Ɨ̀fàʼì 25
25
Pɔ̂l nyaʼa kə̀b ni Kaisà saʼ əwi
1Ənɨ ɨni nyaʼa chè ɨtad nɨ Festùs nyaʼa pè ɨŋga əbà əbeŋ ze nɨ wɨ̀ nyaʼa wo tùmbɨ̀, wɨ̀ nyaʼa nɔ̀ʼ rɨ ə Kàisàriyà kɔʼ wò ə Jèrusalèm. 2Bə̂d kyeŋ mbe rɨ ə mbàn Ŋwìə̀ mbɨ ə bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa wò ghà ɨnû ɨ bɔ ɨmbə̀ʼ ə Pɔ̂l. Mbɨ nyaʼa ghà əne, buʼ ɨbɔ ɨ bɔ ni, 3wɨ̀ ghɨ ɨ̀chɔ̀m ənɨ ə nən chà ə Pɔ̂l ə Jèrusalèm. Mbɨ nyaʼa ghà əne ɨmbə̀ʼ ɨghəm nɨ mbɨ nyaʼa fə taŋ ni mbə bɨrɨ nəmbɨ ɨnə̂njɨ̀, wòm əməd zwiirɨ. 4Festùs nyaʼa wììrɨ̀ ni Pɔ̂l wɨ ə nəb ndəŋ ə Kàisàriyà fɔrɨ ni əmad ze, məd ziə bɨrɨ wo əŋgu. 5Wɨ̀ nyaʼa wò ɨmbì ghà ni, “Mbə̀ saŋ bə̂d kyeŋ mɔʼɔ rəbɔʼ mbe nɨə tekɨ ɨnû ɨŋga əbeŋ mɨ̀Jû swiʼi wò mbɨ num. Wɨ̀ mɨ gù ənû ə mɔʼɔ, mbɨ sɨ zɨ̀ ɨsaʼi ɨgwɨ məd.”
6Ənɨ wɨ̀ nyaʼa fə chubɨ mbɨ mɨ̀mə̌d ɨni famɨ kɨ̀ ɨni wum, wɨ̀ nyaʼa swiʼi wò ə Kàisàriyà. À nyaʼa əni ze nɨ beenɨ, wɨ̀ nyaʼa wò chub ɨŋga nəb ɨsaʼi, ghà ni mbɨ nɨŋ ə Pɔ̂l yeʼe mbɨ məd. 7Ənɨ Pɔ̂l nyaʼa yeʼe, mɨ̀Jû mbe nɨ nyaʼa swiʼi rɨ ə Jèrusalèm nyaʼa təm kad əməd kɔ zɨ ɨnû ka ka nɔnɔʼ ɨgwɨ məd nɨ chəi ənɨ tɨ̀ mbɨ chwi ni ɨnû mbe yɨ ɨnû rəsìʼ. 8Ɨ chɨ ənû rɨ ɨgwɨ ni, Pɔ̂l nyaʼa ghà ni, “Chəi mə̀ kweʼ ghà ənû rɨbɔ̀ŋ dè rɨkə mɨ̀Jû, dè mbàn Ŋwìə̀ kɨ̀ dè ə Kaisà.”
9Àyɨə Festùs nyaʼə kə̀b ghɨ ni mɨ̀Jû ghaʼ əməd, əne wɨ̀ nyaʼa ghà əmbɨ Pɔ̂l ni, “À wa kə̀b kɔʼ wo ə Jèrusalèm ɨmbə̀ʼ mə̀ saʼ əwe əŋgu dè ɨnû mbɔ̂ nɨ mbɨ zɨ ɨgwɨ ne ə?”
