ମାର୍‌କ 6 سے مشہور بائبلی آیات

شئیر

ମା'ଏନ୍‌ବକ୍‌ ଅବୁଦି ରେମଲେ ଉଇ ଇ'ଡେଂକୁସା' ଜିସୁନା ସିସ୍‌ୟଲେ ସୁସୁମ୍‌ପୁଲେଇସା ଉଇ ଆଗଂତା ଡେଂକୁ । ସା' ଜିସୁଲା ଆମା'ଏ ସୁନ', “ଡ ଜାଏସା ମଡୁକୁବକ୍‌ ଉଇସେ'ଗା ଇ'କି ପୁନ୍‌ଲାନେଇ'” ଡ'ସେକ୍‌ ସୁନ' ।

ଜିସୁଲା ଆରେମଲେ ସୁନ' “ଜାଏସା ମୁଇନ୍‌ଡା ବାବବାଦି ଡୁକୁନା ଆମାଇ ମାଇନା ନିଜର୍‌ନା ଉଂଗମ୍‌ରେମ୍‌, ନିଜର୍‌ କୁଲ୍‌ନା ରେମଲେ ମାରି ନିଜର୍‌ନା ଡିଂଅଁନ୍‌ରେମ୍‌ସା ବଲ୍‌ ଆମାନ୍‌ତା । ମାତର୍‌ ପାଲ୍‌ ଉଂଗମ୍‌ବକ୍‌ ଉଇସେକ୍‌ ସୁନ'ନା ମା'ଏ ବଲ୍‌ ମାନ୍‌ତା” ଡ'ସେକ୍‌ ସୁନ' ।

ଜିସୁଲେ ଡଂଗାକୁରୁଂ ତୁତୁର୍‌ବେଲା ଜୁଲ'ସା' ଅବୁଦି ରେମଲେ ଆତା ରୁନ୍‌କୁଗା' । ସା' ମାଇ ଆମା'ଏ ଆଗୁଲାଇର ଜୁଲ'ସା' ମା'ଏ ଗୁଗୁଇ'ରେମ୍‌ ମଡୁକୁବକ୍‌ନା ମେନ୍‌ଡାଲେସୁଗ ବିବିକ୍‌ ଲୁଲାଇଁକୁଗା'ସା' ଜିସୁଲା ଅବୁଦି ଲିବିସୁପ୍‌ଗା' । ମାରି ଆମା'ଏ ମାପ୍‌ରୁନା ତୁମ' ଅମାଗ' ।

ଡୁ'ତୁନ୍‌ସା' ମାଇ ଆତା କାବାକାବା ଡିନ୍‌ଡେମ୍‌ବାଇ'ନା ମାଏସା କାମ୍‌ ଡିନ୍‌ଡେମ୍‌ ଆଗଂତା । ଆ'ଇରସୁଗ ସି ରେମ୍‌ବକ୍‌ଉ ମାଇନା ତିତିବୁରଂ ଆଲାମ'ସେ'ଗା ବଲ୍‌ ଡିନ୍‌ଡେମ୍‌ ଗଂକୁ । ମାରି ରେମଲେ ଆମାଇ ବିସ୍‌ବାସ୍‌ ଆଡେମ୍‌ତସା' ଜିସୁଲା କାବା ଡେଂଉଇଗା' । ତିର୍‌ଗି' ଜିସୁଲା ପାଲ୍‌ପାଲ୍‌ ଉଂଗମ୍‌ବକ୍‌ ବୁଲ୍‌ଲ' ବୁଲ୍‌ଲ'ସେ'ଗା ମାପ୍‌ରୁନା ତୁମ' ଅମାଗ' ।

ସା' ଜିସୁଲା ଗୁତୁନ୍‌ ପାଁନ୍‌ସ୍‌ଟା ରୁଟି ମାରି ଇମ୍‌ବାରୁ ଆ'ଡଂ ତିତିବକ୍‌ ସକ୍‌ସେକ୍‌ ସରଗ୍‌ବକ୍‌ ତାଂଡାୟ'ସେକ୍‌ ଆମାପ୍‌ରୁ ସୁନ୍‌ଡ୍‌ରଗା' । ସୁନ୍‌ଡ୍‌ରକ୍‌ସେ'ଗା ମାଇନା ତିତିବୁରଂ ପାଁନ୍‌ସ୍‌ଟା ରୁଟି ସେତୁଗ'ସେକ୍‌ ଆଗୁଲାଇର ବାନ୍‌ଟାଲ'ବେ' ଡ'ସେକ୍‌ ଆମାଇନା ସିସ୍‌ୟଲେ ବେଡ' । ଗୁତୁନ୍‌ ଆ'ଡଂସା ଡୁ'ତୁନାଉ ବାନ୍‌ଟାଲ'ବେ' ଡ'ସେକ୍‌ ବେଡ' । ସା' ମା'ଏ ଗୁଲାଇର ବୁସୁପନ୍‌ତେକ୍‌ ସୁମ' । ମାରି ଲଲ'କୁନୁଂ ଗୁତୁନ୍‌ ରୁଟି ମାରି ଆ'ଡଂ ଗୁଲାଇ ଜୁକ୍‌ଜୁଗ'ସା' ବାରଟା ଡାମୁଂ ଡେଂଗା' ।