ᓂᐢᑕᒼ ᑲᕒᐃᐣᑎᔭᓇ 7
7
1ᐁᑲᐧ ᒫᑲ ᐊᓂᐦᐃ ᑳ ᑭ ᐯ ᐅᐦᒋ ᒪᓯᓇᐦᐊᒪᐃᐧᔦᐠ: ᒥᔮᐧᓯᐣ ᐊᔨᓯᔨᓂᐤ ᑭᑕ ᐁᑳ ᓵᒥᓈᐟ ᐃᐢᑫᐧᐊᐧ. 2ᒫᑲ, ᐱᓯᑳᐧᑎᓯᐃᐧᐣ ᐅᐦᒋ, ᑭᔮᒼ ᑲᐦᑭᔭᐤ ᓈᐯᐤ ᑭᑕ ᐊᔮᐁᐧᐤ ᐃᐧᔭ ᑎᐱᔭᐤ ᐃᐧᐊᐧ, ᒥᓇ ᑭᔮᒼ ᑲᐦᑭᔭᐤ ᐃᐢᑫᐧᐤ ᑭᑕ ᐊᔮᐁᐧᐤ ᐃᐧᔭ ᑎᐱᔭᐤ ᐅ ᓈᐯᒪ. 3ᑭᔮᒼ ᓈᐯᐤ ᑭᑕ ᑎᐱᑐᑕᐁᐧᐤ ᐃᐧᐊᐧ: ᒥᓇ ᐃᐢᑫᐧᐤ ᐁᑯᓯ ᐃᓯ ᒥᓇ ᐅᓈᐯᒪ. 4ᐃᐢᑫᐧᐤ ᓇᒪᐃᐧᔭ ᑎᐯᔨᑕᒼ ᐃᐧᔭᐤ, ᒫᑲ ᐅ ᓈᐯᒪ ᑎᐯᔨᒥᐠ: ᐁᑯᓯ ᒥᓇ ᓈᐯᐤ ᓇᒪᐃᐧᔭ ᑎᐯᔨᑕᒼ ᐃᐧᔭᐤ, ᒫᑲ ᐃᐧᐊᐧ ᑎᐯᔨᒥᐠ. 5ᐁᑳᐃᐧᔭ ᒪᐢᑲᒋᐃᑐᐠ, ᐱᑯ ᑭᐢᐱᐣ ᓇᐢᑯᒥᑐᐃᐧᐣ ᐅᐦᒋ ᐊᒋᔭᐤ, ᑭᑕ ᑭ ᐸᑭᑎᓂᓱᔦᐠ ᐊᔭᒥᐦᐋᐃᐧᓂᕽ, ᐁᑯᓯ ᒥᓇ ᑭᑕ ᐃᐧᒉᑐᔦᐠ, ᐁᑳ ᓭᑕᐣ ᑭᑕ ᑯᑌᔨᒥᑯᔦᐠ ᑭ ᓀᓱᐃᐧᓯᐃᐧᓂᐋᐧᐤ ᐅᐦᒋ. 6ᐃᔨᓇᒫᑫᐃᐧᐣ ᒫᑲ ᐃᐧᔭ ᐅᒪ ᑳ ᐃᑌᐧᔮᐣ, ᓇᒪᐃᐧᔭ ᐅᔭᓱᐁᐧᐃᐧᐣ. 7ᓇᐊᐧᐨ ᒫᑲ ᐱᑕᓀ ᑲᐦᑭᔭᐤ ᐊᔨᓯᔨᓂᐤ ᐃᓯ ᐊᔮᐟ ᓂᔭ ᑳ ᐃᓯ ᐊᔮᔮᐣ. ᒫᑲ ᑲᐦᑭᔭᐤ ᐊᔨᓯᔨᓂᐤ ᐊᔮᐤ ᐁ ᐃᓯ ᒥᔨᑯᐟ ᑭᓭᒪᓂᑐᐊᐧ, ᐯᔭᐠ ᐅᒥᓯ ᐃᓯ, ᐁᑲᐧ ᑯᑕᐠ ᐱᑐᐢ ᐃᓯ.
