मरकुस 13

मँडिल उजाड़ुआ हेना राः बारे ते ईसु भविस्यवाड़ी तेडा

(मत्ती 24:1-44; लूका 21:5-33)

1जब हेंय मँडिल वरिय उडूंगुः दोहो एनु, तहाँ चेला कुतय मेंडे रे मियाँहोड़ ईसु थरेय कहनी तेडा, “ए गुरू, ञें-लेमू नआँ दिरी अवुर ओड़ाः तीमिन बढ़ियाँ गिआ!” 2तहाँ ईसु हेंय थरेय कहनी तेडा, “अम नआँ बड बडेआ ओड़ाः मी ञेंलियाडा, सींड़कू उजाड़ेआ, नआँ रे दिरी उपर दिरी हो एरो दोहो एना।”

संकट अवुर कलेस

(मत्ती 24:3-14; लूका 21:7-19)

3जब ईसु जयतून बुरू रे मँडिल हनते मड़ंग केडतेय दुड़ूब तना, तहाँ पतरस, एकूब अवुर एहुन्‍ना अवुर अन्दिरयास एटाः हँडे अड़ी केनतेकू होंबोर तेडिया। 4“अलेम लायवा नआँ टेबोः तिमीस होयाआ? अवुर नआँ टेबोः पूरा होयाः रे हेना तोलोग ची चिन्ह होयाआ?” 5तहाँ ईसु हेंकू थरेय कहनी तेडा, “सँवचेती तेपे दोहोनू, कनय हो बहको पेआ मोका अलोपे ओवाकू। 6कहेकि इंञ ञुमू ते अखीर होड़कू मेजकोः तेकू कहनियाँ, ‘इंञ मसीहा हवे,’ अवुर अखीर होड़कुकू भड़कोआ। 7अपे लड़नी उपर लड़नी राः चरचा पे अँजोम रे अलोपे बो-रू, कहेकि नआँ टेबोः मड़ंग ते जरूर होयाआ, लेकिन हेना तोलोग तुरेत्ते अन्त एरो होया एना। 8कहेकि अनजातकू अनजातकू सुदा अवुर एटाः राज रेनकू एटाः राज रेनकू सुदा कू लड़ायुआ, अवुर जघीन जघा ते भुईडोल होयाआ अवुर अकालेआ। नआँ सगोर बिपेत मेजुः राः बोंनोहड़ित होयाआ।”

9 # मत्ती 10:17-20; लूका 12:11,12 “अपे अनापे बिसेय ते सँवचेती तेपे दोहोनू, कहेकि होड़कू अपे दरबार रेकू इदी पेआ, अवुर अपे पंचायत तेकू एर पिटो पेआ, अवुर ईञाः चलते ते अपे अधिकारिकू मड़ंग रे अवुर राजाकू मड़ंग रेकू एर चड़ाँ पेआ, अवुर अपे हेंकू लगड गोवाही पे होयाआ। 10जरूरी इदाना कि नआँ वरी मड़ंग ते बढ़ियाँः खभेर सींड़ जातकू थरे ललाय इदाना। 11अपे पकड़ो केपे तेकू जिमा पेआ, अले ची ले कहनिआँ मेनते मड़ंग ते अलोपे पसींदे, जे-ना अपे हेन तोलोगिय लाय वपेआ, हे-ना पे कहनी, कहेकि टेबोः हेंकू अपे न लगे, पवितर आत्मा हवे।”

12अवुर मगियाकू एर ञेंड गोज ओड़ेंगा, अवुर अपत, होपोन तू एर ञेंड गोजेय लगाडिय जिमाया, अवुर होपोनकू इंगत अपत राः बिरोध रे रिमकोः तेकू एर ञेंड गोज कुआ। 13#मत्ती 10:22अवुर इंञ ञुमू राः चलते ते सींड़कू अपे सुदा बयेर कू रखोआ, लेकिन जे अखरी अँगम मेनते धीराजिय सबताआ, हें-नी बंचोआ।

महासंकट मेजुः राः बोंहड़ित

(मत्ती 24:15-28; लूका 21:20-24)

