পত্থম 1
1
সৃট্টির কধা
1পত্তমে গোজেনে দেবাবো আরঅ পিত্থিমীগান বানেল। 2পিত্থিমীর উগুরেদিগানত্ সেক্কেয়ো কনঅ চিহ্নো পাহ্ ন যায়, আর সিয়েন ভিদিরে জেদা পরাণবলা কিচ্ছু ন-এলাক্; সিয়েন উগুরেদিগান এলঅ আন্ধারে ঢাক্ক্যে গভীন্ পানি। গোজেন আত্মাগান সে পানিগান উগুরে আদা-উদো গুরিদো।
3-5গোজেনে কলঅ, “পহ্র ওক্।” আর সেক্কে পহ্র অলঅ। তে দেগিলোদে সিয়েন জদবদে দোল্ ওইয়্যে। তে আন্ধারত্তুন্ পহ্রানরে ফারক্ গুরিনে পহ্রান নাঙান্ দিলো দিন আর আন্ধারান নাঙান্ দিলো রেত্। এধোক্কেনগুরি সাজোন্যে গেলঅ বেন্যেমাদান্ এলঅ, আর সিয়েনি অলঅ পত্তম দিনোত্।
6সে পরেদি গোজেনে কলঅ, “পানিগান ভিদিরে এক্কান ফারক্ জাগার সৃট্টি ওক্, আর সেনে পানিয়ান্ দ্বিভাগ ওই যোক্।” 7এধোক্ক্যেনগুরি গোজেনে পানিগান ভিদিরে এক্কান ফারক্ জাগার সৃট্টি গুরিলো আরঅ তলে-উগুরে পানিগান ফারক্ গুরিলো। সেক্কে উগুরে পানিগান আর তলে পানিগান ফারক্ ওই গেলঅ। 8গোজেনে সে ফারক্ জাগায়ান নাঙান্ দিলোদে আগাজ্। এধোক্কেন গুরি সাজোন্যে গেলঅ বেন্যেমাদান্ এলঅ, আর সিয়েনি অলদে দ্বি-দিনোত্।
9ইয়েন পরেদি গোজেনে কলঅ, “আগাজ তলেদি বেক্ পানিগান এক্কান জাগাত্ জমা ওক্ আর শুগুনো জাগা দেগা দুয়োগ্।” আর সিয়েনই অলঅ। 10গোজেনে সে শুগুনো জাগায়ান নাঙান দিলো মাদি, আর সে জমা ওইয়্যে পানিয়ান্ নাঙান দিলো দোজ্যে সাগর। গোজেনে দেগিলদে সিয়েন জদবদে দোল্ ওইয়্যে।
11সিয়েন পরেদি গোজেনে কলঅ, “মাদি উগুরে খের্ উদোক্; আর এন্ শোজ্য আহ্ শাক-পাদর্ গাছ্ ওদোক্ যিগুনোর নিজোর নিজোর বিজি থেবঅ। মাদি উগুরে নানান্ জাদর গুলো-গুলি গাছঅ উদদোক্ যিগুনোত্ নিজোর নিজোর গুলো-গুলি ধুরিবাক্; আর সে গুলো-গুলিগুনো ভিদিরে থেবাক্ তারার নিজোর নিজোর বিজি।” আর সিয়েনই অলঅ। 12মাদি উগুরে খের্, নিজোর বিজি আঘেদে এধোক্ক্যেন নানান্ জাদর শোজ্য আর শাক-পাদ গাছ্ আহ্ নানান্ জাদর গুলো-গুলি গাজঅ উদিলাক্; আর সে গুলো-গুলিগুনো ভিদিরে তারার নিজোর নিজোর বিজি এলাক্। গোজেনে দেগিলদে সিয়েনি জদবদে দোল্ ওইয়্যে। 13এধোক্কেনগুরি সাজোন্যে গেলঅ, বেন্যেমাদান্ এলঅ আর সিয়েনি অলঅ তিন দিনোত্।
14সিয়েন পরেদি গোজেনে কলঅ, আগাজ ইধু পহ্র অয়্ এবাবোত্যে বেক্কুন দেগা যোগ্, আর সিগুনে রেদত্তুন্ দিন্নোরে ফারক্ গোত্তোক্। সিগুনে যুদো যুদো দিন, ঋতু আর বজরত্যে চিহ্ন ওই থাদোক্। 15“আগাজত্তুন্ সিগুনে পিত্থিমীগান উগুরে পহ্র দেদোক্” আর সিয়েনই অলঅ। 16গোজেনে দ্বিবে দাঙর পহ্র বানেল। সিগুনো ভিদিরে দাঙরবোরে দিন উগুরে রাজাগিরি গুরিবাত্যে, আর চিগোন্নোরে রেদো উগুরে রাজাগিরি গুরিবাত্যে বানেল। সিগুন বাদে তে-তারায়ো বানেল। 17তে সিগুনোরে আগাজ উগুরে বোজেল যেনে সিগুনে পিত্থিমীগান উগুরে পহ্র দুয়োন্, 18দিন আর রেদো উগুরে রাজাগিরি গরন্ আর আন্ধারত্তুন্ পহ্রানরে ফারক্ গুরি রাগান। গোজেনে দেগিলদে সিয়েন জদবদে দোল্ ওইয়্যে। 19এধোক্ক্যেন গুরি সাজোন্যে গেলঅ বেন্যেমাদান্ এলঅ, আর সিয়েনি অলঅ চের্ দিনোত্ । 