MATHAIA 13
13
Buh chi thehtu tehkhin thu
(Mk. 4:1-9; Lk. 8:4-8)
1Chumi ni chuan Isua chu in ata a chhuak a, dîl kamah a ṭhu a. 2A hnênah mipui nasa tak an lo pung khâwm a; tichuan, lawngah a chuang a, a ṭhu a; mipui zawng zawng chu ṭiauphovah an ding a. #Lk. 5:1-3.
3Thu tam tak an hnênah tehkhin thuin a sawi a: “Ngai teh u, buh chi thehtu buh chi theh tûrin a feh a. 4A han theh chuan a ṭhen kawngah a tla a, savaten an rawn tlân zo ta mai a. 5A ṭhen pialtlêp chung lei pan hmunah a tla a, lei a chhah lo va, a lo ṭo thuai a; 6nimahsela, ni a lo tlângsâng deuh va, a em vuai a, zung a kaih theih loh avângin a râwp ta mai a. 7A ṭhen hnimhlîngnei zîngah a tla a, hnim chu a lo ṭhang a, a dîp ral ta a. 8Ṭhenkhat chu lei ṭhaah a tla a, ṭhenkhat a lêt za te, ṭhenkhat a lêt sawmruk te, ṭhenkhat a lêt sawmthum tein a lo rah ta a. 9Ngaihthlâkna beng nei chuan ngaithla ngun rawh se,” a ti a.
Tehkhin thu hman chhan
(Mk. 4:10-12; Lk. 8:9,10)
10Zirtîrte chu an lo kal a, a hnênah, “Engati nge an hnênah tehkhin thuin i sawi?” an ti a.
11Ani chuan a chhâng a, “Vânram thu ril chu nangni hriat atân tih a ni a, an hriat atân tih a ni ve lo. 12Tu pawh a nei chu an pêk belhchhah ang a, a ngah lehzual ang; a nei lo chu a neih chhun pawh an lâksak ang. #Mt. 25:29; Mk. 4:25; Lk. 8:18; 19:26. 13Chutih avâng chuan an hnênah tehkhin thuin ka sawi a ni; hmu reng chunga an hmuh ṭhin lohva, ngaithla reng chunga an hriat ṭhin lohva, an hriatthiam hek loh nân. 14Isaia hrilhlâwkna thu kha an chungah a lo thleng a nih hi:
‘In ngaithla in ngaithla ang a,
a ngaihna in hre si lo vang.
In hmu in hmu ang a, in hmu fuh si lo vang. #Isa. 6:9,10 (LXX); Mk. 8:18; Jn. 12:39-41; Tirh. 28:26,27.
15He mite thinlung hi a lo chawlawl ta a.
An bengte an chhu chhêt a,
an maimitchhîng bawk a,
Chuti ni lo se, an mitin an hmu ang a.
An bengin an hria ang a,
An thinlungin an hre bawk ang a,
an hawi kîr leh ang a,
Anmahni ka lo tidam tûr,’
a tih ang khân.
16“Nangni mit erawh chu a vânnei e, a hmuh ṭhin avângin; in beng pawh a vânnei e, a hriat ṭhin avângin, #Lk. 10:23,24; Heb. 11:13; 1 Pet. 1:10-12. 17thu dik ka hrilh a che u zâwlneite leh mi fel tam tak pawhin in thil hmuhte hi hmuh an lo châk ṭhîn a, an hmu si lo; in thil hriatte pawh hi hriat an lo châk ṭhîn a, an hre si lo.
Buh chi thehtu tehkhin thu awmzia
(Mk. 4:13-20; Lk. 8:11-15)
18“Chutichuan, buh chi theh tehkhin thu awmzia chu ngaithla rawh u; 19tu pawhin Pathian ram thu chu an ngaihthlâka, an hriatthiam si loh chuan mi sual chu a lo kal a, an thinlunga theh sa chu a chhuhsak ṭhîn. Chûng mi te chu kawnga tlate chu an ni. 20Tin, pialtlêp hmuna tla chu, thu chu ngaithlaa, lâwm taka pawm nghâltu hi a ni; 21mahse, zung a nei lo va, rei lo tê chauh a daih a; thu avânga hrehawmna emaw, tihduhdahna emaw a lo awm veleh a tlu nghâl ṭhîn. 22Hnimhlîngnei zînga tla chu thu chu a ngaithla a; nimahsela, khawvêl lungkhamna leh hausak nawmchenna chuan thu chu a dîp a, rah lovin a awm ṭhîn. 23Lei ṭhaa tla chu, thu chu ngaithlaa hrethiam hi a ni; chumi chu a rah ta ngei a, ṭhenkhat a lêt za te, ṭhenkhat a lêt sawmruk te, ṭhenkhat a lêt sawmthumtein a pung ṭhîn,” a ti a.
Buh lem tehkhin thu
24Tehkhin thu dang an hnênah a sawi leh a; “Vânram chu, mi, a lova chi ṭha thehtu nên chuan tehkhin theih a ni. #Mk. 4:26-29. 25Zânah mi an muthilh vek hlânin, a hmêlma a lo kal a, buh zîngah chuan buh lem a theh a, a kal bo leh ta a. 26Buh chu a lo ṭo va, a vuih hun chuan buh lem chu a lo lang ta a. 27In neitu bawihte chu an lo kal a, ‘Ka pu, i lovah chi ṭha i theh lo vem ni? Buh lem saw khawi ata lo awm nge ni le?’ an ti a. 28Ani chuan, ‘Hmêlmain a lo theh a nih chu,’ a ti a. Bawihte chuan a hnênah, ‘A nih leh, chûng chu va lâwr khâwm mai ila rem i ti em?’ an ti a. 29Ani erawh chuan a chhâng a, ‘Ti lo ve, buh lem in lâwr khâwm zâwngin buh chu in pawt tel hlauh dah ang e. 30Buh seng thlengin ṭo za rawh se; buh seng hunah buh sengtute hnênah, ‘Buh lem chu lâwr khâwm hmasa zet ula, hâl tûrin têl rawh u; buh erawh chu ka buh inah seng lût rawh u,’ ka ti ang e,’” a ti a.
Anṭam chi tehkhin thu
(Mk. 4:30-32; Lk. 13:18,19)
31Tehkhin thu dang a sawi leh a; “Vânram chu anṭam chi fang khat miin a lâka, a lova a theh ang hi a ni. #Mt. 17:20. 32Chi azawnga tê ber a ni a; mahse, a lo ṭhan sân chuan thlai dangte ai chuan a lo lian a, thing a lo ni a; chutichuan, chunglêng savate an lo kal a, a zârahte an riak ṭhîn,” a ti a.
Dawidim tehkhin thu
(Lk. 13:20,21)
33Tehkhin thu dang a sawi leh a: “Vânram chu hmeichhiain dawidim a lâka, chhangphut kho#13:33 kg. 15 vêl dawng a ni. thum khat, zîngah a vaia a fan chhuah vek tûra a phul ang chu a ni,” a ti a.
Isuan tehkhin thu a sawi chhan
(Lk. 4:33,34)
34Chûng zawng zawng chu Isuan tehkhin thu hmangin mipuite hnênah a sawi a, tehkhin thu lovin an hnênah eng mah a sawi lo; zâwlnei hmanga#13:34 Mss ṭhenah ‘Isaia’ tih a tel. sawi kha a lo thlen theihna tûrin:
35“Tehkhin thuin ka kâ ka âng ang a,
Leilung pian tirh ata thil inthup chu ka sawi chhuak ang,” tih hi. #Sam. 78:2.
Buh lem tehkhin thu hrilhfiahna
36Mipuite chu a kalsan a, inah chuan a lût a, a zirtîrte a hnênah an lo kal a, “Lova buh lem tehkhin thu kha min hrilh fiah teh,” an ti a.
