Héchos 19
19
Páblo chise Éfeso to rĩ
1Uje Apólos qué déji Corínto enga Páblo chicáji guidáyode aja Éfeso yui uje ore déji cucaranone edodie. Uje díji Éfeso ga chise pacadigode uñane iji. 2Páblo catecã́ri ore enga chojninga:
–¿Ga Dupade Ujopié Espíritu Sánto base uacabai to a uje uacanguretáyo?–
Mu ore chojninga:
–Úngare. Que yudúco Espíritu Sánto gotique ujnomérique to.–
3Jecute Páblo jno dacatecãraitigade údi ome ore enga chojninga:
–Uje ore tṍra uágaja yodi ica enga ¿uacanguretígo cucha cho rique a?– Enga ore chojninga:
–Yanguretágo Juan casicaite acajnaquéode ica uje ore tṍra yógaja yodi ome bautísmo.–
4Jecute Páblo chojninga:
–Juan tṍra ore aja yodi nanique uje ore chécãre dáyipie quigode, dadode ore ome Dupade. Mu chacadápo ore rĩ ome Dupade utocaidi uñeque uje a di jne iji Juan quigade ujetiga ore changureta uté jne. Enga ojningai u Jesús, judíode ore ijnati Crísto.–
5Uje ore chudute Páblo acajnaquéode udore enga ore changureta Jesús to. Enga jé u uje ore tṍra ore aja yodi gu ore anguretigai iji yocangarádejnai Jesús. 6Enga Páblo chicha dajmainie aja ore ójodie enga jĩrique Dupade Ujopié Espíritu Sánto base ore gai. Enga ore chiraja dara quedéjnane enga ore chacate darasade ome dajnéone Dupade urúo to. 7Gare jnanione iji yirídai uje ore changureta Jesús iji deréjnai uté.
8Páblo guejnane guedosío gadioque iji uté enga chacate ore iji judíode aquiningamei guiguíjna gatuaque. Enga que chagutu rome dacajnaquéode gotique. Chingopísa quigode ome ore ujetiga ore chise dáringáringo Dupade urása to. 9Mu angoronéparíque uñane enga que ore changureta Jesús to go ome Páblo acajnaquéode. Enga ore chujñieta Jesús adode iji dojode judío ujade. Jecute Páblo jnoji ore ajei enga chiroque Jesús anguretasórone aja daquigade enga ore chicáji escúela iji sinagóga uje ore acadisṍri i tu Tiránno. Enga Páblo chacate ore ome Dupade uruode iji uté iji dirode jnese. 10Sequeredie gare uje Páblo jé ate uje chacate ore. Jecute Ásia unirisórone jnese, judíode jé aja purása quedéjnane rĩ, ore chudute yocangarádejnai Jesús ujnomei. 11Enga Dupade pésu dapesútedatéode iji ore ujade nanique uje angúromei u Páblo. 12Enga ayoréode ore chijna borapetígo, piguidérigui ore aja Páblo ujetiga chisa enga jé u uje ejnaretade chisa enga ore eca ome. Jé basa Satanás utocaidode píode ore chisa udore to enga jĩrique Satanás utocaidode doi guesi iji ore.
13Diga judíode uñane uje disorángueméque ore, ore ijnimique Satanás utocaidode iji píode to. Enga ore pota ore chiradírase Páblo aja adode to. Jecute ore chĩ́care Jesús i to uje ore chijnime Satanás utocaidode iji píode. Diga ore chojningame Satanás utocaidode uñai:
–Yirójo ua aja guesi ome pangarádejnai Jesús ujopié uje Páblo chacate yógome.
