Romános 3
3
Dupade uté úringai ũrepise jé jogate ome ichagájade darúo jnese
1Ja seca judı́ode uñeque chojningárasa: "Ujetiga jé ũré enga purása quedéjnane, judı́ode yoco ñane ome yocúringane pujuyagaite ome Dupade, enga ¿yocagutı́yamátique cucha ya? iji yocúringane judı́o. ¿Ama jé ca cuchárique tṍraji yocúringane picaque a?"
2Mu a yichajnárasi gosi uruode, ga yojningárasa: "Judı́ode yocagutı́yamánone cucha jiei arı̃a. Enga cuchiyi tu uje Dupade chisı́ome daru iyiejájnane ome yocayode jnani bajácho ore, uje ingoméone cucha déji udore.#3:2 Dupade gaidi tu ujetiga judı́ode ore suse Dupade urupı́sode udore guio, enga jé ca ore chijnángui udore. Mu que gusu uté, mu pota tagúome judı́ode ore to ujetiga erámi unirisórone jnese ore chiraja Jesucrı́sto ujnomé ueradi uté. ¡Urénga! ¡Cuchadaté Dupade uté isocai uté ome uyoque!"
3Mu ja seca judı́ogosode uñéngo chojningárasa ome uyu: "Mu que judı́ode uñane anguretigai cuse ome Dupade uté. Enga que udore ore dopı́si uté uruode quigode, uje chiese ore dorási quigode nanique mu. Uje que ũré ore, ¿mu ore úringane tácho udore chı̃rorase Dupade úringai ũré uté a? ¿Jé ca chimanirase dangoméone darúo aja guesi ome judı́ode uyoque a?"
4Mu yósi tome ore: "¡Que toque arı̃a ujetiga jé ca Dupade chimate daruode aja guesi! Dupade uté úringai ũrepise jé jogate ome ichagájade darúo jnese. Ujetiga taguirase ayoré ponáyone jnese iji erámi údode, mu pijoque uje Dupade ichagájade darúo que uñeque toja, mu jecucha tocade. Jnani bajai David chajo raja Dupade uruode úringane ũréo to iji darusarane Dupade urúo, uje chósi te:
'Jé bapijógome baruode udore úringane ũréo uje bãrarare. Uje uñane chajirirase badode aja quigode marı́nga, báringai ũré a choquı́pisiji guesi jne.'" #3:4 Jnani bajai David icatecãraitigade u udojo ome Dupade iji Sálmo 51:4, enga uruode udore qui tu uje jé ũré Dupade uje cho dajuñame David uté, uje David pésu pisijnaringuéone ome uté gu.
5Mu ome judı́ode uacuñane áyipie ayoredie quigode, ga chiese Dupade chisı́rase uacabáyode ome uacasijnaringuéone úringane pipesucho. Enga chorase ujetiga uacojnicho: "¿Cuchárique u gu a uje Dupade cho yoquiba yoquisijnaringuéone udore? Uje yocate gajnaréngone pésu ga quene Dupade úringai ujñapetaque choquı́pisiji guesi ome erámi unirisórone ore. ¡A ore pañaji uté úringai ujñapetaque enga a ore chisi uté gai arı̃a! Jecute a jé ca ujñapetaguirase Dupade ujetiga ujuyaquédatéi tocade ome judı́ode uyoque jne."
(Uje yatata ore áyipie quigode udojo ome uaque, mu que yáyipie quigode u gotique. Cachi erámi unirisórone áyuquetoringa.)
6Yujode judı́o uaque á, ¡que toc eti ca ujñapetaque Dupade! Yirajagopise uje Dupade a chajire erámi unirisórone ore adode aja quigode jnese jne ome dajiritı́ga uréone. Mu ujetiga ca ujñapetaguirase uté ujetiga chorase dajuñame judı́ode uyoque, enga ¿jé chorási ringome ujetiga chajirirase erámi unirisórone jnese ore adode aja quigode jne?
