ᐃᓯᐦᒋᑫᐃᐧᓂᐋᐧᐊᐧ 10
10
1ᑭ ᐃᑖᐤ ᒫᑲ ᐯᔭᐠ ᓈᐯᐤ ᓯᓴᕒᐃᔭᐃᕽ, ᑲᕒᓂᓬᐃᔭᐢ ᐁ ᐃᓯᔨᐦᑳᓱᐟ, ᓯᒫᑲᓂᓯᐃᐧᑭᒫᐤ, ᐊᓂᑭ ᐁ ᐱᐢᑭᑕᑭᒥᒋᐠ ᐃᑖᓬᐃᔭᐣ ᑳ ᐃᓯᔨᐦᑳᑎᒋᐠ, 2ᐁ ᐊᔭᒥᐦᐋᐋᐧᑎᓯᐟ ᐊᔨᓯᔨᓂᐤ, ᒥᓇ ᑐᐊᐧ ᑳ ᑯᓯᑫᐧᔨᒫᐟ ᑭᓭᒪᓂᑐᐊᐧ ᑭᑭ ᑲᐦᑭᔭᐤ ᐃᐧᑭᕽ ᑳ ᐊᔮᔨᐟ, ᒥᐢᑕᐦᐃ ᒣᑭᐃᐧᓇ ᑳ ᒥᔮᐟ ᐊᔨᓯᔨᓂᐊᐧ, ᒥᓇ ᐁ ᐊᔭᒥᐦᐁᐢᑕᐋᐧᐟ ᑭᓭᒪᓂᑐᐊᐧ ᑕᐦᑭ. 3ᑭ ᐋᐧᐸᒣᐤ ᐃᓯᓇᒧᐃᐧᓂᕽ ᒧᓯᐢ, ᓈᐣᑕᐤ ᑫᑳᐟ ᒥᑖᑕᐦᐟ ᑎᐸᐃᑲᐣ ᐁ ᑭᓯᑳᐠ, ᐅ ᑭᓯᑯᒪ ᑳ ᑎᐯᔨᐦᒋᑫᐟ ᐁ ᐯ ᐱᑐᑳᑯᐟ, ᒥᓇ ᐁ ᐃᑎᑯᐟ, ᑳᕒᓂᓬᐃᔭᐢ. 4ᐃᐧᔭ ᒫᑲ, ᓱᐦᑭ ᐁ ᑲᓇᐋᐧᐸᒫᐟ ᒥᓇ ᐁ ᓭᑭᓯᐟ, ᑭ ᐃᑌᐧᐤ, ᑫᑲᐧᐩ ᑌᐯᔨᐦᒋᑫᔭᐣ? ᐁᑯᓯ ᑭ ᐃᑎᐟ, ᑭᐟ ᐊᔭᒥᐦᐋᐃᐧᓇ ᒥᓇ ᑭ ᒣᑭᐃᐧᓇ ᑭ ᐃᐢᐹᑫᐸᔨᐊᐧ ᑭᑕ ᒪᓂ ᑭᐢᑭᓯᑐᑕᕽ ᑭᓭᒪᓂᑐ. 5ᐁᑲᐧ ᒫᑲ ᐃᓯᑎᓴᐦᐅᐠ ᓈᐯᐊᐧᐠ ᒑᐸᐃᕽ, ᐁᑯᓯ ᑭᑕ ᓈᑌᐊᐧᐠ ᐯᔭᐠ ᓵᐃᒪᐣ, ᐱᑕᕒ ᑳ ᐃᓯ ᐊᐢᐱᔨᑳᓱᐟ: 6ᐃᐧᒋᐊᔮᒣᐤ ᓵᐃᒪᓇ ᐅᐸᑫᑭᓄᑫᐊᐧ, ᐅ ᐋᐧᐢᑳᐦᐃᑲᓂᔨᐤ ᒋᑫᐯᐠ ᑭᐦᒋᑲᒥᕽ ᑳ ᐊᔮᔨᐠ. 7ᐃᐢᐱ ᒫᑲ ᐊᓂᐦᐃ ᐅᑭᓯᑯᐊᐧ ᑳ ᑭ ᑭᑐᑎᑯᐟ ᑳ ᓯᐯᐧᑌᔨᐟ, ᑭ ᓇᑐᒣᐤ ᓂᓱ ᐅᐟ ᐊᑐᐢᑫᔮᑲᓇ ᐃᐧᑭᕽ ᑳ ᐊᔮᔨᐟ, ᒥᓇ ᐁ ᐊᔭᒥᐦᐋᐋᐧᑎᓯᔨᐟ ᓯᒫᑲᓂᓴ ᑕᐦᑭ ᐁᐊᐧᑲᐧᓂ ᐁ ᐸᒥᐃᑯ; 8ᐃᐢᐱ ᒫᑲ ᑲᐦᑭᔭᐤ ᑫᑲᐧᐩ ᑳ ᐃᐧᐦᑕᒪᐋᐧᐟ, ᑭ ᐃᓯᑎᓴᐁᐧᐤ ᒑᐸᐃᕽ.
