Romános 5
5
Pininaquei irágu yoque uje Dupade, yocajéode cho sere ome ñane
1Uje Dupade e cho ayoré ujñapetáguiji yoque gu uje yichago yocanguretigai aja uté, enga quene jogadi tu uje Dupade, yocajéode cho sere ome ñane. Enga cuchade udojo jnese garani tu Yocangarádejnai Jesucrı́sto uté adode ome uyoque. 2Jesucrísto u to uje pésu ga guesája Dupade yui ome yoque gu uje yanguretágo. Uje uté chijna uyógaja Dupade ujetiga yimóngo icaniratiguéode ome uyoque. Enga jé u uje yoquijogate Dupade uté icaniratiguédatéi jmainie gatuaque iji deréjnane jnese.
Enga jé u uje yinı́nango yoque uje yanguretágo Dupade ingoningájnai yui jeta chingongarája yoque jne, enga a yoco yocajnéngu uté ingoningájnai to jne.
3Enga que gusu uje yinı́nango yógome Dupade ingoningájnai yui, mu yinı́nango yoque to ome yocajnéone petingaquéo uje chise yoque iji yoquijogadi udé erãpe. Uje yirajágo uje uajácho petingaquéode, mu uerate iborátajade ome yoque, uje chacate yoque ujetiga yidotágo yógome cucha dacadode iji erámi tudé.
4Enga ujetiga yidotágo yógome yocajnéone petingaquéo udore, enga yocanguretigai uté a pijógome dáringai ũré uje garani tu Dupade. Enga yocúringai pimeserãque jogadi jé u ome Dupade uté.
Enga ujetiga Dupade e chimesẽre yoque ga, a jé ca toc ujetiga potigayaquérique déji uyógome Dupade ingoningájnai yui ujetiga yoco yocajnéngu to jne.
5Yijorane uaque á, a jé ca yajéjome gotique jne uje yanguretágo Dupade ojningane cucha udore yúode. Yirajágo gu uje a ore jnese chise dáringane tocachucho jne. Chamáñaje Dupade chijnorapise yoque, enga e guẽrate Dajopié Espíritu Sánto ome yoque ujetiga chĩreta yocáyipiedie ome Dupade cutejmai ijnoraquédaté uté gatuaque.
6Enga pijoguipise Dupade isoca ueradi uté uje chingongara dajnoraquei aja yoque. Uacamóño uje que yoquisocárique cusipise ujetiga yiquetágo yógome. Mu Crísto di, ga toi ome yoque iji Dupade ajegaidi dire. ¡Chimo jóroque re, uje ate gajnareque uyóguiji Dupade iquei, mu jé Crísto toi ome yoque!
7Adójnacho iji erámi unirisórone yocujade uje uajadipise ujetiga piyaque gosi uje juégarása re ome dáringárique chuque iji uñeque jogadi. Uje gosi adode aréchorase gatuaque marínga, que ujórique ayoré pota tẽra re iji jnani uté charidi. Ja seca osõrataguipise jnani uñeque ome dojórigo ayoré ore, ga que pimo jeta uñeque cási ujetiga toi iji jnani osõratai uté charidi. Mu que urénga cucha dacadode udore tocade ome erámi unirisórone uyoque.
8Jé basa ga Dupade ijnoraquédatéi pijoguipise ome yoque. Uje sijnanguipise erámi unirisórone uyoque, mu jé Dupade utocaidi Crísto tẽra re ome yoque enga toi iji yoquiyaridi.
9Jecute uje Jesucrísto e chojne ome dayoi nanique ujetiga yico yocúringane ujñapetácho ome Dupade, ¡jétapũré uje Jesucrísto uté a chiqueta yógome Dupade ujuyaquédatéi to jne!
10Ajnusináño uje qué yugúcoji yocúringane Dupade guetésoño gai uje uté ujnacari Jesucrísto toi ome yoque. Mu uté adi uté chiborátaja uje Dupade e cho dajõráji yoque.
