ᐃᓯᐦᒋᑫᐃᐧᓂᐋᐧᐊᐧ 20

1ᐃᐢᐱ ᒫᑲ ᑳ ᐳᓂᐸᔨᐠ ᐊᓂᒪ ᐅᐯᐧᑲᒥᑭᓯᐃᐧᐣ, ᐹᓬ ᐁ ᑭ ᓈᒋᑎᓴᐋᐧᐟ ᑭᐢᑭᓄᐦᐊᒪᐋᐧᑲᓇ ᒥᓇ ᐁ ᑭ ᑲᑫᐢᑭᒫᐟ, ᑭ ᐊᔭᑕᒥᐢᑲᐁᐧᐤ, ᒥᓇ ᑭ ᓯᐯᐧᑌᐤ ᒫᓯᑖᓂᔭᐃᕽ ᑭᑕ ᐃᑐᐦᑌᐟ. 2ᐃᐢᐱ ᒫᑲ ᒥᓯᐁᐧ ᐁᑯᑕ ᓵᐳ ᑳ ᐊᔨᑐᑌᐟ, ᒥᓇ ᒥᐢᑕᐦᐃ ᑳ ᑲᑫᐢᑭᒫᐟ, ᑭ ᐅᑎᑕᒼ ᑲᕒᐃᐢ, 3ᐁᑯᑕ ᒫᑲ ᓂᐢᑐ ᐱᓯᒼ ᑳ ᐊᔮᐟ, ᐁᑯᓯ ᐁ ᑭᒧᒋ ᐃᓯᐦᒋᑫᔨᐟ ᒍᐊᐧ ᓈᐣᑕᐤ ᐁ ᐃᐧ ᐃᑐᑖᑯᐟ, ᐁ ᐃᐧ ᐊᑎ ᓯᐯᐧᔮᓯᐟ ᓯᕒᐃᔭᐃᕽ ᐃᓯ, ᑭ ᑭᓭᔨᑕᒼ ᑭᔮᒼ ᑭᑕ ᑭᐁᐧᐟ ᒫᓯᑖᓂᔭᐃᕽ ᐃᓯ. 4ᑭ ᐊᑎ ᐃᐧᒉᐃᐧᐠ ᒫᑲ ᐁᓯᔭᐃᕽ ᐃᐢᑯ ᓵᐸᑕᕒ ᐱᕒᐃᔭ ᐅᐦᒋ, ᐅᑯᓯᓴ ᐱᕒᐊᐢ; ᒥᓇ ᑌᓴᓬᐋᓂᔭᓇᐠ ᐅᐦᒋ, ᐋᕒᐃᐢᑖᕒᑲᐢ ᒥᓇ ᓯᑲᐣᑕᐢ; ᒥᓇ ᑫᔭᐢ ᑕᕒᐱ ᐅᐦᒋ, ᒥᓇ ᑎᒪᑏ; ᒥᓇ ᐁᓯᔭ ᐅᐦᒋ, ᑎᑭᑲᐢ ᒥᓇ ᑕᕒᐋᐱᒪᐢ. 5ᒫᑲ ᐃᐧᔭ ᑲᐦᑭᔭᐤ ᐅᑭ ᓂᑳᐣ ᑭ ᓯᐯᐧᑌᐊᐧᐠ, ᒥᓇ ᓂ ᑭ ᐯᐃᑯᓈᓇᐠ ᑕᕒᐅᐋᓯᕽ. 6ᐁᑯᓯ ᓂ ᑭ ᓯᐯᐧᔮᓯᓈᐣ ᐱᓬᐃᐸᐩ ᐅᐦᒋ ᐁ ᐳᓂᐸᔨᑭ ᑭᓯᑳᐊᐧ ᐁᑳ ᑳ ᐱᓭᐧᑲᓱᐟ ᐸᑫᐧᓯᑲᐣ, ᓄᑎᑕᐋᐧᓈᓇᐠ ᒫᑲ ᑕᕒᐅᐋᓯᕽ ᓂᔮᓇᓄᑭᓯᑳᐤ ᐃᔨᑯᕽ. ᐁᑯᑕ ᒫᑲ ᓂᐟ ᐊᔮᓈᐣ ᑌᐸᑯᑊ ᑭᓯᑳᐤ.