9ᐁᑲᐧ ᐃᐧᔮᐸᓂᔨᐠ, ᐁ ᐊᑎ ᐱᒧᐦᑌᒋᐠ, ᒥᓇ ᑭᓯᐋᐧᐠ ᐅᑌᓈᕽ ᐁ ᐊᑎ ᐊᔮᒋᐠ, ᐱᑕᕒ ᑕᐦᑯᒋ ᐋᐧᐢᑳᐦᐃᑲᓂᕽ ᑭ ᐃᑐᐦᑌᐤ ᑭᑕ ᐊᔭᒥᐦᐋᐟ, ᓈᐣᑕᐤ ᒫᑲ ᓂᑯᑖᐧᓯᐠ ᑎᐸᐃᑲᐣ: 10ᐁᑯᓯ ᑭ ᓄᑌᑲᑌᐤ, ᒥᓇ ᑭ ᐃᐧ ᒥᒋᓱ: ᒫᑲ ᒣᑳᐧᐨ ᐁ ᑲᐧᔮᒋᑖᐃᐧᐦᐟ, ᑖᐱᐢᑯᐨ ᐁᑳ ᐁ ᑭᐢᑫᔨᑕᕽ ᑭ ᐃᓯ ᐊᔮᐤ; 11ᐁᑲᐧ ᒫᑲ ᑭ ᐋᐧᐸᐦᑕᒼ ᑭᓯᐠ ᐁ ᔪᑌᓂᑳᑌᔨᐠ, ᒥᓇ ᐊᓯᐊᐧᒋᑲᐣ ᐁ ᐯ ᔮᓯᐸᔨᐠ, ᑖᐱᐢᑯᐨ ᑭᐦᒋ ᐊᔭᑲᐢᑫᑭᐣ ᐁ ᐃᓯᓈᑲᐧᓂᔨᐠ, ᓀᐊᐧᔭᐠ ᐁ ᑲᑭᑫᔮᐠ ᐁ ᐅᐦᒋ ᐸᑭᑖᐯᑭᓂᑳᑌᐠ ᐊᐢᑭᕽ. 12ᐁᑯᑕ ᒫᑲ ᐁ ᐊᔮᒋᐠ ᑲᐦᑭᔭᐤ ᓇᓈᑐᕽ ᑐᐊᐧ ᐁ ᓀᐅᑳᑌᒋᐠ ᐱᓯᐢᑭᐊᐧᐠ ᒥᓇ ᑐᐊᐧ ᑳ ᐸᐹᒥᑖᒋᒧᒋᐠ ᒧᒋᕽ ᒥᓇ ᑳ ᐸᐹᒥᔮᒋᐠ ᑭᓯᑯᕽ. 13ᑭ ᐅᑎᐦᑎᐠ ᒫᑲ ᐃᑌᐧᐃᐧᐣ, ᐋᐧᓂᐢᑳ, ᐱᑕᕒ, ᒥᓇᐅ ᒥᓇ ᒥᒋᓱ. 14ᒫᑲ ᐱᑕᕒ ᑭ ᐃᑌᐧᐤ, ᓇᒪᐃᐧᔭ ᐁᑯᓯ, ᑌᐯᔨᐦᒋᑫᔭᐣ; ᒋᑫᒫ ᓇᒪᐃᐧᔭ ᐃᐧᑳᐨ ᓄᐦ ᒥᒋᐣ ᐸᑲᐧᓇᑕ ᑫᑲᐧᐩ ᐊᐦᐳ ᐁᑳ ᐁ ᐯᑲᕽ. 15ᐃᑌᐧᐃᐧᐣ ᒫᑲ ᑭᑖᐧᒼ ᒥᓇ ᑭ ᐅᑎᐦᑎᐠ, ᐊᓂᒪ ᑭᓭᒪᓂᑐ ᑳ ᑭ ᐯᑭᑖᐟ, ᐁᑳᐃᐧᔭ ᑭᔭ ᐸᑲᐧᓇᑕ ᐃᑕᑭᑕ. 16ᐅᒪ ᒫᑲ ᑭ ᐃᑐᒋᑳᑌᐤ ᓂᐢᑖᐧᐤ: ᐁᑲᐧ ᑳᐃᐧ ᑭᓯᑯᕽ ᑭ ᐅᑎᓂᑳᑌᐤ ᐊᓂᒪ ᐊᓯᐊᐧᒋᑲᐣ.
