MATHAIA 15
15
Upate thu rochhiah
(Mk. 7:1-13)
1Chumi lai chuan Jerusalem aṭangin Farisai te leh Dan zirtîrtute chu Isua hnênah an lo kal a. 2“Engati nge i zirtîrten upate thu rochhiah an bawhchhiat ṭhin? Chaw an eiin an kut an sil ngai lo,” an ti a. 3Ani chuan a chhâng a, “Nangni pawhin engati nge in thu rochhiah avânga Pathian thupêk in bawhchhiat ni? 4Pathian chuan,#15:4 Mss ṭhenkhatah ‘thu pein’ tih a tel. ‘I nu leh i pa chawimawi rawh; mahni nu emaw, pa emaw sawichhia chu a thi ngei tûr a ni,’ a ti a. 5Nangni erawh chuan ‘Tu pawh, a nu emaw, a pa emaw hnêna i mi chhawrna tûr zawng zawng chu Pathian hnêna pêk a ni tawh, titu chuan a nu leh#15:5 Mss ṭhenkhatah ‘nu’ tiha tel lo. a pa a chawimawi a ngai tawh lo’ in ti ṭhîn. 6Tichuan, in thu rochhiah avâng hian Pathian thu#15:6 Mss ṭhenkhatah ‘Dan’ tih a ni. chu in bawh bo a nih hi. 7Vervêkte u, Isaian hetia in chungchâng thu a lo sawi lâwk hi a tidik ngawt mai:
8‘He mite hian an hmuiin mi chawimawi a,
An thinlung erawh chuan mi hlat si. #Isa. 29:13 (LXX).
9Thurin ang hrimin mihring thupêkte an zirtîr a,
An mi biakna hi a thlâwn mai a ni,’ tih hi,” a ti a.
Mihring tibawlhhlawhtu
(Mk. 7:14-23)
10Tin, mipui chu a ko va, an hnênah, “Ngaithla ula, hre fiah rawh u. 11Kâa lût chuan mihring a tibawlhhlawh lo va, kâa chhuak chuan, chu ngei chuan mihring a tibawlhhlawh zâwk ṭhîn a ni,” a ti a. #Tirh. 10:14,15; 1 Tim. 4:3.
12Chumi lai chuan a zirtîrte an lo kal a, a hnênah, “Farisai-ten kha thu kha an hriatin an lungnih loh hle kha i hria em?” an ti a. 13Ani erawh chuan a chhâng a, “Kûng eng pawh, ka Pa vâna mi phun loh chu pawh chhuah a ni ang. #Isa. 60:21; Jn. 15:2. 14Anni chu pawisa suh u, hruaitu mitdel an ni. Mitdelin mitdel vêk a hruai chuan khuarkhurumah an tla dûn ang,” a ti a. #Mt. 23:16,24; Lk. 6:39; Rom. 2:19.
15Peteran a chhâng a, “Tehkhin thu kha min hrilh fiah ta che,” a ti a. 16Ani chuan, “Nangni pawh chuti êma mâwl in la ni cheu elo? 17Kâa lût apiang chu pumah a tla thla a, dailênnaah paih chhuah a ni tih in hre lâwm ni? 18Kâa chhuakte erawh chu thinlung aṭanga lo chhuak a ni a, chûng ngei chuan mihring a tibawlhhlawh ṭhîn a ni. #Mt. 12:34. 19Thinlung aṭang hian ngaihtuahna sual te, tualthahna te, uirena te, inngaihna te, rûkrûkna te, dâwta hêk te, Pathian pawisawina te a lo chhuak si ṭhîn a.#Mk. 7:15. 20Chûng chu mihring tibawlhhlawhtu chu a ni; kut sil lova chaw ei erawh hi chuan mi a tibawlhhlawh lo ve,” a ti a.
Surofoiniki nu rinna
(Mk. 7:24-30)
21Chuta ṭang chuan Isua a chhuak a, Tura leh Sidon khaw bialah a kal ta a. 22Ngai teh, chûng lai rama mi, Kanan hmeichhe pakhat a lo kal a, “Lalpa, Davida Fapa, mi khawngaih rawh, ka fanu ramhuaiin a man tlat#15:22 Mss ṭhenah ‘bengngawng’ tih a tel. a ni,” tiin a au va. 23Ani erawh chuan kam khat mahin a chhâng lo. A zirtîrte chuan, “Kan hnungah a au a au si a, kaltîr mai rawh,” tiin an rawn ngên a. 24Ani erawh chuan, “Berâm bo, Israel hnam hnênah lo chuan tirh ka ni lo ve,” a ti a, a chhâng a.#Mt. 10:6,23. 25Nimahsela, hmeichhia chu a lo kal a, “Lalpa, mi pui rawh,” tia kûnin chibai a rawn bûk a. 26Ani chuan, “Fate chaw lâksaka uite hnêna pêk chu a âwm lo ve,” a ti a. 27Ani chuan, “A ni khawp mai, Lalpa; nimahsela, uite pawhin an pu dawhkân ata ei nawi tla chu an ei ṭhîn alâwm,” a ti a. 28Chu veleh Isuan a chhâng a, “Hmeichhia, i ring nasa êm mai a, i duh ang takin i chungah thleng rawh se,” a ti a. Tichuan, a fanu chu chumi a chinah chuan a lo dam ta a. #Mt. 9:22,28; Mk. 10:52; Lk. 7:50; 17:19.
Mi tam tak tihdam
29Chuta ṭang chuan Isua a chhuak a, Galili dîl kam a hrût a; tlângah a chho va, chutah chuan a ṭhu ta a. #Mk. 7:31-37. 30Kebai te, piangsual te, mitdel te, ṭawngtheilo te leh mi dang tam tak rawn hruaiin mipui nasa tak an lo kal a, a ke bulah an dah a; ani chuan a lo tidam ta hlawm a. 31Mipui chuan ṭawngtheilote chu lo ṭawnga, piangsualte chu lo ṭhaa, kebaite chu kea kala,#15:31 Mss ṭhenah ‘bengngawng’ tih a tel. mitdelte mit lo vâr zo ta chu an hmuhin mak an ti hle a; tichuan, Israel-te Pathian chu an fak a.
Mi sângli hrai
(Mk. 8:1-10)
32Isuan a zirtîrte chu a ko va, “Mipuiho hi ka khawngaih êm êm a ni, ka hnênah ni thum an awm tawh a, ei tûr lah an nei tawh si lo, rilṭâma hawtîr mai ka hreh a ni; chutilo chu, kawng lakah an ṭâmchhâwl dah ang e,” a ti a. 33Zirtîrte chuan a hnênah, “Thlalêrah mipui heti zozai hraina khawp chhang khawi ata nge kan hmuh ang?” an ti a. 34Isuan an hnênah, “Chhang eng zât nge in neih?” a ti a. Anni chuan, “Pasarih, sangha tlêm tê nên,” an ti a. 35Tichuan, mipui chu leia ṭhu tûrin thu a pe a. 36Chhang pasarih leh sanghate chu a la a, lâwmthu a sawi zawhin a phel a, zirtîrte a pe a, zirtîrte chuan mipui chu an pe a. 37An vaiin an ei a, an tlai ta hlawm a, an sem bâng chu bâwm sarihah an dah khat a. 38A eitute chu hmeichhia leh naupang tiam lovin patling ngawt pawh sângli an ni a. 39Mipui chu a ṭîntîr hnuin lawngah a chuang a, Magadan#15:39 Mss ṭhenkhatah ‘Megadon, Magdala’ tihte a ni. ramah a kal ta a.
موجودہ انتخاب:
MATHAIA 15: MIZCLBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.