7Ja seca uñane botarirase yu ome yuruode udojo, ga uñeque chojningárasa: –Mu ujetiga yo yurupatáringa ome cuchárique, enga yurupatáringane udore chingongarárasa Dupade úringai ũrepise aja erámi unirisórone. A Dupade uté chisı́rase dáringai picotaque ome ayoré ponáyone ore jõ, enga ingoningájnai choquı́pisirásiji guesi arı̃a. Jé qui tu ujetiga uté chagutı́yame yurupatáringane udore. Jecute ¿cuchárique u gu a uje Dupade chı̃́care pisijnaringuéone ipesusõre aja yu ga chorase dajuyagaidi iji yu?–
8Mu yósi tome ua:
–Ujetiga báyipie quigode u udore, enga chorase ujetiga baroque uyógaja pisijnaringuéone úringane pipesucho gaté. Ome báyipie ditajidie udire ga chiese yocate gajnaréngone udore chiborátaja pate omone.–
Chiese yocacajnaquéode quigode jé u udé ome jutaréquechoquı́ode ore uje ore chijnime darade ome uyoque. ¡Mu que ũré ore ujutarétigade ome uyoque gotique! ¡Dupade a cho dajuñame ore jne, uje jé ore tiógarapı́sa dáringane pujuyagaite!
Pijoguipise uje que ayoré ujñapetátique cuse iji erámi
9Ome yuruode udojo jnese, ga ¿cho rique quigode á? ¿Ama quigode u a ujetiga Dupade urasade judı́o uyoque yujnuéngo purása quedéjnane ore gáyode ome yocúringáringo arécho? ¡Úngare, que quigode u gotique! Uje e yingongara aja uaque uje yoco ñane jnese iji Dupade edominone. Enga pisijnaringuéone cho darógode iji uyoque jnese. Ujetiga judı́o uyoque, jeoga purása quedéjna uyoque, mu jé yitiójo yocúringane pujuyagaite. 10Enga pijoguipise quigode udojo iji profétade ore ajnerámeone Dupade urúo nanique, uje chósi te:
–Que ayoré ujñapetátique cuse. ¡Que chojmarárique dépisi gotique!–#3:10 Quigode udojo iji Romános 3, versı́culode 10 - 12 ore tṍraji Sálmo 14:1-3 jé aja Sálmo 53:1-3
11–Que áyuquetotinguerã́tique cuse iji ore ujade, jeta uñeque chucué Dupade ome re.–
12–Mu ayoré ponáyone jé ore isoca jnese uje ore chicáji quedéjnane ome uté, ga ore chopise ñane jnese ome dáringane cucha bisidécho.
Que uñeque déji jeta pésu cucha arétique; ¡que chojmarárique dépisi gotique!–
13–Udore ore uruode uje tṍraji ore pusugúgode gajnui tu ayoré totique iji dode uje guesa ga uaté chusaque dejode iji jnumi; enga gusu ore aréode chetingare paringaquéode gatuaque ome darupatáringane.
Enga cho ujetiga venéno déji ore pijnanane, ga ore pijnanane jogotodie venéno jé chopise uga chagúode jogotodie venéno udire, uje ore tagu dojode ayoréo iji quedéjnane ome daru dosógode udore.– #3:13 Versículo udé quigode tṍraji Sálmo 5:9 jé aja Sálmo 140:3.
14–Cho ujetiga ore chı̃reta dabijnanone ome damangaqué gajnéone darúo, ujetiga ore cho darúja dojórique ayoré; ga ore uruode gajnui tupo cucha aguté iringonguéraque rı̃.– #3:14 Quigode udojo tṍraji Sálmo 10:7.
15–Ore cugujnáji detétigo dojo ayoré ujetiga ore chojne ome udore iyojna bisideque, ome dáringane tagu dejo.– #3:15 Versículo 15 udé quigode tṍraji Isaı́as 59:7 taningai.
16–Ore chajnangarase cuchade aja dajesúode gatuaque, ga cucha dacate gajnaréngone jecucha chise ore ujórique ayoré ome udore ore isocade.– #3:16 Quigode udojo tṍraji Isaı́as 59:7 eruei.
