Mat. 15
15
Ketanem te menge kemonaan
Mat. 15:1-9; Mar. 7:1-13
1Nayan, doen menge Parisiyo aw menenoladà te punù ingkeliwat i Moises dimoton ki Jesus lekat te Jerusalem. Minikagi dan diyà kandin, 2“Eglàpang se menge tinoledaan no te ketanem te kemonaan tadon, so kenà dan eg-onaw te belad dan te eked dan pa kaen.”
3Minikagi si Jesus, “Eglàpang kaw heman te punù te Timanem pineokit te pegtaking niyo te ketanem te kemonaan niyo. 4Migpunù se Timanem, ‘Keilangan segmanen no se amay aw inay nikaw.’ Migpunù heman sikandin, ‘Keilangan imetayan se otaw megtindaet te amay aw inay din.’ 5Meneng egtoladà kaw te mepakay aw eked pegsagman se otaw te amay aw inay din aw olò mikagi diyà kandan, ‘Se itabang ko peden kenyo, yan se tapay ko imbegay diyà te Timanem.’ 6Meneng pineokit te pegtaking niyo te ketanem sìyan, timinàyog kaw den te kagi te Timanem te keilangan segmanen niyo se amay aw inay niyo. 7Tay law. Eden niyo aw egpenimanem kaw. Sikiyo se tinedoan te kagi te Timanem ingkeliwat i Isaias gebii,
8‘Pengkey eg-ikagi se otaw sìyan te egtaking dan kanak, meneng wedà kelobos se pedowan dan diyà kanak. 9Wedad ontong te pegsimba dan kanak, so se ketanem te otaw ipegtoladà dan, yan se ininang dan punù te Timanem.’”
Kelekatan te salà
Mat. 15:10-20; Mar. 7:14-23
10Nayan, medita se otaw netipon kidoen, aw timawal si Jesus diyà kandan amon megpedapag dan diyà kandin. Minikagi sikandin, “Penenalan kaw kanak amon mekelabet kaw kani. 11Kenà egpekesalà se otaw pineokit te iawop din diyà te bahà din. Meneng egpekesalà se otaw pineokit te lomowà lekat te bahà din.”
12Penga niyan, dimoton se menge tinoledaan i Jesus kandin, aw minikagi dan, “Neopal den se menge Parisiyo tepad te inikagi no sìyan.”
13Minikagi si Jesus, “Pegbàtan dan te Amay ko eg-ogpà doton te langit, iling te sagbet pispisen doton te pawà. 14Pebeyai niyo se menge Parisiyo. Iling dan te otaw bota megtelaman mengibing te doma. Meneng wedad otaw bota mekeagak te doma din bota, so medagdag se didowa dan doton te awang te tanà.”
15Minikagi si Pedro, “Lebadi diyà kenami se tegdeyanan intoladà no gina.”
16Minikagi si Jesus, “Nepela a so iling kaw heman te doma otaw wedà pekelabet. 17Pengkey eden se kànen iawop diyà te bahà te otaw, yan se domeleg doton te getek, aw penga niyan lomowà lekat te lawa. 18Meneng se kagi lomowà lekat te bahà te otaw, lekat iyan te pedowan din, aw yan se doun te egpekesalà se otaw. 19Pedowan se kelekatan te medaet ibeg te otaw egbonò, aw eglakad, aw egpenakaw, aw egkebolalaw, aw egbaet-baet. 20Egpekesalà se otaw pineokit te kedita niyan. Meneng kenà egpekesalà se otaw kenà eg-onaw te belad te eked pa kaen.”
Pegsalig te bayi kenà Judiyo
Mat. 15:21-28; Mar. 7:24-30
21Nesayo si Jesus lekat kidoen aw dimoton te probinsya medapag te lonsod te Tiro aw Sidon. 22Doen bayi mig-ogpà kidoen kenà Judiyo so lekat te Canaan se menge kemonaan din. Dimoton sikandin ki Jesus aw minikagi te dakel se kagi din, “Sir, bowad-bowad i David, keidowi a bag, so ontò dinetengan te bosaw se batà ko bayi.”