14Jnacare gare iji tíode udore uje ore ipesute udore ore dai i u Escéva. Enga sacerdóteode eduguéjnane uñai u. 15Mu uje jnacarode udore catecã́ri Satanás utocaidi tiji pi ajei mu Satanás utocaidi uté chojninga:
–Yiraja Jesús. Yirajápo Páblo rĩ. ¿Mu jé uaque gosode?–
16Enga jé u uje Satanás utocaidi pi uté cugujnáji ore enga chijna detotiguei aja ore. Enga sué ore gai. Ájningaránguipíse ome ore enga chujé ore údode. Jecute jnacarode udore ore chayopísome enga jĩrique ore doi guesi iji guiguíjnai. Mu choquíbi ore aja dagajñunie enga ajnangoque ore rĩ. 17Éfesogosode jnese ore chudute udojo ujnomei to, judíode jé aja purása quedéjnane ore to rĩ. Enga ore todópisa enga ore tujua yocangarádejnai Jesús i aja quedéjnane uje cuchadaté Jesús uté ujopié.
18Jiei Jesús anguretasórone to iji ore ujade uje ore pógu date gajnareque bajade, mu e ore chatatame ore. 19Jé basa Jesús anguretasórone uñane ore chijna Satanás ujopié ome dapesudode uje cáma ore changureta Jesús. Mu ore yugode darujna ao qué déji ore uje chatata pujopié gajnarénguenie udire isocade. Jecute ore doi degode darujna ao udore enga ore chipotame iji ayorébui ajei. Enga jiei darujna aode udore oredie marínga jé ore chipotame. Uje udore oredie chise 50.000 iji pláta guebéode. 20Cuchade udore ujnoméone chubu erámi enga que ore chopo cucha bisidéguiji Dupade uruode. Enga uásejna ore uje ore changureta yocangarádejnai Jesús ome ore atatagode Dupade urúo.
21Udojo quigade enga Páblo pésu dajéode ujetiga qué tibágui Jesús anguretasórone iji ore unirone Macedónia, Acáya ore. Enga chojninga:
–A yicáji Jerusalén to jne enga ujetiga yejna Jerusalén guesi enga Dupade ajéode u ujetiga yicapóji Róma rĩ.–
22Mu Páblo que jno míraque. Mu chutṍri dajõra gáreode aja Macedónia bajaque. Enga utocaidode udore u Timotéo, Erásto ore. Mu Páblo qué chácariji Ásia unirisórone ore gari.
Demétrio ijnimique pocaningai ome Páblo ore
23Ayoréode uñane ore chetaguipise Jesús adode iji Éfeso iji dirode udojo. 24Chamáñaje jnani déji Éfeso uje i u Demétrio enga uté ijnimique pájningai ome Páblo ore. Jnani uté, jorane jnanío ore pésu dangarané Diána iguíjna cuchábi oredie. Enga pláta ore ipesudode udore jecute jiei oredie uje ore tẽrame ayoréode. 25Enga Demétrio uté doi enga chamáta darógode, jé aja dojode ayoré gajnúone ipesungóño enga chojningame ore:
–Uacamóño uje yoquiplátadie garani u yoquipesudode ayoré gajnúo. Enga yiquecágo gu udore oredie enga que cuchárique chona yoque gu uje jecucha ayoréode doi oredie ome yoquipesudode. 26Ise ga e uacamóño jnani to uje i tu Páblo, jeoga e uacadúcho uté ujnomei. Uje uté chacate ayoréode aja dajesúode uje cucha bisidécho ayoré gajnúone uje pipesute ome jnanione. Enga chiese ca cuchárique tṍraji panguretigai ome udore uje yicatecãcoi ore. Uásejnapise ore uje ore changureta uté acajnaquéode. Que gusu iji yoquidai Éfeso udé mu jé u to iji yocuniri Ásia údode. 27Yo yáyugu ujetiga diga ayoréode ore cha ore doi oredie ome yoquipesudode gu uté acajnaquéode. Mu que gusu udore go mu yopo yáyugu rĩ ujetiga yocangarané cuchabé Diána iguíjnai ujnomei ca cusapo rĩ. Uacamóño uje yicotágo yocangarané uaté iji yocuniri Ásia. Jé cho ayoréode uñane iji erámi údode to rĩ. Picota opejã uaté to ome ore jnese. Enga gajnarenguipise ujetiga ayoréode ore tangári Páblo uté enga ore cha changureta Diána úringa cuchadaté.–