7ᓂᐢᑕᒼ ᐁ ᑭᓯᑳᐠ ᒫᑲ ᐁᐊᐧᑯ ᐁ ᐃᐢᐸᔨᐠ, ᐃᐢᐱ ᐁ ᒫᒪᐊᐧᐱᔮᕽ ᑭᑕ ᐸᑫᐧᓈᔮᕽ ᐸᑫᐧᓯᑲᐣ, ᐹᓬ ᑭ ᑲᑫᐢᑭᒣᐤ, ᐁ ᐃᑌᔨᑕᒼ ᑭᑕ ᓯᐯᐧᑌᐟ ᐁ ᐊᑎ ᐋᐧᐸᓂᔨᐠ; ᐁᑯᓯ ᐱᔨᐢ ᐋᐱᑖᑎᐱᐢᑳᔨᐤ ᐁ ᐱᑭᐢᑫᐧᐟ. 8ᒥᐦᒉᐟ ᒫᑲ ᐋᐧᓴᐢᑯᑌᓂᑯᓇ ᑭ ᐊᔮᐊᐧ ᐃᐢᐱᒥᕽ ᐋᐧᐢᑳᐃᑳᓂᕽ, ᐃᑕ ᐁ ᒫᐊᐧᒋᐃᑐᔮᕽ. 9ᑭ ᐊᐱᐤ ᒫᑲ ᐋᐧᓭᓇᒫᐃᐧᓂᕽ ᐯᔭᐠ ᐅᐢᑭᓂᑭᐤ ᔪᑎᑲᐢ ᐁ ᐃᓯᔨᐦᑳᓱᐟ, ᒥᐢᑕᐦᐃ ᐁ ᓄᑌᑲᐧᓯᐟ; ᑫᔮᐱᐨ ᒫᑲ ᑭᓀᐧᐢ ᐁ ᐱᑭᐢᑫᐧᔨᐟ ᐹᓬᐊ, ᐁ ᑲᐃᐧᑲᐧᓯᐟ ᑭ ᐸᐦᑭᓯᐣ ᓂᐢᑖᐧᐤ ᐁ ᐊᑌ ᐋᐧᓭᓇᒫᐃᐧᐠ ᐅᐦᒋ, ᒥᓇ ᐁ ᐅᑎᓂᐦᐟ ᐳᑎ ᓂᐱᐤ. 10ᐹᓬ ᒫᑲ ᑭ ᓂᓵᑕᐃᐧᐤ, ᐁᑯᓯ ᐁᑯᑕ ᐁ ᐃᐢᐸᔨᐅᐟ, ᑭ ᐅᑎᐦᑎᓀᐤ ᒥᓇ ᑭ ᐃᑌᐧᐤ, ᐁᑳᐃᐧᔭ ᓈᐣᑕᐤ ᐃᑌᐧᐁᐧᑖᐠ; ᒋᑫᒫ ᑭᑭᐢᑳᐠ ᐅ ᐱᒫᑎᓯᐃᐧᐣ. 11ᐃᐢᐱ ᒫᑲ ᒥᓇ ᑳ ᑯᐢᐹᑕᐃᐧᐟ, ᒥᓇ ᑳ ᐹᐸᑫᐧᓈᐟ ᐸᑫᐧᓯᑲᓇ, ᒥᓇ ᑳ ᒥᒋᓱᐟ, ᐁᑯᓯ ᑳ ᐃᐧᒋᐱᑭᐢᑫᐧᒫᐟ ᑭᓀᐧᐢ ᐱᔨᐢ ᐁ ᐯᑖᐸᓂᔨᐠ, ᐁᑯᓯ ᑭ ᐃᓯ ᓯᐯᐧᑌᐤ. 12ᑭ ᐯᓯᐁᐧᐊᐧᐠ ᒫᑲ ᐊᓂᐦᐃ ᐅᐢᑭᓂᑭᐊᐧ ᐁ ᐱᒫᑎᓯᔨᐟ, ᒥᓇ ᓇᒪᐃᐧᔭ ᐱᑯ ᐊᐱᓯᐢ ᑭ ᒥᔪᑌᐁᐃᑲᐧᐠ.