23Meneng wedà sikandin segmani i Jesus. Yan dimoton se menge tinoledaan i Jesus kandin aw nemoyò dan, kagi dan, “Pekeseyowi se bayi sìyan, so egtaking kenitadon aw gayed egbelisì.”
24Minikagi si Jesus, “Olò menge bowad-bowad i Israel se sinogoan kanak tebangan ko, so iling dan te menge karniro migketading.”
25Nayan, migpedapag se bayi diyà ki Jesus, aw limongken diyà kandin, aw minikagi, “Sir, tebangi a bag.”
26Mig-indan si Jesus te tegdeyanan amon metaga-taga se bayi te olò menge Judiyo se tebangan din, kagi din, “Eked kepakay aw ebaten te otaw se kànen te menge batà din amon ibegay din diyà te menge toyang.”
27Minikagi se bayi, “Sir, benal iyan. Meneng mepakay aw komaen se toyang te momò medagdag lekat te lemisa te tig-apò.”
28Penga niyan, minikagi si Jesus, “Tiyà, ontò ka simalig kanak. Tomanen ko den se ibeg nikaw.”
Pegketà, negolian se batà din.
Pinegolì i Jesus se medita otaw
29Nayan, nesayo si Jesus lekat kidoen, aw minokit te kilid te lanaw te Galiliya. Timikedeg sikandin te bontod medapag, aw nenenoo kidoen. 30Ontò medita se otaw dimoton kandin, aw inibing dan heman se menge doma otaw doen medita kemolò te mesakit. Doen menge kapig, aw nepantig, aw bota, aw omo, aw medita heman se doma otaw doen mesakit. Insawol dan doton dapag i Jesus, aw pinegolian din dan. 31Nepela se kedita te otaw, so kinità den dan te minikagi den se omo, aw negolian se nepantig, aw minipanaw se kapig, aw kimità den se bota. Yan se doun te dimuyun dan te Timanem egseligan te menge bowad-bowad i Israel.
Impekaen i Jesus se epat melalan otaw
Mat. 15:32-39; Mar. 8:1-10
32Na, penga niyan, tinawal i Jesus se menge tinoledaan din, aw minikagi sikandin, “Neidowan ko den se menge otaw dini, so netelowan den dan timaking kanak, aw wedad den kànen dan. Eked kepakay aw ipeolì ko dan te binallos dan pa, so metapì dan kidoen te dalan.”
33Minikagi se tinoledaan din, “Meneng kebigtilan ini, aw wedad palos ebatan tadon te pan botong te ipekaen tadon kandan, so ontò dan medita.”
34Mig-insà si Jesus, “Pila lay se pan inibing niyo?”
Timaba dan, “Pito olò, aw pilabok se ikan dedeitek.”
35Penga niyan, impeonsad din se kedita te otaw diyà te tanà. 36Inabat din se pito pan aw ikan, aw migpesiontong diyà te Timanem kenyan. Binelà-belà din iyan, aw imbegay din diyà te menge tinoledaan din, aw inteped dan diyà te menge otaw netipon. 37Kimaen se kedita dan aw nebesog dan. Penga niyan, inimon dan se samà te pan kinaen dan, aw pito se boliyas nepenò. 38Menge epat melalan se meama kimaen kenyan, aw wedà bilangi se menge bayi aw mengisù.
39Penga niyan, impeolì i Jesus se kedita dan, aw simakay sikandin te belangay aw dimoton te probinsya medapag te Magadan.
موجودہ انتخاب:
Mat. 15: mbs
سرخی
شئیر
کاپی
Want to have your highlights saved across all your devices? Sign up or sign in
© 1982, Wycliffe Bible Translators, Inc. All rights reserved.