17–A ca ore chiraja pajesereringai quitique,#3:17 Versículo 17 quigode udojo tṍraji Isaı́as 59:8. enga jé u uje que pajesereringárique dépisiji ore ajénique ome dojórique ayoré ore.–
18–Ore etéquetı́ ore áyipieraque déji Dupade úringai pirosobate.– #3:18 Sálmo 36:1
19-20Yujode judı́o uaque á, pijoque uje yatatagode versı́culo ucode quisórone upúsu judı́ode uyoque. Chamáñaje versı́culode udore garani u Dupade uru pirosobádode, enga judı́ode uyoque u uje yoco yocajnéngu Moisés urusarane Dupade uru pirosobácho udore. Mu ¿cho rique judı́ode yoquisocai ome udore quigode a? ¿Ama yimáco udore aja guesi a? Úngare. Yibacóji yui arı̃a. Mu ujetiga jé ca yimécaco udore, uje Dupade cho darása iji uyoque, ¿enga purása uñane jnese chorási ringome ujetiga ore doi quigode? Que toguı́rasome ore to.
Uje obiréjna ome profétade ore urusarane uje que yocuñeque dopı́si Dupade uru pirosobádode udore quigode jnese gotique. Enga jé ũré uje que toc ujetiga uñeque chise dáringárique ujñapetaque ome Moisés urusarane Dupade uru pirosobácho udore. Que udore chiqueta yoque gotique, mu yocúringane pisijnaringuéone ipesusóño choqui guesi ome Moisés urusarane udore. Uje Dupade chisı́ome daru pirosobádode ome uyoque, enga gaidi tupúsu ujetiga erámi unirisórone yipijójome yocúringane máracho jnese iji uté edominone.
¡Jé ũré Dupade uje chı̃́care yocúringane pujuyagaite! Que toc ujetiga yotigáco yoquiba gajnéone cucha, enga a pujuruque yoquibijnanone jnese jne iji uté iquei.
Páblo chatata Dupade isoca ueradi uté uje cho ayoré ujñapetáguiji uyoque gu yocanguretigai iji uté
21Mu e Dupade isoca ueradi uté choqui guesi uje cho ayoré ujñapetáguiji uyoque. Enga isocai uté jé cãra rome Moisés urusarane cucha puyácho úringane pipesucho aja quigode.
Jé ũré enga jecucha Dupade áyipiedie cuse ujetiga pésu yocúringane pimeserãcho ome re. Enga udojo pijoque gu uje angúroméone proféta, jé aja Moisés e ore chatata cucha dacadode udojo iji piquéode nanique.
22Enga ore atatagode quigode u panguretigai ome Dupade utocaidi Jesucrı́sto ujeta gosi chise dáringárique ujñapetágome Dupade. Uje Dupade jé urúo udore gu enga pisocai chojmara ome erámi unirisórone jnese. Ujetiga judı́ode u, jeoga purása quedéjnane u, mu jé yoco ñane jnese iji uté edominone. 23Chamáñaje sijnaque yoque jnese gu. Enga que toque go Dupade ingoningájnai úringárique diquiyágome yoc.
24Mu Dupade cho ayoré ujñapetáguiji uyógome dacaniratiguédatéi, ¡enga guẽrate bisidei u! Uacamóño uje Dupade chı̃́care pisijnaringuéone oré, ga oré tu pitoringai. Jecute yocajneque pitoringai, uje yipéco pisijnaringuéone jnese ome uté. Mu Dupade chiroque datocaidi Crı́sto Jesús aja erámi ujetiga toji yoquiyaridi. Uje gaidi tu gu ujeta chirame yógome yocajnei pitoringa uté. Uje e Jesús chimate yocoré, enga que Dupade chucuepoi oréraque rı̃.
25Dupade jé ajéo ujetiga cho dẽrapáidi iji Jesús uté. Uje gaidi tu gu ujetiga ujnacari uté chojne ome dayoi iji curesei ome yoquisijnaringuéone úringane pı̃rocho. Enga yanguretágo Jesús uté adode ome yoque, enga jé jogadi tu uje Dupade doi ga chı̃ro yoquisijnaringuéone udore. Dupade pota gu ujetiga chingongara dasocai uté úringai ũré aja erámi unirisórone uyoque jnese. Enga uté úringai ũré e choqui guesi gu uje Jesucrı́sto chimate yocoré, enga quene pisocai déji ome uyoque ujetiga yico yocúringane ujñapetaque ome uté.