8ᒫᑲ ᐁᑳ ᑳ ᐃᐧᑭᑐᒋᐠ ᒥᓇ ᓯᑳᐃᐧᐢᑫᐧᐊᐧᐠ ᐅᒥᓯ ᓂᐟ ᐃᑖᐊᐧᐠ, ᒥᔮᐧᓯᓂᔨᐤ ᑭᑕ ᐃᓯ ᐊᔮᒋᐠ ᑖᐱᐢᑯᐨ ᑳ ᐃᓯ ᐊᔮᔮᐣ. 9ᒫᑲ ᑭᐢᐱᐣ ᓇᒪᐃᐧᔭ ᐊᔮᐊᐧᐠ ᐊᔨᓵᐅᐃᐧᐣ, ᑭᔮᒼ ᑭᑕ ᐃᐧᑭᑐᐊᐧᐠ: ᒋᑫᒫ ᓇᐊᐧᐨ ᒥᔮᐧᓯᐣ ᑭᑕ ᐃᐧᑭᑐᕽ ᐃᔨᑯᕽ ᐃᐧᔭ ᑭᑕ ᑲᐢᑫᔨᑕᒥᕽ. 10#ᒫᐟᔪ 5:32; 19:9; ᒫᕒᐠ 10:11,12; ᓬᐅᐠ 16:18ᒫᑲ ᑳ ᐃᐧᑭᑐᒋᐠ ᓂᐟ ᐊᔮᑳᐧᒥᒫᐊᐧᐠ, ᓇᒪᐃᐧᔭ ᒫᑲ ᓂᔭ, ᒫᑲ ᑳ ᑎᐯᔨᐦᒋᑫᐟ, ᐃᐢᑫᐧᐤ ᐁᑳ ᑭᑕ ᓇᑲᑖᐟ ᐅ ᓈᐯᒪ 11(ᒫᑲ ᑭᐢᐱᐣ ᓇᑲᑖᒋ, ᑭᔮᒼ ᐁᑯᓯ ᑫ ᐃᓯ ᐯᔭᑯᐟ, ᐊᐦᐳ ᐃᐧ ᑭᐁᐧᑐᑕᐊᐧᒋ ᐅ ᓈᐯᒪ); ᒥᓇ ᓈᐯᐤ ᐁᑳᐃᐧᔭ ᑭᑕ ᓇᑲᑌᐤ ᐃᐧᐊᐧ. 12ᒫᑲ ᑯᑕᑲᐠ ᓂᐟ ᐃᑖᐊᐧᐠ, ᓇᒪᐃᐧᔭ ᑳ ᑎᐯᔨᐦᒋᑫᐟ; ᑭᐢᐱᐣ ᐊᐃᐧᔭᐠ ᐅᒋᐋᐧᒥᒫᐤ ᐊᔮᐋᐧᒋ ᐁᑳ ᐁ ᑖᐯᐧᑕᒥᔨᐟ ᐃᐧᐊᐧ, ᐁᑯᓯ ᐃᑌᔨᑕᒥᔨᐟ ᑭᑕ ᐃᐧᒉᐃᐧᑯᐟ, ᐁᑳᐃᐧᔭ ᑭᑕ ᓇᑲᑌᐤ. 13ᒥᓇ ᐃᐢᑫᐧᐤ ᐁᑳ ᑳ ᑖᐯᐧᑕᒥᔨᐟ ᐅ ᓈᐯᒪ, ᐁᑯᓯ ᐁ ᐃᑌᔨᑕᒥᔨᐟ ᑭᑕ ᐃᐧᒉᐃᐧᑯᐟ, ᐁᑳᐃᐧᔭ ᑭᑕ ᓇᑲᑌᐤ ᐅ ᓈᐯᒪ. 14ᒋᑫᒫ ᐊᓇ ᐁᑳ ᑳ ᑖᐯᐧᑕᕽ ᓈᐯᐤ ᑲᓈᒋᐃᐠ ᐃᐧᐊᐧ, ᐁᑯᓯ ᐁᑳ ᑳ ᑖᐯᐧᑕᕽ ᐃᐢᑫᐧᐤ ᑲᓈᒋᐃᐠ ᐅ ᓈᐯᒪ: ᑭᐢᐱᐣ ᐁᑳ ᐁᑯᓯ ᓇᒪᐃᐧᔭ ᐅ ᑲ ᐯᑭᓯᑖᐋᐧᐤ ᑭᐟ ᐊᐋᐧᓯᒥᓯᐋᐧᐊᐧᐠ; ᒫᑲ ᐁᑲᐧ ᑲᓈᑎᓯᐊᐧᐠ. 15ᒫᑲ ᑭᐢᐱᐣ ᐊᓇ ᐁᑳ ᑳ ᑖᐯᐧᑕᕽ ᐃᐧ ᓯᐯᐧᑌᒋ, ᑭᔮᒼ ᑭᑕ ᓯᐯᐧᑌᐤ, ᐅᒋᐋᐧᒥᒫᐤ ᐊᐦᐳ ᐅᑕᐁᐧᒪᐃᐧᒪᐤ ᓇᒪᐃᐧᔭ ᒥᒋᒥᓂᑳᓱ ᐁᑯᓯ ᐃᓯ: ᒫᑲ ᑭᓭᒪᓂᑐ ᑭ ᑭ ᓇᑐᒥᑯᓇᐤ ᐯᔭᑕᑫᔨᒧᐃᐧᓂᕽ. 16ᑫᐧᓵᐧᐣ ᐁᑳ, ᑭᔭ ᐃᐢᑫᐧᐤ, ᑭ ᑲ ᑭ ᐱᒫᒋᐦᐋᐤ ᑭ ᓈᐯᒼ? ᐊᐦᐳ ᑭᔭ, ᓈᐯᐤ, ᑫᐧᓵᐧᐣ ᐁᑳ ᑭ ᑲ ᑭ ᐱᒫᒋᐦᐋᐤ ᑭᐊᐧ?
17ᐱᑯ, ᑳ ᑎᐯᔨᐦᒋᑫᐟ ᑳ ᑭ ᐃᓯ ᒥᔮᐟ ᒐᒉᑊ ᐊᔨᓯᔨᓂᐊᐧ, ᑭᓭᒪᓂᑐᐊᐧ ᑳ ᑭ ᐃᓯ ᓇᑐᒥᑯᐟ, ᐁᑯᓯ ᑭᑕ ᐃᓯ ᐱᒧᐦᑌᐤ. ᐁᑯᓯ ᒫᑲ ᐁᓯ ᐅᔭᑭᑕᒪᐊᐧᑭᐠ ᒥᓯᐁᐧ ᐃᑌ ᐅᑕᔭᒥᐦᐋᐊᐧᐠ. 18ᐊᐃᐧᔭᐠ ᒋ ᐊᔨᓯᔨᓂᐤ ᒥᓇ ᑭ ᓇᑐᒫᐤ ᐁ ᓴᕒᑲᒼᓴᐃᓯᐃᐧᐟ? ᑭᔮᒼ ᐁᑳᐃᐧᔭ ᑭᑕ ᐃᓯ ᐊᔮᐤ ᐁᑳ ᑭᑕ ᓴᕒᑲᒼᓴᐃᓯᐃᐧᐟ. ᐊᐃᐧᔭᐠ ᒋ ᑭ ᓇᑐᒫᐤ ᐁᑳ ᐁ ᓴᕒᑲᒼᓴᐃᓯᐃᐧᐟ? ᑭᔮᒼ ᐁᑳᐃᐧᔭ ᑭᑕ ᓴᕒᑲᒼᓴᐃᓯᐃᐧᐤ. 