17ᒣᑳᐧᐨ ᒫᑲ ᐱᑕᕒ ᐁ ᐊᐧᐋᐧᓀᔨᑕᒥᐃᑯᐟ ᑖᓂᓯ ᐁ ᐃᑌᐧᒪᑲᓂᔨᐠ ᐊᓂᒪ ᐃᓯᓇᒧᐃᐧᐣ, ᐳᑎ, ᐊᓂᐦᐃ ᓈᐯᐊᐧ ᑳᕒᓂᓬᐃᔭᐢ ᑳ ᑭ ᐃᓯᑎᓴᐋᐧᔨᐟ, ᑭ ᓂᐸᐃᐧᔨᐊᐧ ᑭᐦᒋ ᐃᐢᑳᐧᑌᒥᕽ, 18ᐁᑯᓯ ᑭ ᑌᐯᐧᐊᐧᐠ ᒥᓇ ᑭ ᑲᑫᐧᒋᑫᒧᐊᐧᐠ ᑭᐢᐱᐣ ᓵᐃᒪᐣ, ᐱᑕᕒ ᑳ ᐃᓯ ᐊᐢᐱᔨᑳᓱᐟ, ᐁᑯᑕ ᑭᑕ ᐃᐧᑭᑫᒧᔨᐟ. 19ᒣᑳᐧᐨ ᒫᑲ ᐱᑕᕒ ᐁ ᒫᒥᑐᓀᔨᑕᕽ ᐊᓂᒪ ᐃᓯᓇᒧᐃᐧᐣ, ᐊᐦᒑᐦᑲᐧ ᑭ ᐃᑎᐠ, ᒋᐢᐟ, ᓂᐢᑐ ᓈᐯᐊᐧᐠ ᑭ ᓇᓈᑐᓈᑲᐧᐠ. 20ᐊᐧᓂᐢᑳ ᒫᑲ, ᒥᓇ ᓂᓵᑕᐃᐧ, ᒥᓇ ᐃᐧᒉᐃᐧᐠ, ᐁᑳ ᑫᑲ ᐁ ᐊᐧᐋᐧᓀᔨᑕᒥᐃᑯᔭᐣ: ᒋᑫᒫ ᓂᔭ ᓂ ᑭ ᐃᓯᑎᓴᐋᐧᐊᐧᐠ. 21ᐱᑕᕒ ᒫᑲ ᑭ ᓂᓵᑕᐃᐧᑐᑕᐁᐧᐤ ᐊᓂᐦᐃ ᓈᐯᐊᐧ, ᒥᓇ ᑭ ᐃᑌᐤ, ᒋᐢᐟ, ᓂᔭ ᑳ ᓇᓈᑐᓇᐃᐧᔦᐠ, ᑫᑲᐧᐩ ᒫᑲ ᐅᐦᒋ ᑳ ᐯ ᐃᑐᑌᔦᐠ? 