२ कोरिन्थी 7
7
1उहओर्से प्रियहुँक्र, परमेश्वर हमन देलक यी प्रतिज्ञानुसार शरीर ओ आत्मह अशुद्ध बनैना हरकिसिमक बातसे हम्र दूर रही, ओ हम्र परमेश्वरक डरम रना मनै हुइलकओर्से पूरा हिसाबले पवित्र जीवन बिताई।
पावलक आनन्द
2हमन टुन्हक हृदयम ठाउँ देओ। हम्र केक्रो अन्याय नैकर्लहुइटी, कौनोजहन नैबिगर्लहुइटी। हम्र कौनो व्यक्तिसे फाइदा नैखैलहुइटी। 3यी बात मै टुँहन दोषी ठहराईक लाग कलक नैहुइटुँ, काकरकि मै पैल्हहेँ कैरख्नु, हमार मनम टुन्हकप्रति अत्रा प्रेम बा, कि हम्र टुन्हकसँग मुना या बच्ना तयार बाटी। 4टुन्हकप्रति म्वार भारी भरोसा बा, ओ टुन्हकम मै धेर गर्व कर्ठुं। हमार सब दुःखकष्टम मै पूरा सान्त्वना पारख्नु, ओ आनन्दित बाटुँ।
5हम्र माकेडोनियम रहबेर बिसैना मौका नैपैली, चर्योओर्से सङ्कष्ट आइल रह, बाहिरसे सङ्घर्ष, ओ भित्री मनम जुन डर केल रह।#२ कोर २:१३ 6तर तीतस अइल त दुःखी मनैन सान्त्वना देना परमेश्वर हमन फे सान्त्वना देल। 7तीतस अइलकओर्से केल नाहीँ, तर ऊ टुँहनसे पाइल सान्त्वनाले मै सान्त्वना पैनु। महीह फेदोस्र भ्याँट कर्ना टुन्हक भारी इच्छा बा कैक ऊ हमन कल। टुह्र दुःखीत हुइलक ओ म्वार बारेम चिन्तित हुइलक बात सुन्क मै धेर खुशी होरनु।
8म्वार पठाइल चिठीले टुँहन दुःख त लागल हुई, तर फे मै नैपश्तैटुँ। हुइना त उ चिठीले टुँहन कुछु समय पीर लागल कना जान्क मै पश्तैनु। 9तर फे आब मै खुशी बाटुँ, टुँहन पीर लागल कैक नाहीँ, तर उ पीरले टुँहन आपन पापी मन परिवर्तन कर्ना मौका मिलल् कैक मै खुशी बाटुँ। काकरकि टुह्र परमेश्वरह समझ्क शोक कर्लो, ओ हमारतर्फसे टुँहन कुछु नोक्सानी सहनैपरल। 10परमेश्वरह समझ्क करल शोकले हमन पापसे अलग करैठा ओ मुक्तिओर लैजिठा। असिन किसिमक शोकम पश्ताइ नैपरट्। तर संसारक शोकले हमन मृत्युओर लैजिठा। 11यी ईश्वरीय शोकले टुन्हकम कसिन उत्साह जगादेरारखल, उ बात विचार करो। अपन्हेह निर्दोष साबित करैना टुन्हकम कत्रा उत्सुकता बा। कसिन क्रोध, कसिन डर, कसिन पियास, कसिन जोश, न्याय ह्वाए कना कत्रा चाहना! सब बातम टुह्र अपन्हेह निर्दोष हुइल् साबित कैरख्लो। 12उ चिठी मै अन्याय कर्ना मनैयक कारणले लिखल नैहो, ना त अन्यायम पर्ना मनैयक कारणले हो, तर यी कारणले कि परमेश्वरक आघ टुह्र हमन कत्रा वास्ता कर्ठो कैक थाहाँ देहक लाग लिखल हो। 13उहओर्से हमन हौसला मिलल् बा।
हमन केल नाहीँ तीतसक आनन्दम फे हम्र खुशी हुइली, काकरकि टुन्हक व्यवहारसे ऊ शान्ति पारख्ल। 14हुँकहार सामनेम टुन्हक बारेम कुछु घमण्ड कर्नहुँ, ओ टुह्र महीह निराश नैबनैलो। तर जसिक हम्र टुँहन कहल सब बात सत्य रह, ओसहेँक तीतसक सामनेम हमार करल घमण्ड फे सत्य ठह्रल बा। 15टुन्हक सबजन्हक आज्ञाकारितक जीवन ओ टुह्र डर ओ आदरसाथ हुँकहीन स्वागत कर्लक बात समझ्क ऊ टुँहन झन् धेर प्रेम कैरख्ल। 16महीह धेर खुशी लागरहल, काकरकि टुन्हकप्रति म्वार पूरा भरोसा बा।
موجودہ انتخاب:
२ कोरिन्थी 7: thl
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2020, Wycliffe Bible Translators, Inc. All rights reserved.