19ᓴᕒᑲᒼᓴᐃᓯᐃᐧᐃᐧᐣ ᓇᒪ ᓈᐣᑕᐤ, ᒥᓇ ᐁᑳ ᐁ ᓴᕒᑲᒼᓴᐃᓯᐃᐧᕽ ᓇᒪ ᓈᐣᑕᐤ; ᒫᑲ ᐁ ᑲᓇᐁᐧᔨᑕᒥᕽ ᐅᔭᓱᐁᐧᐃᐧᓇ ᑭᓭᒪᓂᑐ. 20ᑭᔮᒼ ᑲᐦᑭᔭᐤ ᐊᔨᓯᔨᓂᐤ ᑭᑕ ᐊᔮᐤ ᐅᐟ ᐃᓯ ᐊᔮᐃᐧᓂᕽ ᐃᑕ ᑳ ᑭ ᓇᑐᒥᐦᐟ. 21ᑭ ᑭ ᓇᑐᒥᑲᐃᐧᐣ ᒋ ᒣᑳᐧᐨ ᐁ ᒥᒋᒪᐱᓱᐃᐧ ᐊᑐᐢᑫᔮᑲᓂᐃᐧᔭᐣ? ᐁᑳᐃᐧᔭ ᓈᐣᑕᐤ ᐃᑌᔨᑕ: ᒫᑲ ᑭᐢᐱᐣ ᑲᐢᑭᑖᔭᓂ ᑭᑕ ᑎᐯᔨᒥᓱᔭᐣ, ᓇᐊᐧᐨ ᐁᐊᐧᑯ ᐋᐸᒋᑕ. 22ᒋᑫᒫ ᐊᓇ ᑳ ᑭ ᓇᑐᒥᑯᐟ ᑳ ᑎᐯᔨᐦᒋᑫᔨᐟ, ᒣᑳᐧᐨ ᐁ ᒥᒋᒪᐱᓱᐃᐧ ᐊᑐᐢᑫᔮᑲᓂᐃᐧᐟ, ᐁᐊᐧᑯ ᑳ ᑎᐯᔨᐦᒋᑫᐟ ᐅ ᑎᐯᔨᒥᓱᐋᑲᓇ: ᐁᑯᓯ ᒥᓇ ᐊᓇ ᑳ ᑭ ᓇᑐᒥᐦᐟ ᐁ ᑎᐯᔨᒥᓱᐟ, ᐁᐊᐧᑯ ᙭ ᐅ ᒥᒋᒪᐱᓱᐃᐧ ᐊᑐᐢᑫᔮᑲᓇ. 23ᑭ ᑭ ᑭᐢᐱᓇᑎᑲᐃᐧᓈᐋᐧᐤ ᒥᐢᑕᐦᐃ ᑎᐸᐦᐃᑫᐃᐧᐣ ᐅᐦᒋ; ᐁᑳᐃᐧᔭ ᐊᔨᓯᔨᓂᐊᐧᐠ ᒥᒋᒪᐱᓱᐃᐧ ᐊᑐᐢᑳᑯᐠ. 24ᓂᒋᐋᐧᒥᑎᐠ, ᑭᔮᒼ ᑕᐦᑐ ᐊᔨᓯᔨᓂᐤ, ᐃᑕ ᑳ ᑭ ᐃᓯ ᓇᑐᒥᐦᐟ, ᐁᑯᑕ ᑭᑕ ᐃᐧᒋ ᐊᔮᒣᐤ ᑭᓭᒪᓂᑐᐊᐧ.
