प्रेरित 7
7
स्तिफनसक सन्देश
1तब प्रधान पूजारी स्तिफनसह पुछ्ल, “का टुँहीन दोष लगाइल यी बात सत्य हो?”
2स्तिफनस जवाफ देल, “दादुभैयन ओ आदरणीय अगुवाहुँक्र, म्वार बात ध्यान देक सुनी। हमार पुर्खा अब्राहाम हारान कना ठाउँम जैनासे आघ मेसोपोटामिया देशम पलरहलम महिमामय परमेश्वर हुँकहीन दर्शन देलन।#उत १२:१ 3परमेश्वर अब्राहामह कलन, ‘टैँ आपन देश ओ आपन मनैन छोर्क मै टोहीह देखैना देशम जा।’
4“तब अब्राहाम कल्दीन्हक देश छोर्ल ओ हारानम जाक बैठ्ल। हुँकहार बाबा मुलन त परमेश्वर हुँकहीन अप्नहुँक्र आब बैठल यिह देशम अन्लन।#उत ११:३१; १२:४ 5उ ब्याला परमेश्वर अब्राहामह यी देशम पैला टेक्ना जग्गा फे नैदेलन। तर परमेश्वर ‘यी टोहीह ओ ट्वार सन्तानन देहम’ कैक प्रतिज्ञा कर्ल, हुइना त उ ब्याला अब्राहामक लर्कापर्का नैरलहन।#उत १२:७; १३:१५; १५:१८; १७:८ 6परमेश्वर अब्राहामह कल, ‘ट्वार सन्तान विदेशम जाक परदेशीअस बैठहीँ। उ देशक मनै हुँकन कमारा-कमारी बनैहीन ओ चार सय वर्षसम थिचोमिचो कैक धेर दुःख देहहीन।#उत १५:१३-१४ 7तर हुँकन कमारा-कमारी बनैना मनैन मै दण्ड देहम। तबदोस्र हुँक्र उ देशमसे निकर्क यिह ठाउँम अइहीँ ओ म्वार आराधना करहीँ।’#प्रस ३:१२ 8उ समयम परमेश्वर अब्राहामह हुँक्र उहाँक मनै रलक बाचक चिन्हक रूपम हुँकहार छावन्हक खतना विधि करक लाग आज्ञा देल। तबदोस्र अब्राहामक छावा इसहाक जन्मल। जन्मलक आठवाँ दिनम अब्राहाम आपन छावक खतना कर्ल। इसहाक आपन छावा याकूबक खतना कर्ल। याकूब आपन बाह्र भाइ छावन्हक खतना कर्ल। हमार बाह्र कुलक पुर्खाहुँक्र हिँक्रहे हुइट।#उत १७:१०-१४; २१:२-४; २५:२६; २९:३१–३५:१८
9“याकूबक छावन आपन भैया योसेफकपर बिह्र मुवट्। हुँक्र योसेफह मिश्रदेशक मनैनसे बेँचदेल त ऊ कमारा हुइल। तर परमेश्वर हुँकाहारसँग पलरलह।#उत ३७:११,२८; ३९:२,२१ 10परमेश्वर हुँकहीन सक्कु दुःखकष्टसे छुट्कारा देल। ऊ मिश्रदेशक राजा फारोकठे अइल। परमेश्वर योसेफह बुद्धि देलन ओ राजा योसेफक भलो सोँच्ल। तब फारो योसेफह मिश्रदेशक प्रधानमन्त्री ओ आपन राजदरवारम बडाहाकिम बनैलन।#उत ४१:३९-४१
