Luke 19
19
Jezu anyunuŋa nca njo Zase
1Jezu mito kangundu ka Zeriko ŋa nde yiga anyura kangundu kya. 2Kaŋaa kiigi ŋa balaga lemo nkuumu Zase, nde kiigi mfumu anga lempo ŋaa nde kiigi ŋa kabaga. 3Balaga lya kiigi asaga kaya lemigi leka Jezu, ŋaa nde kiigi akabuna ŋi. Kabila baari kiigi avuli kuna, ŋaa nde otele kali. 4Ŋaa nde biri nciini levuzu ma njila ye ya Jezu, amana nde kumi oti wo ba acwolo ma osikomore, ma kamono ntini ye yira Jezu kaŋaa. 5Jezu kato biri yia, nde kasata miizi ka yulu bu, nde moni Zase, ŋaa Jezu ŋa nde ndi: «Sanaŋa suruga! Ma cugu le lubu li, mi eto njo we.» 6Ŋaa Zase surigi ŋa asisari, nde yambi Jezu ka njo nde bila kase keenini. 7Aso baakiigi mono maami maa aso, yiga ba alyele nde ndi: «Lemono Jezu kaka mi je njo mbuuru wo asa maami maabi.» 8Ŋaa Zase ki ma otele kavuzu o Mfumu, nde ŋa Mfumu ndi: «Mfumu, mono mi empa afuga kabari ka kabaga ka mi. Ŋaa aka mi ma anjaga ampara a mbuuru ma akukuna, mi vuta nde mon nja na.» 9Ŋaa Jezu ŋa nde ndi: «Lubu Njyami mi vuzuga baari a njo we. Ee! Zase se mbuuru a njo Abarayame, 10Okorogo mi wo Mwana Mbuuru, mi ya ncaga bila kavuzuga baari baa ama atamaŋa.»
Ngana ye ajanji ba atari
11Ŋaa ntini e kiigi yuzuga lembuuru mbari a Jezu, nde vuri ti bo ngana kima. Kabila Jezu kiigi yiga tuga ŋa Jeruzaleme, ŋaa baari kiigi amono ndi omfumu o Njyami kiigi bo ya parabu. 12Ŋaa Jezu ŋa bo ndi: «Kiigi ŋa balaga lemo eli kiigi mwana mfumu kasi. Balaga lya kiigi yiga tuga ma kaje ngula kasi kakima kalala, kabila kiigi baampa nde mbara onkani ba kasi ka nde-ankulu. Ŋaa amana, nde aya vuruga.» 13Ŋaa nde kato ma ntini ye kaje, nde si katuma kacwolo ayiga ande akuumu. Nde mpi mbuuru ŋa mbuuru ampara ma kuna. Ŋaa nde ŋa bo ndi: «Lesa maami, ŋaa be lebaga ampara ma kuna ŋa eyi vuruga e mi.» 14Ŋaa baari ba kasi ka nde kya kiigi njala nde kali. Nde kaje waa, bo atumi antuma kabiza nde ma kalyele nde ndi: Bizi njala ni mbuuru wu kaka mfumu a bizi kali. 15Se kawobi bo bwa ampi nde omfumu ba kasi ka nde. Ŋaa nde yi vuruga, Nde tumi ma kacwolo ayiga a nde ba kanyini ampara ma kasa amaami, nde asanaŋa yaa lemigi lesi mbuuru ŋa mbuuru ampara ma anyini nde. 16Ojanji oncomi yi ŋa nde ndi: Mfumu, mi bagi nja kuumu ye ampara ma nyini we mi. 17Ŋaa mfumu ŋa nde ndi: Mbuuru bwa nda, we yemiŋi si, we oyiga woove. We kiigi tele, ma ampara ma nyini mi we nceti. Ŋaa mi empa we omfumu ma kaka okunji wo engundu kuumu. 18Wo oyuele yi, ŋaa nde ndi: Ee mfumu! Kayila ampara ma nyini we mi, mi vuri bagi ampara bwa anja ataani. 19Ŋaa mfumu ŋa nde ndi: Mi se empa we engundu etaani. 20Okima oyi, nde ndi: Ee mfumu, mono ampara ma nyini we mi, mi ma kura mon nca kabari ka mfa, ŋaa mi ma yiziga. 21Mi kiigi ŋa bwogo o we, kabila we balaga le ekemi. We ayaga biibi eli ka we swuzi ŋi, ŋaa we atolo biibi eli jo ka we nkuni ŋi. 22Mfumu a kasi kaali ŋa nde ndi: We oyiga woobi, mi epama we ma ambila ma acuugi ma onyua we ankulu. We ti yayi ni mi mbuuru wo ekemi, ŋaa mi e yaga biibi eli ka mi swuzi ŋi, ŋaa mi etolo biibi eli ka mi nkuni ŋi. 23Ŋaa we jaa lebizi suuza ampara a mi maa, nca njo ye baakiele ampara, mabuni ŋa eyivuruga e mi, mon amisa kuna ma kama? 24Ŋaa amana mfumu a kasi dugi ŋa anjanji baakiigi kaŋaa ndi: «Lepiina nde ampara a mi ma mpi nde, ŋaa lempa mon ŋa mbuuru wo bagi nja kwumu.» 25Ŋaa bo ŋa nde ndi: «Mfumu, nde ti yiga ŋa ampara nja kuumu! 26Ŋaa mfumu a kasi kaali ndi: Mi elyele be ni, mbuuru wo acuami ŋa biibi, ba selege lusa nde jo, ŋaa mbuuru eli cwami kalogo kali, ba aselege cieze nde jo, se jo eka nceti. 27Ŋaa ma baari baali anyon a mi, bo ba alyele ndi bo njala mi ka mfumu a bo kali, leya bila bo kunu, be lebuma bo ka miizi a mi.»