20সে পরেদি গোজেনে কলঅ, “পানিগান্ নানান্ জেদা পরাণবলা ঝাক্কোই ভুরি উদোক্, আরঅ পিত্থিমীয়ান উগুরে আগাজ ইধু নানান্ পেগে উড়ি বেড়াদোক্।” 21এধোক্ক্যেন গুরি গোজেনে দোজ্যে সাগরর দাঙর্ দাঙর্ পরাণবলা আর পানিত্ একযদা গুরি বেড়েইয়্যে নানান্ জাদর জেদা পরাণবলা সৃট্টি গুরিলো। সিগুন বাদেয়ো গোজেনে নানান্ জাদর পেগঅ সৃট্টি গুরিলো। তারার বেক্কুনোর নিজোর নিজোর জাদ ধোক্ক্যেন বংশ বাড়েবার খেমতা ওইয়্যে। গোজেনে দেগিলদে সিয়েন জদবদে দোল্ ওইয়্যে। 22গোজেনে তারারে ইয়েন কোইনে বর্ দিলো, “বংশ বাড়েবার খেমতালোই ভুরি যেইনে তুমি নিজোর মানেইয়ুন্ বাড়, আর সিগুনদোই দোজ্যে সাগর পানি ভোরেই ফেলঅ। পিত্থিমীয়ান উগুরে পেক্কুনেয়ো নিজোর নিজোর সোংখ্যেগুন্ বাড়াদোক্।” 23এধোক্কেনগুরি সাজোন্যেয়ো গেলঅ বেন্যেমাদান এলঅ, আর সিয়েনি অলঅ পাচ্ দিনোত্ ।
24সিয়েন পরেদি গোজেনে কলঅ, “মাদিত্তুন্ এধোক্ক্যেন জেদা পরাণবলার্ জর্ম ওক্ যিগুনোর নিজোর নিজোর জাদরে বাড়েই তুলিবার খেমতা থেবঅ। সিগুনো ভিদিরে ঘরত্ পালেয়্যে, ঝাড়্বো আর বুক্কোই-আঢি বেড়েইয়্যে পরাণবলা থাদোক্”। আর সিয়েনি অলঅ। 25গোজেনে পিত্থিমীর নানান্ জাদর ঝাড়্বো, ঘর্বো আর বুক্কোই-আদি যেইয়্যে পরাণবলা সৃট্টি গুরিলো। ইগুনোর বেক্কুনোত্তুন্ নিজোর নিজোর জাদরে বাড়েবার খেমতা এলঅ। গোজেনে দেগিলদে সিয়েন জদবদে দোল্ ওইয়্যে।
সৃট্টির পত্তম মানুচ্
26সে পরেদি গোজেনে কলঅ, “আমি আমা ধোক্ক্যেনগুরি আর আমা লগে মিল্ রাগেইনে ইক্কিনে মানুচ্ বানেই। তারা দোজ্যে সাগরর মাছ, আগাজ পেক্, য়েমান, বুক্কোই আঢি যেইয়্যে পরাণবলা আর গোদা পিতথিমীয়ান উগুরে রাজাগিরি গোত্তোক্।” 27পরেদি গোজেনে তা ধোক্ক্যেন গুরি মানুচ্ বানেল। অয়, তে গোজেন ধোক্ক্যেন গুরি মানুচ্ বানেল, বানেল মরদ আর মিলে ইজেবে। 28গোজেনে তারারে বর্ দিইনে কলঅ, “তুমি বংশবাড়েবার খেমতালোই ভুরি যঅ, আরঅ নিজোর মানুচ্চুন বাড়েইনে পিত্থিমীগান ভোরেই ফেলঅ আহ্ পিতথিমীগান্ নিজোর্ শাজনত্ আনঅ। ইয়েনবাদে তুমি দোজ্যে সাগরর মাছ, আগাজ পেক্, আর মাদি উগুরে ঘুরি বেড়েইয়্যে বেক্ জেদা পরাণবলাগুনো উগুরে রাজাগিরি গরঅ।”
29ইয়েন পরেদি গোজেনে কলঅ, চঅ, পিতথিমীয়ান উগুরে বেক্ শোজ্য আর শাক-পাদ্ যিগুনোর নিজোর বিজি আগন্ আর পত্তি গাজর্ যিগুনোর্ গুলোগুনো ভিদিরে নিজোর বিজি আগন্ সিগুন মুই তমারে দিলুঙ্। ইগুনোই তমার হানা অবঅ। 30“পিত্থিমীয়ান উগুরে পত্তি য়েমান, আগাজর্ পত্তি পেক্ আর বুক্কোই-আঢিযেইয়্যে পত্তি পরাণবলা, এক্ কধায় বেক্ জেদা পরাণবলাগুনোরে হেবাত্যে মুই বেক্ শোজ্যয়ানি আর শাক্-পাদ্তানি দিলুং।” আর সিয়েনই অলঅ।
31গোজেনে তার নিজোর বানেইয়্যে বেক্কানি চেলঅ। সিয়েনি ঘেচ্ছেক্গুরি জদবদে দোল্ ওইয়্যে। এধোক্ক্যেনগুরি সাজোন্যে গেলঅ বেন্যেমাদান্ এলঅ, আর সিয়েনি অলঅ ছঅ দিনোত্ ।
موجودہ انتخاب:
পত্থম 1: CBT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Copyright © 2021 Bangladesh Bible Society