१ कोरिन्थी 10
10
इस्राएलक इतिहासमसे शिक्षा
1भैयौ, मै टुँहन का बात सम्झाइ चाहटुँ कलसे, हमार पुर्खाओँ सबजन बद्रीक छैहेँछैहेँ गैल, ओ हुँक्र सबजन सुखल धर्तीम नेङ्ग्क समुद्र पार कर्ल।#प्रस १३:२१-२२; १४:२२-२९ 2मोशक पाछ लागल मनैन्हक रूपम हुँक्र सबजन बद्रीम ओ समुद्रम बप्तिस्मा पैल। 3सबजन एक्क आत्मिक भोजन खैल।#प्रस १६:३५ 4सबजन एक्क आत्मिक पानी पिल, काकरकि हुँकन्हक सँगसँग जैना आत्मिक चट्टानमसे निक्रल पानी हुँक्र पिल। उ चट्टानजुन ख्रीष्ट जो रलह।#प्रस १७:६; गन्ती २०:११ 5तर फे परमेश्वर हुँक्र धेर जहनसे खुशी नैहुइल, ओ हुँक्र उजार ठाउँम नाश हुइल।#गन्ती १४:२९-३०
6यी सब घटना हमार चेताउनीक लाग हुइल् हो। हम्र फे हुँकन्हक करलअस खराब इच्छा नैढरपरट्।#गन्ती ११:४ 7हुँक्र कत्रा जन मूर्तिपूजा करलअस टुह्र कर नैपरट्। धर्मशास्त्रम लिखल बा, “मनै खानपिन कैक उत्सव मनैल ओ नाचगान करक लाग उठ्ल।”#प्रस ३२:६ 8हुँक्र कत्रा जन व्यभिचार करलअस हम्र कर नैपरट्। व्यभिचार कर्लक कारण हुँक्र एक दिनम त्याईस हजार जन मुलह।#गन्ती २५:१-१८ 9हुँक्र कत्रा जन परमप्रभुक परीक्षा करलअस हम्र ख्रीष्टक परीक्षा कर नैपरट्। परमप्रभुक परीक्षा कर्लक कारण हुँक्र साँपनसे कट्वापाक मुल।#गन्ती २१:५-६ 10हुँक्र कत्रा जन गनगन करलअस हम्र कर नैपरट्। गनगन कर्लक कारण हुँकन मृत्युक दूत सखाप पर्लन।#गन्ती १६:४१-४९
11हमन चेताउनी देहक लाग हुँकन्हकम यी सब घट्ना हुइलन। ओ यी बात हम्र अन्त्यक दिनम जिउइयन सिखाइक लाग धर्मशास्त्रम लिख्गैल् हो। 12अपन्हेह बलगर विश्वासी सम्झना मनैया होस पुगाइपर्ठा, नकि त ऊ पापम फँससेकी। 13टुन्हक जीवनम अइना सब परीक्षा और जन अनुभव करलसे फरक नैहो। परमेश्वर विश्वासयोग्य बाट। उहाँ टुह्र सहही नैसेक्ना हिसाबक परीक्षम टुँहन पर नैदेनेहुइट। उहाँ परीक्षमसे पार हुइना उपाय फे बनादेहुइयाबाट। असिक टुह्र सब जाँच सह सेक्बो।
मूर्तिह चह्राइल खाना जिन खाओ
14उहओर्से प्रिय भैयौ, मूर्तिपूजसे दूर रहो। 15समझदार मनैनसे बट्वाइअस मै टुँहनसे बट्वाइटुँ। म्वार कहल बात टुह्र अपन्हे विचार करो। 16प्रभुभ्वाजक समयम हम्र खोर्या लेक परमेश्वरह धन्यवाद चह्रैठी। उ खोर्यमसे अङ्गूरिक मद पियबेर का हम्र ख्रीष्टक रगतम साझेदार नैहुइटी? का खँराइल रोटी खाइबेर हम्र ख्रीष्टक शरीरम साझेदार नैहुइटी?#मत्ती २६:२६-२८; मर्क १४:२२-२४; लूक २२:१९-२० 17हम्र धेर जन रलसे फे एकठो रोटी खँराक सबजन खैठी। यिहिँले हम्र एक शरीर हुइटी कना बात देखैठा।
18इस्राएलीन्हक बारेम विचार करो ना। का वेदीम बलिदान चह्राइल चिज खउइयन वेदीम साझेदार नैहुइट?#लेवी ७:६ 19मै का कहटुँ? मूर्तिह चह्राइल चिजिक का महत्व बा? अथवा मूर्तिक का महत्व बा? 20म्वार कहख्वाजल बात का हो कलसे, मूर्तिपूजा करुइयन परमेश्वरह नाही, भूतन बलि चह्रैठ। ओ टुह्र भूतनसे हेलमेल करो कना म्वार चाहना नैहो।#व्य ३२:१७ 21टुह्र प्रभुक खोर्या ओ भूतन्हक खोर्या दुनुमसे पिय नैसेक्टो। टुह्र प्रभुक भ्वाज ओ भूतन्हक भ्वाज दुनुमसे खाइ नैसेक्टो? 22का हम्र प्रभुक रिस उठाइक लाग बाटी? का हम्र प्रभुसे बलगर बाटी?#व्य ३२:२१
सब कामद्वारा परमेश्वरक आदर करो
23कुई-कुई कठ, “सब चिज कर पाजैठा।” ठीक हो, तर सब चिजले भलाइ नैकरट्। “सब चिज कर पाजैठा,” तर सब चिजले फाइदा नैकरट्।#१ कोर ६:१२ 24हम्र आपन भलाइ नाहीँ, तर आनक भलाइ ख्वाजपर्ठा।
25टुह्र बजारमसे शिकार किन्क विवेकक् लाग कुछु फे सोधपुछ बिना कर्ल खाइसेक्ठो। 26काकरकि धर्मशास्त्रम लिखल बा, “पृथ्वी ओ उहिँम रहल सारा थोक परमप्रभुक हो।”#भज २४:१
27यदि कौनो विश्वास नैकरल मनैया टुँहन खाना खाए बलैल ओ टुँहन जैनास लागल कलसे जाओ। ओ टुँहन्हक आघ ढैदेहल खैना चिज विवेकक् लाग कुछु सोधपुछ बिना कर्ल खाओ। 28तर कुई “यी खाना त मूर्तिम चह्राइल हो” कहल कलसे, उ कहुइया मनैयक लाग ओ विवेकक् लाग जिन खाओ। 29मै टुन्हक विवेकक् लाग नाहीँ, तर उ और मनैयक विवेकक् लाग कनहुँ। टुह्र कहसेक्ठो, “आनक विवेकले म्वार स्वतन्त्रतह काजे सिमित बनैना? 30यदि मै परमेश्वरह धन्यवाद चह्राक खाइटुँ कलसे, धन्यवाद चह्राक खाइल बातम काजे और मनैया महीह दोष लगैना?”
31टुह्र खैनापिना ज्या कर्लसे फे परमेश्वरह महिमा देहक लाग करो। 32यहूदीहुँकन, या ग्रीकहुँकन, या परमेश्वरक मण्डलीह, किहुह फे बाधा देना काम जिन करो। 33म्वार करलअस करो। मै अपन्हेह खुशी पर्ना बात नाहीँ, तर सबजन मुक्ति पैहीँ कैक सब किसिमले सबजन्हक भलाइ खोज्ठुँ।
موجودہ انتخاب:
१ कोरिन्थी 10: thl
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2020, Wycliffe Bible Translators, Inc. All rights reserved.