13ᒫᑲ ᓂᔭᓈᐣ, ᓂᑳᐣ ᐁ ᓇᑕᐃᐧ ᐳᓯᔮᕽ ᓈᐱᑳᐧᓂᕽ, ᓂ ᑭ ᓯᐯᐧᔮᓯᓈᐣ ᐋᓵᐢ ᐃᓯ, ᐁᑯᑕ ᐁ ᐃᑌᔨᑕᒫᕽ ᑭᑕ ᐳᓯᐊᔮᕽ ᐹᓬᐊ ᒋᑫᒫ ᐁᑯᓯ ᑭ ᐃᑕᑭᒋᑫᐤ, ᐁ ᐃᑌᔨᑕᕽ ᐁᑯᑕ ᐃᐢᑯ ᐃᐧᔭ ᑭᑕ ᒧᐢᑐᑌᐟ. 14ᐃᐢᐱ ᒫᑲ ᒥᔦᑳᐧᐢᑳᑯᔮᕽ ᐋᓵᓯᕽ, ᓂ ᑭ ᐳᓯᐋᓈᐣ, ᒥᓇ ᓂ ᑭ ᑕᑳᐧᓯᓈᐣ ᐊᓂᑕ ᒥᑎᓬᐃᓂ. 15ᐁᑯᑕ ᒫᑲ ᐁ ᐅᐦᒋ ᓯᐯᐧᔮᓯᔮᕽ, ᐃᐧᔮᐸᕽ ᓂ ᑭ ᑕᑳᐧᓯᓈᐣ ᑎᐱᐢᑯᐨ ᑳᔭᐢ; ᐁᑯᓯ ᒥᓇ ᐃᐧᔮᐸᕽ ᓂ ᑭ ᑖᑳᐧᓯᓈᐣ ᐊᓂᑕ ᓭᒪᐢ; ᒥᓇ ᒫᑲ ᑭᑖᐧᒼ ᐃᐧᔮᐸᕽ ᓂ ᑕᑳᐧᓯᓈᐣ ᐊᓂᑕ ᒪᐃᓬᐃᑕᐢ. 16ᒋᑫᒫ ᐹᓬ ᑭ ᐃᑌᔨᑕᒼ ᑭᑕ ᓵᐳ ᐱᒫᓯᐟ ᐁᐱᓴᐢ ᐃᐧᔭ, ᐁᑳ ᑭᓀᐧᐢ ᑭᑕ ᐊᔮᐟ ᐁᓯᔭᐃᕽ; ᒋᑫᒫ ᓂᓂᑭᓯᐤ, ᑭᐢᐱᐣ ᑭ ᑲᐢᑭᑖᐟ, ᑭᑕ ᐊᔮᐟ ᒉᕒᐅᓴᓬᐊᒥᕽ ᐯᐣᑎᑳᐢᐟ ᐁ ᑭᓯᑳᐠ.

17ᒪᐃᓬᐃᑕᓯᕽ ᒫᑲ ᐅᐦᒋ ᑭ ᐃᓯᑎᓴᐦᐅᐁᐧᐤ ᐁᐱᓴᓯᕽ, ᒥᓇ ᑭ ᓇᑐᒣᐤ ᐁᑯᑕ ᑳ ᓂᑳᓀᔨᑖᑯᓯᔨᐟ ᐊᔭᒥᐦᐋᐃᐧᓂᕽ. 18ᐃᐢᐱ ᒫᑲ ᐁᐧᑎᑎᑯᐟ, ᑭ ᐃᑌᐤ,

ᑭᔭᐋᐧᐤ ᑭ ᑭᐢᑫᔨᑌᓈᐋᐧᐤ, ᓂᐢᑕᒼ ᐁ ᑭᓯᑳᐠ ᐁᓯᔭᐃᕽ ᑳ ᑕᑯᐢᑫᔮᐣ ᐅᐦᒋ, ᑳ ᑭ ᐃᓯ ᐃᐧᒉᐃᐧᑕᑯᐠ ᑕᐦᑭ, 19ᐁ ᐊᑐᐢᑲᐊᐧᐠ ᑳ ᑎᐯᔨᐦᒋᑫᐟ ᒥᓯᐁᐧ ᑕᐸᑌᔨᒧᐃᐧ ᒥᑐᓀᔨᒋᑲᓂᕽ, ᒥᓇ ᐅᐦᒋᑲᐋᐧᐱᐃᐧᓂᕽ, ᒥᓇ ᑯᑌᔨᒥᑯᐃᐧᓂᕽ ᑳ ᑭ ᐅᑎᐦᑎᑯᔮᐣ ᐅ ᑭᒧᒋ ᐃᓯᐦᒋᑫᐃᐧᓂᐋᐧᐊᐧ ᒍᐊᐧᐠ ᐅᐦᒋ: 20ᐁᑳ ᒫᑲ ᐁ ᓇᑭᔮᐣ ᑭᑕ ᐃᐧᐦᑕᒫᑕᑯᐠ ᓈᐣᑕᐤ ᑫᑲᐧᐩ ᑭᑕ ᐋᐸᒋᐃᑯᔦᐠ, ᐁᑯᓯ ᐁ ᑭᐢᑭᓄᐦᐊᒫᑕᑯᐠ ᐃᑕ ᐁ ᒫᒪᐃᐧ ᐊᔮᕽ, ᒥᓇ ᒫᒥᐢᑯᐨ ᐋᐧᐢᑳᐦᐃᑲᓂᕽ. 21ᐁ ᐋᒋᒧᐢᑕᐊᐧᑭᐠ ᒍᐊᐧᐠ ᒥᓇ ᑲᕒᐃᑲᐠ ᑭᑕ ᑫᐧᐢᑳᑎᓯᐢᑖᐦᐟ ᑭᓭᒪᓂᑐ, ᒥᓇ ᑭᑕ ᑖᐯᐧᔦᔨᒥᐦᐟ ᑳ ᑎᐯᔨᒥᑯᔭᕽ ᒋᓴᐢ ᙭. 22ᐁᑲᐧ ᒫᑲ, ᒫᑎᑲ, ᓂᐟ ᐃᑐᐦᑖᐣ ᐁ ᐃᑐᑕᐃᐟ ᐊᐦᒑᕽ ᒉᕒᐅᓴᓬᐊᒥᕽ, ᐁᑳ ᐁ ᑭᐢᑫᔨᑕᒫᐣ ᑫᑲᐧᔭ ᑫ ᐸᑲᒥᐢᑳᑯᐋᐧᓀ ᐁᑯᑕ: 23ᐱᑯ ᑳ ᑲᓈᑎᓯᐟ ᐊᐦᒑᕽ ᓂᐟ ᐋᒋᒧᐢᑖᐠ ᑕᐦᑐ ᐅᑌᓈᕽ, ᐁ ᐃᑌᐧᐟ ᒪᒫᒋᑲᐧᐱᑎᑯᐃᐧᓇ ᒥᓇ ᑯᑕᑭᑖᐃᐧᓇ ᐁ ᐊᐢᑲᒫᑯᔮᐣ. 24#2 ᑎᒪᑏ 4:7ᒫᑲ ᓂ ᐱᒫᑎᓯᐃᐧᐣ ᓇᒪ ᓈᓇᑕᐤ ᓂᐟ ᐃᑕᑭᑌᐣ, ᓂᔭ ᐅᑎ ᐃᐧᔭ ᑭᑕ ᓵᑭᐦᑖᔮᐣ, ᑭᑕ ᑭ ᑭᓯᑖᔮᐣ ᓂᐟ ᐊᑐᐢᑫᐃᐧᐣ, ᒥᓇ ᐊᓂᒪ ᐸᒥᐢᑖᑲᓂᐃᐧᐃᐧᐣ ᑳ ᑭ ᒥᔨᐟ ᑳ ᑎᐯᔨᐦᒋᑫᐟ ᒋᓴᐢ, ᑭᑕ ᐋᑐᑕᒫᐣ ᒥᔮᐧᒋᒧᐃᐧᐣ ᐅ ᑭᓭᐋᐧᑎᓯᐃᐧᐣ ᑭᓭᒪᓂᑐ. 25ᐁᑲᐧ ᒫᑲ, ᒫᑎᑲ, ᓂ ᑭᐢᑫᔨᑌᐣ ᑲᐦᑭᔭᐤ ᑭᔭᐋᐧᐤ, ᐃᑕ ᐁ ᐊᔮᔦᐠ ᑳ ᑭ ᐸᐹ ᐃᐧᐦᑕᒫᐣ ᐅᑌᓇᐃᐧᐃᐧᐣ ᓇᒪ ᐃᐧᑳᐨ ᒥᓇ ᑭ ᑲ ᐋᐧᐸᒥᓈᐋᐧᐤ. 26ᐁᐊᐧᑯ ᐅᐦᒋ ᑭ ᐃᐧᐦᑕᒫᑎᓈᐋᐧᐤ ᐊᓄᐦᐨ ᑳ ᑭᓯᑳᐠ, ᐁᑳ ᐁ ᐊᑖᒣᔨᑖᑯᓯᔮᐣ ᐅ ᒥᐦᑯ ᐊᐃᐧᔭᐠ ᐊᔨᓯᔨᓂᐤ. 27ᒋᑫᒫ ᓇᒪᐃᐧᔭ ᓄᐦᒋ ᓇᑭᐣ ᑭᑕ ᐃᐧᐦᑕᒫᑕᑯᐠ ᑲᐦᑭᔭᐤ ᐅᐟ ᐃᑌᔨᑕᒧᐃᐧᐣ ᑭᓭᒪᓂᑐ.