11“तबदोस्र सारा मिश्र ओ कनान देशम अनिकाल परल। हमार पुर्खाओँ खैना नैपाक भुँखमरिम पर्ल।#उत ४२:१-२ 12मिश्रदेशम अनाज बा कना सुन्ल त याकूब आपन छावन पैल्हचो उ देशम अनाज किन पठैल। 13हुँक्र द्वासरचो अनाज किन गैल्म योसेफ आपन दादुभैयन आपन परिचय देल ओ योसेफ फे आपन परिवारन्हक बारेम राजा फारोसे परिचय करैल।#उत ४५:१,१६ 14योसेफ आपन बाबा याकूबह सब जहान परिवार लेक मिश्रम अइना खबर पठैल।#उत ४५:९-१०,१७-१८; ४६:२७ 15तब याकूब आपन पचहत्तर जन्हक जहान परिवार लेक मिश्रदेशम गैल। असिक याकूब ओ हमार पुर्खाओँ उहँ बित्ल।#उत ४६:१-७; ४९:३३ 16हुँकन्हक सन्तान हुँकन्हक मुवल शरीर शकेम कना ठाउँम लैजाक गर्यम ढर्ल। उ जग्गा हमोरक छावनसे अब्राहाम चाँदीक पैँसा तिर्क किनरख्लह।#उत २३:३-१६; ३३:१९; ५०:७-१३; यहो २४:३२
17“अब्राहामसे परमेश्वरक करल प्रतिज्ञा पूरा हुइना दिन पुगटह। उ समयम हमार इस्राएली मनै मिश्रदेशम धेर बहररलह।#प्रस १:७-८ 18तबदोस्र योसेफह नैचिह्न्ना लौव राजा मिश्रदेशम राज्य करलग्ल। 19उ राजा हमार पितापुर्खन्हक विरोधम जाल जोर्ल ओ हुँकन अत्याचार कर्ल। इस्राएलीन्हक लर्कन मुवाइक लाग जन्मटीकि जबरजस्ती बाहर फाँक लगाइँट्।#प्रस १:१०-११,२२
20“उह समयम मोशा जन्मलह। ऊ परमेश्वरक नजरम सुन्दर रलह। हुँकहार डाई-बाबा तीन मैन्हासम हुँकहीन घरहेँम नुकाक पल्ल।#प्रस २:२ 21तर पाछ नुकाइ नैसेक्क घरसे बाहर ढर्ल त फारोक छाई हुँकहीन लैगिली ओ आपनऽ छावा बनाक पल्ली।#प्रस २:३-१० 22मोशा मिश्रीहुँकन्हक सब ज्ञानगुनक बात सिख्ल, ओ हुँकहार बोलीवचन ओ कामकाज प्रभावशाली रलहन।
23“चालीस वर्षक उमेरम मोशा आपन इस्राएली दादुभैयनसे भ्याँट कर्ना इच्छा कर्ल।#प्रस २:११-१५ 24एक दिन मोशा एकठो मिश्रक मनैया एकठो इस्राएलीह पिटट् देख्ल त उ इस्राएलीक रक्षा कर गैल ओ बद्ला लेक उ मिश्रीह मुवादेल। 25इस्राएलीन अत्याचारमसे छुट्कारा देहक लाग परमेश्वर हुँकहीन पठारख्ल कना बात आपन दादुभैयहुँक्र बुझहीँ कैक मोशा सोँच्लरलह। तर हुँक्र उ बात नैबुझ्ल। 26द्वासर दिन मोशा दुइ जन इस्राएलीहुँकन मारिकमारा करँट् देख्ल। हुँकन मिलैना हिसाबले मोशा कल, ‘टुह्र दादुभैयन होक फे काजे मारिकमारा करटो?’