28Uje ore chudute udojo enga ájningaránguipíse ore. Jecute ore chinguíra dabijnanone aja dejode enga ore chojninga:
–¡Pujnuéngaitó éfesogosode yocangarané dupa Diána!–
29Enga guidai idaisórone ore chirate ore aja ore ájningai. Jecute ore chisa macedóniagosode Gáyo, Aristárco ore. Páblo jorane u jnani gáreode udore aja dajesúode erámio. Mu e ore chisa ore enga ore jno ore údi aja guiguíjnai uje jecucha guidai idaisórone ore taquiríji. 30Páblo pota jeta chacája ore gari to ujetiga catecã́ri ayoréode. Mu ujode Jesús anguretasóño ore charángome. 31Jé cho Ásia unirisórone ore asutedie uñanie uje ore jõrapise Páblo. Ore chiroque daruode aja Páblo to ujetiga ca chacája ayorébui ore uague. 32Mu ayorébui chinguíra dabijnanone aja dejode iji ore uague uaté enga ore pijnane chacája ñane. Enga jiei ayoréode uñane uje que ore chiraja uague uaté gajnesónique cucha gotique. 33Mu judíode uñane uje ore déji ore uague uaté to ore chutṍri Alejándro ujetiga catecã́ri ayorébui. Enga ore chucuase aja ayorébui uague ajei yui. Jé u uje Alejándro chãrai dajmanai tiji ore ujetiga ore cho paraque. Ajéode u gu ujetiga cho quique cuchade. 34Mu uje ayorébui chimo uje judío Alejándro enga ore tibite gaté. Enga diyajmanguipise ore ome dabijnacaraidie enga ore chojninga:
–¡Pujnuéngaitó éfesogosode yocangarané dupa Diána!–
35Udojo quigade ga guidai idaisórone adode urusãrasṍri chaquĩ́ra ore ome ore pijnacaraidie ujetiga ore cho parac enga chojninga:
–Éfesogosode uaque á, ore chiraja iji erámi údode jnese uje éfesogosode yocajnei tu ujetiga yujuco yocangarané dupa Diána iguíjnai guio. Chamáñaje uaté oré ayoré gajnu base yoquibai nanique iji gaté. Jecute yujucópise uaté guio to. 36Uacamóño uje que potigayaque uyógome udore. Jecute ayáyo uacájningai enga ca apéso cuchárique ujetiga cáma ajichopise cucha dacadode aja quigode. 37Uacamóño uje jnanione udore uje uacabeyoi ore údi aja de que ore toria cucháriguiji yocangarané dupa Diána iguíjnai gotique, enga que ore urúrigo gajnaréngapo aja rĩ. 38Ujetiga Demétrio, ujode ayoré gajnúone ipesungóño ore chetaque uñeque atígo, yocasutedie cuse gu cucha dacadode udore. Omi tu ujetiga ore chijna uté gosi aja dacasutedie gari enga ore chingo detétigade aja ore. Diga ore etei uté narare dabai to. 39Que yimo ujetiga apótayo acatecãchoi ñane gaté ome cuchárique mu omi tu ujetiga beyoi yocasutedie áyipiedie ome udore ujetiga diga amátayopo ñane rĩ. 40Yocajnúone u ayoré sijnángone uje ore tagu deduguéjnane uruode aja. Chamáñaje yoquichorájna que enga yoquibijnane chacája ñane iji udé. Enga a ca yirajagórase yocuru quitígome yocadode udore ujetiga uñeque catecãrirási yógome.
41Uje guidai idaisórone adode urusãrasṍri uté chejna daruode udore guesi enga jé u uje ore cha dague enga ore chajni aja daguíjnane.
موجودہ انتخاب:
Héchos 19: Ayore
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2021 Ethnos360