10Pɔ̂l nyaʼa wììrɨ̀ ni, “Mə yɨ əni ɨŋga nəb ɨsaʼi Kaisà, nɨ yeʼ əsɨ nɨ tɨ̀ à saʼ əmɨ əŋgu. Chəi mə̀ gu ənû ə mɔʼɔ əmbɨ mɨ̀Jû ɨchî nɨ à kàŋ kyerɨ. 11Əne mə mɨ fə ghɨ̀ ɨnû rɨbɔ̀ŋ, kɨ̀ mə fə gù ənû ə mɔʼɔ nɨ tɨ̀ mbɨ zwiirɨ əmɨ, chəi mə̀ ton nɨ kwɨ. Àyɨə ɨchî nɨ chəi rəsìʼ ɨŋga ɨnû mbɔ̂ nɨ mbɨ zɨ ɨgwɨ num, chəi wə̀d mɔʼɔ nɨ tɨ̀ wɨ̀ nàʼ əmɨ əmbɨ mɨ̀mə̌d. Mə kə̀b ni Kaisà saʼ ɨsaʼi wɔ̂.”
12Ənɨ Festùs nyaʼa fə ghambɨ mbɨ ə mbaŋə̀ te nɨ nyaʼə kəərɨ əməd, wɨ̀ nyaʼa wììrɨ̀ ni, “À fə ghà ni Kaisà saʼ ɨsaʼi wɔ̂, əne à bɨrɨ wò əsɨ Kaisà!”
Pɔ̂l nyaʼa təm ɨfě Agripà mbɨ Benis
13Ənɨ ɨni mɔʼɔ nyaʼa chě, ɨfɔ̂n Agripà mbɨ Benis #25.13Benis yɨə nyaʼa njàbɨ ɨfɔ̂n Agripà. nyaʼa wo chaʼrɨ ə Festùs ə Kàisàriyà. 14Ɨchî nɨ mbɨ nyaʼa chub əŋgu ɨni nɔnɔʼ, Festùs nyaʼa ghà ənû ɨmbə̀ʼ ɨsaʼi Pɔ̂l əmbɨ Ɨfɔ̂n Agripà ni, “Mbaŋə̀ mɔʼɔ zɨ əgha nɨ Felìz nyaʼa saŋ ə nəb ndəŋ. 15Ənɨ mə̀ nyaʼa wo ə Jèrusalèm, bə̂d kyeŋ mbe rɨ ə mbàn Ŋwìə̀ mbɨ ə bə̂d kyeŋ ɨŋga əbeŋ mɨ̀Jû nyaʼa ghà ɨnû ɨmbə̀ʼ ɨsaʼi məd ɨ num. Mbɨ nyaʼa kə̀b ni mə sob ɨsaʼi ni mbɨ zwiirɨ əməd. 16Mə nyaʼa wììrɨ̀ əmbɨ mɨ̀mə̌d ni kaʼi ɨchî əbeŋ məRom nɨ yim wə̀d nàʼ əmbɨ ə bə̂d mbe nɨ zɨ ɨsaʼi ɨgwɨ məd, bɔŋ wɨ̀ sɨə bòmnɨ̀ə̀ mbɨ mɨ̀mə̌d. Mbɨ berɨ nàʼ əpan ɨ bɔ ni wɨ̀ chɨ ɨnû rɨ ɨgwɨ ni. 17Ənɨ mbɨ nyaʼa yeʼe fetɨ əgha, chəi mə nyaʼa chəkɨ ə nyùmə̀. Àmei ɨgwɨ əni ze nɨ beenɨ, mə nyaʼa wò chub ɨŋga nəb ɨsaʼi ghà ni mbɨ yeʼe mbɨ ə mbaŋə̀ ze. 18Ənɨ bə̂d mbe nɨ nyaʼa zɨ ɨsaʼi ɨgwɨ məd nyaʼa nɔʼ rətiə, chəi mbɨ nyaʼa zɨ tɨkwɨrɨ ɨnû rɨbɔ̀ŋ ɨgwɨ məd ɨghabɨ te nɨ mə̀ nyaʼə kɔndɨə. 19Ɨ mbɨə nyaʼə tàŋə̀ mbɨ məd ɨmbə̀ʼ ɨnû nɨ dè ənû ə ŋwiə̀ mɨ̀mə̌d fɔrɨ ɨmbə̀ʼ mbaŋə̀ mɔʼɔ nɨ ɨkum məd nyaʼə Yeso, nɨ nyaʼa fə kwɨ, àyɨə Pɔ̂l wɨə ghàə̀ ni ɨ wɨ ɨkǎ. 20Chəi mə̀ nyaʼa kyerɨ ɨchî nɨ nwendɨ tɨkwɨrɨ ɨnû tɔ̂, əne mə nyaʼa biirɨ əmbɨ Pɔ̂l ni tɨ̀ wɨ̀ wò ə Jèrusalèm ɨmbə̀ʼ mə̀ saʼ əməd əŋgu dè ɨnû mbɔ̂ nɨ mbɨ zɨ ɨgwɨ məd ə? 21Àyɨə ənɨ wɨ̀ nyaʼa gha ni mbɨ nuŋ əwi ə nəb ndəŋ pè ənɨ Kaisà saʼ ɨsaʼi we, mə nyaʼa ghà ni mbɨ nuŋ əməd pè ənɨ mə bɨrɨ cha əməd əsɨ Kaisà.”