27“तर अन्याय करुइया इस्राएली मोशह घुचेट्टी कहल, ‘हमारम शासन कर ओ हमार न्याय कर टोहीह के पठाइल? 28काल उ मिश्रीह मुवाइल्अस का टैँ मही फे मुवाइ ख्वाजट्या?’ 29यी सुन्ल त मोशा भाग्क मिद्यान कना देशम गैल ओ परदेशी होक बैठलग्ल। मोशक दुइठो छावन उहँ जन्मलन।#प्रस १८:३-४
30“चालीस वर्ष पाछ एक दिन सीनै कना पर्वत्वक लग्घ उजार ठाउँम एकठो स्वर्गदूत मोशकठे जर्टिरहल झप्टीम देखपर्ल।#प्रस ३:१-१० 31यी देख्क मोशा छक्क पर्ल ओ मजासे ह्यारक लाग लग्घ गैल त परमप्रभुक आवाज सुन्ल, 32‘मै ट्वार पितापुर्खा अब्राहाम, इसहाक ओ याकूबक परमेश्वर हुइटुँ।’ यी सुन्क मोशा डरकमार लग्लगाइलग्ल ओ हेर्ना आँट फे नैकर्ल।
33“परमप्रभु मोशह कल, ‘आपन चप्पल निकार, काकरकि टैँ ठह्र्याइल ठाउँ पवित्र बा। 34मिश्रदेशम रहल म्वार मनैन्हक दुःखकष्ट मै आपनऽ आँखिले देखरख्नु ओ हुँकन्हक बिलौना सुनरख्नु। मै हुँकन छुट्कारा देहक लाग आरनु। आब यी कामक लाग मै टोहीह मिश्रदेशम पठैम।’
35“यिह मोशह, आपनऽ जातिक मनै ‘हमारम शासन कर ओ हमार न्याय कर टोहीह के पठाइल?’ कैक अस्वीकार कर्लह। जर्टिरहल झप्टीम देखपर्लक स्वर्गदूतसे इस्राएलीन्हक अगुवा हुइक लाग ओ हुँकन छुट्कारा देहक लाग परमेश्वर मोशह पठैल।#प्रस २:१४ 36उ मनैया मिश्रदेशम, लाल समुद्रम ओ चालीस वर्षसम उजार ठाउँम अचम्म-अचम्मक काम कर्ल ओ चिन्ह देखाक आपन इस्राएली मनैन मिश्रदेशमसे निक्रैल।#प्रस ७:३; १४:२१; गन्ती १४:३३
37“इस्राएलीन असिक कहुइया यिह मोशा हुइट, ‘परमेश्वर टुन्हक आपनऽ दादुभैयन्हकमसे म्वारअस एकठो अगमवक्ता टुन्हकठे अनहीँ।’#व्य १८:१५,१८ 38इस्राएलीहुँक्र उजार ठाउँम जम्मा हुइल्म मोशा उहँ रलह। स्वर्गदूत सीनै पर्वत्वम हुँकहीनसे बोल्लह। मोशा उह वचन हमार पुर्खन कलह ओ हमन देहक लाग जीवित वचन पैलह।#प्रस १९:१–२०:१७; व्य ५:१-३३
39“तर हमार पितापुर्खाहुँक्र हुँकहार बात ओनैबोओनैबोनैकर्ल। बेनसे हुँक्र मोशह छोर्क मिश्रदेशम घुम्ना विचार कर्ल। 40हुँक्र मोशक दादु हारूनह असिक कल, ‘हमार आघ-आघ जाइक लाग डिउँटाओँ बनादी, काकरकि हमन मिश्रदेशमसे निक्राक अनुइया ऊ मोशह का हुइलस कना बात हमन थाहाँ नैहो।’#प्रस ३२:१ 41तबदोस्र हुँक्र एकठो बच्छ्वक मूर्ति बनैल ओ ओइहेँम बलि चह्रैल। हुँक्र आपनऽ हाँठले बनाइल मूर्तिक खुशीयाली मनैल।#प्रस ३२:२-६ 42तब परमेश्वर आपन नजर हुँकन्हकमसे हटैल। ओ हुँकन दिन, जोन्ह्या, ओ तोरैँयक पूजा कर देल। अगमवक्तन परमेश्वरक वचनम असिक लिख्रख्ल,
‘हेरो, इस्राएलक मनै,
का उजार ठाउँम चालीस वर्षसम
महीह पशु काट्क बलि चह्रैलहो?#आमो ५:२५-२७
43टुह्र मोलेख कना डिउँटक पाल लैगिलो