22ᐁᑯᓯ ᑭ ᐃᑌᐧᐊᐧᐠ, ᑳᕒᓂᓬᐃᔭᐢ ᓯᒫᑲᓂᓯᐃᐧᑭᒫᐤ, ᐁ ᑲᐧᔭᐢᑭᑖᑎᓯᐟ ᐊᔨᓯᔨᓂᐤ ᒥᓇ ᑐᐊᐧ ᑳ ᑯᓯᑫᐧᔨᒫᐟ ᑭᓭᒪᓂᑐᐊᐧ, ᐁ ᒥᔮᐧᒋᒥᑯᐟ ᒥᓇ ᑲᐦᑭᔭᐤ ᐁ ᐃᑕᐢᑳᓀᓯᔨᐟ ᒍᐊᐧ, ᑭ ᓯᑭᒥᐠ ᑭᓭᒪᓂᑐᐊᐧ ᑲᓈᒋ ᐅᑭᓯᑯᐊᐧ ᐅᐦᒋ, ᑭᑕ ᐃᓯᑎᓴᐦᐅᐁᐧᐟ ᐅᑕ ᐅᒪ ᐋᐧᐢᑳᐦᐃᑲᐣ ᑭᑕ ᓈᑎᑲᐃᐧᔭᐣ, ᐁᑯᓯ ᒫᑲ ᑭᑕ ᐯᐦᑕᕽ ᐃᑌᐧᐃᐧᓇ ᑭᔭ ᐅᐦᒋ. 23ᑭ ᐱᐦᑐᑫ ᓇᑐᒣᐤ ᒫᑲ ᐁᑯᓯ ᑭ ᑲᐯᓯᒧᓇᐁᐤ ᐁᑯᑕ.
ᐁᑲᐧ ᐃᐧᔮᐸᓂᔨᐠ ᑭ ᐸᓯᑯ ᒥᓇ ᑭ ᓭᐯᐧᐃᐧᒉᐁᐧᐤ, ᐋᑎᐦᐟ ᒫᑲ ᐅᒋᐋᐧᒥᒫᐊᐧ ᒑᐸᐃᕽ ᐅᐦᒋ ᑭ ᐃᐧᒉᐃᐧᐠ. 24ᐁᑯᓯ ᒥᓇ ᐃᐧᔮᐸᓂᔨᐠ ᑭ ᐊᑎ ᐱᐦᑐᑫᐊᐧᐠ ᓯᓴᕒᐃᔭᐃᕽ ᑳᕒᓂᓬᐃᔭᓴ ᒫᑲ ᐸᐯᐃᐠ, ᐁ ᑭ ᓇᑐᒫᐟ ᐅ ᐋᐧᑯᒫᑲᓇ ᒥᓇ ᑭᓯᐋᐧᐠ ᐅᑐᑌᒪ. 25ᐃᐢᐱ ᒫᑲ ᐁ ᐊᔨᑭᕽ ᐱᑕᕒᐊ ᐁ ᐱᐦᑐᑫᔨᐟ, ᑳᕒᓂᓬᐃᔭᐢ ᑭ ᓇᑭᐢᑲᐁᐧᐤ, ᒥᓇ ᐅᓯᑎᔨᕽ ᑭ ᐃᐢᐸᔨᐦᐅ ᐁ ᐅᒋᐦᒋᑲᐧᓂᐢᑕᐋᐧᐟ. 26ᒫᑲ ᐱᑕᕒ ᑭ ᐸᓯᑯᓀᐤ, ᐁ ᐃᑌᐧᐟ, ᓂᐸᐃᐧ, ᓂᐢᑕ ᐅᒪ ᓂᐟ ᐊᔨᓯᔨᓂᐃᐧᐣ. 27ᐁ ᐊᑎ ᐃᐧᒋ ᐱᑭᐢᑫᐧᒫᐟ ᒫᑲ, ᑭ ᐊᑎ ᐱᐦᑐᑫᐤ, ᐁᑯᓯ ᐳᑎ ᒥᐦᒉᐟ ᑭ ᒫᐊᐧᒋᐃᑐᔨᐊᐧ: 28ᑭ ᐃᑌᐤ ᒫᑲ, ᑭᔭᐋᐧᐤ: ᑭ ᑭᐢᑫᔨᑌᓈᐋᐧᐤ ᐁᑳ ᐁ ᐃᑕᐢᑌᐠ ᐅᔭᓱᐁᐧᐃᐧᐣ ᐊᔨᓯᔨᓂᐤ ᑳ ᒍᐃᐧᐟ ᑭᑕ ᐃᐧᒉᐋᐧᐟ ᐊᐦᐳ ᑭᑕ ᐱᑐᑲᐋᐧᐟ ᑯᑕᑲ ᐁ ᐃᑕᐢᑳᓀᓯᔨᐟ ᐊᔨᓯᔨᓂᐊᐧ; ᒫᑲ ᓂᔭ ᑭᓭᒪᓂᑐ ᓂ ᑭ ᐋᐧᐸᐦᑕᐃᐠ ᐁᑳ ᐊᐃᐧᔭᐠ ᐊᔨᓯᔨᓂᐤ ᐱᑲᐧᓇᑕ ᑭᑕ ᐃᓯᔨᐦᑳᑕᐠ ᐊᐦᐳ ᓇᒪᐃᐧᔭ ᐯᑭᓯᐤ: 29ᐁᐊᐧᑯ ᐅᐦᒋ ᒫᑲ ᓇᒪᐃᐧᔭ ᓂᐟ ᐋᓀᐧᑌᐣ ᑭᑕ ᐯ ᐃᑐᐦᑌᔮᐣ ᐃᐢᐱ ᐁ ᓇᑐᒥᑲᐃᐧᔮᐣ. ᓂ ᑲᑫᐧᒋᑫᒧᐣ ᒫᑲ, ᑫᑲᐧᐩ ᐅᐦᒋ ᑳ ᓇᑐᒥᔦᐠ. 30ᑳᕒᓂᓬᐃᔭᐢ ᒫᑲ ᑭ ᐃᑌᐤ, ᓀᐤ ᑭᓯᑳᐤ ᐊᐢᐱᐣ, ᐃᐢᑯ ᐅᒪ ᑎᐸᐃᑲᐣ, ᐁ ᑲᓇᐁᐧᔨᑕᒫᐣ ᑫᑳᐟ ᒥᑖᑕᐟ ᑎᐸᐃᑲᐣ ᑳ ᐊᔭᒥᐦᐋᕽ ᓂ ᐋᐧᐢᑳᐦᐃᑲᓂᕽ; ᐳᑎ, ᓈᐯᐤ ᓂ ᑭ ᐯ ᐅᑎᐢᑲᐃᐧᑳᐸᐃᐧᐢᑖᐠ ᐁ ᐋᐧᐱᐢᑭᐅᐟ, 31ᐁᑯᓯ ᐃᑌᐧᐤ, ᑳᕒᓂᓬᐃᔭᐢ, ᑭᐟ ᐊᔭᒥᐦᐋᐃᐧᐣ ᐯᐦᒋᑳᑌᐤ, ᒥᓇ ᑭ ᒣᑭᐃᐧᓇ ᒪᓂ ᑭᐢᑭᓯᑐᒋᑳᑌᐊᐧ ᐁ ᐃᓯ ᐋᐧᐸᐦᑕᕽ ᑭᓭᒪᓂᑐ. 32ᐃᓯᑎᓴᐦᐅᐁᐧ ᒫᑲ ᒑᐸᐃᕽ, ᒥᓇ ᓇᑐᒼ ᑭᑕ ᐯ ᓈᑎᐢᐠ ᓵᐃᒪᐣ, ᑳ ᐃᓯ ᐊᐢᐱᔨᑳᓱᐟ ᐱᑕᕒ; ᐃᐧᑭᑫᒧ ᐅ ᐋᐧᐢᑳᐦᐃᑲᓂᔨᕽ ᓵᐃᒪᓇ ᐅᐸᑫᑭᓄᑫᐊᐧ, ᒋᑭᐯᐠ ᑭᐦᒋᑲᒥᕽ. 