Jecute uje e pajesereringai déji Dupade, uyógome uñane gu Jesús itoringai uté, ¡jétapũré uje a yagutíyangome Jesús ome úringai ueca uté jne! Uje Jesucrísto uté e ecapóji datoringai quigade, enga pijoguipise uje a uté chiqueta yógome Dupade ujuyaquédatéi to jne.
11Mu que gusu uje piquetaque yoque jne ome Dupade ujuyaquei uté. Mu Dupade e pésu to ujetiga pininaquei irágupúsu yocajéode iji erámi tudé, uje e Dupade, yoco yoquijõráji ñane, enga gose Yocangarádejnai Jesucrísto cutejmai átegoningá ome yoque.
Jnani bajai Adán uté di pitoringai údi aja yoque gu isijnaringuei; jé basa ga Jesucrísto uté átegoningái di pucuecaringué eyúgojmai údi aja yoque
12Yirajágo uje pisijnaringuéone chise erámi ome jnani chojmarai, enga Adán u uté nanique. Enga uté isijnaringuéone chiborátaja pitoringai ome re. Mu que gusu ome uté, mu yocãrapi uté gajnei pitoringa uté chuságaja ájnape disi ejode uyoque jnese, uje cho ujetiga e yugúcoji uté ajei nanique. Jecute Adán uté angoninguite paritigade basája yoque, enga jé u uje yoco yocajnéngu pitoringai uté to ga gose yocúringane pisijnaringuéone ipesusóño.
13Jé iji Adán uté quigade jé aja deréjnane udore uje Dupade chisíome daru pirosobádode ome Moisés uté, mu pisijnaringuéone piéjna erámi. Jé ũré uje Dupade que doi ga chĩ́care daruode iyógaisoño aja erámi unirisórone ore iji dirode udore. Que chasingare ore adode aja daru pirosobádode quigode gu uje cáma purusãracho "ley" gotique. 14Mu jé ate iji Adán, Moisés ore ujai jnese uje pitoringai cho dajosipié ome ayoré ponáyone udore ore jnese nanique, que uñeque chapídome.
Adójnacho uje pitoringai uté que chedu re ome udore uje ore cho Adán ome uté angoninguite paritigade uje tagu dajnéone Dupade aquĩraquéo aja nanique. Mu pitoringai sué udore gáyode to uje que ore isocai cho Adán isocai gotique. Uje que ore adode chopise ñane marínga, jé ore cho dajnéngu Adán iríringui pisijnaringué jnese, enga ore toi ome, uje ore gãrapi jé u Adán uté jnese gu.
Cuchadatépise jnani bajai Adán adode, uje uté gajnui tu daquigaminóri jnani uté uje i tu Jesucrísto, ome adode úringane cuchadatéo.#5:14 Quĩrique Adán, Jesucrísto ore cunguésõri ñane gu uje jnani chojmara ore jnese, jé aja uje ore adode iborátajade cucha cuse ome ayoré ponáyone uyoque jnese iji erámi.
15Mu a yajico ore adode iji ñane jne, enga a pijoque uje ore adode iborátajade cucha cãrápísa re ome ñane. Chamáñaje jnani chojmarai uté angoninguite paritigai uté chiborátaja uje pitoringai guiyaque ayoré ponáyone ore jnese iji erámi, enga Adán u jnani uté. Jé basa ga jnani chojmarai átegoningái uté iborátajai tu uje Dupade cutejmai icaniratiguédaté jé chuságaja ayoré dipeséode uyoque iji erámi udé ome guẽrate bisidei uté. Enga Jesucrísto u jnani chojmarai uté.
¡Jecute ibijoi tu Jesucrísto ome dáringai cuchadaté, uje uté adode ujñapetáringai suépise Adán ate gajnarei uté gai!
16Adójnacho to uje Dupade guẽrate bisidei que cho jnani chojmarai uté isijnaringuei iborátajai cucha ome isocai gotique. Uje Adán uté quene pésu dasijnaringué chojmarai, enga jĩraque chise dáringai pujuyagaite ome dadi uté, enga jé chuságaja erámi unirisórone ore jnese, uje Dupade e chĩ́care pisijnaringuéone oré, ga oré tu pitoringai.
