Rm 9
9
Bə̂d mbe nɨ Ŋwìə̀ chɔʼɔ
1Mə wɨə ghà rəsìʼ ɨchî nɨ mə yeʼ ənɨ ɨfɔtɨ mbɨ Kristo. Chəi mɨə ghàə̀ mɨghab. Əzwî ə Zeŋɨ ze nɨ yeʼ ɨŋga mɨ fîŋ ə fə ghɨ̀ mə kyerɨ ni chəi mɨə ghàə̀ mɨghab. 2Ə̀kə̀nɨ̀ mbɨ ə ŋgəʼ nɨ chəi ɨnwǐ fə swi ɨŋga mɨ fîŋ. 3Mə nyaʼa kàŋ kə̀b ni njɨ Ŋwìə̀ zɨ ndɔ̀n ɨgwɨ num, sob əmɨ tɨ ənɨ ɨfɔtɨ we nɨ mə berɨ mbɨ Kristo ɨmbə̀ʼ ətu mbɨ bɔŋgɔb mbe nɨ tɨ̀ fɔtɨ ɨnəbɨ. 4Mbɨ yɨ mɨ̀Izre. Ŋwìə̀ nyaʼa fə nɨŋ mɨ̀mə̌d ənɨ mbi bɔn, əne ghɨ̀ mbɨ zə ɨzeŋɨ zeŋɨ. Wɨ̀ nyaʼa san tɨso mbɨ mɨ̀mə̌d, nàʼ rɨkə əmbɨ mɨ̀mə̌d, ghɨ̀ mbɨ wumnɨ əməd bə̀ kàʼ ɨnû nɔnɔʼ əmbɨ mɨ̀mə̌d. 5Mbɨ yɨə bɔn tɨ ənɨ əghaŋ mɨ̀mbǎʼ ɨnəbɨ mɨ̀Izre. Wə̀d we nɨ Ŋwìə̀ zɔʼɔ ə jwɨ̀ rɨŋga ɨnəbɨ we. Məd yɨə Ŋwìə̀ we nɨə tùmbɨ̀ ɨghɨjìm. Tɨ̀ yiirɨ ə Ŋwiə̀ koŋ. #9.5Mbɨ ŋwaʼnɨ ɨŋga ɨ̀ŋwàʼnɨ̀ ənun mɔʼɔ ni, “Ŋwìə̀ wɨə tùmbɨ̀ə̀ ɨghɨjìm. Tɨ̀ yiirɨ əməd koŋ.” À yɨ əne.
6Kaʼi ɨghabɨ ni ɨŋgam Ŋwiə̀ nyaʼa chè ətu ə̀kǒ. Əne mbə̀ kyerɨ ni ka mɨ̀Izre mɨ̀jìm yɨ ə bə̂d Ŋwiə̀. 7Ka bɔn mɨjìm tɨ ənɨ əghaŋ ə Abràham yɨ ə bɔn Ŋwiə̀. Ŋwìə̀ nyaʼa ghà əmbɨ Abràham ni, “À yɨ ənjìm ə Aizìk nɨ à bɨrɨ berɨ bɔn mbe nɨ mə̀ kaʼ ɨ ne.” 8Əzɔ̂ ə chwi ni kaʼi bɔn mɨjìm tɨ ənɨ əghaŋ ə Abràham nɨ yeʼ bɔn Ŋwiə̀. À yɨə bɔn mbe nɨ Ŋwìə̀ kaʼ ənû əmbɨ mɨ̀mə̌d yeʼ bɔn tɨ ənɨ əghaŋ ə Abràham. 9Ənû ze nɨ Ŋwìə̀ nyaʼa kaʼi yɨ ni, “Ənɨ ə nyùmə̀ wɔ̂ əghəm əwu, mə bɨrɨ wɨrɨ yeʼe, əne Sèra bɨrɨ gywɨ wan mbaŋə̀.” 10Kaʼi əjìm əze. Ənû ɨghabɨ əzɔ̂ ə nyaʼa bə̀ ghɨ̀ ənɨ ə Rèbekà ənɨ wɨ̀ nyaʼa bɔŋ ɨbum gywɨ mɨ̀ŋwìə̀ mbɨ ɨnom mɔʼ. Ɨnom we yɨə Aizìk nɨ yeʼ a mbǎʼ kyeŋ rəŋwe. 11Àyɨə bɔŋ Rèbekà nyaʼa sɨə gywɨ mɨ̀mə̌d, kɨ̀ bɔŋ bɔn mbe nyaʼa sɨə ghɨ̀ ənû ə chɔ̀m kɨ̀ ənû rɨbɔ̀ŋ, (əne yɨ ɨmbə̀ʼ ənû ze nɨ Ŋwìə̀ ə chɔʼɔ mbi bə̂d ə wo ɨmbì 12kaʼi ɨmbə̀ʼ ɨnû mɔʼɔ mbe nɨ mbɨ nyaʼa ghɨ̌, à yɨ ɨmbə̀ʼ ɨchî nɨ Ŋwìə̀ nyaʼa tɔŋ mɨ̀mə̌d), Ŋwìə̀ nyaʼa ghà ɨ bɔ ni, “Wɨ kyeŋ bɨrɨ fàʼ əmbɨ wɨ kwa.” 13Ə zɨ ɨŋga Ə̀ŋwàʼnɨ̀ ə Ŋwiə̀ ni, “Mə nyaʼa ghaʼ ə Jakɔ̂b, àyɨə mə nyaʼa bàn ə Esaò.”
