมยว เฮา คาหนาบ เฆ ดูอี อีซาเรลัะ, แตห อึณ ปี ดูอี ครึง ดีฆาว. โอว ยี ตู แตห คอ อู วี ลอด ดูก ตี ปี ดีฆาว อู โบ็ง อี โจห แดง กาดาย.
10ดอน อี อี แฮะ โบง หมาบ, เฆ ดี ยัม ดี มาปัวะ ลาง. อึณ มูห เฆ อี นับ ดี ต็อห, “ดูก ตาง ตี, อึณ ตู ครับ เย, อึณ ตู ปึอน แคร เย.”
ลอง เฆ ดูอี อีซาเรลัะ ดี วี ปี บรีม
11เฌาพรา ปี วี ต็อห, “อาคราว ดอ อัน ตี โอว ดี บอ วี อึณปราย มาน มืง อาดาวีด อี แฮะ ลึร ชึม. ดอ ตี นี อึณ ปี กาง อี แฮะ ราม. มาแล, โอว ยี อึณปราย แรง อัน บอ แตห อึณ มึห อาพูง ดังโคว ปี บรีม.
12เฆ ดูอี อีซาเรลัะ ดี วี ปึอน กาดาย อี ซี ฆืด ซี กอย แคง มืง เอโดม บอ ดูอี อาโมยว เฮา แบน โมยว แบน โมยว เฆ แบน ดูอี ปี อึบ โอว.” โอว อี มูห อัน เฌา, โอว แฮะ กาลาง ปาย ตี. โอว มืร ดี โบง แตห อึณ โบว แบน.
13เฌาพรา แฮะ ต็อห, “อาคราว อัน ดี บอ ฌัม ดอ ดูอี อี แท โดง นา ดี บอ ครับ ดูอี อี โซะ โหงว. ดูอี อี กรีด เบล มางูน ดี บอ ครับ ดูอี อี ซัม เบล มางูน กามาย. ดอ อัน ตี ดี มาน มางูน อึณ เลห กืน อึม มางูน อี ซีแงห กาเซา.
14โอว ดี บอ วี ดึห ตัห เฆ ดูอี ปี อึบ โอว อี มูห ดูอี อีซาเรลัะ แปะ แฮะ เหมต ฮาว อี เฮา. เฆ ดี บอ วี ตัห อึณปราย มืง บรีม เฆ อี แฮะ ลึร กาปยาต. แฮะ ฮอต, เฆ ดี บอ วี กอย แคง มืง เฆ ตี. เฆ ดี บอ วี ซัม มาน มางูน, แตห เฆ วี ปึอน ดี เดียง อึม เบล มางูน. เฆ ดี บอ วี ตัห ลึมลา มาน บอ โดง นา เฆ, แตห เฆ วี ปึอน ดี โฮม เบล อัน เฆ กาโย็ง อัน.
15โอว ดี แตห เฆ กอย ซีคยา แคง มืง บรีม เฆ ตี. วาย อัน ตี เฆ มืร อาว ฮู โลว เลห แคง มืง เฆ ตี.” เฌาพรา อี มูห เฌาพรา ปี กรึบ เฆ ดูอี อีซาเรลัะ แฮะ กาลาง ปาย ตี.
موجودہ انتخاب:
อาโมวซา 9: pce
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2021, Wycliffe Bible Translator, Inc. All rights reserved.