Jé basa ga jiépisi erámi unirisórone uyoque uje yipéco pisijnaringuéone iji Adán isijnaringuei uté quigade, mu Dupade e chingongara dacaniratiguédatéi aja yoque. Uje que yitiójo uté guẽrate bisidei uté marínga, Dupade chĩro yocúringane máracho, ga cho ayoré ujñapetáguiji yoque.
17Jé ũré uje ome jnani chojmarai isijnaringuei uté, ga pitoringai quene cho dajosipié ome ayoré ponáyone jnese. Uje chojmarápise Adán uté, mu uté iríringui cucha noñaque uté sué ore gáyode jnese. Ujetiga cuchadaté Adán uté isocai, ¡jétapũré jnani chojmarárique uñai uté isocai uje i tu Jesucrísto! Uje ome Jesucrísto adi uté ga pitoringai a jé ca chopo dajosipié ome uyoque rĩ, ga a yiquecágo iji deréjnane jnese ome yocúringane pujnuéngaisóño, enga a yoco yocajnéngu uté ingoningájnai to jne. Yojningane u uyoque uje yocajneque Dupade cutejmai icaniratiguédaté uté, jé aja yocúringai ujñapetaque. Uacamóño uje que yoquigaite oré yocúringai ujñapetaque uté, mu Dupade gueranome yoque bisideque gu Jesucrísto adode.
Páblo uté chajirápo Adán, Jesucrísto ore isocade iji ñane gaté rĩ, enga chujnungu jmare ore isocade udore iji de
18E cuchade udojo quigode pijoguipísome uyoque: Pisijnaringué chojmarai iborátajai tu uje Dupade ujuyaquei chise erámi unirisórone jnese. Jé basa ga adi jé u to uje pate ujñapetaque chojmarai pésu ga piotiguei e déji ome ayoré ponáyone jnese jetiga ore chise dáringáringo ujñapetácho jne. Enga jé chiborátaja pucuecaringué eyúgojmai ome ore jnese. 19Obiréjna uje jnani chojmara Adán, mu jnani chojmarai uté angoninguite paritigai pésu ga jiépisi pisijnaringuéone ipesusórone iji erámi tudé. Enga adi jé u to uje chojmara Jesucrísto uté, mu ome uté angoninguite guesáringai uje toi ome yoque, enga jiépisode u ore to uje Dupade a cho ayoré ujñapetáguiji ore to jne.
20Adójnacho uje jiei pisijnaringuéone iji erámi, enga quene Dupade pésu ga uru pirosobádode chise erámi ome Moisés urusarane cucha puyácho nanique. Mu Dupade gaidi u ome cucha puyade udore ujetiga erámi unirisórone chó gai enga a ore pijógome dáringane Dupade uruode piyógaisóño. Enga ore isocai jé upúsu uté uje jecucha ore chó uruode gai, enga ore ate gajnaréngone quérã, quérã gatuaque.
Mu uje pisijnaringuéone chichagu raja erámi jnese, mu jogadi jé u to uje Dupade cutejmai icaniratiguédatéi cho dabai ga chãraja pisijnaringuéone udore.
21Jecute e pijoque pisijnaringuéone, Dupade icaniratiguédatéi, ore isocade iji ñane: Ome pisijnaringuéone úringai ujopíerãque, jé tagúome pitoringai ujetiga sué erámi unirisórone yoquibáyode jnese.
Jé basa ga Dupade cutejmai icaniratiguédaté tu uje pijógome dáringai pujnuéngaisõripíse, uje suépise pisijnaringuéone gai. Obiréjna udojo gu uje Dupade cho ayoré ujñapetáguiji uyoque enga chorei yóguiji pucuecaringué eyúgojmai uté.
¡Enga cucha pagutíyabádode udojo jnese tocade ome yoque gu Yocangarádejnai Jesucrísto adode ome yoque!
موجودہ انتخاب:
Romános 5: Ayore
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2021 Ethnos360