14Əne tɨ̀ kɨə wo gha ni yè ə? Ni Ŋwìə̀ wɨə ghɨ̀ ɨnû nɨ chəi mbɨ kùʼnɨ̀ ə? Chə̂! 15Wɨ̀ nyaʼa ghà əmbɨ Mose ni,
“Mə bɨrɨ diirɨ wə̀d we nɨ mə ghaʼ nɨ dììrɨ̀,
bə̀ kə̀n ənɨ we nɨ mə ghaʼ nɨ kə̀n ənɨ məd.”
16Əne yɨ ni, ka Ŋwìə̀ wɨə dììrɨ̀ i bə̂d ɨchî nɨ bə̂d mɨ̀sɔŋɨchù kəbɨ, kɨ ɨmbə̀ʼ ɨnû mɔʼɔ mbe nɨ mbɨə ghɨ̀ə̀. Ŋwìə̀ wɨə dììrɨ̀ə̀ bə̂d ɨchî nɨ wɨ̀ ghaʼi. 17Ə zɨ ɨŋga Ə̀ŋwàʼnɨ̀ ə Ŋwiə̀ ni Ŋwìə̀ nyaʼa ghà əmbɨ Ferò ni, “Mə nyaʼa nùŋ əwe ənɨ ɨfɔ̀n ɨmbə̀ʼ nɨŋ əwe chwi mɨ ɨka. Əze ə bɨrɨ ghɨ ni bə̂d gha ənû ɨmbə̀ʼ əmɨ ɨŋga ɨsɨg jìm.” 18Əne məd wɨə dììrɨ̀ə̀ wə̀d we nɨ wɨ̀ kə̀b nɨ dììrɨ̀. Ɨ wɨə bə̀ tuurɨə fîŋ wə̀d we nɨ wɨ̀ kə̀b nɨ tuurɨ fîŋ məd.
Ŋwìə̀ wɨə sə ɨtəm bə̀ dììrɨ̀ə̀ bə̂d
19Mbə bɨrɨ biirɨ ɨ num ni, “Ŋwìə̀ kɨə kɨrɨ zɨ əzɨ ə bə̂d ɨmbə̀ʼ ə yè ə? À kɨə we nɨ tɨ̀ wɨ̀ ton ənû ze nɨ Ŋwìə̀ kə̀b ə?” 20Àwɔ̀ wə̀d mɨ̀sɔŋɨchù kɨə kaŋ əwe nɨ bɨrɨ wiirɨ ɨŋgam əmbɨ ə Ŋwiə̀ ə? Tɨ̀ əghɨ ze nɨ mbɨ bɔmɨ wɨrɨ ghà əmbɨ ə wə̀d we nɨ bɔm əməd ni, “À bɔm əmɨ əni ɨmbə̀ʼ ə yè ə?” 21Chəi əbɔm rɨkyiŋ wa berɨ ɨka ɨgun əbɔm ə, ɨ nɨŋ mbə̀ʼ əbɔmɨ fibɨ̀ bɔm tɨkyiŋ rɨbe əŋgu, fɨ fibɨ̀ ənɨ əni ənû, fɨ fibɨ̀ ɨ zɨ ɨghɨ ɨŋga əbəŋ əbəŋ ə?
22Ŋwìə̀ nyaʼa kə̀b chwi i ɨsə ɨtəm bə̀ ghɨ̀ ni bə̂d kyerɨ ɨka məd. Àyɨə wɨ̀ nyaʼa kaŋ yim fîŋ mbɨ ə bə̂d mbe nɨ nyaʼa ghɨ ni wɨ̀ sə ɨtəm. Bə̂d mbe nɨ nyaʼa ghɨ ni wɨ̀ sə ɨtəm yɨ mbe nɨ nyaʼa berɨ kwɨ. 23Wɨ̀ nyaʼa bə̀ kə̀b chwi i mbɔ̂n ze nɨ chəi zɨ̀ bɨrɨ nɔ mì, nɨ yeʼ mbɔ̂n ze nɨ wɨ̀ chwɨ ɨgwɨ ə bə̂d mbe nɨ wɨə dììrɨ̀ə̀. Bə̂d mbe nɨ wɨə dììrɨ̀ə̀ yɨ mbe nɨ wɨ̀ nyaʼa fə tekɨ ni mbɨ chub ɨŋga ɨwumnɨ məd. 24Tɨ̀ yɨə bə̂d mbe nɨ wɨ̀ nyaʼa tɔŋ ənɨ mbi. Chəi wɨ̀ nyaʼa tɔŋ əwa àmei rəkaʼ mɨ̀Jû. Wɨ̀ nyaʼa bə̀ tɔŋ rəkaʼ bə̂d mbe nɨ kaʼi mɨ̀Jû.