33ᓭᒫᐠ ᒫᑲ ᓂ ᑭ ᐃᓯᑎᓴᐦᐅᐋᐧᐣ ᑭᑕ ᓈᑎᑲᐃᐧᔭᐣ; ᐁᑯᓯ ᑭ ᑭ ᒥᔪ ᑐᑌᐣ ᑳ ᐯ ᐃᑐᑌᔭᐣ. ᐁᑲᐧ ᒫᑲ ᑲᐦᑭᔭᐤ ᐅᑕ ᓂᐟ ᐊᔮᓈᐣ ᐁ ᐊᐧᐸᒥᑯᔭᕽ ᑭᓭᒪᓂᑐ, ᑭᑕ ᐯᑕᒫᕽ ᑲᐦᑭᔭᐤ ᑫᑲᐧᐩ ᑳ ᑭ ᐃᑕᓱᐋᐧᑎᐢᐠ ᑳ ᑎᐯᔨᐦᒋᑫᐟ. 34#ᑎᔪᑕᕒᐊᓇᒥ 10:17ᐁᑲᐧ ᒫᑲ ᐱᑕᕒ ᑭ ᐹᐢᑭᑐᓀᔨᐤ ᒥᓇ ᑭ ᐃᑌᐧᐤ,
ᑖᐯᐧ ᓂ ᓂᓯᑕᐃᐧᓀᐣ ᑭᓭᒪᓂᑐ ᐁᑳ ᑲᑖᐨ ᐁ ᑲᑫᑭᓈᐟ ᐊᐃᐧᔭ: 35ᒫᑲ ᑲᐦᑭᔭᐤ ᑳ ᐃᑕᑐᐢᑳᓀᓯᐟ ᐊᔨᓯᔨᓂᐤ ᐊᓂᐦᐃ ᑳ ᑯᓯᑫᐧᔨᒥᑯᐟ, ᒥᓇ ᑳ ᐊᑐᐢᑳᑕᒥᔨᐟ ᑲᐧᔭᐢᑭᑖᑎᓯᐃᐧᐣ ᐁ ᒥᔪ ᐅᑎᓈᐟ. 36ᐃᑌᐧᐃᐧᐣ ᑳ ᑭ ᐃᓯᑎᓴᐦᐊᒪᐋᐧᐟ ᐃᐢᕒᐁᐃᓬ ᐅᐟ ᐊᐋᐧᓯᒥᓯᔨᐊᐧ, ᐁ ᑲᑫᐢᑭᒥᐁᐧᐟ ᐁ ᐃᓯ ᒥᔮᐧᑐᑖᑲᐧᕽ ᒥᔮᐧᒋᒧᐃᐧᐣ ᒋᓴᐢ ᙭ ᐅᐦᒋ (ᐁᐊᐧᑯ ᑳ ᑎᐯᔨᑕᕽ ᑲᐦᑭᔭᐤ ᑫᑲᐧᐩ) 37ᐁᐊᐧᑯ ᐃᑌᐧᐃᐧᐣ ᑭᔭᐋᐧᐤ ᑭ ᑭᐢᑫᔨᑌᓈᐋᐧᐤ, ᑳ ᑭ ᐃᐧᒋᑳᑌᐠ ᒥᓯᐁᐧ ᒍᑎᔭᐃᕽ, ᐁ ᒫᒋᐸᔨᐠ ᑳᓬᐊᓬᐃᕽ, ᒣᐧᐢᑕᐢ ᐃᔨᑯᕽ ᐊᓂᒪ ᐹᑊᑖᐃᓯᐃᐧᐃᐧᐣ ᒑᐣ ᑳ ᑭ ᑲᑫᐢᑭᒥᐁᐧᐟ; 38ᒋᓴᐢ ᐅᑎ ᓈᓴᕒᐃᑎᕽ ᑳ ᐅᐦᒋᐟ, ᑭᓭᒪᓂᑐᐊᐧ ᑳ ᑭ ᐃᓯ ᑭᐢᑎᓂᑯᐟ ᑳ ᑲᓈᑎᓯᔨᐟ ᐊᐦᒑᐦᑲᐧ ᐅᐦᒋ ᒥᓇ ᑲᐢᑭᐦᐁᐃᐧᓯᐃᐧᐣ: ᑳ ᑭ ᐸᐹᒧᑌᐟ ᐁ ᒥᔪᑐᑖᑫᐟ, ᒥᓇ ᐁ ᐃᔨᓂᑲᐦᐋᐟ ᑲᐦᑭᔭᐤ ᑳ ᑭᑎᒪᐃᑯᔨᐟ ᒪᒑᔭ; ᒋᑫᒫ ᑭᓭᒪᓂᑐᐊᐧ ᑭ ᐃᐧᒉᐃᐧᐠ. 