Héchos 28
28
Yote quedéjnai ajã́ro uaté i tu Málta
1Uje e yico guesi jnese ome yocúringane ueca enga ayoréode ore chingo yoque uje yote quedéjnai ajã́ro i tu Málta. 2Yote quedéjnai ajã́ro unirisórone ore irasique yoque enga ore chosõripise yoque. Ore chiqueta pioguéjnai ome yoque ujetiga yoriago. Chamáñaje beque enga tejnupise. 3Enga Páblo doi pite togode to enga chadíja pioi. Mu ugai doi guesi tiji pidode uje todo pioi jũruachúringai enga catája Páblo jmanai. 4Uje yote quedéjnai ajã́ro unirisórone chimo uje ugai catája Páblo jmanai enga ore chojningame ñane:
–A ayoré yungore jnani uté jõ. Eca iji yote quedéjnai mu a quene isijnaringuéone chajni gai enga ugai a chequésãre jne.–
5Mu Páblo chimesẽre ugai aja pioi iji dajmanai. Enga que cuchárique chósi ti iji Páblo. 6Ore jnátu jnese ujetiga ugai potipídi guejna iji Páblo, jeoga toi ome. Mu uje iyajmaque uje ugai tagu Páblo enga que cuchárique chósi ti iji, jogadi u uje ore chécãre dajéode enga ore chojninga:
–A dupa jõ.–
7Yocoridi pioque idógosi iji máltagosode ore eduguéjnai gajnepídi erãpe. Enga ore eduguéjnai uté i tu Públio. Uté chijna yógaja daguíjnai enga yoquimochádode gadioque iji gari iji iguíjnai. Enga que chuseque yoque. 8Mu ejnarétaque yocupusiédi Públio dayé. Ducosi tagu enga chátaja pajei chagúi ome. Enga Páblo tibágui enga chisíji mochápi gai. Enga Páblo catecã́ri Dupade ome enga chicha dajmainie aja gai enga úringai ueca jé u. 9Uje ayoréode ore chimo uje Páblo chiqueta enga yote quedéjnai ajã́ro unirisórone ore chijna darása ejnaretade aja Páblo to jnese. Enga Páblo chiqueta ejnaretade ore jnese. 10Enga ore tẽrája yoque uje caniraque ore ome yoque. Uje e yicopome yote quedéjnai enga que cucha amínique cuse ujetiga ca ore chisi ome yoque ome dajei yui.
Páblo e díji Róma
11Uje yoquejnane guedosío gadioque iji yote quedéjnai ajã́ro enga e yicopome cucoi. Yoquibi cuco cuchábi garani u ore idáidatéi Alejandría ica mu chejna esoi tiji yote quedéjnai ajã́ro Málta. Ayoré gajnúone gare iji cucoi uté iquei uje ore íode u Cástor, Pólux ore. 12Yico ga yico ore idai iji yote quedéjnai edógai uje i tu Siracúsa. Enga yoquimochádode gadióguiji uté. 13Yicoji uté enga yaroco yógaja yote quedéjnai edógai. Enga jé yusájoja ore idai uje i tu Régio. Dire uñai enga emami di ga tṍraji umusoi garani. Yico enga dire uñai enga yico ore idai uje i tu Puteóli. 14Yico yocujode Jesús anguretasóño iji uté, enga ore irasique yoque. Jecute ore chaquĩ́ra yoque enga yoquimochátigo gare iji ti iji ore gari. Quigade enga yicome ore idáidatéi Róma yui. 15Yocujode Jesús anguretasóño iji Róma ore chudute yocujnomei. Jecute ore chachai yoque. Enga yico ñane iji jogadi uje i tu Fóro de Ápio; jec iji ore idai Las Tres Tabérnas rĩ. Uje Páblo chimo ore enga chacãre Dupade gai ome ore enga tijode cho jnángome. 16Uje yico Róma enga soldádode eduguéjnai chisi ome darodigode pujurúgayo ome pujurúgayode irodisórone eduguéjnai uté. Mu ore cãra Páblo qui ome ujode pujurúgayo. Enga ore juéga ujetiga Páblo chucué daguíjnarique. Mu jé soldádi chojmarai cháji gari ujetiga chirote.