25Wɨ̀ nyaʼa fə ghà ɨŋga Ə̀ŋwàʼnɨ̀ ze nɨ wə̀d ɨ̀kə̀n Hosià nyaʼa ŋwaʼnɨ ni,
“Bə̂d mbe nɨ ka mɨ̀mə̌d yɨə nyaʼa ə mbɨ bə̂d,
mə bɨrɨ tɔŋ ənɨ 'Mbɨ bə̂d.'
Mbe nɨ chəi mə̀ nyaʼa ghaʼi,
mə bɨrɨ tɔŋ ənɨ 'Bə̂d nɨ mə̀ ghaʼi kwàʼ rɨŋgəʼ.'
26Ɨŋga əsɨ ze nɨ mbɨ nyaʼa gha əmbɨ mɨ̀mə̌d ni, 'Ka mbə yɨ ə mbɨ bə̂d,'
mbɨ bɨrɨ tɔŋ mɨ̀mə̌d ənɨ ə 'Bɔn Ŋwiə̀ we nɨ yeʼ ɨkǎ.'”
27Aizayà nyaʼa zə̀ʼ ɨmbə̀ʼ ə Izre ghà ni, “Ka à bè yeʼi ni ɨnun mɨ̀Izre yɨ ɨghabɨ rɨsi əŋgo rɨ̀bàà, àmei mbe nɨ buʼu bɨrɨ jwɨ̀ rəŋgəʼ, 28ɨmbə̀ʼ ɨghəm nɨ Ə̀nùŋɨ̀sɨg bɨrɨ zambɨ sob mɨsaʼi bə̂d rɨ ɨgwɨ ə si fən ɨghəm mɔʼ. 29Aizayà nyaʼa bè ghà ni,
À mɨ yeʼ nɨ chəi Ə̀nùŋɨ̀sɨg
nyaʼa nuŋ bɔn ɨ na,
njɨ wɨ̀ nyaʼa fə nimnɨ əwa màànɨ̀,
ɨchî nɨ wɨ̀ nyaʼa nimnɨ ə Sodòm mbɨ Gòmorà.”
Pɔ̂l nyaʼa kɔŋgɨ ə Ŋwiə̀ ɨgwɨ mɨ̀Izre
30Tɨ̀ kɨə wo gha ni yè? Tɨ̀ bɨrɨ gha ni bə̂d mbe nɨ kaʼi mɨ̀Jû, nɨ chəi mbɨ nyaʼə kə̀b ənû nɨ təm kùʼnɨ̀, fə təm kùʼnɨ̀ ənjìm ɨbenɨ. 31Àyɨə chəi mɨ̀Izre nɨ nyaʼə kə̀bə̀ ni mbə̀ təm kùʼnɨ̀ ənjìm rɨkə nyaʼa təm kùʼnɨ̀, ɨmbə̀ʼ ɨghəm nɨ chəi mbɨ nyaʼə nùŋə̀ rɨkə te. 32Əton kɨ ni yè ə? À yɨ ɨmbə̀ʼ ɨghəm nɨ chəi mbɨ nyaʼa kəb ənû nɨ təm kùʼnɨ̀ ənjìm ɨbenɨ. Mbɨ nyaʼa ghɨ̀ ɨghabɨ ni ənû nɨ təm kùʼnɨ̀ yɨ ənjìm ɨnû mbe nɨ mbɨ nyaʼə ghɨ̀ə̀. Mbɨ fə tɨ̀grɨ̀ ɨgun “ɨti we nɨ bə̂d ə tɨ̀grɨ̀ ɨgun.” 33Ə zɨ ɨŋga Ə̀ŋwàʼnɨ̀ ə Ŋwiə̀ ni,
“Zə, mə fə nùŋ ɨti ə Zayɔ̀n nɨ bɨrɨ ghɨ ni bə̂d tɨ̀grə,
ɨwɔ̌ nɨ bɨrɨ ghɨ ni mbɨ gu ə.
Chəi Ŋwìə̀ bɨrɨ naʼ tɨ̀nìd ətu əmbɨ wə̀d we nɨ nuŋ fîŋ ɨgwɨ məd.”
موجودہ انتخاب:
Rm 9: mgo
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2013, Cameroon Association for Bible Translation and Literacy