28ᐊᔮᑳᐧᒥᓯᐠ ᒫᑲ ᑭᔭᐋᐧᐤ, ᒥᓇ ᑲᓇᐁᐧᔭᒥᑯᐠ ᑳ ᒫᒪᐁᐧᔭᑎᒋᐠ, ᐃᑕ ᑳ ᑲᓈᑎᓯᐟ ᐊᐦᒑᕽ ᑳ ᑭ ᐃᑕᔨᑯᔦᐠ ᑭᑕ ᑭᐦᒋ ᐊᔭᒥᐦᐁᐃᐧᔨᓂᐃᐧᔦᐠ, ᑭᑕ ᐊᓴᒥᒫᔦᐠ ᐅᐟ ᐊᔭᒥᐦᐋᒪ ᑭᓭᒪᓂᑐ, ᑳ ᑭ ᐊᑖᐁᐧᐟ ᐃᐧᔭ ᐅ ᒥᐦᑯ ᐅᐦᒋ. 29ᓂ ᑭᐢᑫᔨᑌᐣ ᑭ ᓯᐯᐧᑌᔮᓂ ᐁ ᐋᑳᐧᑎᓯᒋᐠ ᒪᐃᑲᓇᐠ ᑭ ᑲ ᐱᑐᑳᑯᐋᐧᐊᐧᐠ ᐁᑳ ᐁ ᒪᓈᒋᐋᒋᐠ ᒫᔭᑎᐦᑲᐧ; 30ᒥᓇ ᐊᐦᐳ ᑭᔭᐋᐧᐤ ᑫᐦᒋᐋᐧᐠ ᐅᐦᒋ ᐊᔨᓯᔨᓂᐊᐧᐠ ᑭᑕ ᐸᓯᑯᐊᐧᐠ, ᐋᔭᓵᐋᐧᐨ ᑫᑲᐧᔭ ᐁ ᑕᓯᑕᑭᐠ, ᑭᑕ ᐅᒋᐱᑖᒋᐠ ᑭᐢᑭᓄᐦᐊᒪᐋᐧᑲᓇ ᑭᑕ ᐱᒥᑎᓴᐅᑯᒋᐠ. 31ᐁᑯᓯ ᒫᑲ ᐊᓴᐋᐧᐱᐠ, ᑲᓄᑭᐢᑭᓯᐠ ᓂᐢᑐ ᐊᐢᑭ ᐃᔨᑯᕽ ᓇᒪᐃᐧᔭ ᑭ ᑭ ᐳᓂ ᑲᑫᐢᑭᒥᑎᓈᐋᐧᐤ ᑲᐦᑭᔭᐤ ᐁ ᐃᑕᓯᔨᐠ ᐁ ᑭᓯᑳᐠ ᒥᓇ ᐁ ᑎᐱᐢᑳᐠ ᑭᑭ ᐅᐦᒋᑲᐋᐧᐱᐃᐧᐣ. 32ᐁᑲᐧ ᒫᑲ ᑭ ᑳᑭᓯᒧᐢᑕᒫᑎᓈᐋᐧᐤ ᑭᓭᒪᓂᑐ, ᒥᓇ ᐅ ᑭᓭᐋᐧᑎᓯᐃᐧ ᐃᑌᐧᐃᐧᐣ, ᐊᓂᒪ ᑫ ᑭ ᔭᑭᓯᐃᑯᔦᐠ, ᒥᓇ ᑭᑕ ᒥᔨᑯᔦᐠ ᑭᑕ ᐊᓯᑕᑭᒥᑲᐃᐧᔦᐠ ᑲᐦᑭᔭᐤ ᐊᓂᑭ ᑳ ᑲᓈᒋᐃᐦᒋᐠ. 33ᓇᒪᐃᐧᔭ ᓄᐦᒋ ᒧᐢᑕᐃᐧᓇᒪᐋᐧᐤ ᐊᐃᐧᔭᐠ ᐊᔨᓯᔨᓂᐤ ᐅ ᐋᐧᐱᐢᑭᓱᓂᔮᒪ, ᐊᐦᐳ ᐅᓵᐃᐧᓱᓂᔮᒪ, ᐊᐦᐳ ᐅ ᑭᑭᐢᑳᒋᑲᓇ. 34ᑭᔭᐋᐧᐤ ᑭ ᑭᐢᑫᔨᑌᓈᐋᐧᐤ ᐅᐦᐃ ᓂᒋᐦᒋᔭ ᐁ ᑭ ᐸᒥᐃᑯᔮᐣ ᓂ ᑭᐧᑕᒫᐃᐧᓂᕽ, ᒥᓇ ᐊᓂᑭ ᑳ ᑭ ᐃᐧᒉᐃᐧᒋᐠ. 35ᑲᐦᑭᔭᐤ ᑫᑲᐧᐩ ᑭ ᑭ ᑭᐢᑭᓇᐋᐧᐸᐦᑕᐃᑎᓈᐋᐧᐤ, ᐁ ᐊᑐᐢᑫᔦᐠ ᑭᑕ ᐃᓯ ᐃᐧᒋᐋᔦᑯᐠ ᑳ ᓀᓱᐃᐧᓯᒋᐠ, ᒥᓇ ᑭᑕ ᑲᓄᑭᐢᑭᓯᔦᐠ ᐅᐟ ᐃᑌᐧᐃᐧᓇ ᑳ ᑎᐯᔨᐦᒋᑫᐟ ᒋᓴᐢ, ᐃᐧᔭ ᑫᐦᒋᐋᐧᐠ ᑳ ᑭ ᐃᑌᐧᐟ, ᓇᐊᐧᐨ ᑭᓭᐋᐧᑐᑖᑯᐃᐧᓯᐤ ᑳ ᒣᑭᐟ ᐃᐢᐱᐦᐨ ᐊᓇ ᑳ ᒥᔨᐦᐟ.