25ᐁᑲᐧ ᒫᑲ ᐅᐢᑭᓂᑭᐢᑫᐧᐊᐧᐠ ᐅᐦᒋ ᓇᒪᐃᐧᔭ ᓄᐦᒋ ᐅᔭᓱᐋᐧᑎᐠ ᑳ ᑎᐯᔨᐦᒋᑫᐟ: ᒫᑲ ᓂ ᒣᑭᐣ ᓂᐟ ᐃᑌᔨᑕᒧᐃᐧᐣ, ᐁ ᑭ ᐃᓯ ᒥᔨᑯᐃᐧᓯᔮᐣ ᐅ ᑭᓭᐋᐧᑎᓯᐃᐧᐣ ᑳ ᑎᐯᔨᐦᒋᑫᐟ ᑭᑕ ᐊᔮᑳᐧᒥᓯᔮᐣ. 26ᐅᒪ ᒫᑲ ᒥᔮᐧᓯᐣ ᓂᐟ ᐃᑌᔨᑌᐣ ᐊᓄᐦᐨ ᒣᑳᐧᐨ ᑳ ᐃᓯ ᐋᔨᒪᕽ, ᓇᐊᐧᐨ ᒥᔮᐧᓯᐣ ᐊᔨᓯᔨᓂᐤ ᑭᑕ ᐃᓯ ᐊᔮᐟ ᑳ ᐃᓯ ᐊᔮᐟ ᐊᓄᐦᐨ. 27ᑭ ᒥᒋᒪᐱᓱᐣ ᒋ ᐁ ᐃᐧᐃᐧᔭᐣ? ᐁᑳᐃᐧᔭ ᓇᑐᓇ ᑭᑕ ᐋᐱᑯᓂᑲᐃᐧᔭᐣ. ᑭ ᑭ ᐋᐱᑯᓂᑲᐃᐧᐣ ᒋ ᐁ ᐃᐧᐃᐧᔭᐣ? ᐁᑳᐃᐧᔭ ᓇᑐᓇ ᑭᑕ ᐃᐧᐃᐧᔭᐣ. 28ᒫᑲ ᑭᐢᐱᐣ ᐃᐧᑭᑐᔭᓂ, ᓇᒪᐃᐧᔭ ᑭ ᐊᐧᓂᑐᑌᐣ; ᒥᓇ ᑭᐢᐱᐣ ᐅᐢᑭᓂᑭᐢᑫᐧᐤ ᐃᐧᑭᑐᒋ, ᓇᒪᐃᐧᔭ ᐊᐧᓂᑐᑕᒼ. ᒫᑲ ᐁᐊᐧᑯᓂᐠ ᑫ ᐊᔮᒋᐠ ᐋᔨᒥᓯᐃᐧᐣ ᐃᐧᔮᓯᐃᐧᐃᐧᓂᕽ: ᐁᑯᓯ ᑭ ᐃᐧ ᒪᓈᒋᐃᑎᓈᐋᐧᐤ. 29ᒫᑲ ᐅᒪ ᓂᐟ ᐃᑖᐧᐣ, ᓂᒋᐋᐧᒥᑎᐠ, ᓇᒪᐃᐧᔭ ᑭᓀᐧᐢ ᑭᐟ ᐊᔮᓈᓇᐤ, ᐁᑯᓯ ᒫᑲ ᐊᓂᑭ ᑳ ᐃᐧᐃᐧᒋᐠ ᑭᑕ ᐃᐧ ᐃᓯ ᐊᔮᐊᐧᐠ ᑖᐱᐢᑯᐨ ᐁᑳ ᐁ ᐃᐧᐃᐧᒋᐠ; 30ᒥᓇ ᐊᓂᑭ ᑳ ᒫᑐᒋᐠ, ᑖᐱᐢᑯᐨ ᐁᑳ ᐁ ᒫᑐᒋᐠ; ᒥᓇ ᐊᓂᑭ ᑳ ᒥᔭᐋᐧᑕᑭᐠ, ᑖᐱᐢᑯᐨ ᐁᑳ ᐁ ᒥᔭᐋᐧᑕᑭᐠ; ᒥᓇ ᐊᓂᑭ ᑳ ᐊᔭᑖᐁᐧᒋᐠ, ᑖᐱᐢᑯᐨ ᐁᑳ ᑫᑲᐧᐩ ᐁ ᐊᔮᒋᐠ; 31ᒥᓇ ᐊᓂᑭ ᑳ ᐋᐸᒋᑖᒋᐠ ᐅᒪ ᐊᐢᑭ, ᐁᑳ ᑭᑕ ᐅᓵᒥᑲᑭᐠ: ᒋᑫᒫ ᐁ ᐃᓯ ᐊᔮᐠ ᑭᔨᐸ ᐊᑎ ᒣᒋᐸᔨᐤ. 32ᒫᑲ ᑭ ᓇᑕᐁᐧᔨᒥᑎᓈᐋᐧᐤ ᐁᑳ ᒥᑯᐢᑳᑌᔨᑕᒧᐃᐧᐣ ᑭᑕ ᐊᔮᔦᐠ. ᐊᓇ ᐁᑳ ᑳ ᐃᐧᑭᑐᐟ ᐊᔮᑳᐧᒣᔨᑕᒼ ᐊᓂᐦᐃ ᑳ ᑎᐯᔨᐦᒋᑫᔨᐟ ᑳ ᐃᓯ ᓇᑕᐁᐧᔨᑕᒥᔨᐟ, ᑭᑕ ᑭ ᓇᐦᐃᔭᐁᐧᐋᐟ ᑳ ᑎᐯᔨᐦᒋᑫᔨᐟ: 33ᒫᑲ ᐊᓇ ᑳ ᐃᐧᑭᑐᐟ ᐊᔮᑳᐧᒣᔨᑕᒼ ᐊᐢᑭᐃᐧ ᑫᑲᐧᔭ, ᑭᑕ ᑭ ᐃᓯ ᓇᐦᐃᔭᐁᐧᐋᐟ ᐃᐧᐊᐧ. 34ᐱᑐᐢ ᒥᓇ ᑳ ᐅ ᓈᐯᒥᐟ ᒥᓇ ᐅᐢᑭᓂᑭᐢᑫᐧᐤ. ᐊᓇ ᐁᑳ ᑳ ᐅ ᓈᐯᒥᐟ ᐊᔮᑳᐧᒣᔨᑕᒼ ᐊᓂᐦᐃ ᑳ ᑎᐯᔨᐦᒋᑫᔨᐟ ᑳ ᐃᓯ ᓇᑕᐁᐧᔨᑕᒥᔨᐟ, ᑭᑕ ᑭ ᑲᓈᑎᓯᐟ ᐃᐧᔭᐃᐧᕽ ᒥᓇ ᐅᐟ ᐊᐦᒑᐦᑯᕽ: ᒫᑲ ᐊᓇ ᑳ ᐅ ᓈᐯᒥᐟ ᐊᔮᑳᐧᒣᔨᑕᒼ ᐊᐢᑭᐃᐧ ᑫᑲᐧᔭ, ᑭᑕ ᑭ ᐃᓯ ᓇᐦᐃᔭᐁᐧᐋᐟ ᐅ ᓈᐯᒪ. 35ᐅᒪ ᒫᑲ ᓂᐟ ᐃᑖᐧᐣ ᑭᑕ ᐋᐸᒋᐃᑯᔦᐠ; ᓇᒪᐃᐧᔭ ᐁ ᐃᐧ ᒥᒋᒪᐱᑎᑕᑯᐠ, ᒫᑲ ᐊᓂᒪ ᐁ ᐃᓯ ᓇᐃᓈᑲᐧᕽ, ᒥᓇ ᑭᑕ ᑭ ᐊᑐᐢᑲᐋᐧᔦᐠ ᑳ ᑎᐯᔨᐦᒋᑫᐟ ᐁᑳ ᑫᑲᐧᐩ ᐁ ᐅᑕᒣᔨᑕᒥᐃᑯᔦᐠ.