Jezu nyuniŋi nca Jeruzaleme
28Jezu kamana lyele bwa, nde vi ka levuzu le baari baakiigi lwono nde, ŋaa nde kumi kangundu ka Jeruzaleme. 29Jezu kato mpaana ampugu amwele ma acwoli ma Betefaye bila Betani, maali tuga ŋa kakuru keenini ka baacwolo ma elivye, nde tumi alwoni bwele. 30Ŋaa nde ŋa bo ndi: «Leje nca mpugu yeeli kavuzu o be, ntini ye nyunuŋa be, be lemoo nyama wo baacwolo ma ane#19.30 Nyama wo ba acwolo mpila aJife ma ane, wo abuna ka bira biibi bila baari. , ama kura ma oti, eli mbuuru kini sa akuma yila nde ŋi, ŋaa lenaana nde, be leya bila nde kunu. 31Ŋaa mbuuru wo apiza be kabila kanaana be nyama wua, ŋaa be le lyeli ni: Mfumu ŋa kaama.»
32Ŋaa alwoni abwele se ayeni, bo amoni maami mva lemigi le lyeli Jezu bo. 33Bo ba anaana nyama wua, ŋaa amfumu a nde ŋa bo ndi: Be jaa la lenaana nyama wu lema? 34Ŋaa alwoni akaali ndi: «Mfumu ŋa kaama ma nde.» 35Ŋaa bo ayi bila ŋa nyama wua mpila Jezu, ŋaa bo amana lege angoyi maala kayila nyama wua, bo anyini Jezu kumi kayila nde. 36Ŋaa ntini ye kiigi nciina Jezu ka levuzu, baari ba kalege amfa kayila njila ka ovuzu o nde ma kakusa nde. 37Ntini ye kiigi suruga Jezu kakuru ka elivye, tuga ŋa Jeruzaleme alwoni a nde awaayi, ŋaa bo kiigi nca kase keenini. Bo yiga ba ampa Njyami leve, ma ampiri ma lwari ma si Jezu. 38Ŋaa bo ndi: «Njyami kampa Mfumu wo aya ma nkuumu a nde puga. Kadusu kaka ka yulu, ŋaa lekuma leka ŋa Njyami nkara yulu.»
39Ŋaa afarizi ake kiigi aka nca lembuuru, bo ŋa Jezu ndi: «Mfumu! Duga alwoni a we aka pi.» 40Jezu ŋa bo ndi: «Mi elyele be jaajaa, se bo aka pi, akele ma ata nya.»
Jezu ŋa nya ma baari a Jeruzaleme
41Jezu yiga anciina tuga ŋa Jeruzaleme ŋa nde taali kangundu. Ŋaa nde yiga abaraga ma baari ba kangundu kia. 42Ŋaa nde yiga alyele ndi: «Ee baari a Jeruzaleme ba! Aka lubu be se kiigi leyayi mbuuru we ampa be kadusu? Ŋaa mono be yiga kibuna kayaa ni.» 43Ntini a be emi to eli anyon a be ba acua kabaga ma kajeneŋe be, ma kajwana bila be, ŋaa bo apya be ma ancwo aso. 44Bo ba ajaraga be, bo ba akanyina se kele lemo yila buga ŋi. Kabila be le kiyaa ntini ye yi Njyami mpila be ma kasa be leve ŋi.
Jezu acura antege biibi nca Njo Njyami
45Jezu kato Jeruzaleme, nde nyunuŋi nca Njo Njyami. Kaŋaa kiigi ŋa baari ba kiigi tege biibi, Ŋaa Jezu yiga acura bo. 46Nde ŋa bo ndi: «Nca abuku a Njyami amaateende ndi: Njo mi ye ka njo ye ba abwono, ŋaa be, be le mi kaala yo ma njo ye asara.»
47Ŋaa ecugu eso Jezu kayiziga nca Njo Njyami. Ŋaa amfumu a baari baba ampa ambwoŋi, ŋa ayizigi angiri bila amfumu ba kasi ba kasaga oyeri ma kabuma nde. 48Ŋaa bo akibaga oyeri ba kasa ŋi, okorogo lembuuru le kayuzuga maami ma kiigi lyele Jezu yemiŋi yemiŋi.
موجودہ انتخاب:
Luke 19: teg
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