36ᐃᐢᐱ ᒫᑲ ᐅᒥᓯ ᑳ ᐊᔨᑌᐧᐟ, ᑭ ᐅᒋᒋᑲᐧᓇᐱᐤ, ᒥᓇ ᑭ ᐊᔭᒥᐦᐁᐢᑕᒪᐁᐧᐤ ᑲᐦᑭᔭᐤ, 37ᑲᐦᑭᔭᐤ ᒫᑲ ᒥᐢᑕᐦᐃ ᑭ ᒫᑐᐊᐧᐠ, ᐁ ᑭ ᐊᔨᐢᐸᔨᐅᒋᐠ ᐹᓬᐊ ᐅᑲᐧᔮᔨᕽ, ᒥᓇ ᐁ ᐊᐧᔪᒉᒫᒋᐠ, 38ᐁᐊᐧᑫᐧᔨᐤ ᐊᔨᐋᐧᐠ ᐁ ᒧᓯᑖᒋᐠ ᐃᑌᐧᐃᐧᐣ ᑳ ᑭ ᐃᐧᐦᑕᒥᔨᐟ, ᐁᑳ ᐃᐧᑳᐨ ᒥᓇ ᑭᑕ ᐋᐧᐸᒫᒋᐠ. ᑭ ᓄᒪᑫ ᐃᐧᒉᐁᐧᐊᐧᐠ ᒫᑲ ᓈᐱᑳᐧᓂᕽ ᐃᐢᑯ.

موجودہ انتخاب:

ᐃᓯᐦᒋᑫᐃᐧᓂᐋᐧᐊᐧ 20: KKMs

سرخی

کاپی

موازنہ

شئیر