36ᒫᑲ ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᓇᒪᐃᐧᔭ ᓂ ᒥᔪᑲᑕᐋᐧᐤ ᐃᑌᔨᒫᒋ ᐅᑖᓂᓴ ᐁ ᐅᐢᑭᓂᑭᐢᑫᐧᐃᐧᔨᐟ, ᒥᓇ ᐊᑎ ᒪᔮᐢᑲᒥᔨᒋ ᐁ ᑮᓯᓂᑖᐃᐧᑭᔨᐟ, ᑭᐢᐱᐣ ᐃᓯ ᓇᑕᐁᐧᔨᑖᑲᐧᑭ, ᑭᔮᒼ ᑭᑕ ᐃᑐᑕᒼ ᐁ ᐃᑌᔨᑕᕽ, ᑭᔮᒼ ᑭᑕ ᐃᐧᑭᑐᐊᐧᐠ. 37ᒫᑲ ᐊᓇ ᑳ ᐋᔮᑌᔨᑌᕽ ᐅᑌᐃᕽ, ᐁᑳ ᐁ ᑭᐧᑕᐁᐧ ᐃᑎᐟ, ᒫᑲ ᐁ ᑲᐢᑭᑖᐟ ᑭᑕ ᐃᑐᑕᕽ ᐁ ᐃᑌᔨᑕᕽ, ᒥᓇ ᐁ ᑭ ᑭᓭᔨᑕᕽ ᐅᑌᐃᕽ, ᑭᑕ ᑲᓇᐁᐧᔨᒫᐟ ᐅᑖᓂᓴ ᐁ ᐅᐢᑭᓂᑭᐢᑫᐧᐃᐧᔨᐟ, ᑲᐧᔭᐢᐠ ᑭᑕ ᐃᑐᑕᒼ. 38ᐁᑯᓯ ᒫᑲ ᑖᐱᐢᑯᐨ ᐊᓇ ᑳ ᒣᑭᐟ ᐁ ᐅᐢᑭᓂᑭᐢᑫᐧᐃᐧᔨᐟ ᐅᑖᓂᓴ ᑭᑕ ᐃᐧᑭᑐᔨᐟ ᒥᔪ ᐃᑐᑕᒼ; ᒫᑲ ᐊᓇ ᐁᑳ ᑳ ᒣᑭᐟ ᑭᑕ ᐃᐧᑭᑐᔨᐟ ᐊᔨᐋᐧᐠ ᑭᑕ ᒥᔪ ᐃᑐᑕᒼ.
39ᐃᐢᑫᐧᐤ ᒥᒋᒪᐱᓱ ᐃᐢᑯ ᐁ ᐱᒫᑎᓯᔨᐟ ᐅ ᓈᐯᒪ; ᒫᑲ ᑭᐢᐱᐣ ᐅ ᓈᐯᒪ ᐳᓂ ᐱᒫᑎᓯᔨᒋ, ᑎᐯᔨᒥᓱ ᑭᑕ ᐃᐧᑭᒫᐟ ᐊᐃᐧᔮ ᐁ ᐃᑌᔨᑕᕽ; ᐱᑯ ᑳ ᑎᐯᔨᐦᒋᑫᐟ ᐃᓯ. 40ᒫᑲ ᓇᐊᐧᐨ ᒥᔪ ᐊᔮᐤ ᑭᐢᐱᐣ ᑳ ᐃᓯ ᐊᔮᐟ ᐁᑯᓯ ᐃᓯ ᐊᔮᒋ, ᓂᔭ ᐃᐧᔭ ᓂᐟ ᐃᑌᔨᑌᐣ: ᓂ ᑭᑭᐢᑳᐠ ᒫᑲ ᐁᑐᑫ ᑭᓭᒪᓂᑐ ᐅᐟ ᐊᐦᒑᐦᑲᐧ.
موجودہ انتخاب:
ᓂᐢᑕᒼ ᑲᕒᐃᐣᑎᔭᓇ 7: KKMs
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
This Bible text is a corrected edition of the 1908 Western Cree Bible; it is in the public domain.