Li Santil Musikꞌej quixye re laj Felipe: —Ayu, jilon chixcꞌatk li carruaje aꞌan, chan. Quijiloc laj Felipe ut quirabi nak li cui̱nk yo̱ chirilbal xsaꞌ li hu li quixtzꞌi̱ba li profeta Isaías. Laj Felipe quixpatzꞌ re: —¿Ma nacatau ru li yo̱cat chirilbal? chan re. Ut li cui̱nk quixye: —¿Chanru nak tintau ru cui ma̱ ani junak ta̱cꞌutuk lix ya̱lal chicuu?— Ut quixtzꞌa̱ma chiru laj Felipe nak ta̱takekꞌ saꞌ li carruaje ut ta̱cꞌojla̱k chixcꞌatk.