39ᓂᔭᓈᐣ ᒫᑲ ᓂᐟ ᐋᑐᑌᓈᐣ ᑲᐦᑭᔭᐤ ᑫᑲᐧᔭ ᑳ ᑭ ᑐᑕᕽ ᐅᐟ ᐊᐢᑭᔨᕽ ᒍᐊᐧ, ᒥᓇ ᒉᕒᐅᓴᓬᐊᒥᕽ; ᐁᐊᐧᑲᐧᓂ ᒥᓇ ᑳ ᑭ ᓂᐸᐦᐋᒋᐠ ᐁ ᐊᑯᑖᒋᐠ ᒥᐢᑎᑯᕽ. 40ᐁᐊᐧᑯ ᑭᓭᒪᓂᑐᐊᐧ ᑭ ᐊᐧᓂᐢᑳᓂᐠ ᐁ ᓂᐢᑐ ᑭᓯᑳᔨᐠ, ᒥᓇ ᑭ ᒥᔨᐠ ᑭᑕ ᓄᑯᐦᐃᓱᐢᑖᑫᐟ, 41ᓇᒪᐃᐧᔭ ᑲᐦᑭᔭᐤ ᐊᔨᓯᔨᓂᐊᐧ ᑭᑕ ᐋᐧᐸᒥᑯᐟ, ᒫᑲ ᐅᑖᒋᒧᐊᐧ ᓂᔮᐠ ᑳ ᑭ ᓇᐊᐧᓱᓈᐟ ᑭᓭᒪᓂᑐ ᓂᔭᓈᐣ ᐅᑎ, ᑳ ᑭ ᐃᐧᒋᒥᒋᓱᒫᔮᕽ ᒥᓇ ᑳ ᑭ ᐃᐧᒋᒥᓂᑫᐧᒫᔮᕽ ᒣᐧᐢᑕᐢ ᐃᔨᑯᕽ ᐁ ᑭ ᐊᐧᓂᐢᑳᐟ ᓂᐳᐃᐧᓂᕽ ᐅᐦᒋ. 42ᐁᑯᓯ ᓂ ᑭ ᐊᔮᑳᐧᒥᒥᑯᓈᐣ ᑭᑕ ᑲᑫᐢᑭᒫᔮᑭᐠ ᐊᔨᓯᔨᓂᐊᐧᐠ, ᒥᓇ ᑭᑕ ᐋᒋᒧᔮᕽ ᐁᐊᐧᑯ ᐊᐊᐧ ᑳ ᑭ ᐅᔭᑭᒥᑯᐟ ᑭᓭᒪᓂᑐᐊᐧ ᑭᑕ ᐅᔭᓱᐋᐧᑖᐟ ᐅᐱᒫᑎᓯᐊᐧ ᒥᓇ ᐅᓂᐱᐊᐧ. 43ᐃᐧᔭ ᒫᑲ ᑲᐦᑭᔭᐤ ᐅᑭᐢᑭᐁᐧᐦᐃᑫᐊᐧ ᑳ ᑭ ᐋᒋᒥᑯᐟ, ᐅ ᐃᐧᔪᐃᐧᐣ ᐅᐦᒋ ᑲᐦᑭᔭᐤ ᐊᐃᐧᔭ ᑳ ᑖᐯᐧᑖᑯᐟ ᑭᑕ ᐊᓭᓇᒫᑯᐃᐧᓯᔨᐟ ᒪᒋᐃᑎᐃᐧᓇ.
