PAMUNGKAAN 1
1
Barita ni panompaon ni sasude na adong
1Di mulana i ditompa Debata ma langit dohot tano. 2Nada marrumang dope sudena i jana mamolngit do pangalahona. Laut bidang na margalumbang na mangalingkup sasudena boti golap bulita, jana manggulot ma Tondi Ni Debata di ginjang ni aek i. 3Jadi mangkuling ma Debata, “Jadi ma na torang” gabe adong ma na torang. 4Denggan do na torang i diida Debata. Dung i disirang Debata ma na torang i sian na golap, 5jana digoar ma na torang i “Arian”, jana na golap i “Borngin”. Salpu ma borngin jana torang muse ma ari – i ma ari parjolo.
6-7Dung i mangkuling ma Debata, “Jadi ma awang-awang manyirang aek i gabe dua bope lalu manahan aek i di inganan na paasing-asing” – gabe jadi ma songon i. Songon i ma dibaen Debata mambaen awang-awang na manyirang aek na di toru ni awang-awang i sian aek na di ginjangna. 8Digoari Debata ma awang-awang i “Langit”. Salpu ma borngin, jana torang ma ari – i ma ari paduahon.
9Dung i mangkuling ma Debata, “Marpungu ma aek na di toru ni langit i tu sada inganan, lopus tarida tano i” gabe jadi ma songon i. 10Digoari Debata ma tano i “Darat”, jana parpunguan ni aek i digoari Ia ma “Laut”. Jana denggan ma sudena i diida Debata. 11Dung i mangkuling ma Debata, “Dipartubuhon tano ma sude ragam ni suan-suanan, i ma na marboni dohot na marbatu” – gabe tarjadi ma songon i. 12Songon i ma dipartubuhon tano i sudena ragam ni suan-suanan. Jana denggan ma sudena i diida Debata. 13Salpu ma borngin jana torang ma ari – i ma ari patoluhon.
14Dung i mangkuling ma Debata, “Jadi ma angka na torang idaon di langit i manyirang arian sian borngin bope laho patandahon pamungkaan ni ari, taon dohot ari pesta ni ugamo; 15marsinondang ma angka na torang i di langit laho manorangi tano” – gabe tarjadi ma songon i. 16Songon i ma ditompa Debata dua panyondang na godang, i ma mataniari na mangarajai arian, dohot bulan pangarajai ni borngin; laing ditompa Ia muse do dohot angka bintang. 17Dibaen Debata ma angka na torang i di langit laho manorangi tano, 18mangarajai arian dohot borngin, bope laho manyirang na torang sian na golap. Jana denggan do sudena i diida Debata. 19Salpu ma borngin jana torang ma ari – i ma ari paopatkon.
20Dung i mangkuling ma Debata, “Maringanan ma ragam-ragam ni angka na mangolu di aek i dohot angka unggas manggohi awang-awang i.” 21Songon i ma ditompa Debata angka binatang na godang-godang di laut, dohot sude ragam ni na mangolu di bagasan aek, bope sude ragam ni unggas. Jana denggan ma sudena i diida Debata. 22Dipasupasu Debata ma i sudena jana diparentahon Ia ma tu sude na mangolu di bagasan aek anso mamopari laho manggohi laut, jana tu angka unggas anso mur martamba bahat. 23Salpu ma borngin jana torang ma ari – i ma ari palimahon.
24Dung i mangkuling ma Debata, “Diparruarkon tano ma ragam ni angka binatang, i ma binatang na jinak dohot na riar, na godang dohot na menek,” gabe tarjadi ma songon i. 25Songon i ma panompa ni Debata di sasudena i jana denggan ma i diida Debata.
26Dung i mangkuling ma Debata, “Saonnari tompaonta ma jolma; songon Hita ma halahi jana suman tu Hita. Rajaan ni halahi ma angka ihan, unggas dohot sude binatang sanga pe na jinak bope na riar, na menek pe dohot na godang.” 27Songon i ma panompa ni Debata di jolma, jana dibaen Ia ma halahi suman tuSia sandiri. Halaklahi dohot dadaboru halahi dijadihon Debata. 28Dipasupasu Debata ma halahi, didok Ia ma, “Gabe ma hamu maranak marpahompu, lopus sude sisik ni tano on diingani jana dirajai pomparanmu. Hupasahat ma tu hamu mangurus angka ihan, unggas dohot sude binatang riar. 29Hupasahat ma tu hamu sude ragam ni na marbatu dohot sude ragam ni suan-suanan gabe panganonmunu; 30tapi anggo tu binatang na riar i sude dohot tu angka unggas Hupasahat ma ruput dohot angka na marbulung gabe panganonna” – gabe tarjadi ma songon i. 31Ditatap Debata ma sude na nitompaNia i jana sun ma dengganna sudena i diida Ia. Salpu ma borngin jana torang ma ari – i ma ari paonomkon.
موجودہ انتخاب:
PAMUNGKAAN 1: LAIAKB
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Indonesian Bible Society