22Agripà nyaʼa ghà əmbɨ Festùs ni, “Mə bɨrɨ ghaʼ nɨ zu rɨ əmbɨ ə mbaŋə̀ ze mɔ̌ mɔ̌.”
Festùs nyaʼa wììrɨ̀ ɨ bɔ ni, “À bɨrɨ zu rɨ ɨ bɔ ɨsɔ.”
23À nyaʼa əni ze nɨ beenɨ, Agripà mbɨ Benis nyaʼa yèn ɨghabɨ mɨfɔ̀n wò nyɨ ɨŋga ɨ̀chàm. Wɨ̀ nyaʼa wò nyɨ mbɨ ɨtu kyeŋ ɨgwɨ mɨ̀sɔgyɨ̀ fɔrɨ mbɨ ə bə̂d kyeŋ kyeŋ rɨŋga ɨsɨ ze. Ənɨ mbɨ nyaʼa nyɨ əne, Festùs nyaʼa ghà ni mbɨ nɨŋ ə Pɔ̂l yeʼe mbɨ məd. 24Festùs nyaʼa ghà ni, “Ɨfɔ̂n Agripà mbɨ ə bə̂d mɨjìm mbe nɨ yeʼ əgha mbɨ na, mbə zə mbaŋə̀ zɔ̂ nɨ mɨ̀Jû mɨ̀jìm mbe rɨ ə Jèrusalèm mbɨ mbe rɨ əgha nyaʼa zɨ ɨsaʼi ɨgwɨ məd, kyeŋə ghàə̀ ni wɨ̀ rɨka kùʼ i nɨ wɨrɨ chub ɨkǎ. 25Mə nyaʼa zə ni chəi wɨ̀ ghɨ ənû ə mɔʼɔ nɨ tɨ̀ mbɨ zwiirɨ əməd, àyɨə ɨchî nɨ məd ziə gha ni Kaisà saʼ ɨsaʼi we, mə nyaʼa ben ni mə bɨrɨ cha əməd ə Rom. 26Chəi mə̀ kaŋ berɨ ənû ə mɔʼɔ nɨ tɨ̀ mə ŋwàʼnɨ̀ əmbɨ ɨfɔ̂n kyeŋ ɨmbə̀ʼ əməd. Əne mə fə nɨŋ əməd yeʼe ɨfě nən, màànɨ̀ ɨfě ne àwɔ̀ ɨfɔ̂n Agripà, ɨmbə̀ʼ tɨ̀ mɨ fə nwèndɨ̀ ɨsaʼi məd, mə we tɨ̀ mə berɨ ənû nɨ ŋwàʼnɨ̀. 27À bɨrɨ kaŋ yeʼ ənû ə neŋ ni mə̀ cha wə̀d ndəŋ əsɨ ɨfɔ̂n kyeŋ nɨ chəi mə ŋwaʼnɨ ɨsaʼi we nɨ mbɨ zɨ ɨgwɨ məd.”
موجودہ انتخاب:
Ɨ̀fàʼì 25: mgo
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2013, Cameroon Association for Bible Translation and Literacy