14“हेनाते जब अपे मँडिल असुधा मेरंग वआ चीज जहाँ रे जयेज कोवाआ, हेना रे चड़ाँ कोःरेपे ञें-ले (जे पड़होवेअय हेंय जेर जोमियू) अहूदिया रे दोहोनकू, बुरू हनते पे ञींरू; 15#लूका 17:31अवुर जे छत अगस रेय दोहोना, हेंय अनेज ओड़ाः रे कनारा उडूंग मेनते पेंदी हनते अलोय अगड़ुऊ, अवुर भीतर हनते अलोय बो-लू। 16अवुर कनय हो खेत रेय दोहोना, हेंय ईञाः कपड़ांञ आगा मेनते तयोम हनते अलोय मिड़ाऊ। 17हेना तोलोग दोहरी देंह रे दोहोनकू अवुर बलेकू दुदू कू पियोआ, हेंकू अखीर दुख रेकू पड़ोआ! 18अवुर नआँ लेयेड़ तोलोग अलो होयाः लगड बिनती पे। 19#दरसन 7:14कहेकि हेना तोलोग एयसा कलेस होयाआ, भगवान दुनियाय बनो तेड वरी, निहों मेनते नआँ घयते बेगर होयाआ अवुर न फेर कबोह होयाआ। 20परभु कलेस राः समय मेनेय घटो रेदो, कनय एरो बंचो एन मेनू। लेकिन अनेज चुनो केडकुआ, हेंकू राः चलते ते हेंय हेना दीनिय घटो केडा। 21हेना तोलोग कनय अपे थरे कू कहनियूँ, ‘ञेंलेय पे, मसीहा हना रेया’, चहे ‘ञेंलेय पे, मेना रेया,’ मेंडे रेदो अलोपे बिसवासे। 22कहेकि ठक-लबरा मसीहा अवुर भविस्यवक्‍ताकू रिम चड़ाआँ, अवुर अहचरज वआ घियाः चिन्ह कू तीबा, अगर हो सके रेदो चुनो केडकुआ, हेंकू घली कू बहको कुआ। 23लेकिन अपे सँवचेती तेपे दोहोनू, अँजोम पे, इंञ अपे सींड़ टेबोः पहील तेंञ लाय वडपेआ।”

होड़ होपोन फे-रिय मेजुआ

(मत्ती 24:29-31; लूका 21:25-28)

24 # दरसन 6:12 “हेना तोलोग नआँ कलेस राः बाद रे बेर अंधरा अयू, अवुर बँगो हो एरोय तरास तेडा। 25#दरसन 6:13अवुर अगस रेनकू इपिलकू लोजोरुआ कू; अवुर अगस राः सक्‍ति हिलोवेआ। 26#दरसन 1:7हेंडे होड़कू इंञ होड़ होपोन लिंबीर रे मेजुः तोलोग सक्‍ति अवुर आदर इजेत राः साथ ते मेजुः तोलोग कू ञेंलेञाँ। 27हेना तोलोग हेंय अनेज रेनकू दूतकुय कुलकेते, धरती राः अखरी छोर वरी, अगस राः अखरी छोर अँगम, चारियो खुट वरी अनेज चुनो केडकुआ हेंकू होड़कुय जवारा।

अंजीर काठ राः उदाहरड़

28अंजीर दुबी वरी नआँ उदाहरड़ पे चेडुऊ; हेना राः डाँड़ तू डोंहडीः रे अवुर सकमतू पल्वाः रे, अपे झूर मेजुः तना मेनते पे पपाड़ी जोमा। 29नेन घयते अपे नआँ टेबोः होयाः तोलोग पे ञें-ले रेदो, पपाड़िकोःपे कि मसीहा ठाँव रेया, मतलोब दुनूवर रेया मेनते। 30इंञ अपे थरे सही मेतेंञ कहनी यडा, नआँ टेबोः अनायिन होयाः मेन दिन नआँ पिढ़ी रेनकू एरो कू गोजेना। 31ओत अवुर अगस मेटियोआ, लेकिन ईञाः तेनेमेन होडिञाँ टेबोः कबोह एरो मेटियो एना।

जाग जाग तेपे दोहोनू

(मत्ती 24:36-44)

32 # मत्ती 24:36 हेना दिन चहे हेना समय राः बारे ते कनय मेने कू पपाड़ी तना, सरगदूतकू हो मेने, अवुर होपोन हो मेनेय पपाड़ी तना, बस अपा भर पपाड़ी तना। 33ञेंल पे, जाग जाग तेपे दोहोनू, अवुर बिनतीः महल रेपे दोहोनू, कहेकि अपे मेने पे पपाड़ी तना, कि हेना समय तिमीस मेजुआ। 34#लूका 12:36-38नआँ हेंय होड़ राः दसा घयगिआ, जे एटाः देस हनतेय चलोः तोलोग अनेज ओड़ाईय बगी अटु वआ, अवुर अनेज रेनकू हरवाह कुय जिमा अटु वआ, अवुर सगोरकू कामिय लाय अटु वकुआ, अवुर पहारदार जाग जाग तेम दोहोन मेनतेय कहनी अटु वया। 35हेनाते जाग जाग तेपे दोहोनू, ओड़ाः मुँवर तिमीसिय मिड़ाः मेजुआ, सींगड़ जुवर किदो, अदहा रात, किदो मुरगा कुकड़ूचुः तोलोगू, किदो अंगा तोलोगू, कहेकि हेना अपे मेने पे पपाड़ी तना। 36न घयते अलो होयाऊ कि हेंय अचाकते मेजकोःते अपे गितीज तोलोगिय मेज ञँम पे। 37अवुर जे-ना इंञ अपे थरेंञ कहनी यडा, हेना सींड़कू थरेंञ कहनी यडा, जाग जाग तेपे दोहोनू!”

موجودہ انتخاب:

मरकुस 13: ksz

سرخی

کاپی

موازنہ

شئیر