37Ani chuan a chhâng a, “Chi ṭha thehtu chu Mihring Fapa hi a ni a, lo chu khawvêl hi a ni. 38Chi ṭha chu Ram fate an ni a, buh lem erawh chu mi sual fate an ni; hmêlma, buh lem thehtu chu Diabola a ni. 39Buh seng chu khawvêl tâwp hun#13:39 Mss ṭhenkhatah ‘tûn hun tâwp’ tih a ni. tûr a ni a, a sengtute chu vântirhkohte an ni. 40Tichuan, buh lemte chu an la khâwm a, meia an hâl ang hian khawvêl tâwpah chuan a la awm ang. 41Mihring Fapa hian vântirhkohte a tîr chhuak ang a, a ram ata mi titlu thei zawng zawng leh thil sual titu zawng zawng an thiar chhuak ang a,#Mt. 24:31. 42rawhtuina meiah an paih ang; chutah chuan an ṭap ang a, ha an ṭhial ang. #Mt. 13:50; 22:13; 25:30. 43Chumi hunah chuan mi felte chu an Pa ramah chuan ni angin an êng tawh ang. Ngaihthlâkna beng nei chuan ngaithla ngun rawh se.
Ro phûm rûk tehkhin thu
44“Vânram chu lova ro phûm rûk ang a ni; chu chu miin a hmu a, a chhilh leh a, lâwm êm êmin a kal a, a neih zawng zawng a va hralh a, lo chu a lei ta a.
Tuikeplung hlu tak
45“Vânram chu sumdâwng mi, tuikeplung ṭha tak zawngtu ang chu a ni leh a; 46ani chuan tuikeplung hlu tak pakhat a hmu a, a neih zawng zawng a va hralh a, a lei ta a.
Lênkhang tehkhin thu
47“Vânram chu lênkhang, tuipuia zâr, sangha chi tinrêng fûn khâwmna ang chu a ni bawk. 48Chu chu a khah veleh vaukamah an hnûk chhuak a, an ṭhu a, a ṭha zawng bâwmah an dah khâwm a, a chhia erawh chu an paih a. 49Khawvêl tâwpah chutiang bawkin a la awm ang. Vântirhkohte an lo chhuk ang a, mi fel zîng ata mi sualte chu an hlîr ang a, 50rawhtuina meiah chuan an paih ang; chutah chuan an ṭap ang a, ha an ṭhial ang.
Thil hlui leh thil thar
51“Chûng zawng zawng chu in hrethiam em?” a ti a. Anni chuan “Hrethiam e,” an ti a. 52Ani chuan an hnênah, “Chuvângin, Dân zirtîrtu, vânram thu zir tawh apiang chu, in neitu, a robâwm ata thil hlui leh thil thar phawrh chhuaktu ang hi a ni,” a ti a.
Nazaret-ah Isua a hnawng
(Mk. 6:1-6; Lk. 4:16-30)
53Isuan chûng tehkhin thu chu a sawi zawhin chuta ṭang chuan a kal ta a. 54An khua chu a lo thleng a, an sunagog-ah chuan anmahni a zirtîr a; tichuan, mak an ti hle a, “He mi hian he finna leh hêng thil mak tihtheihna hi khawi ata nge a hmuh? 55He mi hi mistiri fapa kha a ni lo vem ni? A nu pawh Mari an tih kha a ni lo vem ni? A unaute pawh Jakoba#13:55 Mss ṭhenkhatah ‘Johana te, Josia te’ tih a ni zâwk. te, Josefa te, Simona te, Juda te kha an ni lo vem ni? A farnute pawh kan zîngah an awm vek lo vem ni? 56Hêng zawng zawng hi khawi aṭanga a hriat nge?” an ti a. 57Amah chu an hmu thiam ta lo va. Isuan an hnênah, “Zâwlnei chu ama khaw lamah leh a chhûngte zîngah lo chuan an chawimawi ṭhîn,” a tihsan a. #Jn. 4:44. 58An rin loh avângin chutah chuan thil mak a ti tam lo.
موجودہ انتخاب:
MATHAIA 13: MIZCLBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.