ओ रेफन डिउँटा कना तोरैँयक मूर्ति फे लैगिलो।
उ मूर्ति टुह्र पूजक लाग अपन्हे बनैलहो।
उहओर्से मै टुँहन बेबिलोनसे फे दूर कैदी बनाक पठैम।’
44“सारा उजार ठाउँम हमार पुर्खन्हकठे ‘परमेश्वरक उपस्थिति देखैना’ एकठो पवित्र पाल रह। परमेश्वर मोशह देखाइल नमुना अनुसार उ पाल बनागैल रह।#प्रस २५:९,४० 45परमेश्वर यी देशम रहल गैरयहूदीन खेद्ल। यहोशू यी देश जित्ल त, हमार पुर्खाओँ उ पवित्र पाल यिह देशम अन्ल। तबसे राजा दाऊदक पालासम उ पवित्र पाल यिहँ पलरहल।#यहो ३:१४-१७ 46दाऊद परमेश्वरक निगाहा पैल ओ इस्राएलीहुँक्र आराधना करक लाग परमेश्वर सड्ड पलरना एकठो भवन बनैना अनुमति मङ्ल।#२ शमू ७:१-१६; १ इति १७:१-१४ 47दाऊदक छावा सोलोमन परमेश्वरक भवन बनैल।#१ राज ६:१-३८; २ इति ३:१-१७
48“तर सर्वोच्च परमेश्वर त मनैन्हक बनाइल मन्दिरम नैबैठ्ट। परमप्रभुक कहल बात अगमवक्ता लिख्रख्ल,
49‘स्वर्ग म्वार सिंहासन हो,
पृथ्वी म्वार पौलीक पाउदान हो।
टुह्र म्वार लाग कसिन मन्दिर बनैबो?
मै आराम कर्ना ठाउँ कहाँ बा?#यशै ६६:१-२
50यी सब चिज म्वार बनाइल नैहो का?’
51“अप्नहुँक्र कठोर मनै हुइटी। अप्नहुँक्र गैरयहूदीन्हकअस परमेश्वरक आज्ञापालन कर या उहाँक वचन सुन नैचहटी। आपन पुर्खन्हकअस अप्नहुँक्र पवित्र आत्मक विरोध कर्टिरठी।#यशै ६३:१० 52अप्नहुँकन्हक पुर्खाओँ कौन अगमवक्तह नैसँतैल? परमेश्वरक धर्मी जन अइना बारेम अगमवाणी करुइयन त झन् मुवैना समेत कर्ल। उह धर्मी जनह अप्नहुँक्र ध्वाखा देक मुवैली। 53अप्नहुँक्र स्वर्गदूतनसे परमेश्वरक धार्मिक व्यवस्था पैली, तर जानजानक फे पालन नैकर्ली।”
स्तिफनसह पत्थ्रले मार्क मुवैलक
54स्तिफनसक बात सुन्क महासभक मनै रिसले आगी हुइल ओ दाँत पिसभिर्ल। 55तर स्तिफनस पवित्र आत्मले भरपूर होक स्वर्गओर हेर्ल त परमेश्वरक महिमा ओ परमेश्वरक दाहिन पाञ्जर येशूह ठह्र्याइल देख्ल। 56स्तिफनस कल, “हेरी, मै स्वर्ग उघ्रल ओ मनैयक छावा येशूह परमेश्वरक दाहिन पाञ्जर ठह्र्याइल द्याखटुँ।”
57अत्रहम हुँक्र आपन-आपन कान बुज्क जोरसे चिल्लैल ओ स्तिफनसह आक्रमण कर्ल। 58हुँक्र स्तिफनसह घँस्यैटी सहरसे बाहर लैजाक पत्थ्रले मारभिर्ल। हुँकहीन मुवैना मनै आपन-आपन कोट काहारक शाऊल नाउँक एकठो जवान मनैयह ह्यार देरख्लह।
59हुँक्र पत्थ्रले मर्टिरहल ब्याला स्तिफनस प्रार्थना कर्ल, “हे प्रभु येशू, म्वार आत्मह ली।” 60तबदोस्र स्तिफनस ठिहुन टेक्क जोरसे प्रार्थना कर्ल, “हे प्रभु, यी पाप हिँकन जिन लाग।” अत्रा कैक ऊ प्राण छोर्ल।
موجودہ انتخاب:
प्रेरित 7: thl
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2020, Wycliffe Bible Translators, Inc. All rights reserved.