44ᒣᑳᐧᐨ ᒫᑲ ᐱᑕᕒ ᑫᔮᐱᐨ ᐁ ᑕᓯᑕᕽ ᐅᐦᐃ ᐃᑌᐧᐃᐧᓇ, ᑳ ᑲᓈᑎᓯᔨᐟ ᐊᐦᒑᐦᑲᐧ ᑭ ᐅᑎᐦᑎᑲᐧᐠ ᑲᐦᑭᔭᐤ ᑳ ᐯᐦᑕᐦᑭᐠ ᐃᑌᐧᐃᐧᐣ. 45ᐊᓂᑭ ᒫᑲ ᓴᕒᑲᒼᓴᐃᓯᐃᐧᐃᐧᐣ ᑳ ᐃᐧᒋᐃᐁᐧᒋᐠ ᑳ ᑖᐯᐧᑕᐦᑭᐠ ᑭ ᒫᒪᐢᑳᑕᒪᐧᐠ, ᑕᐦᑐ ᑳ ᑭ ᐯ ᐃᐧᒉᐋᐧᒋᐠ ᐱᑕᕒᐊ, ᒋᑫᒫ ᒉᐣᑕᐃᓬᐊᐠ ᒥᓇ ᐁ ᓯᑭᓇᒫᒋᐠ ᐊᓂᒪ ᒣᑭᐃᐧᐣ ᑳ ᑲᓈᑎᓯᐟ ᐊᐦᒑᕽ. 46ᒋᑫᒫ ᐯᑕᐁᐧᐊᐧᐠ ᐁ ᐱᑭᐢᑫᐧᔨᐟ ᓇᓈᑐᕽ ᐃᑐᐁᐧᐃᐧᓂᕽ, ᒥᓇ ᐁ ᑭᐢᑕᑭᒫᔨᐟ ᑭᓭᒪᓂᑐᐊᐧ. 47ᐁᑲᐧ ᒫᑲ ᓇᐢᑫᐧᐊᐧᓯᐃᐁᐧᐤ ᐱᑕᕒ, ᐊᐃᐧᔭᐠ ᒋ ᐊᔨᓯᔨᓂᐤ ᑭᑕ ᑭ ᑭᑕᐊᒫᑫᐤ ᓂᐱ, ᐅᑭ ᐁᑳ ᑭᑕ ᐹᑊᑕᐃᓯᐃᐧᐃᒋᐠ, ᑳ ᑭ ᒥᔨᑯᐃᐧᓯᒋᐠ ᑳ ᑲᓈᑎᓯᔨᐟ ᐊᐦᒑᐦᑲᐧ ᑖᐱᐢᑯᐨ ᑭᔮᓇᐤ? 48ᑭ ᐃᑕᓱᐁᐧᐤ ᒫᑲ ᑭᑕ ᐹᑊᑕᐃᓯᐃᐧᐃᒥᐦᐟ ᐅ ᐃᐧᔪᐃᐧᓂᔨᕽ ᒋᓴᐢ ᙭ᐊ. ᐁᑲᐧ ᒫᑲ ᑭ ᑲᑫᐧᒋᒣᐊᐧᐠ ᐁᑯᑕ ᑭᑕ ᐊᔮᔨᐟ ᓇᐦᐃ ᑕᐦᑐ ᑭᓯᑳᐊᐧ.
موجودہ انتخاب:
ᐃᓯᐦᒋᑫᐃᐧᓂᐋᐧᐊᐧ 10: KKMs
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
This Bible text is a corrected edition of the 1908 Western Cree Bible; it is in the public domain.