Mu uje Jesús cáma toi ome yoquisijnaringuéone nanique, enga cho ujetiga Dupade jé ca chidójnanga erámi unirisórone ore isijnaringuéone, uje que jı̃raque cho dajuñame ore. Jecute que uté úringai ũré pijógome pisijnaringuéone ipesusórone udore ore. 26Chamáñaje Dupade que jnátu cuchárique gu, enga chidota re ome udore ore adode jé aja uté ojningai dire. Gaidi tu gu ujetiga uté úringai ũré choqui guesi iji deréjnane udojo ome isocade ome Jesucrı́sto uté. Uje e Jesús toji yoquiyaridi, enga jé tiógara ujetiga Dupade uté cho ayoré ujñapetáguiji uyoque jnese gu uje yanguretágo Jesús uté adode ome uyoque.#3:26 Obiréjna uje que quigode u ujetiga Dupade gusu cho ayoré ujñapetáguiji udore iji deréjnane udojo, mu qui jé u udore to uje e ore changureta Dupade Júdebei Piquetangore Jesús yui ome re nanique rı̃.
Obiréjna uje que toque ujetiga uñeque chisi dabánique ome dáringárique ujñapetaque
27-28Uje Dupade cho ayoré ujñapetáguiji yoque gu dacaniratiguédatéi ome yoque, ¿ama yicorási ga yisı́gorase yoquibai a? ¡Úngare! ¡Íjnoque jogadi ome yoquijoyaquérique gotique! Uje que yoquipesudode cucha uñeque chiborátaja yocúringai ujñapetaque uté gu. Que tṍrapóji Moisés urusarane cucha puyácho úringane pipesucho aja quigode rı̃. Mu Dupade ı̃carai tupúsu panguretigai ujetiga chimesẽre yógome, enga gusu uté. Jecute a jé ca pimeraja Moisés urusarane úringane pipesucho gotique.
29Ja seca judı́ode uacuñéngo jos eti uacangaráño Dupade uté ome purása quedéjnane. Mu ¿jé ũré enga Dupade chedu judı́ode uágome dáringai Uacadupa ya? ¡Úngare! Obiréjna uje Dupapı́si u purása quedéjnane ore Udupade to. 30Uacarajáyo uje Dupa Chojmarai tu arı̃a. Enga Dupa Ugurui uté isocai chojmara ome erámi unirisórone jnese. Ujetiga judı́ode u, uje picaque ore, jeoga purása quedéjnane u, uje que picaque ore, mu gusu uje Dupade cho ayoré ujñapetáguiji gosi uje chedu chicha danguretigai aja Jesucrı́sto uté.
31Uje Dupade cho ayoré ujñapetáguiji yoque gu yocanguretigai iji Jesucrı́sto, mu ¿yoco ringome Moisés urusarane Dupade uru pirosobácho a? ¿Ama qui turásu ujetiga yı̃rongo udore a? ¡Úngare, que qui u! Pijoque ome Moisés urusarane uje que yimécaco Dupade uru pirosobádode udore quigode enga yocajneque pitoringai. Mu uje Jesús toi iji yoquiyaridi, enga jé u uje uté chimate yocajnei pitoringa oredie jnese. Jecute uje yanguretágo Jesucrı́sto adi uté ome uyoque, enga jé qui tu uje yajógo yógaja Dupade uru iyiejnane quigode udore uje purusãracho ome profétade, jé aja Moisés ore icaite.#3:31 ¡Que toc ujetiga yoco cucha bisidéguiji Moisés urusarane udore arı̃a! Jesucrı́sto dopı́si udore quigode ga gusu uté uje chimate udore aja guesi jnese. Jecute uje yanguretágo Jesucrı́sto adode ome yoque ga jé qui u to uje yoco cuchadatéji Moisés urusarane udore uje ore tṍraji Dupade gu.
موجودہ انتخاب:
Romános 3: Ayore
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2021 Ethnos360