Páblo chatata Dupade uruode iji Róma
17Dirode gadióguiji diringai yui enga Páblo tibidi judíode ore eduguéjna ibijógode uje ore idai jé u Róma to. Uje e ore chamáta rágaja enga Páblo chojninga:
–Yujode judío uaque á, que yurúrique gajnaréngaja judíode múñi. Que yetágapo yocayode jnani bajácho adode rĩ. Mu jé ore chigaru yu iji Jerusalén enga ore chisi yu ome rómagosode. 18Uje rómagosode ore catecã́ri yu enga que ore chise detépitíguiji yu enga ore chirarásome yu uje que ore chiraja yibárique ujetiga chuque yu. 19Mu yujode judío ore chetaque. Jecute yingome ore ujetiga rómagosode ore eduguéjna cuchábi chajire yadode aja quigode. Mu que yetaque yurasade judío uñeque atique gotique, enga que yajéode u gotique ujetiga yaguhéta ore gai gotique to iji udé. 20Mu yibidi uaque gu ujetiga yĩrarare yibai iji uacaquei. Uacamóño uje ore jurúgai yu enga ore chigaru yu ome ojnaquérodie udaji. Mu que yipésu cucha gajnarétique gotique. Gusu uje yangureta israélgosode yoquijnati Crísto to enga yibai u uté ome yetesórone judío ica uje ore chisa yu.–
21Enga udore ore chojningame Páblo:
–Que yudúco bajnomérique to ome yocajnetígo purusãracho uje yoquijorane iji Judéa ore churúsãre ome yoque. Yocujode judío díode que ore ojñáringo gajnaréngome ua rĩ. 22Mu a yangácobí bojñáringo ome banguretarétigade udore. Uje yudúco to uje ayoréode ore iji erámi jnese ore chetaque pacajnaqué ichade udore.–
23Enga jé u uje ore chimate diri ujetiga Páblo chacate ore iji. Jecute chise gojni diri uté enga ayoréode ore chamáta ñane aja Páblo charidi guiguíjna enga jiei ore. Enga Páblo chacate ore iji durasé ga chuságaja guedéjnoringái. Enga chingo isocai ome ore ujetiga ore chise dáringáringo purása ome Dupade to ujeta Dupade u ore asuté to. Enga angúroméone u Moisés urusarane, jé aja Dupade uruode atatasórone ore urusarane to rĩ uje chatata judíode ore ijnati Crísto adode. Gaidi u gu ujetiga chimate ore aja panguretigai ome Jesús, uje judíode ore ijnati Crísto u. 24Uñane ore chimesẽre Páblo acajnaquéode mu uñane que ore changureta go. 25Jé u uje ore botaripise ñane. Uje e uásejna ore ibotaquéode enga jogadi u uje que ore chisápo ñane unétique rĩ, enga ore cho jmíti, jmíti ome ñane. Mu uje cáma ore jnopise enga Páblo chojningame ore:
–Jé ũrepise Dupade Ujopié Espíritu Sánto uruode ome yocayode jnani bajácho uje angúromei u Dupade uruode atatasṍri Isaías nanique. Uje chojninga:
26Bo, ga ango yuruode aja barasade judío ore. Ojninga:
A adúcho yuruode jne marínga, a ca arajáyo quigode jne.
A amóñopo yu jne rĩ mu a ca arajáyo yúringai cuchape jne.
27Chamáñaje angoninguite pariguipise israélgosode udore ore gu.
Enga que ore tangári yu.
Cho jetiga ca ore edóraque cuse.
Chamáñaje ore gaidi u ujetiga ca ore chimo.
Enga ore gaidi upo rĩ ujetiga ca ore chudute cuchárique.
Que ore pota gu ujetiga ore chiraja.
Que ore pota rĩ ujetiga ore chajni yibai enga yiqueta ore.
28Adójningachó gajneri uje Dupade a chingo dáringai piquetangore ome purása quedéjnane iji erámone jnese uje que judío ore gotique. Enga a ore tangári jne.–
29Uje Páblo urúo udojo enga judíode ore jno. Enga ore botaripise ñane ome Páblo acajnaquéode udore.
30Páblo guejnanie sequeré gare iji dapari guiguíjna iji Róma uje cho oré ome. Enga nína dabaguiésórone jnese uje ore tibágui iji apari guiguíjna uté. 31Enga Páblo jno dacajnaquéode údi ome ayoréode gatuaque, gatuaque enga que pijocayagome acajnaquéode udore gotique. Jecute chingo isocai ome ore ujetiga ore chise dáringáringo purása ome Dupade ujetiga Dupade u ore asuté to. Enga chacadápo ore rĩ ome Yocangarádejnai Jesucrísto adode.
موجودہ انتخاب:
Héchos 28: Ayore
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2021 Ethnos360